1-2. Kala Lote ibhidi yebhi yene mudibhana nayu o Jikidistá lelu?

 KYOSO kitumona o ukexilu wayibha wa athu ku mundu yu, tudivwa kala kyexile mudivwa Lote. Mwene “wexile ni kuxixima kwa muxima, mukonda dya wendelu wayibha wa athu abhukumuka,” kuma wejidile kwila o Tata yetu ya dyulu wazembe o ukexilu yu. (2 Ph. 2:7, 8) O kuxila kyavulu Nzambi ni kumuzola, kwakwatekesa Lote kudituna o ukexilu wayibha wa athu amukondolokele. Etu we atukondoloka ku athu ene muxila ngo bhofele mba kene muxila o itumu ya Jihova. Ne kiki tutena kukala ni wendelu wa zele, se tusuluka mu ku zola Nzambi ni kudilonga kukala ni woma wa mwene mu ukexilu watokala.—Jisa. 14:2.

² Jihova utukwatekesa kubhanga kiki, bhukaxi ka itendelesu ya henda itusanga mu divulu dya Jisabhu. Jikidistá joso ja mayala ni ahatu, minzangala ni adyakime, atena kukatula mbote mu itendelesu ya divulu didi.

3. Kala kilondekesa Jisabhu 17:3, kima kyahi kitubhangesa kulanga o muxima wetu? (Tala we ofoto.)

³ Kima kimoxi kitubhangesa kulanga o muxima, o kwijiya kwila Jihova utonginina o mixima. Kiki kilombolola kwila Jihova ka difu ni athu atena kutala ngo o kidifwa kya kanga, maji mwene wejiya kyebhi kitwala moxi dyetu. (Tanga Jisabhu 17:3.) Se tuzalesa o muxima wetu ni itendelesu ya Jihova mwene wanda tuzola dingi ni kutubhana o mwenyu wakalelaku. (Nzw. 4:14) Se tubhanga kiki Satanaji ni mundu we, kanda tena kutukwata mba kutufwinyisa ni ukexilu we wayibha ni makutu me. (1 Nz. 5:18, 19) Kyoso kituya ni kuzukama dingi kwa Jihova, o henda yetu kwa mwene ni kuxila kwetu kwanda dibandekesa. Etu twazolo kyavulu Tata yetu Jihova, mukonda dya kiki, twazembe  kate mwene ngo o kixinganeku kya kuta kituxi. Kyoso kyanda tutendala phala kubhanga kima kyayibha, twanda kwimana ni kudibhwidisa, ‘Kyebhi kingitena kuluwalesa muthu walondekesa kya muveji javulu kwila wangizolo?’—1 Nz. 4:9, 10.

4. Kyebhi o woma wa Jihova wakwatekesa phang’yetu ya muhatu kudibhana ni tendasa?

⁴ Malata phange ya muhatu mu ixi ya Croácia, wadibhanene ni tendasa ya kuta undumbu, wasoneka: “Kya ngibhonzele kyavulu kuxinganeka kyambote, ni kutolola o hanji ya kubhanga kima kyayibha kyeji ngisangulukisa ngo kakithangana. Maji o woma wa Jihova wa ngilange.” b Maji kyebhi o woma wa Jihova wa kwatekesa Malata? Malata wambe kwila wa xinganeka mu ibhidi yeji dibhananayu mukonda dya kubhanga kima kyayibha. Etu twatokala kubhanga we kala kya bhange Malata. Twatokala kuxinganeka kwila kima kyayibha kinene kuluwalesa Jihova, ni kudibotesa o ujitu wa kumubheza kate ku hadya ni hadya.—Dim. 6:5, 6.

5. Ihi itwadilongo ni musoso wa phange Leo?

⁵ Kyoso kitukala ni woma wa Jihova, twandadilanga phala ki tusote kukala makamba a athu a bhanga ima yayibha. Phange Leo watungu mu ixi ya Congo, wadilongo o disá didi. Mu kubhita mivu iwana kyoso kya mu batizala, mwene wabhange ukamba ni athu exile mubhanga ima yayibha. Phange Leo wexile mubanza kwila, ki kyexile kima kyayibha kudilunga ni athu yo, se mwene kexile mubhanga o ima yayibha, mukonda kexile muta kituxi kwa Nzambi. Maji ki kulaleka kyavulu o makamba enyo amubhangesa kunwa uholwa wavulu ni kuta undumbu. Wamateka kuxinganeka mu ima yoso yamulongele o jitata je ni kisangusangu kyexile nakyu kyoso kyexile mubheza Jihova. Ihi yabhiti? Mwene wamateka dingi kubhanga o imbamba yambote. Ni kikwatekesu kya tufunga watena kuvutuka kwa Jihova. Lelu  mwene wasanguluka mu kusidivila kala kafunga ni muboki wakatunda.

