1. Kala kizwela o divulu dya 1 Phetele 5:2, kikalakalu kyahi kyala nakyu o tufunga?

 O TUFUNGA atambula o kikalakalu kya kulanga o jimbudi jangene ja Jihova. O mayala ya afiyele a bhana valolo yavulu ku ujitu walanawu wa kusidivila o jiphange ja. Mukonda dya kiki ene abhanga nguzu yavulu phala kukala “tufunga” twambote. (Jel. 23:4; tanga 1 Phetele 5:2.) Etu twasakidila kyavulu mukukala ni mayala ya, mu ilunga!

2. Ibhidi yebhi nange itena kudibhana nayu o tufunga?

² Mu kukumbidila o kikalakalu kya abhana Jihova, o tufunga a dibhana ni ibhidi yavulu. Mu kifika, ene abhingi kukalakala kyavulu phala kulanga o kilunga. Phange Tony, kafunga watokala mu ixi ya Estados Unidos, wabhingile kutonginina se weji xikina dingi ikalakalu mba kana. Mwene wajimbulula: “Kyoso kyamateka o uhaxi wa COVID-19, eme ngexile mukalakala kyavulu mu kusokejeka o yonge ni sidivisu ya kuboka. Maji ne mwene ni nguzu yoso ingexile mubhanga, o ikalakalu yexile mudibandekesa dingi. Mukonda dya kiki, ngamateka kulanduka o kudilonga o bibidya, kudilonga ubheka ni kusamba.” Phange Ilir, kafunga mu ixi ya Kosovo, wadibhana ni kibhidi kyengi. Kyoso kyexile bhu kididi, mwexile mubhita ita, kya mubhonzele kyavulu kubelesela o itendelesu ya kilunga. Mwene wajimbulula: “Eme ngexile ni woma wavulu kyoso o jiphange ku Betele kya ngisolo phala kuya bhu kididi bhwexile ilwezu yavulu, phala kukwatekesa o jiphange. Ngi zwela ni kidi kyoso kwila, kwa ngikambele kuswina, o kitendelesu kyokyo kyedile kala ki kyeji bhana.” Phange Tim, mukunji wa jixi jengi mu ixi ya Ásia, kyexile mu mubhonza kyavulu kubhanga o ikalakalu ya kizuwa ni kizuwa. Mwene wambe: “ Sayi ithangana ngexile mutohoka kyavulu, mukonda dya kiki, kyexile mu ngibhonza ku kwatekesa o jiphange”. Ihi itena kukwatekesa o tufunga amudibhana ni ibhidi yadifu kiki?

3. Phangu yebhi yatuxila o mufundixi Ngidiyone?

 ³ O tufunga atena kudilonga ni phangu ya mufundixi Ngidiyone. (Jih. 6:12; 11:32) Mwene wexile mulanga ni kuyinga o mundu wa Nzambi. (Afun. 2:16; 1 Mal. 17:6) Kala kyabhiti ni Ngidiyone, o tufunga atambula o kikalakalu kya kulanga o mundu wa Nzambi mukithangana kyabhonzo. (Ika. 20:28; 2 Ti. 3:1) Ngidiyone watuxila phangu yambote yalungu ni kuditulula, kulenduka ni kubelesela. Mwene wabhingile kukolokota mu sidivisu ye kwa Jihova. Kikale se tu tufunga mba kana, etwenyoso tutena kubhana valolo mu yoso yene mubhanga o tufunga twetu. Etu tutena we kukwatekesa o jiphange jiji ene mukalakala ni nguzu yoso phala kulanga o kilunga.—Jih. 13:17.

4. Kyebhi Ngidiyone kyalondekesa kwila wexile muthu walenduka?

⁴ Ngidiyone wexile muthu walenduka. b Kyoso o anju ya Jihova yatangela Ngidiyone kwila, amusolele phala kubhulula o kifuxi ya Izalayele bhu maku a akwa Midiyana, ni kulenduka kwoso mwene watambwijila: “O kibuka kya vumu dya tat’etu, kyene kyala ndenge mu mwiji wa Manasa, o mu bhata dya tat’etu, eme-eme ngala ngi kasule kâ.” (Afun. 6:15) Ngidiyone wadivwile kwila, ki mwene wafwamene phala kubhanga o kikalakalu kiki, maji Jihova wejidile kwila wejitena kukibhanga. Ni kikwatekesu kya Nzambi, Ngidiyone waditundu kyambote mu kikalakalu kyamubhanene.

