1. Kikalakalu kyebhi kyabhana Jihova kwa Phetele ande dya kufwa?

 O POXOLO Phetele wejidile kwila, ki kweji laleka kyavulu wejifwa. Mwene wasidivila ni ufiyele woso, waxinjikila Jezú mu ukunji we, wamateka o kikalakalu kya kuboka mu ididi yavulu, yu wabhangele mbandu ku kibuka kya utuminu. Maji o kikalakalu kye ki kyabhwile luwa. Mu mivu ya 62-64 K.K., ni kikwatekesu kya Jihova, mwene wasoneka mikanda iyadi —o divulu dya 1 ni 2 dya Phetele. Mwene wamesenene kwila o mikanda yiyi ikwatekesa o Jikidistá ne mwene kyoso kyeji fwa.—2 Ph. 1:​12-15.

2. Mukonda dyahi twamba kwila o mikanda ya Phetele a isoneka mu kithangana kyatokala?

² Kyoso Phetele kyasoneka o mikanda yiyi, o jiphange exile mudibhana ni ‘ibhidi yavulu.’ (1 Ph. 1:6) Sayi mayala exile ni ixinganeku yayibha, abheka ilongesu ya makutu ni wendelu wabolo mu kilunga. (2 Ph. 2:​1, 2, 14) Kwakambele ngo o Jikidistá ejidibhana ni “dizubhilu dya ima yoso”—kifwa akwa Loma ejibwika o mbanza ya Jeluzaleme ni unguvulu wa Jijudé. (1 Ph. 4:7) Se phata, o mikanda ya Phetele yakwatekesa o Jikidistá kukala polondo phala kudibhana ni ibhidi yenyoyo, ni yamukwa yeji kwiza kupholo. b

3. Mukonda dyahi twatokala kubhana valolo mu mikanda Phetele?

³ Sumbala Phetele wasoneka o mikanda phala o Jikidistá atungile mu thembu yenyoyo, maji Jihova wabhangesa kwila  yene ikala we mu Bibidya. Kyenyiki, etu we tutena kukatula mbote mu mikanda yiyi. (Lom. 15:4) Etu twatungu ku mundu wezala ni wendelu wabolo, mwaxaxi ka athu kene mu sidivila Jihova. Mukonda dya kiki, twene mudibhana ni ibhidi yavulu, kate sayi bhabha kitubhonza kusidivila Jihova. Ku mbandu yamukwa, kwakambe ngo twandadibhana ni hadi yadikota, o yabhitile nayu o Jijude ndenge. Kyenyiki o itendelesu mu mikanda iyadi ya Phetele, yala ni valolo yavulu phala etu. Yene itukwatekesa kusuluka mu kukingila o kizuwa kya Jihova, kutolola o woma wa athu, ni kudizola kyavulu mudyetu. O itendelesu yiyi itena we kukwatekesa o tufunga kulanga kyambote o ibhindamu ya jimbudi.

4. Kala kyolondekese mu divulu dya 2 Phetele 3:​3, 4, ihi yejitena kuzozesa o kixikanu kyetu?

⁴ Etu atukondoloka ku athu kene muxikina mu ikanenu ya Bibidya. Amoxi ene mutusebhulula mukonda twene muboka mu mivu yavulu kwila o dizubhilu dya mundu didiza. Amoxi amba kwila o dizubhilu nuka dyanda kwiza. (Tanga 2 Phetele 3:​3, 4.) Kyoso kitwivwa o izwelu yiyi, nange bhukaxi ka muthu mu ukunji, koleka ya xikola, ya salu mba ndandu, o kixikanu kyetu atena ku kilola. Phetele wajimbulula se ihi itena kutukwatekesa.

5. Ihi yandatukwatekesa kusuluka mu kukingila ni mwanyu o dizubhilu? (2 Phetele 3:​8, 9)

⁵ Amoxi atena kudivwa kwila Jihova wamulaleka mu kubheka o dizubhilu dya mundu yu wayibha. Maji o izwelu ya Phetele itukwatekesa kutala o ima mu ukexilu watokala, mukonda itulembalesa kwila o ukexilu wa Jihova kutala o kithangana ki wadifu ni wa athu. (Tanga 2 Phetele 3:​8, 9.) Phala Jihova, midi ya mivu yedi kala kizuwa kimoxi. Jihova mukwa mwanyu, ka mesena kwila kukala muthu amubwika. Maji mu kithangana kyatokala, Jihova wandazubha o kuyibha kwoso. Etu twala ni ujitu wadikota wa kubokela o athu oso mu ngongo, mu kithangana kiki kyatusubhukaku.

