1-2. Mukonda dyahi kima kyambote kudilonga o musoso wa Sasawu?

 IHI i ubanza kyoso ki wivwa o dijina dya Sasawu? Nange uxinganeka yalungu ni diyala dya kexile ni nguzu yavulu. Kiki kidi mwene. Maji Sasawu wabhange kima kyayibha kyamubhekela hadi yavulu. Maji ne kiki, Jihova wadikwatenena ku yoso yabhange Sasawu mu sidivisu yê, yu wa sonekesa mu Bibidya yoso yabhange mwene, phala o mbote yetu.

² Jihova watumu Sasawu phala kukwatekesa o mundu wê, akwa Izalayele. Mu kubhita jihama jamivu kyoso Sasawu kyafu, Jihova watumu poxolo Phawulu kusoneka o dijina dya Sasawu kumoxi ni majina akamukwa a mayala a kixikanu. (Jih. 11:​32-34) O musoso wa Sasawu utuswinisa. Mwene wadyelele kwa Jihova, ne mwene mu ithangana yabhonzo. Tudilonge kyebhi o musoso wa Sasawu utena kutuswinisa ni kutulonga milongi itukwatekesa mu kizuwa ni kizuwa.

3. Kikalakalu kyahi kyatambula Sasawu?

³ Kyoso Sasawu kyamuvwala, akwa Fidixa akexile mutumina akwa Izalayele ni ku a zukutisa. (Afun. 13:1) Akwa Izalayele atale hadi yavulu mukonda akwa Fidixa ayibhile kyavulu. Jihova wasolo Sasawu phala ‘kubhulula akwa Izalayele bhu maku akwa Fidíxa.’ (Afun. 13:5) Kyokyo kyexile kikalakalalu kyabhonzo! Phala kutena kubhanga o kikalakalu kiki, Sasawu wabhingile kudyelela kwa Jihova.

4. Kyebhi Jihova kyakwatekesa Sasawu kudijituna bhu maku a akwa Fidixa? (Afundixi 15:​14-16)

⁴ Tala kima kimoxi kilondekesa kyebhi Sasawu kya dyelela  kwa Jihova, yu wasoto o kikwatekesu kyê. Sayi kizuwa, masoladi akwa Fidixa endele mu kwata Sasawu mu dyembu dya Leyi nange mu mbanza ya Juda. O mayala akwa Juda akexile ni woma, mukonda dya kiki abhana Sasawu ku jinguma. Sasawu amukutu kwala o mundu we ni jingoji jiyadi ja ubhe, ya amubheka ku akwa Fidixa. (Afun. 15:​9-13) Maji ‘o nzumbi ya Jihova ya bhana kutena’ kwa Sasawu, mwene wadijituna. Mu kusuluka “wasange lunganzwanza lwa jumendu” walukatula yu wa jibha nalu 1.000 ya mayala akwa Fidixa!—Tanga Afundixi 15:​14-16.

5. Kyebhi Sasawu kyalondekesa kwila wa dyelele kwa Jihova?

⁵ Mukonda dyahi Sasawu wakatula lunganzwanza lwa jumendu? Ki wexile uta wakubhânga nawu kana! Sé phata, Sasawu wejidile kwila Jihova weji mukwatekesa kutolola akwa Fidixa ni uta wosowoso. Kidi, o diyala didi dya fiyele wakwata kima kyosokyoso kyakexile nakyu bhu maku phala kubhanga o vondadi ya Jihova. Mukonda dya kudyelela kwa Jihova, Sasawu amubesowala, watena kutolola o jinguma!

6. Mu kubhanga o ikalakalu yetu mu kilunga, o musoso wa Sasawu utulonga kima kyahi?

⁶ Jihova utena we kutubhana nguzu phala kubhanga o ikalakalu yetu kate ni ikalakalu yoyo yedi kala yabhonzo kyavulu. Nzambi utena kutukwatekesa. Dyelela kwila Jihova, wabhana nguzu kwa Sasawu, wandakukwatekesa kubhanga o vondadi Yê se ulengela kwa mwene ni kumubhinga kikwatekesu.—Jisa. 16:3.

