1. Mukonda dyahi akwa Babilonya a diwana ni polofeta Daniyele?

 O POLOFETA Daniyele wexile munzangala kyoso kya mwambata ku Babilonya kala pelezu, dikanga dya ixi ye. Maji sumbala wexile munzangala, o masoladi a Babilonya amumono mu ukexilu wengi. Ene amono kwila Daniyele wawabhele o pholo, wexile njimu ni kwila watokalele ku mwiji wa athu akwa ujitu. (1 Sam. 16:7) Mukonda dya kiki, o akwa Babilonya a mulongo phala kusidivila mu inzo ya Sobha. —Dan. 1:3, 4, 6.

2. Jihova wexile mudivwa kyebhi yalungu ni Daniyele? (Izekiyele 14:14)

² Jihova wazolele Daniyele, ki mukonda dya kuwabha o pholo mba dya ujitu wexile nawu mu inzo ya Sobha, maji mukonda dya ukexilu wa mwenyu wa solele o munzangala yu. Mu kidi, kyoso Jihova kyazwela kwila Daniyele wexile kala Nowé ni Jobe, nange mwene wexile ngo ni 20 a mivu. Kyenyiki ku mesu ma Jihova, Daniyele wexile muthu wayuka mu wendelu we kala Nowe ni Jobe, exile athu a musidivile ni ufiyele woso mu mivu yavulu. (Dim. 5:32; 6:9, 10; Jobe 42:16, 17; tanga Izekiyele 14:14.) Jihova wasuluka mu kuzola Daniyele mu izuwa yoso ya mwenyu we.—Dan. 10:11, 19.

3. Ihi itwanda mona mu milongi yiyi?

³ Mu milongi yiyi, twanda dilonga idifwa iyadi ya Daniyele ya bhangesa Jihova kumuzola kinene. Kyadyanga, twanda jimbulula o kidifwa ni kumona se mu ithangana yebhi kya kilondekesa. Mu kusuluka, twanda mona ihi yakwatekesa Daniyele kukala ni idifwa yiyi. Mu kusukaku, twanda mona kyebhi kitutena kukayela o phangu ye. Sumbala o milongi yiyi a isoneka phala o minzangala, etwenyoso tutena kudilonga ni phangu ya Daniyele.

4. Kyebhi Daniyele kya londekesa kuswina? Bhana phangu.

⁴ O athu a swina atena kukala ni woma, maji ene kehela kwila o woma wa afidisa kubhanga o kima kyatokala. Tala ithangana iyadi kya londekesa o kidifwa kiki. Kyadyanga kyabhiti nange mivu iyadi kupholo kyoso akwa Babilonya kyabhwika o mbanza ya Jeluzaleme. O Sobha ya Babilonya Nabukodonozolo, waloto nzoji ikwatesa woma yalungu ni kiteka kyonene. Mwene wambe kwila weji jibha o jinjimu joso, kate mwene ni Daniyele, se a lembwa kumutangela o nzoji ni dilombolwelu dye. (Dan. 2:3-5) Daniyele wabhingile kulenguluka, se ka kibhangele, avulu eji fwa. Mwene ‘wayi mu zwela ni sobha; yu wamubhingi, wixi: Ngi bhane kithangana, nda ngi ku jimbwile nzoji yê.’ (Dan. 2:16) Phala kubhanga kiki kwabhingile kuswina ni kixikanu. Mu Bibidya ki mwala mbandu izwela kwila Daniyele wajimbulwile kya jinzoji m’ukulu. Mwene wabhingi ku makamba me—exile ni majina a akwa Babilonya, Sadalake, Mizake ni Abede-neko—‘phala a dyonde o henda ya Nzambi ya dyulu, yalungu ni kikutu kiki.’ (Dan. 2:18) Jihova watambwijila o misambu ya. Ni kikwatekesu kya Nzambi, Daniyele walombolola o nzoji ya Nabukodonozolo. Daniyele ni makamba me ka ajibha.

