‘Eye u mukwa kwívwa o misambu, ko kwé kwene ku bhongolokela o xitu yoso.’—Jisálamu 65:2.

Sayi athu asamba mukonda ene ambakwila, kubhanga kiki kwabhangesa kudivwa kyambote, sumbala abanza kwila, seku muthu wamwa evwa. Maji omusambu ki utubhangesangó kudivwa kyambote, mba kudibhana ni ibhidi. O Bibidya itudyelelesa kwila, “Jihova * wa zukama kwa yó a dikola kwa mwene, oso a dikola kwa mwene mu kidi. . . . wívwa nzongo yâ, ya kudikola.”—Jisálamu 145:18, 19.

Etu tutena kudyelela kwila, Jihova Nzambi uvwa omisambu yajiselevendejê. Ni henda yoso, mwene wambe: “Kyenyokyo mwa-nda kwà di kola kokwami, anga muya, mu ngi sambela, eme ngá kà m’ivwa.”—Jelemiya 29:12.

“Kolokotenu mu kusamba, ki mu bhwile.”—Loma 12:12.

O Bibidya Ituswinisa: “Sambenu jinga” ni “kudyonda mu ithangana yoso.” Sekuphata, Jihova Nzambi wamesena kwila tusamba kwa mwene.—Matesu 26:41; Efezu 6:18.

Mukonda dyihi Nzambi wamesena kwila, tusamba kwa mwene? Xinganeka: Otata usanguluka kyoso monê kyamubhinga kikwatekesu. Mukidi, otata nange wejiiyakyá okima kyabhindamena monê mba wejiyakyá kyebhi kyamudivwa. Maji kyoso mwene kyevwa monê kumubhinga kikwatekesu, kyandalondekesa kwila, omonê wamudyelela, wamesena kumuzukama. Kyene kimoxi we, kyoso kitusamba kwa Jihova Nzambi, tulondekesa kwila, twamudyelela, twamesena kumuzukama.—Jisabhu 15:8; Tiyaku 4:8.

“Hele yenu yoso xilenuyu Nzambi, mukonda mwene wene mumilanga.”—1 Phetele 5:7, nwt.

Nzambi wamesena kwila, tusamba kwamwene mukonda watuzolo, utulanga. Mwene wejiya o ibhidi yetu yoso ituthandanganyesa, yuwamesena kutukwatekesa.

Kumwenyu woso, Sobha Davidi wasambele kwa Jihova Nzambi phala kumukwatekesa ni kumutangela o ibanzeluyê ni kyebhi kyexile mudivwa. (Jisálamu 23:1-6) Kyebhi Nzambi kya divu mu ima yabhangele Davidi? Nzambi wazolele Davidi, watambwijila o misambuyê yoso. (Ikalakalu 13:22) Kyene kimoxi we, Nzambi wivwa o misambu yetu mukonda watuzolo.

Yiyi izwelu yamusoneki wa Bibidya, wadivulu dya jisalámu. Mwene wejidile kwila, Nzambi wevwile omisambuyê, wamukwatekesa luwavulu. Mwene wadivwile kwila, wazukamene kwa Nzambi, yuwazange ngunzu phala kudibhana ni ibhidi kumwenyu.—Jisálamu 116:1-9.

Kyoso kitudyela kwila Nzambi wivwa omisambu yetu, kitukolokotesa mukusamba kwa mwene. Tala omusoso wa Phetele watungu kutunda dya Espanha. O monê wa 19 dya mivu wafu kukilwezu. Ni ndolo yoso yiyi, Phetele wajikula o muximawê kwa Nzambi, mwene wasambe kyavulu, phala Nzambi kumuswinisa ni kumubhana nguzu. Ihi yabhiti? Phetele wambe: “Jihova watambwijila omisambu yami mukungibhana nguzu bhukaxi kamuhatwami ni bhukaxi kajiphange mukilunga.”

Sumbala omisambu ki ibhangesa omona Phetele kuvutuka kumwenyu, maji o misambu yakwatekesa kyavulu Phetele ni mwijiwê. O muhatwê Madiya Carmen wambe: “Omisambu yangikwatekesa kukolokota mudilamba dyami. Eme ngejidile kwila, Jihova wangijiya, mukonda dya kiki, kyoso kingexile musamba kwamwene ngexile mutululuka.”

Kikale o Bibidya, ni ima ibhita kumyenyu ya athu, ilondekesa ni kidi kyoso kwila, Nzambi wivwa omisambu yetu. Maji kiki kikilondekesa kwila, Nzambi wivwa omisambu yoso. Mukonda dyahi Nzambi katambwijila omisambu yoso?