O jitata jami axisa o ixi ya Estônia mu kithangana kya ita ya kayadi yabhiti ku mundu woso, ya ayi mu ixi ya Alemanya, kwangivwalela. Kupholo, ayi mutunga mu mbanza ya Ottawa, ku Canadá. Twatungile mu inzo yofele mwexile we muzekesa o jisanji. O wadyama watuvudile, maji twexile ni mayaki phala kudya mu kamene.

Sayi kizuwa, O Jimbangi ja Jihova atange Dijingunwinu 21:3, 4 kwa mam’etu. O jivelesu jiji ja mutula ku muxima, yu wamateka kudila. Tat’etu ni mam’etu asuluka mu kudilonga o Bibidya, ki kubhiti thembu yavulu exile polondo phala kwa batizala.

O jitata jami kexile muzwela kyambote o Kingileji, maji ne kiki exile mubhana valolo yavulu ku kidi kya Bibidya. Tat’etu wexile mu kalakala usuku woso mu ditenda dibhanga jifwelu ni ima yamukwa, ku Sudbury, mu mbanza ya Ontário, maji ne kiki mu jisabhalu joso wexile mukwambata ndeng’yami Sylvia, n’eme mu ukunji. Semana joso twexile mudilonga O Mulangidi ku mwiji. O kiki kyene kya kwatekesa o jitata jami kuzola Jihova. Kiki kyangibhangesa kubhakula o mwenyu wami kwa Jihova ni kungibatizala mu muvu wa 1956 kyoso kingexile ni 10 dya mivu. O kuxinganeka mu henda ya jitata jami kwa Jihova kwene mu ngiswinisa kusuluka we mu kusidivila Jihova.

Kyoso kingazubha o xikola, sayi imbamba yamateka kungilandukisa. Ngexile muxinganeka kwila se ngikala muboki wa thembu yoso, ki ngejitena kukala ni kitadi kyasoko phala kubhanga o vondadi yami, ya kwendela mu kiphululu ni kwijiya jixi jengi. Ngawabhelele kyavulu o salu yami mu ditenda dya radyu, mu mbandu ya kuxika mimbu. Maji ngexile mu kukalakala kate mu mawusuku, mu kiki ngexile mu fonga mu yonge, ngamateka we kudilunga ni athu kexile mubheza Jihova. Mu kusuluka, o kitongolwelu kyami kyolonge bhu kaxi ka Bibidya kya ngikwatekesa kulungulula o ima.

Ngayi mutunga ku Oshawa, mbanza ya Ontário. Kwenyoko ngeza mu kwijiya Ray Norman, pang’ye ya muhatu Lesli, ni aboki a thembu yoso amukwa. A ngikwatekesa kudivwa kyambote. O kumona o kisangusangu kya mu kusidivila Jihova kyangibhangesa kutonginina o jimbambe jami. Ene a ngiswinisa kukala muboki wa thembu yoso, kyene kingabhange mu mbeji ya Katutu wa 1966. Ngasangulukile kyavulu, o ima yexile mukwenda kyambote. Maji kwexile hanji ima yeji lungulula o mwenyu wami.

Kyoso kingexile hanji mu xikola, ngatumikisine petisá ku Betele ya Toronto, ku Canadá. Mivu kupholo,  kyoso kingexile kya muboki wa thembu yoso, angixana phala kusidivila ku Betele mu mivu iwana. Maji eme ngazolele kyavulu phange Lesli, kyenyiki ngexile ni woma wa kwila, se ngixikina o kixanu, ki ngejitena ku mumona dingi. Ngasambe kyavulu, mu kusuluka, sumbala kyangibhonzele kudilekela ni Lesli, ngayi ku Betele.

Ku Betele ngakalakala mu kididi kya kusukwila izwatu, mu kusuluka ngexile seketa. O phange Lesli wakituka muboki wakatunda ku Gatineau, mbanza ya Quebec. Ngexile muxinganeka jinga se ihi yexile mubhanga mwene ni kudibhwidisa se ngabhangele mwene kyambote mu kuya ku Betele. Bhenyobho, kwabhiti kima kyangisangulukisa kyavulu. Ray, phang’ya Lesli, amwixana ku Betele. Kiyadi kyetu twexile mu dixilu dimoxi! Kyenyiki ngatena dingi kudizwelesa ni Lesli. Twakazala mu kizuwa kya 27 ya mbeji ya Kawana wa 1971, o kizuwa kingatundu ku Betele, mu kubhita mivu iwana.