5. Mu kithangana kyebhi Daniyele wabhingile dingi kuswina?

⁵ Mu kubhita kithangana kyoso Daniyele kya jimbulula o nzoji yalungu ni kiteka kyonene, o kixikanu kye kyolole dingi. Nabukodonozolo waloto dingi nzoji yamukwa ikwatesa woma. O nzoji yiyi yalungile ni muxi wonene. Ni kuswina kwoso Daniyele wajimbulula o nzoji ya sobha, kate mwene ni njimbu ya kwila o sobha weji saluka, ni kubhita ithangana sé kutumina. (Dan. 4:25) O sobha weji tena kumona Daniyele kala nguma ni kumujibha. Maji Daniyele walondekesa kuswina, yu walombolola o nzoji.

6. Nange ihi yakwatekesa Daniyele kukala muthu waswina?

⁶ Nange ihi yakwatekesa Daniyele kukala muthu waswina ku mwenyu we woso? Tutena kuxikina kwila o jitata ja Daniyele exile phangu yambote phala mwene kyoso kyexile mon’a ndenge. Ene a belesela o itendelesu yabhanene Jihova ku jitata akwa Izalayele, ya a  longo o Mak’a Nzambi kwa mon’a. (Mate. 6:6-9) Daniyele kejidile ngo o Dikwinyi dya Ijila maji we ni ima yavulu yamukwa. Mu kifika, mwene wejidile se ihi ya tokalele kudya ni ihi ka tokalele ku idya ku akwa Izalayele. b (Iji. 11:4-8; Dan. 1:8, 11-13) Daniyele wejidile we o musoso wa mundu wa Nzambi ni ihi yabhitile ni ene kyoso kya bhukumukina Jihova. (Dan. 9:10, 11) O ima yabhiti ku mwenyu we, yamudyelelesa kwila kabasa kibhidi kyeji dibhana nakyu, Jihova ni jianju Je, eji mukwatekesa.—Dan. 2:19-24; 10:12, 18, 19.

7. Ihi dingi ya kwatekesa Daniyele kukala ni kuswina? (Tala we ofoto.)

⁷ Daniyele wadilongo o mikanda ya jipolofeta ja Nzambi, kala o ikanenu ya polofeta Jelemiya. Mu kubhanga kiki, Daniyele watendela kwila o kithangana kya ubhika wa Jijudé ku Babilonya kwakambele ngo bhofele kyejibhwa kya. (Dan. 9:2) O kumona o ikanenu ya Bibidya kudikumbidila, se phata kyakolesa o kidyelelu kya Daniyele kwa Jihova. Oso phe ala ni kidyelelu kya kolo kwa Jihova, a tena kuswina kyavulu. (Sokesa Loma 8:31, 32, 37-39.) O kya beta dingi kota, Daniyele wexile musamba kyavulu kwa Tat’e ya dyulu. (Dan. 6:10) Mwene wafisala o ituxi ye kwa Jihova, yu wamutangela kyebhi kyexile mudivwa. Daniyele wabhingile we kikwatekesu. (Dan. 9:4, 5, 19) Mwene wexile muthu kala etu, ka muvwala kya ni kuswina. Muveji dya kiki, mwene weza mu kukala ni kidifwa kiki mu kudilonga, mu kusamba, ni mu kudyelela kwa Jihova.

8. Kyebhi kitutena kukala ni kuswina?

⁸ Phala kukala ni kuswina, ihi i twabhingi kubhanga? O jitata jetu a mesena kwila tu kala tu athu a swina, maji ene ka tena kutubhitisa o kudifwa kiki kala undundu wa mwiji. O kukala ni kuswina kwedi kala o kudilonga ufunu. Ukexilu umoxi wa kukala hete mu ufunu yu, o kutonginina kyambote kyoso o mulongexi kyaya ni kukalakala, ni kukayela o phangu ye. Kyene kimoxi we, tutena kukala ni kuswina, mu kutonginina kyambote kyebhi akwetu kyene mulondekesa o kidifwa kiki ni kukayela o phangu ya. Mu kiki, ihi itwadilongo ku phangu ya Daniyele? Kala kyabhange mwene, twabhingi kwijiya kyambote o Mak’a Nzambi. Twatokala kukala ni ukamba wambote ni Jihova mu kuzwela ne ithangana yoso ni kumutangela kyebhi kitwamudivwa. Twabhingi we kudyelela kwila Jihova wanda tukwatekesa ithangana yoso. Kyenyiki kyoso kitwanda dibhana ni ibhidi ilola o kixikanu kyetu, twanda swina.