6. Ihi itutena kubhanga phala tusuluke mu “kuxinganeka” o kizuwa kya Jihova? (2 Phetele 3:​11, 12)

⁶ Phetele watutendelesa kusuluka mu “kuxinganeka” o kizuwa kya Jihova. (Tanga 2 Phetele 3:​11, 12.) Kyebhi kitutena kubhanga kiki? Kima kyambote kuxinganeka —se kibhana, izuwa yoso —mu mabesá utwanda tambula ku mundu wa ubhe. Dixinganeke mu kididi kyafwama, wamubhwima munza wazele, wamudya kudya kwayuka, ni kusangesa o jindandu je jakazola jafukunuka. Mba phe kulonga athu exile ku mwenyu m’ukulukulu, yalungu ni kyebhi kyadikumbidila o ikanenu ya Bibidya. Kuxinganeka mu ima yiyi kyanda kukwatekesa kusuluka mu kukingila, ni kudyelela kwila o dizubhilu dyazukama mwene. O “kudyanga kya kwijiya o ima yiyi” yalungu ni hadya, kutulanga phala ‘ka tu jimbidise’ ku makutu a mundu yu.—2 Ph. 3:17.

7. Ihi itena kubhita mukonda dya woma wa athu?

⁷ Twejiya kwila o kizuwa kya Jihova kyazukama, kyenyiki twamesena kubhanga yoso itutena phala kuboka o njimbu yambote ku akwetu. Maji sayi ithangana nange tutena kukala ni hele yakuzwela. Mukonda dyahi? Mukonda tutena kukala ni woma wa athu, kala kyabhiti ni Phetele. Mu usuku kyoso kyexile mu fundisa Jezú, Phetele walembwa kudilondekesa kala dixibulu dye, yu waditunu mu veji jitatu kwila kexile dikamba dya Jezú. (Mat. 26:​69-75) Maji  Phetele watolola o woma. Kupholo, mwene wasoneka: “Kimukale ni wôma wa ima ya akwatesa wôma, ki mu thandanganye.” (1 Ph. 3:14) O izwelu ya Phetele itudyelelesa kwila, tutena we kutolola o woma wa athu.

8. Ihi itena kutukwatekesa kutolola o woma wa athu? (1 Phetele 3:15)

⁸ Ihi itena kutukwatekesa kutolola woma wa athu? Phetele wambe: “Ximanenu Kidistu mu mixima yenu, kala Ngana yenu.” (Tanga 1 Phetele 3:15.) Kiki kyalungu ni kuxinganeka mu ujitu ni kutena kwa Ngana yetu o Sobha, Jezú Kidistu. Kyoso kikumoneka kithangana phala kubokela akwenu o njimbu yamote, o kwila wene mukala ni woma? Se kyene, Lembalala o Sobha yetu. Mu kithangana kiki, xinganeka Jezú wamutumina ku dyulu, amukondoloka ku mazunda a jianju. Lembalala kwila mwene wala ni “kutena kwoso . . . ni mu dyulu ni mu ngongo,” yu wakanena kwila “nganda kala ni enu izuwa yoso, katé ku dizubhilu dya mundu.” (Mat. 28:​18-20) Phetele utuswinisa kukala “jinga polondo” phala kuzwela yalungu ni kixikanu kyetu. O kwila wamesena kubokela muthu, ku salu, ku xikola, mba kididi kyengi? Xinganeka hanji se mu kithangana kyebhi mu wamesena kubhanga kiki, ni usokejeke iwandazwela. Samba phala uswine, dyelela kwila Jihova wanda kukwatekesa kutolola o woma wa athu.—Ika. 4:29.

9. Sayi kithangana, kyebhi Phetele kyalweza mu kulondekesa o henda? (Tala we ofoto.)

⁹ Phetele wadilongo kyebhi kyatena kulondekesa o henda. Mwene wexilebhu kyoso Jezú kyazwela: “Ngi mi bhana kitumu kya ubhe: Dizolyenu mudyenu. Kala ki nga mi zolo eme, enu-wenu dizolyenu mudyenu.” (Nzw. 13:34) Ne mwene kiki, ithangana kupholo Phetele waditunu kudya ni jiphange kexile Jijudé, mukonda dya woma wa Jikidistá exile Jijudé. O poxolo Phawulu wambe kwila o ukexilu yu wa Phetele wexile wa “mangonya.” (Nga. 2:​11-14) Phetele waxikina kyamubazela, ni wakatulaku mbote. Mu mikanda ye iyadi, mwene wazwela kyavulu kwila, ki twatokala ngo kukala ni henda ku jiphange jetu, maji twatokala ku ilondekesa.

