1. Ihi itwatokala kubhanga phala kubhuluka ku kizuwa kya Jihova?

 Mu Bibidya o izwelu “kizuwa kya Jihova,” yalungu ni kithangana kya Jihova kufundisa o jinguma je, ni kubheka o ubhulukilu ku jiselevende je. Mu ukulu, sayi ifuxi Nzambi wafundisile kya. (Iza. 13:1, 6; Ize. 13:5; Sof. 1:8) Mu izuwa yetu, o “kizuwa kya Jihova” kyanda mateka kyoso o Jinguvulu kyanda lungulukila o Babilonya ya Dikota ni kyanda sukina ni ita ya Alumajedone. Phala kubhuluka ku “kizuwa” kiki, twabhingi kudipelepalala kindala. Jezú walongo kwila twatokala ‘kukala polondo’ phala o “hadi yadikota,” kiki kilombolola kwila twatokala kukibhanga kana ngo mu kizuwa kimoxi maji ithangana yoso.—Mat. 24:21; Luk. 12:40.

2. Mukonda dyahi o izwelu ya Phawulu mu divulu dya 1 Tesalonika yala ni valolo phala etu?

² Mu mukanda wadyanga ku akwa Tesalonika, poxolo Phawulu wate ifika yavulu phala kukwatesa o Jikidistá kusuluka mu kukala polondo phala o kizuwa kya kufundisa kya Jihova. Phawulu wejidile kwila, o kizuwa kya Jihova ki kyeji kwiza mu kithangana kyenyokyo. (2 Te. 2:1-3) Ne kiki, mwene wa tendelesa o jiphange je kudipelepala phala o kizuwa kyenyokyo, ni kukimona kala kya zukamene kya kyavulu, etu we tutena kubelesela o kitendelesu kiki. Twanda mona ihi ya jimbulula poxolo Phawulu yalungu ni (1) kyebhi kyanda kwiza o kizuwa kya Jihova, (2) nanyi kanda bhuluka mu kizuwa kyenyokyo, ni (3) kyebhi kitutena kudipelepalala phala kubhuluka.

3. Mu ukexilu webhi o kizuwa kya Jihova kyanda kwiza kala kiza o mwiyi mu usuku? (Tala we ofoto.)

³ “Kala kiza o mwiyi mu usuku.” (1 Te. 5:2) Kiki o kifika kyadyanga mu ifika itatu yate poxolo Phawulu phala kujimbulula kyebhi kyanda kwiza o kizuwa kya Jihova. Muveji javulu, o miyi i  nyana ni lusolo, ene abhanga kiki bengebenge mu usuku, mu kithangana o athu ka kifikile. O kizuwa kya Jihova we kyanda kwiza mu kithangana o athu ka kifikile, kyenyiki avulu kyanda kwatukumukisa. Kuma o kizuwa kyenyokyo kyanda kwiza ni lusolo, nange kate mwene phala o Jikidistá ja kidi, kyanda kwatukumukisa we. Maji phe etu kanda tubwika, kala kyanda bhita ni athu ayibha.

4. Mu ukexilu webhi o kizuwa kya Jihova kyedi kala jindolo ja kuvwala?

⁴ “Kala kiza o jindolo ja kuvwala ku muhatu wemita.” (1 Te. 5:3) Kyoso o muhatu kyemita, kejiya o ola yanda vwala. Maji mwene wejiya ni kidi kyoso kwila o kithangana kiki kyanda bhixila. Mu kusuluka, mwene utukumuka kumbi dya kuvwala dya bhixila, o jindolo jiya ni kudibandekesa ni lusolo, kala ki janda bhita. Kyene kimoxi we, etu ki twejiya o kizuwa ni ola yanda mateka o kizuwa kya Jihova, maji twejiya ni kidi kyoso kwila kyanda bhixila. O athu ayibha anda kwafundisa ni lusolo, ni kwila kanda tena kulenga.

5. Mu ukexilu webhi o kithangana kya hadi yadikota kyedi kala ki moneka o mwanya mu kamene?

⁵ Kala kimoneka o mwanya mu kamene. Mu kifika kya katatu, poxolo Phawulu wazwela dingi yalungu ni miyi i nyana mu usuku. Maji mu kifika kiki, kyedi kala mwene wasokesa o kizuwa kya Jihova ni kithangana ki moneka o mwanya mu kamene, muveji dya kukisokesa ni mwiyi. (1 Te. 5:4) O miyi atena kulanduka kyavulu ni kunyana, kate mwena nange adijimba kwila o kithangana kya mubhita. Ene nange atukumuka kya ngo kuma kwaki, kyenyiki atena kwamona ni ku akwata. O kithangana kya hadi yadikota, kyanda tungula we o athu yo edi kala miyi, kifwa o athu a mukwenda mu kitombe mukubhanga o ima yayibhila Nzambi. Maji etu twatokala kukala polondo phala kudituna kabasa kima kyayibhila Nzambi, ni tudikwatenena mukubhanga o “ima yoso yambote, yayuka  ni yakidi.” (Efe. 5:8-12) Mu kusuluka Phawulu watumbula ifika iyadi phala kujimbulula yo kanda bhuluka mu kizuwa kya Jihova.

