“Mu kusamba, kana kutumbula o izwelu imoxi mu ithangana yoso.”—Matesu 6:7, nwt.

Jihova kamesena kwila tubhitulula omisambu yalakyá mumitwe yetu mba yala mudivulu dyamisambu. Muveji dya kiki, mwene wamesena kwila, o izwelu yetu itunda kumuxima. Kyebhi kiweji divwa se kambadyé mukuzwela neye o izwelu yenye imoxi izuwa yoso? Omakamba ambote azwela ni kidi kyoso yoso yala kumuxima. Kyoso kitusamba kwa Tata yetu mu izwelu yetu, tulondekesa kwa mwene kwila, dikamba dyetu.

“Kyoso ki mubhinga kima kwa Nzambi, enu kimukitambula mukonda mukibhinga phala kubhanga nakyu ima yayibha.”—Tiyaku 4:3, nwt.

Mukidi, kitutena kukingila kwila, Nzambi utambwijila omisambu yetu, se okima kitwamubhinga mwene kakiwabhela. Mukifika, okwila Jihova wejitambwijila omusambu wamuthu ubhinga phala kunganyala owadi mba joko mu ipeteka yawanga se Mwene wadimunakyá kwila, wazembe olwimbi ni ima yalungu ni wanga? (Izaya 65:11; Luka 12:15) Kitutena kukingila kwila, Jihova utambwijila omusambu yú! Phala Nzambi kwivwa omisambu yetu, o ima itubhinga yatokala ilunga ni ima izwela o Bibidya.

 “Woso o mátwi mê u ma landukisa, ngwayê kubatekela mu kwivwidila o ngonge, katé ngó ni musambu wê, u kituka kisunji kya ibha kwa Ngana!”—Jisabhu 28:9.

Mu ukulu, Nzambi kakexile mutambwijila omisambu ya athu kexile mubelesela o itumuyê. (Izaya 1:15, 16) Mwene kalunguluka. (Malakiya 3:6) Se twamesena kwila Nzambi utambwijila omisambu yetu, twabhingi kubelesela o itumuyê kumwenyu wetu. Abha se twabhange ima yayibha mu ukulu? Okwila kiki kilombolola kwila, Jihova nuka dingi wandakwivwa omisambu yetu? Kana, kikyene! Muhendayê Nzambi utuloloka se tweha o ima yayibha, anga tubhanga o ima yamuwabhela.—Ikalakalu 3:19.