6. Ahatu ebhi ayadi a atumbula mu divulu dya Jisabhu mu kibatulu 9?

⁶ Kindala tudilonge o kibatulu kya 9 kya divulu dya Jisabhu, kyene kizwela yalungu ni ahatu ayadi, umoxi ulombolola o unjimu, o wamukwa ulombolola o kutobha mba o ulaji. (Tala we Loma 5:14; Ngalásya 4:24.) Mu kudilonga o kibatulu kiki, lembalala kwila o mundu wa Satanaji a wabhela kyavulu kuta o undumbu ni kutala o ufusa. (Efe. 4:19) Mukonda dya kiki twatokala kusuluka mukukala ni woma wa Nzambi, ni kulenga o imbamba yayibha. (Jisa. 16:6) Kyenyiki etwenyoso kikale mayala ni ahatu, tutena kukatula mbote mu milongi itusanga mu kibatulu kiki. O ahatu ayadi ya, a ajimbulula kala amwixana yo o ilalu, kifwa o athu “a kambe kilunji.” Kyedi kala exile muzwela ‘ezenu kunu kubhata dyami phala kudya kama.’ (Jisa. 9:1, 5, 6, 13, 16, 17) Maji o yanda bhita ni athu axikina o kixanu kya muhatu mukwa unjimu ni yo axikina o kixanu kya muhatu dilaji mba watobho, ki yadifu.

7. Kala kilondekesa o divulu dya Jisabhu 9:13-18, ihi ibhita ni yo axikina o kixanu kya muhatu mukwa ulaji? (Tala we ofoto.)

⁷ Kyadyanga twanda mona o kixanu kibhanga o “muhatu wa dilaji.” (Tanga Jisabhu 9:13-18.) Mwene kala ni jisonyi ja kwixana yo “kambe kilunji” phala kudya mu kwamba, ezenu kuku. Ihi ibhita ni yo axikina o kixanu? O Bibidya yamba: “Bhenyobho bhene bhwa dilunjika o imbi.” Nange eye udilembalala kwila mu divulu dya Jisabhu tusangamu ifika ya mukwa yadifu ni yiyi. Mu kifika atudimuna yalungu ni muhatu “wakambe o kilunji”, ni mukwa “undumbu.” A tudimuna we kwila o inzo ya muhatu mukwa undumbu “i bhekesa kalunga.” (Jisa. 2:11-19) O divulu dya Jisabhu 5:3-10, dizwela dingi yalungu ni muhatu wamukwa mukwa “undumbu,” dyene dyamba kwila “o inama ye i kulumuka mu’alunga.”

8. Mu maka ebhi mu twabhingi kusola?

⁸ O yo evwa o kixanu kya “muhatu wa dilaji,” atokala kusola se anda xikina kumukayela mba kana. Nange etu we twanda bhinga kusola kima kala kiki. Mu kifika, ihi itwandabhanga se kumoneka muthu usota kutufwinyisa phala kuta undumbu, mba se mu kukalakala ni mutelembe kumoneka ufusa?

9-10. Ima yahi itubhangesa kulenga o nudumbu?

⁹ Kwala ima yavulu itubhangesa kulenga o undumbu. O “muhatu wa dilaji,” wamba kwila: “Menya ma kunyana ma towala kyengi.” Maji o “Menya ma kunyana” ihi? O Bibidya isokesa o ukexilu wa dyala ni muhatu a kazala kuzeka kumoxi kala menya a talala. (Jisa. 5:15-18) O diyala ni muhatu a kazala kala kitendelesa o itumu,  atena kukatula mbote mu ujitu wa kuzeka kumoxi kyadikya. Maji o “menya ma kunyana” a difu kyengi. Ene atena kulombolola diyala ni muhatu kuzeka kumoxi se kukazala kala kitendelesa o itumu. O athu abhanga kiki muveji javulu asota kudisweka, kala kibhanga o mwiyi unyana se kumumona ku akwa. Kyoso ene afika kwila seku muthu wanda tungula o kima kyabhange, o “menya ma kunyana” ya, mba o undumbu a umona kala wabeta o kutowala. Kilwezu kyadikota kubanza kiki! Jihova umona o ima yoso. Seku “kutowala” mukubhanga kiki, mu kidi o kudibotesa o ukamba we ni Jihova kima kyalulu kinene. (1 Ko. 6:9, 10) Maji kikyene ngo.