7. Kima kyahi kilondekesa kwila twatokala kusota o itendelesu ya Jihova?

⁷ Jiphange javulu, ja mala ni ja ahatu, akwatekesa mu kutunga ididi ya ubhezelu, ene mulondekesa kwila adyelela kwa Jihova. M’ukulu, o jiphange akexile mu sokejeka ni kutunga kifwa o Ididi yoso ya Ubhezelu ni ididi yakamukwa. Maji kupholo dya kwenda, kuma athu avulu amwabatizala, o kilunga kya Jihova kyabhingile kulungulula o ukexilu wa kukalakala. O jiphange ala ku pholo, asambe mu kubhinga unjimu kwa Jihova  ya afikisa kukalakala mu ukexilu wengi, mu kifika kusumba jinzo ni kujifwamesa kyambote. Phange Robert wene mu kakalakala mu kutunga ididi yavulu ku mundu woso, wambe kiki: “Ku dimatekenu, kwabhonzele kukalakala mu ukexilu wengi. Mu mivu yavulu twexile kya ni ukexilu wetu wa kukalakala. Maji o jiphange alungulula o ukexilu wâ wakukalakala, ni kwila yoso itwene mumona ilondekesa kwila Jihova wamubesowala o ukexilu waubhe wakukalakala.” Kiki kifika ngo kimoxi kilondekesa kwila Jihova wamukwendesa o mundu wê phala kubhanga o vondadi yê. Kithangana ni kithangana, kima kyambote kudibhwidisa: ‘O kwila ngamusota o itendelesu ya Jihova? Ngala polondo phala kulungulula o ukexilu wami phala ngitene kumusidivila kyambote?’

8. Kyoso Sasawu kyakexile ni dinyota, ihi yabhange mwene?

⁸ Nange eye wamulembalala ima yamukwa yakatunda yabhangele Sasawu. Ni maku mê, mwene wajibha hoji, wajibha we 30 a mayala akwa Fidixa mu mbanza ya Axikilone. (Afun. 14:​5, 6, 19) Sasawu wejidile kwila kejitena kubhanga o ima yoyo se o kikwatekesu kya Jihova. Twamuzwela kiki mukonda sayi kizuwa kyoso kyajibhile 1.000 akwa Fidixa, mwene wakexile ni dinyota dyavulu. Ihi yabhange mwene? Muveji dya kudisotela menya mwene mudye, Sasawu wadikola kwa Jihova yu wamubhingi kikwatekesu. —Afun. 15:18.

9. Ihi yabhange Jihova kyoso Sasawu kyabhingi kikwatekesu? (Afundixi 15:19)

⁹ Jihova watambwijila Sasawu, wabhange madiwanu yu wamubhana menya. Kyoso Sasawu kyanu o menya, “nguzu ya vutuka mu mukutu, mwene anga uswina dingi.” (Tanga Afundixi 15:19) Nange o fixi yiyi ya menya, yakexileku hanji mivu ku pholo kyoso polofeta Samuwele kyasoneka o divulu dya Afundixi. O akwa Izalayele amono o menya amufwafwa, nange alembalala kwila se adyelela kwa Jihova, mwene wanda kwatekesa o abhezi’ê a fiyele mu ibhindamu yâ.

10. Ihi itwatokala o kubhanga phala Jihova kutukwatekesa? (Tala we ofoto.)

¹⁰ Etu wetu twatokala kubhinga o kikwatekesu kya Jihova ne mwene se twadimono kwila twala ni uhete wavulu, unjimu, mba twabhange kya ima yavulu mu sidivisu ya Jihova. Twatokala kwijiya kwila tutena ngo kubhanga yoso itubhinga Jihova se twamudyelela. Sasawu wakexile ni nguzu ku mukutu kyoso kyazubha kunwa o menya yamubhana Jihova. Etu we twanda kala ni nguzu mu nzumbi kyoso kitukatula mbote ku yoso yene mutubhana Jihova.—Mat. 11:28.