9. Mbote yebhi itukatula mu kukala tu athu a swina?

⁹ O kukala tu athu a swina kutubhekela mbote yavulu. Tala o phangu ya phange Ben. Athu oso mu xikola mwexile mudilongelela Ben, mu ixi ya Alemanha, axikinine kwila o ima yamoneke ngo, seku muthu wayibhange, ni kwila o musoso wa Bibidya walungu ni mubhangi, wa makutu. Sayi kizuwa, Ben amubhana kithangana kya kukala kupholo ya jikoleka je ni kujimbulula se mukonda dyahi waxikinine kwila o mwenyu a ubhange. Ni kuswina kwoso mwene wazokela o kixikanu kye. Ihi yabhiti? Ben wambe: “O mesene yetu wevu kyambote yoso i ngazwela, wabhange jikopya ku madivulu mwatundu o milongi i ngazwela, yu wajiwanena o jikoleka joso.” Kyebhi kyadivu o jikoleka ja Ben? Mwene wambe: “Avulu mudya evu o ima ingazwela, ya angitangela kwila adiwanene ni ukexilu wami.” Kala kilondekesa o musoso wa Ben, muveji javulu o athu a swina a axila ku akwa. Ene atena we kukwatekesa yo ala ni mixima yambote kwijiya  Jihova. Se phata, twala ni ima yavulu itubhangesa kukala tu athu a swina.

10. O ufiyele ihi?

¹⁰ Mu Bibidya, o kizwelu mu dimi dya Hebalayiku phala kujimbulula o “ufiyele,” mba “henda ya ufiyele,” kyalungu ni kuzola kyavulu muthu ni kudikwatenena kwa mwene. Kyene a kitumbula phala kujimbulula o henda yala nayu Nzambi ku jiselevende je. Maji kyene kijimbulula we o henda idilondekesa o jiselevende ja Nzambi mudya. (2 Sam. 9:6, 7) Kyoso o mivu iya ni kubhita, o ufiyele wetu utena kukola dingi. Tumone kyebhi o kidi kiki kyabhiti ni polofeta Daniyele.

11. Kibhidi kyebhi kyalola o ufiyele wa Daniyele mu ukukilu we? (Tala ofoto yakapa.)

¹¹ O ufiyele wa Daniyele a ulola mu ithangana yavulu ku mwenyu we. Maji kibhidi kimoxi kyadikota kyalola o ufiyele we, kyabhiti kyoso kyexile ni 90 a mivu ndenge. Mu kithangana kyenyokyo, o mbanza ya Babilonya a itolola ku akwa Mediya ni Pelesa, ya exile mu itumina kwa Sobha Ndala. O athu a bhangele mbandu ku utuminu wa Sobha Ndala a zembele Daniyele, kexile we muxila o Nzambi yexile mubheza mwene. Kyenyiki, ene a soto ndunge phala kujibha Daniyele. Ene abhangesa o sobha kusoneka kitumu phala kumona se Daniyele weji kala fiyele kwa Nzambi inga kwa sobha. Phala kulondekesa o ufiyele we kwa sobha, kala o athu oso, ni kulenga o kumukaxtikala, Daniyele ka tokalele kubheza Jihova mu 30 a izuwa. Daniyele wasolo kukala fiyele kwa Jihova. Mukonda dya kiki, a mutakula mu dikungu dya jihoji. Maji Jihova wa besowala o ufiyele wa Daniyele mu kumubhulula bhu makanu ma jihoji. (Dan. 6:12-15, 20-22) Kyebhi kitutena kukala ni ufiyele wa kidi kwa Jihova kala wexile nawu Daniyele?