Eme ni Lesli a tusolo phala kuya mu kilunga kya dimi dya Francês, ku Quebec. Mu kubhita mivu, ngasasumuka kyoso kyangisolo phala kukala kafunga ka ilunga, mu kitala kya 28 a mivu. Ngexile mudivwa kwila ngexile munzangala hanji, ki ngexile ni uhete wasoko. Maji o izwelu ya Jelemiya 1:7, 8 ya ngiswinisa. Muhatu’ami Lesli, wabhitile mu ilwezu yavulu ya makalu, kyexile we mumubhonza kuzeka. Mu kiki, twafikile kyeji tubhonza kyavulu kukunda o ilunga. Maji Lesli wambe, “se Jihova mwene wamutubhinga, mukonda dyahi ki tufikisa?” Twaxikina o kikalakalu, twasangulukile mu kukunda o ilunga mu 17 a mivu.

Ngexile ni ikalakalu yavulu, mu kiki ki ngexile mubhita kithangana kyasoko ni Lesli. Sayi kizuwa mu kamenemene kya sekunda, a phuphu ku dibhitu. Ngajikula o dibhitu maji ki kwexile muthu, ngamono ngo kakinda bhoxi, bhwexile ditwaya, ibundu, jimbolo, keju, ngalafwa ya vinyu, jikopho ni kamukanda kwasonamene kiki: “Ambata muhatu we phala kutonoka.” Kizuwa kyenyokyo kwexile mwanya, kuma kwawabhele mwene. Maji ngajimbulula kwa Lesli kwila ki tweji tena kuya mukonda ngexile ni madiskulusu phala ku pelepalala. Mwene watendela, maji waluwalele bhofele. Kyoso kingameteka kupelepalala, o kitongolwelu kyamateka kungifundisa. Nga lembalala o izwelu ya Efezu 5:25, 28. Ngatendela kwila Jihova wexile mu ngikwatekesa kumona kwila, ngatokalele kusuwa dingi muhatu wami. Kyoso kingazubha kusamba, ngatangela Lesli, “tuyetu,” kiki kyamusangulukisa kyavulu. Twayi ni dikalu bhu kididi kyafwamene kyavulu bhu mbandu a ngiji, twazale o ditwaya bhoxi. Twasangulukile kyavulu mu kubhita kithangana kumoxi, izuwa yavulu kudima ndenge. Ngatenene hanji kupelepalala o madiskulusu.

Mu kukunda o ilunga twexile ni ikalakalu yavulu ya tusangulukisa, twanyungu tunde ku Colúmbia Britânica kate ku Terra Nova. O vondadi yami, ya kwijiya jixi jengi, yexile mudikumbidila. Eme ngexile mubanza kubhanga o xikola ya Ngiliyade,  maji ki ngamesenene kuya mu ixi yengi. Phala eme, o akunji a jixi jengi exile athu a katunda, ngexile mudivwa kwila ki ngafwamene kukala mukunji wa jixi jengi. Ku mbandu ya mukwa ngexile ni woma wa kungitumikisa mu ixi ya África, mu kididi mwexile ita ni mauhaxi. Ngasangulukile kyavulu mu kukala mu ixi ya Canadá.

Ku muvu wa 1992, o Jimbangi ja Jihova atambula dingi o ufolo wa kuboka, mu jixi ja tokalele ku União Soviética. O jiphange a twibhwidisa se twexile polondo phala kusidivila ku Estônia. O njimbu yiyi ki twayifikile, kyenyiki twasambe yalungu ni maka enya. Lwamukwa dingi twambe: ‘Se Jihova mwene wamutwixana, mukonda dyahi ki tufikisa kubhanga kiki?’ Mu kiki twaxikina, nga sangulukile mukonda ka tutumikisa ku África.’

Twamateka kudilonga o dimi dya Estoniano. Mu kubhita jimbeji, atubhana o kikalakalu kya kukunda o ilunga. Twa kundu 46 a ilunga ni ibuka ku Estônia, Letônia, Lituânia. Twakundu we Kaliningrado, ya tokala ku Rússia. Twabhingile we kudilonga o madimi a jixi jiji, dimi dya Letão, Lituano ni Russo. Kyabhonzele kyavulu. O jiphage a sangulukile ni nguzu itwexile mubhanga, ya exile mutukwatekesa. Ku 1999, ku Estônia abhangeku Filiyale, kyenyiki angisolo phala kusidivila mu kibuka kya Filiyale kumoxi ni phange Toomas Edur, Lembit Reile, ni Tommi Kauko.