5. Mu ithangana yebhi kitena kubhonza phala o tufunga kulondekesa o kidifwa kya kulenduka?

⁵ O tufunga abhanga nguzu yavulu phala kukala athu alenduka ithangana yoso. (Mik. 6:8; Ika. 20:18, 19) Ene kene mudizangeleka mukonda dya uhete wa mba dya ima yene mubhanga; kene we mudivwa kwila kala ni valolo mukonda dya itondalu ya. Maji phe sayi bhabha, o tufunga kyene mwabhonza kulondekesa o kidifwa kiki. Mu kifika, nange o kafunga uxikina ikalakalu yavulu, maji kupholo kimubhonza kukumbidila yene yoso, mba kitena kwabhonza kulondekesa o kulenduka kyoso phange umuximana, maji o phange yamukwa umutatela mukonda dya ukexilu we wa kukalakala. Kyebhi o tufunga kyatena kukayela o phangu ya Ngidiyone?

6. Kyebhi o tufunga kya atena kukayela o kulenduka kwa Ngidiyone? (Tala we ofoto.)

⁶ Bhinga kikwatekesu. O muthu walenduka wejiya kwila sayi ima kanda tena ku ibhanga.  Kuma walendukile, Ngidiyone wabhingile kikwatekesu ku akwa. (Afun. 6:27, 35; 7:24) Kima kyambote se o tufunga abhanga we kiki. Phange Tony twamutumbula kudima, wambe: “Mukonda dya ukexilu wangi sase, ngexile muxikina kutambula ikalakalu yavulu ne mwene se ki ngeji tena ku ibhanga yene yoso. Kyenyiki mu ubhezelu wetu kumwiji twasolo kudilonga o kidifwa kya kulenduka, ngebhwidisa we muhatu wami se ihi i banza mwene yalungu ni maka enya. Eme we ngatale dingi lwamukwa o vidyu, Longa, Dyelela ni Kubhana Kikalakalu ku Akwenu Kála kya Bhangele Jezú.” Phange Tony wamateka kuwana o ikalakalu ni jiphange jamukwa mu kilunga. Ihi yabhiti? Mwene ututangela: “O ikalakalu mu kilunga, amwilanga kyambote, ni kwila eme ngala dingi ni kithangana phala kukolesa o ukamba wami ni Jihova.”

7. Kyebhi o tufunga kya atena kukayela o phangu ya Ngidiyone kyoso kya atatela? (Tiyaku 3:13)

⁷ Kana kufutuluka kyoso kya kutatela. Kibhidi kyamukwa kitena kudibhana nakyu o tufunga, o kwatatela. Lwamukwa dingi, o phangu ya Ngidiyone itena kukwatekesa. Kuma Ngidiyone wejidile we kwila wexile mukwa ituxi, kyoso o akwa Efalayime kya mutatela, mwene watambwijila ni kutululuka kwoso. (Afun. 8:1-3) Ngidiyone kexile ni njinda. Mwene walondekesa o kulenduka mu kwa evwa ni mwanyu woso; mukubhanga kiki, wa akwatekesa kutululuka. Kima kyambote o tufunga kukayela o phangu ya Ngidiyone kyoso kya atatela, mu kwivwa kyambote o muthu, ni kutambwijila ni kutululuka kwoso. (Tanga Tiyaku 3:13.) Mukubhanga kiki ene akwatekesa o kilunga kukala ni kutululuka.