12. Kyebhi Daniyele kya kolesa o ufiyele we kwa Jihova?

¹² Kala kitwazwela kudima, phala kukala fiyele kwa Jihova twatokala kumuzola kyavulu. Daniyele wakolokotele fiyele kwa Jihova mukonda wamuzolele kyavulu. Phala kukala ni henda yiyi, se phata Daniyele wexile mu xinganeka ku idifwa ya Jihova ni kyebhi Mwene kyexile mu ilondekesa. (Dan. 9:4) Daniyele wexile we muxinganeka mu ima yoso yambote yabhangele Jihova phala mwene ni mundu We, yu wexile mu musakidila jinga.—Dan. 2:20-23; 9:15, 16.

13. (a) Ibhidi yebhi yene mulola o ufiyele wa minzangala yetu? Bhana phangu. (Tala we ofoto.) (b) Kala kyalondekesa mu vidyu, kyebhi ki utena kutambwijila se akwibhwidisa: o kwila o Jimbangi ja Jihova a swinisa yo asola o ukexilu wa kuzeka diyala ni diyala mba muhatu ni muhatu?

 ¹³ Kala Daniyele, o minzangala yetu lelu ala mwaxaxi ka athu kene muxila Jihova ni itumu ye. O athu enya ka wabhela kumona muthu wamba kwila wazolo Nzambi. Amoxi kate mwene a sota kubhangesa kwila o minzangala yetu a zanga o ufiyele wa kwa Jihova. Mu kifika, tala ihi yabhiti ni munzangala amwixana Graeme, watungu mu ixi ya Austrália. Mwene wadibhanene ni kibhidi kyoso kyexile mu xikola ya kaxi. O mulongexi webhwidisa ku maxibulu moso mu sala, ihi yeji bhanga se kamba dya, wa atangela kwila mwene wene muzeka ni mala ni akwa, mba ahatu ni akwa. O mulongexi wambe kwila oso eji swinisa o dikamba phala kusuluka ni ukexilu we, a tokalele kukala mbandu imoxi mu sala; o yo keji muswinisa kusuluka, akala mbandu yengi. Phange Graeme wambe: “Jikoleka joso ayi ku mbandu ya yo aswinisa o ukexilu yu. Eme ngo ni koleka imoxi, Mbangi ya Jihova we, twexile ku mbandu yengi.” O yabhiti kupholo yalola dingi o ufiyele wa phange Graeme kwa Jihova. Mwene wambe: “Mu kizuwa kyenyokyo o jikoleka jamukwa, kate mwene ni mulongexi exile mu tusebhulula. Ngabhange yoso phala kuzokela o kixikanu kyami ni kutululuka kwoso ni kulenduka, maji ene ka bhana matwi.” Kyebhi kyadivu Graeme? Mwene wambe: “Ki ngawabhela o ukexilu wangitalatala o jikoleka jami, maji ngasanguluka mukonda ngatena kukala fiyele kwa Jihova ni kuzokela o kixikanu kyami.” c

14. Mu ukexilu webhi umoxi ututena kukolesa o ufiyele wetu kwa Jihova?

¹⁴ Tutena kukala ni ufiyele wa kidi kwa Jihova, se tu muzola kyavulu kala kyabhangele Daniyele. Etu tu kolesa o henda yiyi, mu kudilonga yalungu ni idifwa ya Jihova. Mu kifika, tutena kudilonga o ibhangelu ye. (Lom. 1:20) Se wamesena kubandekesa o henda ye kwa Jihova ni kumuxila, utena kutanga o milongi ni dyambu: “Teve um Projeto?” mba utala o ji vidyu. Eye we utena kutanga o tumadivulu A Vida —Teve um Criador? ni A origem da vida —Cinco perguntas que merecem resposta. Tala yazwela phang’yetu ya muhatu amwixana Esther, watungu mu ixi ya Dinamarca: “O milongi yojimbulule kyambote. O tumadivulu ki tuzwela se watokala kuxikina mu ihi; muveji dya kiki twene tujimbulula o milongi anga eye mwene usola se wandaxikina mu ihi.” Ben, twamutumbula kudima, wambe: “O milongi yiyi ikolesa mwene kyavulu o kixikanu. O tumadivulu twangilondekesa kwila Nzambi wabhange o mwenyu.” Kyoso kiwanda dilonga o tumadivulu tutu, nange wanda xikina mu izwelu yiyi ya Bibidya: “Eye u Jihova Nzambi yetu, kya kufwama kutambula o fuma, o kijingu ni kutena, mukonda éye wabhange o ima yoso.”—Dij. 4:11. d

