O Ndolo Ijila Mukonda Dya Kalunga
XINGANEKA kwila eye wa mu tala vidyu ya muthu mukwa fuma, nange ngimbidi, eye u mu ximana kyavulu. O vidyu i mateka ni kulondekesa o ima ya lungu ni undenge wê, kyebhi kya mateka o kwimba, ni kithangana kya bhange phala kudilonga o kuxika. Mu kusuluka eye u mona wa mu kwimba bhu pholo ya mundu, kwenda mu jixi javulu. U kituka muthu wa fuma katé ni mu jixi ja makanga. Maji mu kubhita tu ithangana, eye u mona o jifoto ji londekesa o ukukilu wê. kyoso vidyu ki iya ni kubhwa, mwene ufwa.
O musoso yu musoso wa kidi, wa bhiti ni muthu kala dingi ku mwenyu. Ne mwene se o muthu ngimbidi ya fuma, ngijiye, mukwa kujokala mba muthu a mwijiya kyambote, o musoso yú u tena we kubhita ni muthu woso-woso. O muthu nange wa bhangele ima yavulu ya wabha, maji xinganeka mu ima yeji bhanga dingi se mwene ka kukile, mba kafwile.
Tu tena kuluwala mu kuxinganeka mu ima yiyi, maji yene ya-nda bhita n’etu. (Ndongixi 9:5) Sumbala ni nguzu yoso i tu bhanga, etu ki tu tena kulenga o kukuka ni kalunga. Ku mbandu ya mukwa, tu tena kufwa, mukonda dya uhaxi mba kilwezu kyoso-kyoso ki moneka ku mwenyu. Kala ki tanga o Bibidya, etu twala kala o “mbundu, i moneka ngó kathangana kofèle, kindala-phe ya jimuka ku mesu!”—Tiyaku 4:14.
Sayi yá, a banza kwila o mwenyu ki wala ni valolo, mu kiki akayela o kixinganeku kya kwila ‘tu dyetu, tu nwetu, kuma mungu twa-nda fwa.’ (1 Kolindu 15:32.) O athu ala ni ixinganeku yiyi, mukonda ejiya kwila mu kithangana kyoso-kyoso a tena kufwa, ni kwila ene kala ni kidyelelu kya lungu ni hádya. Kupholo dya kwenda—benge-benge kyoso ki ku moneka uhaxi wa bhonzo—eye u tena ku di bhwidisa, ‘O kwila yú wene ngó o mwenyu u twa dyelela?’ kwebhi ku u tena kusanga o kithambwijilu?
Athu avulu a dyelela kwila o jingijiye ene a-nda tambwijila o kibhwidisu kiki. O jingijiye ni jidotolo ené mu sanga ima yavulu i bandekesa dingi ithangana ku mwenyu wa athu. Sayi jingijiye a mu bhanga nguzu yavulu phala o athu a tene ku nangenena ku mwenyu. Né mwene se o jingijiye a mu ditunda kyambote mba kana, o kibwidisu kinangenena kyeniki: Mukonda dyahi twene mu kuka ni kufwá? O kwila tu tena ku dyelela kwila o nguma yetu o kalunga, wa ka bhwa? O milongi ya-nda kayela ya-nda zwela ya lungu ni maka yá, ni ku tambwijila o kibhwidisu kiki: O kwila yú wene ngó o mwenyu u twa dyelela?
Eye Nange Wandawabhela we o Maka Yá
O MULANGIDI
O Athu a Bhanga Nguzu Phala Kukala ni Mwenyu u Nangenena
Sayi jingijiye akwa ku di longa o idyandu ya mukutu a mu bhanga yoso phala kwijiya se ihi i bhangesa o ku kuka. O kutokwesa kuku, kwene mu bhekela ihi?