8. Kyebhi kyatokala kudivwa o tufunga kyoso kya aximana? Bhana phangu.

⁸ Bhana o kijingu kyoso kwa Jihova. Kyoso Ngidiyone kya muximana mu kubhulula o kifuxi bhu maku akwa Midiyana, mwene wabhana o kijingu kyoso kwa Jihova. (Afun. 8:22, 23) Kyebhi o tufunga kya atena kukayela o phangu ya Ngidiyone? Ene atokala kujingisa Jihova, mu yoso yene mubhanga. (1 Ko. 4:6, 7) Mu kifika, se kafunga amuximana mukonda dya uhete we wa kulonga, mwene utena kuzwela kwila waditundu ngo kyambote mukonda dya Maka a Nzambi, mba dya itendelesu ibhana o kilunga kya Jihova. Sayi ithangana o tufunga atokala kuditonginina phala kumona se amulonga mu ukexilu ubhana kijingu kwa Jihova, inga amudijingisa ene mwene. Tala ihi yabhi ni kafunga amwixana Timothy. Ki kwabhitile luwa thembu yavulu tunde kya musolele kala kafunga, mwene wa wabhelele kubhanga madiskulusu. Phange Timothy wambe: “Ngexile mubhanga madiskulusu ni ifika yalebha yabhingile ku ijimbulula kyavulu. Mukonda dya kiki, jiphange javulu exile mu ngi ximana. Maji phe muveji dyakubhana kijingu kwa Jihova mba ku Bibidya, exile mu ngibhanakyu eme.” Kupholo dya kwenda, phange Timothy wamono kwila wabhingile kulungulula o ulongelu we, phala ehe kudibhana kijingu. (Jisa. 27:21) Mbote yahi yejila mukubhanga kiki? Mwene wajimbulula: “Kindala o jiphange a ngi tangela kyebhi o diskulusu di nga bhange dya akwatekesa kubatula maka, kudibhana ni ibhidi, mba dya azukamesa dingi kwa Jihova. Eme nga sanguluka dingi, mukonda o jiphange a ximana dingi o diskulusu muveji dya ku ngiximana.”

9. Mukonda dyahi Ngidiyone kya mubhonzele kubelesela ni kuswina? (Tala ofoto yakapa.)

⁹ Kyoso Ngidiyone kyamusolo kala mufundixi mu Izalayele, mwene wa bhingile kubelesela ni kuswina, maji o kiki kya mubhonzele. Amubhele kikalakalu kyabhonzo kya kubula o kalatódyo ka Bahale katokalele kwa tat’e. (Afun. 6:25, 26) Mukusuluka muveji jiyadi, Jihova watendelesa Ngidiyone kusosolola o kifuxi kya masoladi. (Afun. 7:2-7) Mwene we amutendelesa  kuya mubhanga ni jinguma je mu kaxi ka usuku.—Afun. 7:9-11.

10. Mu ithangana yebhi kitena kubhonza ku tufunga kubelesela?

¹⁰ O tufunga atokala kukala polondo phala ‘kubelesela.’ (Tiy. 3:17) O kafunga u belesela, ka laleka mu kukayela o itendelesu ya Bibidya ni ya kilunga kya Jihova. Mu kubhanga kiki mwene ubhana phangu yambote ku akwa. Maji sayi ithangana kitena kubhonza kubelesela. Mu kifika, sayi bhabha o tufunga atambula itendelesu yavulu mba phe yene ilunguluka ni lusolo. Mu ithangana yamukwa, o tufunga atena kukala ni phata se o kitendelesu kyatambula kyandabhana mwene. Mba phe nange ene amona kwila se axikina o kikalakalu kya abhana o kilunga, andakala mu kilwezu kya ku ata mu kaleya. Kyebhi o tufunga kyatena kukayela o kubelesela kwa Ngidiyone mu ithangana yiyi?

11. Ihi itena kukwatekesa o tufunga kubelesela?

¹¹ Ivwa kyambote ni ukayela o itendelesu. Jihova watendelesa Ngidiyone kyebhi kyeji bula o kalatodyo ka tat’e, kwebhi kweji tungila o kalatodyo ka ubhe ni kyama kyebhi kyeji satela bhu. Ngidiyone ka dikalanganza mukonda dya itendelesu yamubhele Jihova, muveji dya kiki mwene wa belesela ngo. Mu izuwa yetu o kilunga kya Jihova kitumikisa mikanda, jingolokela, ni itendelesu phala o tufunga kwijiya kyebhi kyanda kwatekesa o jiphange mu xitu ni mu nzumbi. Etu twazolo kyavulu o tufunga mukonda ene abelesela o itendelesu yiyi ni ufiyele woso. O kiki kibhekela mbote mu kilunga kyoso.—Jisá. 119:112.