6. Mu ukexilu webhi athu avulu amuzeka? (1 Tesalonika 5:6, 7)

⁶ ‘Yo amuzeka.’ (Tanga 1 Tesalonika 5:6, 7.) Phawulu wasokesa o athu kanda bhuluka mu kizuwa kya Jihova, kala yo amuzeka. Ene ka mumona o kithangana kya mubhita, kejiya we ihi ya akondoloka. Mukonda dya kiki ka tena kutendela o ima yambote yamubhita ne ngo kubhanga kima. Athu avulu lelu amuzeka mu nzumbi. (Lom. 11:8) Ene kaxikina kwila twala mu “izuwa ya sukidilaku” ni kwila o hadi yadikota kwakambe ngo yanda bhixila. Amoxi mukumona o ima yayibha yamudibandekesa mu ngongo, abalumuka bhofele ku kilu anga a sota kubhana matwi ku njimbu yetu ya Utuminu. Maji phe muveji dya kusuluka mu kukala ku mesu azele, ene avutuka dingi mu kuzeka mu nzumbi. Kate mwene yo axikina ku kizuwa kya Jihova kya kufundisa, axinganeka kwila kyene kyala hanji dikanga. (2 Ph. 3:3, 4) Maji etu twejiya kwila, kindala kyene o kithangana kya kukala ku mesu azele.

7. Mu ukexilu webhi o athu anda kwabhwika mu kizuwa kya Jihova edi kala yo akodiwa?

⁷ “Yo a kodiwa.” Phawulu wasokesa o athu anda kwabwika kwa Nzambi, kala yo a kodiwa. O muthu wakodiwa ulaleka kyavulu phala kutendela o ima yamubhita bhu kidi bhwala, kimubhonza we kubhanga o ima ni unjimu. Kyene kimoxi we, o athu ayibha ne mwene ni idimwinu ya Nzambi kene mubhanga kima. Ene asola o ukexilu wa myenyu, wanda kwa ambata ku kibwikilu. Maji o Jikidistá abhanga yoso phala ka kodiwe mu nzumbi, kifwa akala ku mesu azele. (1 Te. 5:6) Sayi mutokwexi wa Bibidya wajimbulula kwila, “O muthu wala ku mesu azele utululuka, ka tandanganya kana, mwene utena kuxinganeka kyambote ni kusola we kyambote o ima.” Maji mukonda dyahi kima kyambote kutululuka, ni kukamba kutandanganya? Phala ki tudite mu maka a jinguvulu, mba mu madimanda akamukwa a mundu yu. Kyoso kituya ni kuzukama dingi ku kizuwa kya Jihova, o mundu yu wanda bhanga yoso phala kutubhangesa kudita mu maka ma. Maji ki tubhingi kukala ni hele yavulu ya ima yiyi. O nzumbi ikola ya Jihova yanda tukwatekesa kutululuka, ni kusola ni unjimu.—Luk. 12:11, 12.

8. Kala kilondekesa divulu dya 1 Tesalonika 5:8, kyebhi kitutena kudipepalala phala o kizuwa kya Jihova? (Tala we ofoto.)

⁸ “Tuzwate o kivunga thulu. . . ni . . . kapasete.” Phawulu watusokesa ni masoladi ala ku mesu azele adisokejeka phala kubhânga. (Tanga 1 Tesalonika 5:8.) Mu ita o disoladi watokala kukala polondo phala kubhânga kabasa kithangana. Kyene kimoxi we netu. Etu tukala polondo phala o kizuwa kya Jihova, mu kuzwata o kivunga thulu kya kixikanu ni kya henda, ni kapasete, kifwa o kidyelelu kya kubhuluka. O idifwa yiyi itena kutukwatekesa kyavulu.

