O kwila kuxinganeka kiki kituxi? Kana! O Bibidya i tu tangela kwila, Nzambi wa tu bhange ni vondadi ya kukala ni mwenyu wa kalela-ku. (Ndongixi 3:11) Di zwela we kwila “Nzambi henda.” (1 Nzwá 4:8) O kwila ki bhonza phala Nzambi wa tu bhange ni ­hanji ya kukala ni mwenyu ki wa kabhwa, kukumbidila o kikanenu kyê kya lungu ni mwenyu wa kalelaku?

Se-ku muthu wa mesena o kufwa. O Bibidya i zwela kwila o kalunga “nguma.” (1 Kolindu 15:26) Amoxi a fwa mu undenge; amukwá a laleka mu ­kufwa. Maji etu enoso twa-nda fwa. Athu avulu, kyoso kya banza yalungu ni kufwa a kala ni wôma. O kwila o kalunga ka-nda bhwa? O kwila kiki kya-nda bhita mwene?

O kwila weji diwana mu kwijiya kwila, Nzambi ka bhange o athu phala kufwa? O divulu dya dimatekenu dizwela ya lungu ni vondadi ya Nzambi ya kwila, o athu a kala ni mwenyu wa kalelaku mu ixi. Jihova Nzambi wa bhange o ixi ni ima yoso yeji bhindamena o athu phala na sanguluke ku mwenyu. Mu kiki-phe, wa bhange o diyala dya dyanga, Adá, yu wa mu tula mu palayízu, a ixana njaludim ya Edene. Mu kusuluka, “Nzambi anga u mona ima yoso ya yudika! ima ya wabha mwene kyavulu.”—Dimatekenu 1: 26, 31.

Adá a mu bhange se kituxi, a mu bhange mu kidifwanganu kya Nzambi. (Matendelelu 32:4) O muha­tu wa Adá, Eva, wexile we muthu wa yuka mu ukexilu woso, mu mukutu ni mu kilunji. Jihova anga wa ambela wixi: “Vwalenu, mu sokoloke, mu izalese ixi yoso, mu i tolole; mu tumine we jimbiji jendela mu menya, ni jinjila ji bhita bhulu, ni yama yoso ya mwenyu yendela ku mavu.”​—Dimatekenu 1:28.

Phala kwizalesa o ixi ni twana, kweji bhinga kithangana kyavulu. Eva weji vwala twana, o twana tutu tweji vwala we katé kyeji zalesa o ixi kala kya mesenene Nzambi. (Izaya 45:18) O kwila kima kyambote kuxinganeka kwila, Jihova weji bhana ngó kwa Adá ni Eva kithangana kya kumona o twana twê ni alawula kwabhu, se kwijiya ihi yeji bhita ku hádya?

Xinganeka we ya lungu ni kikalakalu kya kutumina o yama. Adá a mu tumu kuluka o majina ku yama, kweji bhinga thembu yavulu. (Dimatekenu 2:19) Maji phala kutumina kyambote o yama, kulombolola kwila mwene wa tokalele kwijiya kyambote o ukexilu wa yama ni kyebhi kyeji ku i langa. Kubhanga kiki kweji bhinga kithangana kyavulu.

O itendelesu ya Nzambi ya lungu ni kwizalesa o ixi ni kutuma o yama, ilondekesa kwila o dikaza dya dyanga a a bhange phala kukala ni mivu yavulu ku mwenyu. Mu kidi, Adá wexile ku mwenyu mu mivu yavulu.

O Bibidya ilondekesa kwila o athu mu ukulu a nangenena dingi ku mwenyu mu izuwa ya lelu ndenge. Yene yamba: “Izuwa yoso ya Adá mu ngongo, anga i tena 930 a mivu.” Ilondekesa we mayala a samanu exile ku mwenyu mu 900 a mivu ndenge! O majina mâ enyá: Sethe, Enoko, Kayinane, Jalede, Matúzala, ni Nowé. Mayala oso yá, exile ku mwenyu ande dya Diluvyu mu izuwa ya Nowé. Nowé wexile ku mwenyu 600 ya mivu ande dya Diluvyu kubhixila (Dimatekenu 5:5-27; 7:6; 9:29) Kyebhi ene kya tena kukala ku mwenyu mu mivu yoso yiyi?

O mayala oso yá, a a vwalela mu kithangana kyoso Adá ni Eva kya texi o kuyuka kwâ. Nange kiki kyene kya a bhangesa kukala ku mwenyu mu mivu yavulu. Kyebhi o kuyuka kwa lungu ni kithangana kya mwenyu wetu? O kalunga a-nda ku ka tolola kyebhi? Phala kutambwijila o ibhwidisu yiyi, kya dyanga twa tokala kwijiya se mukonda dyahi twa mu kuka ni kufwa.