12. Kyebhi o tufunga kyatena kukayela o kitendelesu kyala mu divulu dya Jihebelewu 13:17 kyoso kyatambula itendelesu ya ubhe?

¹² Kala polondo phala kulungulula o ima. Lembalala kwila Jihova watendelesele Ngidiyone, kusosolola o kifuxi phala kuxala ngo ni masoladi ofele. (Afun. 7:8) Nange Ngidiyone waxinganekene: ‘O kwila kwabhingi mwene kusosolola o masoladi? Yiyi ndunge yambote mwene?’ Ne kiki, Ngidiyone wabelesela. Lelu o tufunga akayela o phangu ya Ngidiyone mukubelesela o itendelesu ibhana o kilunga kya Jihova, ne mwene kyoso kiyilunguluka. (Tanga Jihebelewu 13:17.) Mu kifika, mu muvu wa 2014, o Kibuka kya Utuminu kyalungulula o ukexilu wa kusangela o kitadi phala kutunga o Ididi ya Ubhezelu, ni ididi ya Yonge ya Ilunga. (2 Ko. 8:12-14) M’ukulu o kilunga kyexile musobhesa kitadi phala o jiphange kutunga o Kididi kya Ubhezelu mba Kididi kya Yonge ya Ilunga, kudisukilu o jiphange jiji asangela o kitadi phala kukivutula. Maji kindala, o ididi yiyi a itunga ni kitadi kisangela o ilunga yoso ku mundu, ne mwene se o jiphange a bhindamena o kididi kala ni kitadi kya soko. Kyoso phange Zuze kyeza mukwijiya kuma o ima yalunguluka mu ukexilu yu, kya mubhonzele ku kixikina, mwene wabanze: ‘Ki twanda tena kutunga ne ngo kididi kimoxi kya Ubhezelu. Etu kuku ki twene mubhanga o ima mu ukexilu yu.’ Maji ihi ya kwatekesa phange Zuze kukayela o kitendelesu kiki kya ubhe? Mwene wambe: “O izwelu itusanga mu divulu dya Jisabhu 3:5, 6 ya ngilembalesa kwila,  ngabhingile kudyelela kwa Jihova. O ukexilu yu wamubhangesa o ikalakalu kwenda kyambote! Etu twamutunga dingi Ididi ya Ubhezelu mu ukulu ndenge, twamudilonga we maukexilu a ubhe a kusangela, amukwatekesa kate mwene o jiphange ala mu jixi mwala wadyama wavulu, kukala we ni Ididi ya ya Ubhezelu.”

13. (a) Kidyelelu kyebhi kyexile nakyu Ngidiyone? (b) Kyebhi o tufunga kyatena kukayela o phangu ye? (Tala we ofoto.)

¹³ Bhanga o vondadi ya Jihova ni kuswina kwoso. Ngidiyone wabelesela Jihova, ne mwene kyoso kyexile ni woma, ni kyoso mwenyu we wexile mu kilwezu. (Afun. 9:17) Kyoso Jihova kyamuswinisa, Ngidiyone wadyelele ni kidi kyoso kwila, mwene weji mukwatekesa kulanga o mundu wa Izalayele. O tufunga atungu mu jixi mwafidisa o kikalakalu kyetu, ene mukayela o phangu ya Ngidiyone. Ni kuswina kwoso ene a sokejeka o yonge ni sidivisu ya kuboka, sumbala ejiya kwila atena ku afundisa, ku ata mu kaleya, ku akaya ku salu mba ku abeta. c Mu kithangana kya hadi yadikota, o tufunga andabhinga we kuswina phala kubelesela o itendelesu yanda tambula, ne mwene se kubhonza kubhanga kiki. O itendelesu yiyi nange yalungu ni kyebhi kitutena kuboka o njimbu ya kufundisa mba ihi itwatokala kubhanga phala kubhuluka ku kizukutisu kya Ngongo dya Mangongo.—Ize. 38:18; Dij. 16:21.