9. Kyebhi o kixikanu kyetu kitulanga?

⁹ O kivunga tulu kyexile mulanga o phumbulu ya disoladi. Kyene kimoxi we, o kixikanu ni henda ilanga o phumbulu yetu mu nzumbi. O idifwa yiyi yanda tukwatekesa kusuluka mu kusidivila Jihova ni ku kayela Jezú. O kixikanu kitudyelelesa kwila Jihova wanda besowala oso amusota ni muxima woso. (Jih. 11:6) Kyene we kituswinisa kusuluka mukukayela o mutwameni wetu Jezú, ne mwene kyoso kitudibhana ni ibhidi. Phala kukolesa o kixikanu kyetu ni tukolokote, tutena kudilonga ni phangu ya jiphange jetu ene musidivila Jihova ni ufiyele woso sumbala ni izukutisu, ni ibhidi yalungu ni kitadi. Tutena kulenga o kilwezu kya kuzola kyavulu o  kitadi ni jimbote, mukukayela o phangu ya jiphange jetu asosolola o ukexilu wa mwenyu wa, phala kuta o Utuminu wa Nzambi kupholo. b

10. Kyebhi o henda kwa Nzambi ni kwa akwetu itukwatekesa kukolokota?

¹⁰ Etu twabhindamena kyavulu o henda phala kusuluka mukukala ku mesu azele. (Mat. 22:37-39) O henda yetu kwa Nzambi itukwatekesa kukolokota mu kuboka, ne mwene se o kubhanga kiki kitubhekela ibhidi. (2 Ti. 1:7, 8) Twene we mulondekesa o henda kwa yo ka musidila Jihova, kiki kyene kitubhangesa kusuluka mu kuboka mu mbambe yetu, kate mwene bhukaxi ka mitelembe ni mikanda. Etu twadyelela jinga kwila, kupholo dyakwenda o athu atena kulungulula o mwenyu wa, ni amateke kubhanga o ima yambote.—Ize. 18:27, 28.

11. Kyebhi o henda yetu ku jiphange itukwatekesa? (1 Tesalonika 5:11)

¹¹ O kuzola akwetu kwalungu we ni kuzola o jiphange jetu mu nzumbi. Etu tulondekesa o henda yiyi, “mu ku dikolokotesa ni kudiswinisa mudyetu.” (Tanga 1 Tesalonika 5:11.) Kala o masoladi atokala ku mbandu imoxi adiswinisa mudya mu ita, etu tudikolokotesa ni kudiswinisa mudyetu. Kidi kwila o disoladi nange utena kulweza ni kukwama mukwa wala kumbandu ye, maji mwene nuka weji bhanga kiki mu lwelu. Kyene kimoxi we etu nuka tweji kwama phang’yetu mu lwelu mba ku muvutwila phulu mu phulu. (1 Te. 5:13, 15) Tulondekesa we o henda yetu mu kuxila o jiphange ala ni kikalakalu kya kwendesa o kilunga. (1 Te. 5:12) Kyoso poxolo Phawulu kya soneka o mukanda ku akwa Tesalonika, ki kwabhitile lwa muvu tunde kyamateka o kilunga kyenyokyo. Nange o jiphange ja mala exile mu kwendesa o kilunga, kexile luwa ni uhete wavulu ni kwila exile we mulweza. Maji ne kiki atokalele kwaxila. Kyoso kituya ni kuzukama ku kithangana kya hadi yadikota, twanda bhindamena kudyelela dingi ku tufunga mu kilunga ni kukayela o itendelesu yatubhana. Nange mu kithangana kyenyokyo ki twanda tena kutambula itendelesu itunda ku mbonge yetu ni ku filiyale. Kyenyiki kima kyambote kudilonga kya kindala kuzola ni kuxila o tufunga twetu mu kilunga. Kabasa kima kibhita, twanda kala ku mesu azele, ki twanda dikwatenena ku  itondalu ya jiphange jetu. Muveji dya kiki twatokala kudikwatenena mukwijiya kwila Jihova ni Jezú amukwendesa o jiphange jiji ja fiyele.

12. Kyebhi o kidyelelu kilanga o ixinganeku kyetu?

¹² Kala o kapasete kexile mulanga o mutwe wa disoladi, o kidyelelu kyetu kya kubhuluka kilanga o ixinganeku yetu. O kidyelelu kyetu kitukwatekesa kumona kwila, seku kima kibhana o mundu yu kyala ni valolo yadikota. (Fil. 3:8) O kidyelelu kyetu kitukwatekesa kutululuka ni kukolamena. Kiki kyene kyabhiti ni phange Wallace ni muhatu we Laurinda, amusidivila mu ixi ya África. Mu semana jitatu, kiyadi kya afundu muthu wa kazola, umoxi o tata o mukwa o mama. Mukonda dya uhaxi wa COVID-19, ene katenene kuvutuka ku bhata phala kukala ni miji ya, mu kithangana kiki kya malamba. Phange Wallace wambe: “O kidyelelu kya difukunukinu, kingikwatekesa kwa xinganeka kana mu ukexilu wakexile nawu ande dya kufwa, maji mu ukexilu wandakala kyoso kyanda kwafukununa ku mundu wa ubhe. O kidyelelu kiki kingitululukisa kyoso kingikala ni kikote ku muxima.”