15. Mu ukexilu webhi dingi ututena kukolesa o ukamba wetu ni Jihova?

¹⁵ Ukexilu wa mukwa wa kukolesa o henda yetu kwa Jihova, o kudilonga yalungu ni mwenyu wa Mon’e, Jezú. Kiki kyene kyabhange phang’yetu ya muhatu amwixana Samira, watungu ku Alemanha. Mwene wambe: “Nga beta kwijiya dingi kyambote Jihova bhukaxi ka Jezú.” Kyoso kyexile mon’a ndenge, Samira kexile mutendela kyebhi Jihova kyeji tena kukala kamba dye mba kumuzola. Maji mwene watenene kutendela kyebhi kidivwa Jezú. Samira wambe dingi: “Eme ngawabhelele  Jezú mukonda mwene wexile mutalatala o athu kala makamba, wazolele we o ana’ndenge.” Kyoso kyayi ni kudilonga dingi yalungu ni Jezú, o ukamba we ni Jihova wayi ni kukola dingi. Mukonda dyahi? Mwene wambe: “Bhofele bhofele ngatendela kwila Jezú wakayela o phangu ya Tat’e ni kuyuka kwoso. Ene adifwangana kyavulu. Ngamono kwila kiki kima kimoxi kyabhangesa Jihova kutumikisa Jezú mu ixi, phala kukwatekesa o athu kumwijiya kyambote.” (Nzw. 14:9) Se wamesena kukolesa o ukamba we ni Jihova, mukonda dyahi ki ukatula kithangana phala kudilonga yoso i utena yalungu ni Jezú? Se u kibhanga, o henda ye kwa Jihova ni ufiyele we wanda dibandekesa.

16. Mukonda dyahi twatokala kukala fiyele? (Jisálamu 18:25; Mikeya 6:8)

¹⁶ Mu ithangana yavulu, o athu alondekesa o ufiyele ene mukala ni ukamba wambote, unangenena. (Lute 1:14-17) Se twala fiyele kwa Jihova, tutena kukala ni kutululuka ni kusanguluka. Mukonda dyahi? Mukonda Jihova wakanena kukala fiyele kwa yo amukala we fiyele. (Tanga Jisálamu 18:25; Mikeya 6:8.) Xinganeka ngo—o Mubhangi muteni a yoso, wamesena kukala kamba dyetu ni kutuzola ithangana yoso! Kyoso kitukala ni ukamba wambote ni Jihova, o ibhidi, izukutisu, kate ni kufwa ki kutena kutusondolola kwa Mwene. (Dan. 12:13; Luk. 20:37, 38; Lom. 8:38, 39) Kima kyambote kukayela o phangu ya Daniyele ni kukolokota fiyele kwa Jihova!

17-18. Ihi dingi itutena kudilonga ni Daniyele?

¹⁷ Mu milongi yiyi, twamono ngo idifwa iyadi ya Daniyele. Maji kwala dingi ima yamukwa itutena kudilonga ku phangu ye. Mu kifika, Jihova wabhana isumwa ni jinzoji kwa Daniyele, yu wamubhana we o kutena kwa kulombolola ikanenu. Mu ikanenu yiyi, yavulu ya dikumbidila kya. O yamukwa izwela yalungu ni ima yanda bhita ku hadya, yalungu ni athu oso mu ixi.

¹⁸ Mu milongi yakayela, twandazwela yalungu ni ikanenu iyadi yala mu divulu dya Daniyele. O kutendela o ikanenu yiyi kwanda tukwatekesa etwenyoso, minzangala ni adyakime, kusola ni unjimu kindala. O ikanenu yiyi itena we kukolesa o ufiyele wetu ni kuswina, phala tutene kuditunda kyambote ku ibhidi ya tukala kupholo.