¹⁰ O kubhanga o undumbu kutena ku kubhekela jisonyi, ku kubhangesa kudivwa kala ki wala ni valolo, kwimita se ku ki mesena, ku mbandu yamukwa kutena kubhekela maka ku mwiji. Mu kidi, unjimu wadikota kudituna o kixanu kya muhatu wa dilaji. Katuku o kufwa mu nzumbi, kifwa o kutexi o ukamba wetu ni Jihova, athu avulu a dita mu undumbu, ene mukwata mauhaxi a abhekela o kufwa. (Jisa. 7:23, 26) O velusu 18 ya kibatulu 9 dya Jisabhu yamba: “O asonyi a muhatu mwenyo wa sanga oso bhu hole ya bombo dya kalunga.” Maji phe se o kixanu kya muhatu yu kibhekela kalunga, mukonda dyahi athu avulu a kixikina?—Jisa. 9:13-18.

11. Mukonda dyahi o ufusa kimbamba kyayibha kinene?

¹¹ Kima kimoxi kya dimwange mu nongo lelu, kitwatokala kudituna o ufusa. Sayi athu abanza kwila o kutala o ufusa ki kubhekele ibhidi. Mu kidi, o ufusa ubhekela ibhidi yavulu, ubhangesa o muthu kukamba kudixila, ni kuxila akwa, ku mbandu ya mukwa o kifwa kya kutala o ufusa kitena kubhonza kyavulu kukixisa. Kyoso o muthu kyatala o ufusa kimubhonza kyavulu kukatula o ixinganeku yiyi yabolo mu kilunji. O ku mbandu yamukwa o ufusa ki ubatula o jihanji ja undumbu, mu kidi jene jidibandekesa dingi. (Kol. 3:5; Tiy. 1:14, 15) Kiki kyene kibhangesa kwila o yo atala o ufusa a dita mukubhanga o undumbu.

12. Kyebhi kitutena kulenga o jifoto jitubhekela jihanji ja undumbu?

¹² Ihi yatokala kubhanga o Kidistá se mu mutelembe we mba komputadolo mu moneka foto, mba vidyu ya ufusa? Ni lusolo loso tutalela kwengi. Ki kyanda tubhonza kubhanga kiki se tulembala kwila o kima kyabeta kota ku mwenyu wetu, o ukamba wetu ni Jihova. Sayi jifoto ki ja ufusa kana, maji jitena kutubhekela jihanji ja undumbu. Mukonda dyahi twatokala kujilenga? Mukonda ki twamesena kubhanga kima ne wene kyofele ngo, kyeji tubhekela ixinganeku ya kubhanga o undumbu. (Mat. 5:28, 29) Sayi kafunga a mwixana Davidi wala mu ixi ya Tailândia wambe: “Sumbala o jifoto jiji ki ja ufusa, maji o kwila Jihova wanda sanguluka se ngisuluka mu kujitala? O kubanza kiki kungikwatesa kusola ni unjimu.”

13. Ihi itukwatekesa kubhanga o ima ni unjimu?

¹³ O woma wa kubhanga kima kyosokyoso kiluwalesa Jihova, wanda tukwatekesa kubhanga o ima ni unjimu. “O woma wa Jihova dyene o dimatekenu dya unjimu.” (Jisa. 9:10) O kidi kiki kidimonekena mu dimatekenu dya kibatulu 9 kya divulu dya Jisabhu, kizwela yalungu ni muhatu wamukwa wa kifika, amujimbulula kala “unjimu wa kidi.”

14. Kixanu kyebhi kya mukwa kitusanga mu divulu dya Jisabhu 9:1-6?

¹⁴ Tanga Jisabhu 9:1-6. Mu jivelusu jiji tusangamu kixanu kya Jihova, o Mubhangi wetu, yo wala ni unjimu woso. (Jisa. 2:6; Lom. 16:27) Jene jizwela yalungu ni inzo ya dikota yala ni sambwadi dya jingunji. O inzo yiyi yadikota itulembalesa kwila Jihova wa wabhela kubhana, ni kwila utambulula kyambote oso amesena kudilonga yalungu ni mwene n’a kale jinjimu.

15. Jihova wamesena kwila tubhanga ihi?

 ¹⁵ O musoso mu divulu dya Jisabhu kibatulu 9 utumbula muhatu wa wabhela kubhana, upelepalala kudya, walungu kya o vinyu bhwamoxi, yu wazale o meza. O muhatu yu “ulombolola o unimu wa kidi.” O phangu ye itulonga we kwila Jihova mukwa kubhana, o kidi kiki tukimona mu ima yoso yene mutubhana mwene. (Jisa. 9:2) Ku mbandu yamukwa, kala kilondekesa o jivelusu 4 ni 5, o muhatu wambela yo a kambe kilunji, wixi: “Zenu, mudye ku mbolo yami.” Mukonda dyahi twatokala kuxikina o kixanu kiki? Jihova wamesena kwila o an’e akala jinjimu. Mwene wandala kutulanga. Mwene kamesena kwila tuta itondalu itubhekela ibhidi, anga itubhangesa kudyela ku mwenyu wetu woso. Mukonda dya kiki o maka me atutangela kwila, “o unjimu wa kidi mwene wa ulundila oso emana mixima nzanza.” (Jisa. 2:7) Se tukala ni woma wa Nzambi mu ukexilu watokala, twanda mesena kumusangulukisa. Twanda kwivwa kyambote o itendelesu ye, twanda sanguluka we mu ku ikumbidila ku mwenyu wetu.—Tiy. 1:25.