10. Ihi itena kutukwatekesa kulondekesa ‘henda ku jiphange sé mangonya’? (1 Phetele 1:22)

¹⁰ Phetele wambe kwila ‘o henda yetu ku jiphange ikala sé mangonya.’ (Tanga 1 Phetele 1:22.) Phala kukala ni henda yiyi ku jiphange twabhingi “kutumaka o kidi.” Kiki kyalungu ni kidi kya kwila “Nzambi ki mukwa katombo.” (Ika. 10:​34, 35) Etu kitweji belesela o kitumu kya Jezú se tweji zola ngo amoxi mu kilunga, o amukwa kana. Kidi kwila, tutena kukala ni ukamba wakolo dingi ni amoxi, amukwa kana, kala wexile nawu Jezú ni amoxi ku jipoxolo je. (Nzw. 13:23; 20:2) Maji Phetele watulembalesa kwila twatokala kubhanga nguzu phala kukala ni “henda ku jiphange joso mu ngongo.” Twamesena kuzola o jiphange jetu joso mukonda ene abhanga mbandu ku mwiji wetu.—1 Ph. 2:17

11. Ihi ilombolala o kudizola mudyetu “ni kufulujuka kwoso ni muxima woso”?

¹¹ Phetele watuswinisa ‘kudizola mudyetu ni kufulujuka kwoso ni muxima woso.’ Bhabha o “kudizola mudyetu ni kufulujuka,” kulombolola kuzola muthu ne mwene kyoso kikubhonza kumulondeksa o henda. Mu kifika, ihi iweji bhanga se phange ukuxinga mba ukuluwalesa? Nange kudimatekenu, tweji mesenena kumubhanga kyayibha muveji dya kumulondekesa henda. Maji Phetele wadilongo ni Jezú kwila o ukexilu yu ki usangulukisa Jihova. (Nzw. 18:​10, 11) Phetele wasoneka: “Kanenu kuvutula phulu ni phulu, né ndaka ni ndaka. Muveji dya kiki, woso wa mibhange phulu, mu mubesowala.” (1 Ph. 3:9) Se uzola kyavulu o jiphange, wanda bhanga mbote kwa ene oso, ne mwene se bhu kala muthu ukutalatala kyayibha, eye wanda sota kumutendela.

12. (a) O kudizola mudyetu ni kufulujuka kwoso kutukwatekesa kubhanga ihi? (b) Kala kyolondekese mu vidyu Mantenha a União Cristã, nguzu yahi itutena kubhanga?

¹² Mu mukanda we wadyanga, Phetele watumbula o izwelu ‘kudizola ni kufulujuka kwoso.’ O henda kala yiyi, itukwatekesa kuloloka kana ngo ituxi yofele, maji “nzungule dya ituxi.” (1 Ph. 4:8) Nange Phetele wadilembalele yadilongele ni Jezú mivu kudima, yalungu ni kuloloka. Mu kithangana kyoso Phetele kya zwela kwila o phange watokala uloloka mukwa “sambwadi dya jiveji,” mwene wafikile kwila wexile mubhanga mbote. Maji Jezú walongo kwa Phetele —ni etwenyoso —kuloloka kate “makwinyi a sambwadi ni sambwadi dya jiveji,” kifwa ithangana yoso. (Mat. 18:​21, 22) Se kyene mukubhonza kukumbidila o kitendelesu kiki, kana kuluwala! Etwenyoso sayi ithangana kyene mutubhonza kuloloka. O kyabeta kota o kubhanga yoso i utena phala kuloloka phang’ye ni kukala ku paze ni mwene. c

13. Ihi itena kubhonzesa o tufunga kusanga kithangana phala kuswinisa o jiphange?

¹³ Se phata Phetele nuka wadijimbi yamutangela Jezú kyoso kyafukunuka: “Inga o tumbudi twami.” (Nzw. 21:16) Se eye u kafunga, wejiya kwila o izwelu yiyi yakutokala we. Kidi kwila kitena kubhonza phala o kafunga, kusanga kithangana phala kubhanga o kikalakalu kiki kyakatunda. O tufunga atokala kudyanga kulanga o miji yawu, mu xitu, mu kilunji, ni mu nzumbi. Ene we atokala kubhana phangu yambote mu kuboka, ni mukusokejeka ni kubhanga o jimbandu jawu mu yonge mu kilunga, yonge ya ilunga, ni yonge ya makota. Amoxi hanji a kalakala mu Kibuka Kikwatekesa o Jiphange mu Jinzo Jakusaka, mba mu kibuka kya kutunga (LDC). Se phata, o tufunga ala ni ikalakalu yavulu!