11. Kyebhi phange Aleksey kyalondekesa kwila wadyelela kwa Jihova, ni kyebhi kitutena we kubhanga kiki?

¹¹ Tala o musoso wa phange Aleksey, watokala mu ixi ya Russya, mwene wamubhita mu izukutisu yabhonzo. Ihi yene mu mukwatekesa kukala ni nguzu phala kukolokota mu ibhidi yiyi? Mwene ni muhatu we, atanga o Bibidya izuwa yoso. Mwene wambe kiki: “Ngisota jinga kudilonga o Bibidya ubheka ni ku itanga izuwa yoso. Kimene ni kimene, muhatu wami n’eme tutanga o velusu ya kizuwa ni kusamba kumoxi kwa Jihova.” Kiki kitulonga ima yahi? Muveji dya kudyelela mu nguzu yetu, twatokala kudyelela kwa Jihova. Kiki kibhita kyebhi? Kiki kibhita mu kubhanga ima itukwatekesa kukolesa o kixikanu kyetu, ima kala kudilonga o Bibidya, kusamba, kuya mu yonge ni kuboka. Mu kiki, Jihova wandatubhana nguzu phala tukolokote mu kumusidivila. Mwene wabhana nguzu kwa Sasawu, se phata wandatena we kutubhana nguzu.

12. Kima kyahi kyayibha kyabhange Sasawu? Kyebhi o ukamba wê ni Dalila wadifwile kyengi?

¹² Sasawu wexile mukwa ituxi kal’etu. Mukonda dya kiki kwexile ithangana mwene kabhange ima yambote. Sayiku kima kyabhange mwene, kyamubhekela windwa wadikota. Kyoso Sasawu kyakalakalele kala mufundixi mu tumivu twofele, mwene “weza mu kuwabhela muhatu watungile mu honga ya Soleke, amwixana Dalila.” (Afun. 16:4) Ithangana kudima, Sasawu wamesenene kukazala ni muhatu mukwa Fidixa. Jihova wamutendelesa kubhanga kala kyamesenene, mukonda Mwene wexile musota ndunge phala kutolola akwa Fidixa.” Ku pholo dya kwenda, Sasawu wakexile monzo ya kidyanzunga mu mbanza ya Ngaza mu ixi ya Fidixa. Mu kithangana kyenyokyo, Nzambi wabhana kutena kwa Sasawu phala kuvuza o mabhitu a mwelu wa mbanza, yu wayixisa sé kifikidilu. (Afun. 14:​1-4; 16:​1-3) Maji o maka a Dalila exile engi, mukonda mwene nange wexile mukwa Izalayele.

13. Ihi yabhange Dalila kwa Sasawu?

¹³ Dalila amubana kitadi kyavulu kwala akwa Fidixa phala kusumbisa Sasawu. Nange mukonda dya kwila wa wabhelele kyavulu Dalila, mwene katenene kutongolola ihi yandalele kubhanga Dalila. Maji kikale se kyene mba kana, Dalila mu veji javulu wajijidika Sasawu kumutangela kwebhi kwakexile mutunda o nguzu yê, mukonda dya kiki, Sasawu wamutangela o kikutu. Kuxixima kwadikota! O kitondalu kya Sasawu kyamubhangesa kubhwa o nguzu mu mukutu, yu wabhiti we ithangana sé o kikwatekesu kya Jihova. —Afun. 16:​16-20.

14. Ihi yabhiti ni Sasawu mukonda dya mwene kudyelela kwa Dalila?

¹⁴ Sasawu watale hadi yavulu mukonda dya  kudyelela kwa Dalila mu veji dya kudyelela kwa Jihova. Akwa Fidixa akwata Sasawu ya amukubula o mesu. Amute mu kaleya mu mbanza ya Ngaza. Sayi kizuwa Sasawu watobhesele o mundu wa mbanza yenyoyo, wavuzile o mabhitu a mbanza. Maji kindala, akwa Ngaza amute phala kuzuka jimbutu. Mu kusuluka Sasawu amutobhesa kyoso akwa Fidixa kyadyongeka phala kubhanga fesa. Ene abhana sata yadikota ku nzambi yawu yamakutu amwixana Dangoni, mukonda phala ene, Dangoni mwene wa akwatekesele kukwata Sasawu. Atubhula Sasawu mu kaleya, ende-ne kate bhwakexile o fesa phala ‘kumutobhesa.’—Afun. 16:​21-25.

15. Kyebhi Sasawu kyalondekesa kwila wadyelele dingi kwa Jihova? (Afundixi 16:​28-30) (Tala ofoto yakapa.)

¹⁵ Sasawu watondala kyavulu, maji wasuluka mu kusidivila Jihova. Mwene wasoto kithangana phala kubhanga o kikalakalu kyamubhana Nzambi, o kikalakalu kya kubhânga ni akwa Fidixa. (Tanga Afundixi 16:​28-30.) Sasawu wadyondo kwa Jihova: “Ngehele kuvutula phonzo ku akwa Fidíxa.” O Nzambi ya kidi watambwijila o musambu wa Sasawu yu wamubhana dingi o nguzu yakexile nayu. Mukonda dya kiki, Sasawu mu kithangana kiki wabhange dingi ima yavulu ku akwa Fidixa mu ithangana yamukwa ndenge.