14. Mu maka ebhi kyabhonzele phala Ngidiyone kukolokota?

¹⁴ Phala kusidivila kala mufundixi mu Izalayele Ngidyone wabhingile kukala ni nguzu yavulu mu xitu. Kyoso akwa Midiyana kya lenge bhukaxi ka usuku, Ngidiyone wayi ni ku akaya tunde ku honga ya Jizelele kate ku ngiji ya Njolodá, kwenyoko nange o ngiji a ikondolokele ku yangu ni minya. (Afun. 7:22) O kwila Ngidiyone wasukila bhu ngiji ya Njolodá? Kana! Sumbala ni kubhwila, mwene ni 300 ja masoladi me, asuluka mu kukaya o jinguma. Mukusukaku ene atena kukwata akwa Midiyana ya a atolola.—Afun. 8:4-12.

15. Mu ithangana yebhi nange o tufunga abhingi kukolokota?

¹⁵ O kafunga wabhingi kukolokota, phala kulanga  o kilunga ni mwiji we. Mukonda dya ikalakalu yavulu yala nayu, sayi ithangana mwene utena kubhwila mu xitu ni mu kilunji. Mu maka enya, kyebhi o tufunga kyatena kukayela o phangu ya Ngidiyone?

16-17. Ihi ya kwatekesa Ngidiyone kukolokota, ni kidyelelu kyebhi kitena kukala nakyu o tufunga? (Izaya 40:28-31) (Tala we ofoto.)

¹⁶ Dyelela kwila Jihova wanda kukolokotesa. Ngidiyone wadyelele kwila, Jihova weji mubhana nguzu, kyene mwene phe kyabhiti. (Afun. 6:14, 34) Sayi kizuwa Ngidiyone ni masoladi me, akaye sobha jiyadi ja akwa Midiyana. O jisobha jenyojo, nange exile mukwendela mu jikamelu, maji Ngidiyone ni kifuxi kye exile mukwendela bhoxi. (Afun. 8:12, 21) Ni kikwatekesu kya Jihova, ene atena kukwata o jisobha, ya atolola o ita. Kyene kimoxi we, o tufunga atena kudyelela kwa Jihova, yo “kene kuzônda, kene kubhwila.” Mwene wanda kwabhana o nguzu yabhindamena.—Tanga Izaya 40:28-31.

¹⁷ Tala o phangu ya phange Matthew, kafunga watokala mu kibuka Kikwatekesa o Jiphange mu Ididi Yakusaka. Ihi yamukwatekesa kukolokota? Mwene wambe: “Ngamono o kikumbidilu kya izwelu itusanga mu divulu dya Filipe 4:13. Ithangana yoso kyoso kingexile mu tohoka, ngexile musamba ni kuswina kwoso kwa Nzambi mu kumubhinga o nguzu mu xitu, ni mu kilunji phala ngitene kukwatekesa o jiphange jami. Mu ithangana yiyi ngexile mumona kwila Jihova wexile mu ngibhana o nzumbi ye ikola, phala kungikolokotesa.” Kala Ngidiyone, o tufunga twetu ene mukalakala ni nguzu yavulu phala kulanga o jimbudi ja Jihova ne mwene kyoso o ima ibhonza kyavulu. Kidi kwila ene atokala kulenduka, ni kuxikina kwila kanda tena kubhanga o ima yoso yamesena. Ene atena kudyelela kwila Jihova wanda kwivwa o misambu ya, ni kwabhana o nguzu yabhindamena phala kukolokota.—Jisá. 116:1; Fil. 2:13.

18. Kala kitwadilongo mu milongi yiyi, kyebhi o tufunga kyatena kukayela o phangu ya Ngidiyone?

¹⁸ Kala kitwamono, o tufunga atena kudilonga kyavulu mu phangu ya Ngidiyone. O tufunga atokala kulenduka mu kusola se anda xikina dingi ikalakalu mba kana, atokala we kubhanga kiki kyoso kya aximana mba a atatela. Ene atokala kuswina ni kubelesela, bengebenge mu kwijiya kwila o dizubhilu dya mundu yu dya zukama. Atokala we kudyelela kwila kabasa kibhidi kya dibhana nakyu, Jihova wanda kwaswinisa. Kala kizwela o Bibidya, tu ‘kolokota mu kubhana valolo ku athu kala ene,’ twawabhela kyavulu yoso yene mubhanga o tufunga twetu.—Fil. 2:29.