Kwenyoko twasangeku jiphange a abhalakalele mu ixi ya Sibéria. Sumbala a atalatalele kyayibha, exile dikanga dya miji, maji ka kituka athu abhaka phonzo mba akwa njinda. O kisangusangu ni nguzu ya, mu sidivisu ya kuboka, ki yazoza. O phangu ya yatulongo kwila tutena kukolokota ni kusanguluka ne mwene ni ibhidi yavulu.

Ki twexile ni kithangana kyasoko phala kunyoha, mukusuluka muhatu wami Lesli wamateka kudivwa kwila wexile mutohoka kyavulu. Maji ki twakijidile kwila mwene wexile ni uhaxi awixana fibromialgia, ubhangesa o muthu kwivwa jindolo javulu ni kubhwila. Bhenyobho twamateka kuxinganeka kuvutuka ku Canadá. Atwixana phala kubhanga o xikola ya jiphage abhanga mbandu mu kibuka kya Filiyale, mu mbanza Patterson, ku Nova York, Estados Unidos da América. Eme ngexile mu xinganeka se twejitena kubhanga mwene o xikola. Twasambe kyavulu, mukusuluka twaxikina o kixanu. Jihova wa tubesowala. Kwenyoko twatena kwijiya o uhaxi wexile nawu Lesli, ya atena kumusaka. Twatena kuvutuka mu kubhanga dingi o ikalakalu yetu.

Sayi kizuwa mu usuku, kyoso kitwexile hanji ku Estônia ku 2008, o jiphange ku filiyala angixindi, ya angibhwidisa se tweji xikina kuya ku ixi ya Congo. Kyokyo kyangitukumukisa, bengebenge mukonda ngabhingile kutambwijila mu kizuwa kya kayela. Ki ngakitangela Lesli, mukonda ngejidile kwila se ngimutangelakyu, keji tena kuzeka mu usuku wenyo. Maji éme ki ngatenene kuzeka, ngabhiti o usuku mu kusamba mukonda dya hele ya kuya mu ixi ya África.

Mu kizuwa kya kayela ngatangela yoso kwa Lesli, “twamono kwila Jihova mwene wexile mutwixana  phala kuya ku África. Kyebhi kitwanda kijiya kwila ki twanda tena mba kukiwabhela, se ki tufikisa kuyaku?” Kyenyiki mu kubhita 16 a mivu ku Estônia, twayi ku Kinshasa, mu ixi ya Congo. O njaludim ya Betele ya Congo yafwamene kyavulu, kyexile we kididi kya tululuka. Kima kyadyanga kyate Lesli mu xilu dyetu, kalatá katundile naku ku Canadá. Asonekeneku kiki: “Sanguluka kabasa kididi kuwala.” Mu kwijiya kyambote o jiphange, kulonga o Bibidya ku athu ni kumona o kisangusangu kya kukala akunji a jixi jengi, o henda yetu ku sidivisu ya Jihova yadibandekesa dingi. Twatambula o ujitu wa kukunda 13 kya ji Betele jamukwa ja África. Kiki kyatukwatekesa kwijiya ijila ya jixi javulu, ni athu avulu we. O woma utwakexile nawu ku dimatekenu wabhu, twasakidila Jihova mu kututumikisa ku África.

Ku Congo, atubhana makudya avulu kala o mahoho ungexile mufika ki ngejitena kwadya. Maji mu kumona kwila o jiphange jetu awabhelele kyavulu o kudya kuku, twafikisa kudya we, twakuwabhela kyavulu.

Etu twabhange njila ku mbandu itundila o dikumbi ya ixi ya Congo, phala kuswinisa o jiphange ni kwabhana o imbamba ya bhindamenene. Mu ididi yenyoyo o masoladi exile mulwa ita mu madyembu ni kutalesa hadi ku ahatu ni ana a ndenge. Jiphange jetu javulu exile jingadyama. Maji ne kiki, o kidyelelu kya ku difukunukinu, o henda ya kwa Jihova, ni ufiyele wa ku kilunga kye, kyexile mutuswinisa kyavulu. O phangu ya, yatubhangesa kutonginina o vondadi yetu ya kusidivila Jihova ni yakolesa we o kixikanu kyetu. Sayi jiphange axala se o jinzo ja ni idima ya. Kiki kyangilembalesa kwila o jimbote jitena kudibota ni lusolo lwoso, maji o kyabeta dingi kota o ukamba wetu ni Jihova. Sumbala ni ibhidi yavulu, ene kexile mu dikalanganza. O ukexilu wa, watukwatekesa kudibhana ni ibhidi yetu yalungu ni sawidi ni kuswina.

