O Bibidya ki itutangela se mukonda dyahi. Maji yene izwela ima itena kutukwatekesa kutendela se mukonda dyahi ene asolo kukala mu Beleme muveji dya kuvutuka ku Nazalé.

Sayi anju yatangela Madiya kwila mwene weji kwimita ni kuvwala mona. Kyoso o anju kyambata o njimbu yiyi, Madiya ni Zuze atungile mu Nazalé, sanzala yatokalele ku mbanza ya Ngalileya kwavwalukila Zuze. (Luk. 1:26-31; 2:4) Kupholo dya kwenda, kyoso kyatundu ku Ijitu, avutuka ku Nazalé. Jezú wakituka mukwa Nazalé mukonda kwene kwakudila. (Mat. 2:19-23) Kiki kyene kibhangesa kwila, kyoso kituzwela yalungu ni sanzala ya Nazalé, tulembalala Jezú, Zuze ni Madiya.

Madiya wexile ni ndandu amwixanene Nzebele, watungile mu mbanza ya Judá. Nzebele mwene wavwala Nzwá dya Batizu, mwene wexile muhatu wa mukunji Zakadiya. (Luk. 1:5, 9, 13, 36) Madiya wayile mukunda Nzebele mu mbanza ya Judá, wabhangeleku mbeji jitatu. Mu kusuluka wavutuka ku Nazalé. (Luk. 1:39, 40, 56) Kiki kyene kyabhangesa Madiya kwijiya o mbanza ya Judá.

Ithangana kupholo, Zuze watundu ku Nazalé yu wayi ku Beleme, mukonda o akwa Loma abhanene kitumu kya kwila, athu oso “aya mu disonekesa.” Beleme yexile we o kididi mweji vwalukila o Mexiya kala kya kikanene kwa Nzambi. (Luk. 2:3, 4; 1 Sam. 17:15; 20:6; Mik. 5:2) Kyoso Jezú kyamuvwala kwenyoko, Zuze ka mesenene kwila Madiya ubhanga njila yalebha phala kuvutuka ku Nazalé ni kabwetele bhu maku. Ene a kolokota mu Beleme, kutunda mu mbanza yiyi phala kubhixila ku Jeluzaleme kwabhingile kwenda nange divwa dya ji kilometulu. Kuma o kitumu kya Nzambi kyatendelesele kwila se mama uvwala mona watokalele ubhana sata mu tembulu, o kukala ku Beleme kyeji bhebhulukisa dingi o ima phala ene kutena kubhixila mu Jeluzaleme.—Iji. 12:2, 6-8; Luk. 2:22-24.

O anju yazwelele ni Madiya, yamutangela kwila o mona eji kumuvwala weji tambula o ungana wa “Davidi,” ni kwila weji kala “Sobha”. Nange Zuze ni Madiya atendela kwila kyexile kima kyambote Jezú kumuvwala mu mbanza ya Davidi. (Luk. 1:32, 33; 2:11, 17) Nange ene abanzele kwila kima kyambote kukala hanji mu kididi kyenyokyo kate Nzambi kyeji londekesa ihi yamesenene kwila ene ayibhanga.

Etu ki twejiya se thembu kuxi yexile kya Zuze ni Madiya mu mbanza ya Beleme, kyoso kya akundu ku mayala akwa kuzambula bhukaxi ka jithéthembwa. Maji twejiya kwila, a asangele kya m’onzo, ni kwila Jezú wexile kamona kakulu kya bhofele, kexile dingi kabwetele. (Mat. 2:11) Nange muveji dya kuvutuka ku Nazalé, ene abhiti Thembu ya soko mu mbanza ya Beleme, yene yakituka kala dibhata dya.

Helode wa tumu “kujibha o twana twoso twa mala ala kyá ni mivu iyadi mba ndenge, mu Beleme.” (Mat. 2:16) Anju yadimuna Zuze yalungu ni maka enya, kyenyiki mwene ni Madiya alengela ku ixi ya Ijitu ni Jezú, ya exile kwenyoko kate kyafu Helode. Ku pholo dya kwenda Zuze wambata o mwiji we mu mbanza ya Nazalé. Maji mukonda dyahi ene ka vutuka ku Beleme? Mukonda mu kithangana kyenyokyo o mona a Helode, amwixanene Alakelawu, wakexile mutumina mu mbanza ya Judeya. Mwene phe kexile muthu wambote. Ku mbandu yamukwa, sayi anju yadimuna dingi Zuze kwila, kyeji kala kilwezu kyadikota kuvutuka kwenyoko. Ku Nazalé mwene wejitena kusasa kyambote Jezú kala mubhezi wa Jihova mukonda kyexile kididi kyatululuka, kyakondama.—Mat. 2:19-22; 13:55; Luk. 2:39, 52.

Nange Zuze wafu ande dya Jezú kufwa ni kujikula o njila phala athu akamukwa akale we ni ujitu wa kuya ku dyulu. Kyenyiki Zuze anda kumufukununa phala kutunga mu ixi. Athu avulu andatena kumwijiya ni kutendela kyambote se mukonda dyahi mwene ni Madiya exile mu mbanza ya Beleme kyoso kyavwala Jezú, muveji dya kuvutuka ku Nazalé.