13. Ihi itutena kubhanga phala kutambula o nzumbi ikola?

¹³ “Kanenu kufidisa o kikalakalu kya nzumbi ikôla momwenu.” (1 Te. 5:19) Phawulu wambe kwila o nzumbi ikola ikalakala moxi dyetu. Kyoso kitwehela o nzumbi ikola kukalkala momweto, twizala ni vondadi ya kubhanga o ima yayuka, tukala we ni nguzu yavulu phala kukalakela Jihova. (Lom. 12:11) Maji ihi itutena kubhanga phala kutambula o nzumbi ikola? Tutena kusamba mu ku ibhinga, kudilonga o Mak’a Nzambi, ni kubhanga mbandu ya kilunga kyê. O kubhanga kiki kwanda tukwatekesa kukala ni “ibundu ya nzumbi.”—Nga. 5:22, 23.

14. Ihi itwatokala kweha se twamesena kusuluka mutambula o nzumbi ikola ya Nzambi? (Tala we ofoto.)

¹⁴ Kyoso Jihova kya tubhana o nzumbi ikola, twatokala kudilanga phala ki tufidise “o kikalakalu kya nzumbi ikôla.” Jihova ubhana ngo o nzumbi ye ikola kwa yo azele mu ixinganeku ni mu wendelu wa. Mwene kanda tubhana o nzumbi ye ikola se tusuluka mu kuxinganeka mu ima yayibha, mba tubhanga kima kya muyibhila. (1 Te. 4:7, 8) Ku mbandu yamukwa, phala tusuluke  mu kutambula o nzumbi ikola, ki twatokala “kukamba kubhana valolo ku ikanenu yatundu kwa Nzambi.” (1 Te. 5:20) Mu velusu yiyi, o “ikanenu”, ilombolola o njimbu yabhana Jihova bhukaxi ka nzumbi ye ikola, kala o njimbu yalungu ni kizuwa kya Jihova ni izuwa isukidilaku ya mundu yu. Etu ki tuxinganeka kwila, o Alumajedone yanda laleka phala kubhixila. Muveji dya kiki, tulondekesa kwila twaxikina kuma ki yandalaleka mu kwiza, mu kusuluka mu kubhanga o “ima iximanesa Nzambi,” ni mu kukala ni wendelu wazele izuwa yoso.—2 Ph. 3:11, 12.

15. Ihi itutena kubhanga phala ka tunganale ni njimbu ya makutu ya madimonyo? (1 Tesalonika 5:21)

¹⁵ Kwakambe ngo bhofele, o jinguma ja Nzambi anda bhana o ngolokela ya kwila: “Kwatululuka, kwabatama!” (1 Te. 5:3) O madimonyo, anda mwanga njimbu ya makutu mu ngongo yoso phala kunganala o athu. (Dij. 16:13, 14) Ihi itwamba yalungu netu? Etu kanda tu nganala se tu “tongolola [mba, “tulola”] o ima yoso.” (Tanga 1 Tesalonika 5:21.) Mu Ngeleku o kizwelu “kutongolola” kya lungile ni ukexilu wexile mu kalakala nawu o athu exile mulola o ima kala o phalata ni ulu, phala kwijiya se yexile mwene ya kidi. Mu kiki etu twabhingi kulola phala kwijiya se o ima itutanga ni itwivwa ya kidi mwene. O kiki kima kya tokalele kubhanga akwa Tesalonika, kima kitwatokala we kubhanga etu bengebenge kyoso kituya ni kuzukama dingi mu kithangana kya hadi yadikota. Muveji dya kuxikina ngo mu ima yoso izwela akwetu, twatokala kukalakala kyambote ni kitongolwelu kyetu, mu kusokesa o ima itutanga mba itwivwa, ni ima izwela o Bibidya ni kilunga kya Jihova. Kanda tunganala ni njimbu ya makutu ya madimonyo.—Jisa. 14:15; 1 Ti. 4:1.

16. Kidyelelu kyahi kitwala nakyu kyalungu ni hadya, ni ihi itwatokala kubhanga?

¹⁶ Twejiya kwila, o jiselevende ja Nzambi anda bhuluka ku hadi yadikota. Maji ki twejiya ihi yanda bhita ni muthu ni muthu mudyetu. (Tiy. 4:14) Kikale se twanda kala ku mwenyu mba kana, kyoso kyanda kwiza o hadi yadikota, Jihova wanda tubesowala ni mwenyu wakalelaku se tukolokota fiyele kwa mwene. O Jikidistá a undu anda tunga ni Jezú ku dyulu. O yo atokala ku jimbudi jamukwa anda tambula o mwenyu wakalelaku mu palayizu mu ixi. Kyenyiki tudikwatenyenu mu kidyelelu kyetu kyalungu ni hadya, tukalyenu polondo phala o kizuwa kya Jihova!