16. Ihi itutena o kudilonga ku kitondalu kya Sasawu?

¹⁶ Sumbala Sasawu watale hadi yavulu mukonda dya itondalu yê, maji mwene kalembwa kubhanga o vondadi ya Jihova. Ne mwene se tutondala, anga atubazela ni kutukatula ujitu utwexile nawu mu kilunga, kitutokala kweha kusidivila Jihova. Ijiyakyu kwila, Jihova kanda tweha kana. (Jisá. 103:​8-10) Sumbala ni itondalu yetu, Jihova utena kutubhana nguzu phala kubhanga o vondadi yê kala kyabhana nguzu kwa Sasawu.

17-18. Mukonda dyahi o musoso wa phange Mingedi ukuswinisa kyavulu? (Tala we ofoto.)

¹⁷ Tala o musoso wa munzangala, phang’yetu Mingedi. Mwene wakexile ni ikalakalu yavulu mu kilunga, wexile mukwatekexi wa tufunga ni muboki wa thembu yoso. Maji mwene watondala, mukonda dya kiki amutambula o ikalakalu yoso yakexile nayu mu kilunga. Mwene wambe kiki: “Ngakexile ni ikalakalu yavulu mu sidivisu ya Jihova. Maji mu kithangana ni mbandu, ngamono kwila kingitenene dingi kubhanga kima mu kilunga.  Nuka ngabanzele kwila Jihova weji ngibhana dikunda, mukonda dya kiki, ngakexile mu banza; O kwila ngandatena dingi kukala ni ukamba wambote ni mwene? O kwila ngandatena dingi kumusidivila kyambote mu kilunga?”

¹⁸ Twaximana phange Mingedi mukonda mwene keha kusidivila Jihova. Mwene wambe dingi: “Ngabhange yoso ni yoso phala kukolesa o ukamba wetu ni Jihova, ngakexile musamba izuwa yoso, kudilonga ni kuxinganeka ku yoso i ngexile mudilonga.” Mu kubhita kithangana, phange Mingedi watambula dingi o ikalakalu yakexile nayu mu kilunga. Lelu mwene kafunga ni muboki wa thembu yoso. Mwene wambe kiki: “O kikwatekesu ni kiswinisu kingatambula, bengebenge ku tufunga, kyangikwatekesa kumona kwila Jihova wangizolo hanji. Ngamutena dingi kusidivila mu kilunga ni muxima wa zele. Yoso yiyi yangilongo kwila Jihova wandaloloka muthu wosowoso wadyela mu kidi.” Tutena kudyelela kwila Jihova wandatubhana ikalakalu ni kutubesowala we se twatondala. Maji wandatuloloka ngo se tubhanga yoso ni yoso phala kulungulula o wendelu wetu ni kusuluka kudyelela kwa mwene.—Jisá. 86:5; Jisa. 28:13.

19. Mu ukexilu webhi o musoso wa Sasawu ukuswinisa?

¹⁹ Mu mbandu yiyi, twabhitulula bhofele o musoso wa Sasawu. Mwene wexile mukwa ituxi maji mwene keha kusidivila Jihova nemwene kyoso kyatondala ni Dalila. Maji Jihova wasuluka kubhana ikalakalu kwa Sasawu. Lwamukwa dingi, Jihova wabhana kikalakalu kyakatunda kwa Sasawu. Jihova wamumono hanji kala diyala dya kixikanu kyadikota, wamutumbula mu kaxi ka mayala exile jifiyele kala kyosoneke mu divulu dya Jihebelewu kibatulu 11. Kiswinisu kyadikota kwijiya kwila twamubheza Tat’etu ya dyulu wezala ni henda, wamesena kutubhana nguzu kotelele kyoso kitubhwila! Mu kyenyiki, kala kyabhange Sasawu, tudyonde kwa Jihova: “Nga kudyondo, ngilembalale, ngibhane nguzu.”—Afun. 16:28.