16. Kyebhi o kukala ni woma wa Nzambi kwakwatekesa phange Alain kusola ni unjimu, ni ihi yabhiti mu kubhanga kiki?

¹⁶ Tala kyebhi o kukala ni woma wa Nzambi kwakwatekesa phange Alain kubatula o maka ni unjimu. O phange Alain kafunga mu kilunga, ni mulongexi mu xikola. Mwene wambe: “Jikoleka jami javulu exile mubanza kwila o jifilime ja ufusa, jexile mwalonga unjimu walungu ni diyala ni muhatu kuzeka kumoxi.” Maji phange Alain wejidile kwila kyokyo ki kyexile kidi. Mwene wambe dingi: “Kuma eme ngazolo Jihova, ni kwila ngene mumuxila kyavulu, ngaditunu kutala o jifilime jenyojo, ngajimbulula we ku jikoleka jami se mukonda dyahi ki ngeji xikina kutala o jifilime ja ufusa.” Mukubhanga kiki phange Alain wexile mu kumbidila o kitendelesu kya “unjimu wa kidi” kyalungu ni ‘ku ditela mu njila ya kilunji.’ (Jisa. 9:6) Sayi jikoleka ja phange Alain a diwane kyavulu ni ukexilu we wambote, kindala amudilonga o Bibidya ni kuya mu yonge.

17-18. Ima yahi yambote ibhita ni yo axikina o kixanu kya “unimu wa kidi,” ni ihi itena kukingila ene ku hadya? (Tala we ofoto.)

¹⁷ Bhukaxi ka phangu ya ahatu ayadi a atumbula mu divulu dya Jisabhu, Jihova utulondekesa kyebhi kitutena kukala ni kisangusangu kya kidi kumwenyu wetu. O yo axikina o kixanu kya muhatu “wa dilaji” a dikwatenena mu kusota o ima “ya towala” mba yosweke kala o undumbu. Ene asanguluka ngo ni mbote ya kindala, ka xinganeka mu ibhidi yandakala nayu ku hadya mukonda dya kubhanga o imbamba yayibha. O ukexilu wa, wayibha wanda kwabhekela “kalunga.”—Jisa. 9:13, 17, 18.

¹⁸ Maji ki kyene kyanda bhita ni yo axikina o  kixanu kya muhatu wa unjimu, kifwa “o unjimu wa kidi”! Mwene u pelepalala o kudya phala o ason’ye, yoso yabhindamena phala kusuluka mukukala ni ukamba wambote ni Jihova. (Iza. 65:13) Bhukaxi ka polofeta Izaya Jihova wambe: “Kwatenu kilunji mu ng’ivwe, nda mu dya kyawabha, o mwenyu wenu u tane ni ima yanete.” (Iza. 55:1, 2) Mukubhanga kiki twamudilonga kuzola o ima ya zolo Jihova ni kuzemba ya zembe mwene. (Jisá. 97:10) Tusanguluka we kyavulu mu kwixana akwetu phala kudilonga ni “unjimu wa kidi.” Kyedi kala, “twa mwa exana tunde bhu thal’elele ya dyembu, mu kwamba: ‘Woso wakambe unjimu eze kuku.’” O mbote phala etu mba yo axikina o kixanu kiki, ki ya kindala ngo, maji yanda nangenena kate ku hadya ni hadya. O mbote yiyi itukwatekesa kukala ni “mwenyu wakalelaku ni kusuluka mukwenda “mu njila ya kilunji.”—Jisa. 9:3, 4, 6.

19. Kala kilondekesa Ndongixi 12:13, 14, ihi itwatokala o kubhanga? (Tala we okaxa “ O Woma wa Nzambi Utubhekela Mbote.”)

¹⁹ Tanga Ndongixi 12:13, 14. O woma wa Nzambi wanda tukwatekesa kusuluka mu kulanga o muxima wetu ni kuzela mu kilunji ni mu nzumbi mu izuwa yiyi ya sukidilaku ya mundu yu wayibha. Twanda suluka mu kwixana athu avulu phala kudilonga ni “unjimu wa kidi,” tubhanga kiki mukonda twala ni woma wa Jihova mu ukexilu watokala ni kwila twamuzolo ni muxima woso.