Kwamoneka dingi kima kyamukwa ki twakifikile. Atutumikisa ku Betele ya Hong Kong. Nuka twaxinganekene kwila twejiya mutunga mu ixi ya Ásia! Maji mu kumona kyebhi Jihova kyatukwatekesa ni henda yoso mu ikalakalu yamukwa yatubhele, twaxikina o kixanu. Mu muvu wa 2013, ni masoxi ku  mesu, twaxisa o makamba m’etu a kazola ni ixi ya África yafwama kyavulu, etu twayi se kwijiya ihi yeji bhita ku pholo.

Kutunga ku Hong Kong, kididi kyezala ni athu a jixi javulu, kyexile kima kyawubhe phala etu. Kyatubhonzele kyavulu kudilonga o dimi dya Chinês. Maji o jiphange atulondekesa henda yavulu, twawabhela we kyavulu o kudya kwa ixi. O kikalakalu kyexile mudibandekesa, maji o imbamba yatele we kalu yavulu. O Kibuka Kya Utuminu ni unjimu woso, kyasolo kusumbisa mbandu ya ibhela ni jisabhalalu ja tokalele ku filiyale, ni kutumikisa o ikalakalu yamukwa mu ididi yengi. Ki kulaleka kyavulu, ku 2015, atutumikisa ku Coreia do Sul, kwene kutwala kindala. Bhabha twamudilonga dingi dimi dyengi dyabhonzo we kyavulu. Ki twamuzwela hanji kyambote o dimi dya Coreano, maji o jiphange atuswinisa, a tutangela kwila o uhete wetu wa kuzwela o dimi wamudibandekesa.

Sayi bhabha kitena kubhonza kubhanga makamba a ubhe, maji twamono kwila se twixana o jiphange kubhata dyetu, ni tubhite nawu kithangana, ki kyandatubhonza kyavulu kubhanga makamba. Twatendela kwila, o jiphange jetu joso adifu mu maukexilu avulu, ni kwila Jihova watubhange ni kutena kwa kuzola makamba avulu mu kithangana kimoxi.—2 Ko. 6:11.

Twene mumona o mbote ya kuzola o athu kala kibhanga Jihova ni kusota kumona ihi ituxikinisa kwila mwene watuzolo anga utwendesa. Kyoso kitwexile mu luwala mba kukala ni phata yalungu ni henda ya jiphange kokwetu, twexile mutanga o mikanda ni ji kalatá jatusonekenene o makamba m’etu, kiki kyexile mutuswinisa kyavulu. Twamono muveji javulu kyebhi Jihova kyatambwijila o misambu yetu, kiki kyakolesa o kixikanu kyetu ni kyatudyelelesa we kwila mwene watuzolo kyavulu.

Mu mivu yoso yiyi, eme ni Lesli twamono o mbote ya kukatula kithangana kya kukala kumoxi, ne mwene se ikalakalu yavulu. Twatendela we mbote ya kwolela kyoso kitutondala bengebenge se twamudilonga dimi dya ubhe. Mu mawusuku tusota kuxinganeka mu kima kituwabhela ku kizuwa, anga tusamba kwa Jihova phala ku musakidila.

Ngi zwela ni kidi kyoso kwila, nuka ngaxinganekene kwila ngejitena kusidivila kala mukunji wa ixi yengi mba kutunga mu jixi jamukwa. Maji, ngene musanguluka mu kumona kyebhi o ima yoso itena kubhita ni kikwatekesu kya Jihova. Ngene mu lembalala jinga o izwelu ya polofeta Jelemiya: “Jihova, tata, eye wa ngi tobhesa.” (Jel. 20:7) Jihova wangibhana maujitu avulu, wangibesowala mu ukexilu ki ngawufikile, kate mwene wakumbidila o vondadi yami ya kwendela mu kiphululu. Etu twayi mu ididi yavulu, o ingexile mu xinganeka m’ukulu ndenge. Twakundu jifiliyale javulu. Ngisakidila we kyavulu kazola kami Lesli mu kungikwatekesa mu ikalakalu yoso ingatambula.

Izuwa yoso tulembalala kwila, ima yoso tuyibhanga mukonda dya henda yetu kwa Jihova. O mabesá utwala nawu lelu alondekesa kyebhi kitwandadivwa mu kukala ni mwenyu wakalelaku kyoso Nzambi kyandajikula “o lukwaku lwe” ni kubhana o ima yoso yabhindamena o athu.—Jisá. 145:16.