14. Ihi itena kukwatekesa o tufunga ku inga o kilunga? (1 Phetele 5:​1-4)

¹⁴ Phetele watendelesa o tufunga kwila, “ingenu o kilunga kya Nzambi.” (Tanga 1 Phetele 5:​1-4.) Se eye u kafunga, twejiya kwila wazolo o jiphange, ni kwila wamesena ku alanga kyambote. Maji sayi bhabha, utena kutohoka kyavulu mba kukala ni ima yavulu ya kubhanga ikubhonzesa kukumbidila o kikalakalu kiki. Ihi i utena o kubhanga? Tangela Jihova kyebhi ki wamudivwa. Phetele wasoneka: “Woso usidivila, asidivile mu kudyelela mu kutena kubhana Nzambi.” (1 Ph. 4:11) Nange o ibhidi yamudibhana nayu o jiphange, ki yandabhwa ku mundu yu. Maji lembalala kwila “o kafunga kadikota,” Jezú Kidistu, utena ku akwatekesa mu ukexilu wabeta dingi kota, eye ndenge. Mwene utena kukibhanga kikale kindala mba ku mundu wa ubhe. Jihova wamesena ngo kwila o tufunga, azola o jiphange, a inga, ni kubhana “phangu yambote ku kilunga.”

15. Sayi kafunga, kyebhi kyene mu inga o kilunga? (Tala we ofoto.)

¹⁵ Phange William, wala kya kafunga mu mivu yavulu, wejiya o valolo ya ku inga o jiphange. Kyoso kya mateka o dibhebhu dya COVID-19, mwene ni tufunga twamukwa, abhange yoso phala kuzwela ni jiphange joso mu ibuka yawu, semana joso. Mwene wajimbulula se mukonda dyahi: “Jiphange javulu exile ubheka mu mabhata, kyenyiki ki kyeji  kwabhonza kukala ni ixinganeku yayibha.” Kyoso phange mu kilunga kyakala ni ibhidi, phange William umwivwidila kyambote, phala kutendela kyebhi kyamudivwa ni ihi yabhindamena. Mu kusuluka mwene usota milongi, mba vidyu mu sayite jw.org, phala kuswinisa o phange. Mwene wambe: “Kindala twabhindamena dingi kukunda o jiphange m’ukulu ndenge. Twene mubhanga nguzu yavulu phala kukwatekesa o athu kejiya luwa Jihova, mu kiki twabhingi we kubhanga o nguzu yeniyi phala kukwatekesa o jiphange jetu kusuluka mu kubheza Jihova.”

16. Mu maukexilu ebhi mututena kukumbidila o madisá utwadilongo mu mikanda ya Phetele?

¹⁶ Kate bhabha, twamono ngo ima yofele itutena kudilonga mu mikanda iyadi ya Phetele. Nange mu kudilonga wamono kwila sayi kima kiwatokala kulungulula ku mwenyu we. Mu kifika, o kwila wamesena kuxinganeka dingi mu mabesá uwanda tambula ku mundu wa ubhe? O kwila utena kuxinda o mbambe ya kubhana umbangi ku salu, ku xikola, mba mu ukexilu wengi? O kwila utena kusota maukexilu a kulondekesa dingi o henda ye ku jiphange? Enu mu tufunga, o kwila mwandabhanga yoso phala ku inga o jimbudi ja Jihova ni muxima woso? Ditonginine ni kidi kyoso, ni umone bhebhi bhu watokala kulungulula. O “Ngana muthu wambote,” mwene wanda ku kukwatekesa kulungulula bhwoso bhwa bhingi. (1 Ph. 2:3) Phetele watudyelelesa, wixi: “Nzambi . . . wanda zubha o ku milonga. Mwene wanda mi swinisa, wanda mikolesa ni ku mi kolokotesa.”—1 Ph. 5:10.

17. Mbote yahi itwanda katula se tu kolokota, anga twehela kwila Jihova utulonga?

¹⁷ Ku dimatekenu, Phetele wafikile kwila ka fwamene kukala ni Jezú. (Luk. 5:8) Maji ni kikwatekesu kya henda kya Jihova ni Jezú, Phetele wakolokota, yu wasuluka mu kukayela Jezú. Mukonda dya kiki Phetele watambula o ujitu wa kubokona “mu Utuminu wakalelaku wa Ngana yetu ni Mubhuludi, Jezú Kidistu.” (2 Ph. 1:11) Didi dyexile dibesá dya katunda! Kala kyabhange Phetele, se wehela we Jihova kukulonga, wandatambula we o ujitu wa mwenyu wa kalelaku. Kyenyiki eye wanda ‘kumbidila o mbambe ya kixikanu kye, kifwa o kubhuluka kwe.’—1 Ph. 1:9