Mu milongi yenyoyo, twadilongo kwila kwala maka abetakota alungu ni athu oso mu ixi ni jianju ku dyulu. O maka enya, o kuzelesa o dijina dya Jihova. O ungana wa Jihova —kifwa, o maka alungu ni ukexilu wa Jihova wa kutumina —alungu ni kuzelesa o dijina dye. Kyene we kimoxi, o maka alungu ni ufiyele wa athu kwa Nzambi, alungu we ni kuzelesa o dijina dya Jihova.

Mukonda dyahi kindala twa muzwela kyavulu kwila, o maka alungu ni dijina dya Jihova, ni kwila atokala kudizelesa? Tumone ima itatu.

Kya dyanga, mu njaludim ya Edene Satanaji waxidisa o dijina dya Jihova. Mu kibhwidisu kyabhange Satanaji kwa Eva, mwene walondekesa kwila Jihova ki mukwa kubhana ni kwila o itendelesu yabhana kwa Adá ni Eva ki yexile yambote. Mu kusuluka, Satanaji wambe kwila Nzambi mukwa makutu. Kyenyiki mwene waxidisa o dijina dya Jihova. Mwene wa kituka “Dyabhu,” kilombolola “mukwa makutu.” (Nzw. 8:44) Mu kuxikina mu makutu a Satanaji, Eva wa bhukumukina Nzambi, mu kubhanga kiki walondekesa kwila kamesenene kuma Jihova ukala mutumini we. (Dim. 3:1-6) Kate lelu, Satanaji wa muxidisa o dijina dya Nzambi, mu kumwanga makutu alungu ni Jihova. O yo axikina mu makutu enya ene mu bhukumukina Jihova. Maji o mundu wa Nzambi, amona kwila o kutanga makutu alungu ni dijina dikola dya Jihova, kima kyayibha kinene. O mundu lelu wezala ni kuyibha ni hadi mukonda dya kuxidisa o dijina didi.

Kyakayadi, phala o mbote ya ibhangelu ye yoso, Jihova wanda zokela o dijina dye, mu kudizelesa ku makutu oso. Kiki kima kyakatunda phala Jihova. Mukonda dya kiki mwene wambe: “Eme-phe nga-nda kukôlesa o dijina dyami dyonéne.” (Ize. 36:23) Jezú walondekesa kyebhi o kima kya beta kota, kyatokalele kutumbula o jiselevende joso ja Jihova mu misambu, kyoso kyambe: “Dijina dyé adizelese.” (Mat. 6:9) Mu veji javulu o Bibidya ilondekesa o valolo ya kujingisa o dijina dya Jihova. Tala o ifika ya kayela: “Bhanenu Nzambi o fuma ni kijingu kya fwama o dijina dyê.” (1 Mal. 16:29; Jisá. 96:8) “Imbenu, mu kutumbula o dijina dyê.” (Jisá. 66:2) “Ngi jingisa jinga o dijina dyé, katé ku hádya ni hádya.” (Jisá. 86:12) Sayi kithangana Jihova wazwela tunde ku dyulu. Kiki kyabhiti kyoso Jezú kyexile mu tembulu mu Jeluzaleme, yu wambe: “Tata, jingisa o dijina dyé.” Jihova, wa mutambwijila: “Eme nga dijingisa kyá, nganda dijingisa dingi.”—Nzw. 12:28. a

Kya katatu, o vondadi ya Jihova yanda lunga jinga ni dijina dye. Xinganeka: Kyoso kyandabhwa o polova ya sukina, ku disukilu dya Utuminu wa Midi ya Mivu wa Kidistu, ihi yandabhita? Kyebhi kyanda divwa o jianju ni athu yalungu ni dijina dya Jihova mu kithangana kyenyokyo? Phala kutukwatekesa  kutambwijila, tu lembalale o ima iyadi yabeta kota mu maka enya —o ufiyele wa athu ni ungana wa kutumina o ngongo. O kwila o athu ene mu belesela Nzambi, andabhinga kusuluka mu kudibhana ni kibhidi kya kuzokela o ufiyele wa? Kana. Ene andakala athu ayuka, azubha kya ku alola. Anda tambula kya o mwenyu wa kalelaku. Ki kwandabhinga we dingi kulondekesa se o ukexilu wa Jihova kutumina wene wa beta kota mba kana. Mukonda, mu kithangana kyenyokyo, enyoso kudyulu ni mu ixi andakala ni muxima umoxi, anda xikina we Jihova kala nguvulu ya. Abha, ihi itwamba yalungu ni dijina dya Jihova?

Mu kithangana kyenyokyo, athu oso anda kwijiya o kidi kyalungu ni dijina dya Jihova, ni kwila anda dizelesa ku makutu oso. Maji, o dijina dya Jihova dyanda suluka mu kukala o kima kya beta dingi kota phala o jiselevende je joso. Mukonda dyahi? Mukonda ene anda mona Jihova kusuluka mukubhanga ima ya katunda. Xinganeka: Kuma Jezú ni kulenduka kwoso wanda vutula o utuminu kwa Jihova, kyenyiki Nzambi wanda kala “Ngana ya athu oso.” (1 Ko. 15:28) Mu kusuluka, o athu mu ixi anda tambula o “ufolo wafuma ya an’â Nzambi.” (Lom. 8:21) Jihova wandazubha mu kukumbidila o vondadi ye, ya kubhangesa kwila o an’e oso ku dyulu ni mu ixi, akala mwiji umoxi ngo.—Efe. 1:10.

Ku disukilu dya ima yoso yiyi, kyebhi kyanda divwa o mwiji wa Jihova ku dyulu ni mu ixi? Ni kidi kyoso, twandakala hanji ni vondadi yavulu ya kuximana o dijina dya Jihova. O mukwa jisálamu Davidi wa soneka: “Jihova Nzambi a taneku . . . A ximane dijina dyê dikola, kate ku hadya ni hadya.” (Jisá. 72:18, 19) Twanda suluka mu kuximana o dijina dya Jihova kate ku hadya ni hadya.

O dijina dya Jihova dilombolola yoso yalungu ni mwene. O dijina didi di tu lembalesa bengebenge o henda ye. (1 Nz. 4:8) Etu twanda suluka mu kulembalala jinga o henda yatulondekesa Jihova, mu kutubhanga ni kutubhana o sata ya kukula. Twanda lembalala jinga we kwila Jihova utumina mu ukexilu wa yuka ni henda. Twanda suluka jinga mu kumona o henda ya Jihova kokwetu kate ku hadya ni hadya. Ku mwenyu wetu woso, twanda zukama kwa mwene kala Tata yetu ni kwimba mimbu ya kiximanu ku dijina dye.—Jisá. 73:28.