1. Kyebhi kyadivu Phetele kyoso Jezú kyamubhangesa kukwata jimbiji javulu bhu kaxi ka madiwanu?

 PHETELE wabhitile o usuku woso mu kutamba maji ka tenene kukwata mbiji. Maji bhenyobho, Jezú wa mwambela: “Ndé ku mbandu yazongo, mutakule o mawanda phala kutamba.” (Luk. 5:4) Phetele kafikile kwila wejikwata mbiji, maji ne kiki wabhange yamutangela Jezú. Mu kusuluka, ene akwata jimbiji javulu kate o mawanda amateka kutanduka mukonda dya kunema kwa jimbiji. Mu kumona o ima yoso yiyi, Phetele ni yo exile ne, “adiwana kyavulu.” Phetele wambe, wixi: “Ngana, tunda bhu mbandu yami, mukonda ngi mukwa ituxi.” (Luk. 5:​6-9) Tutena kumona kwila Phetele, wexile mudivwa kwila kafwamene kukala ne ngo bhu mbandu ya Jezú.

2. Mukonda dyahi kima kyambote kudilonga o phangu ya Phetele?

² Phetele wazwela o kidi—wexile mwene “mukwa ituxi.” O Bididya ilondekesa kwila sayi ithangana, mwene wazwelele ni wabhangele ima yamubhangesa kudyela. O kwila wadivwile we kya kala Phetele? O kwila wamesena kulungulula kima ku ukexilu we, mba wala ni kifwa kyayibha kyamukubhonza kukitolola? Se kyene, utena kusanga kuswina mu kudilonga o phangu ya Phetele. Kyebhi? Xinganeka ngo: Se Jihova wa kyandalele, wejibhangesa kwila o itondalu ya Phetele ka isoneke mu Bibidya. Maji, a isoneka mu Bibidya phala tutene kukatulaku mbote. (2 Ti. 3:​16, 17) Kudilonga yalungu ni diyala didi wexile mutondala kala etu, kitukwatekesa kumona kwila Jihova ka kingila kwila tubhanga o ima ni kuyuka. Mwene wamesena kwila tukolokota —tusuluka mukubhanga nguzu, sumbala ni itondalu yetu.

3. Mukonda dyahi ki twatokala kubhwila?

³ Mukonda dyahi twabhingi kukolokota? Mukonda kyoso  kitukolokota mukubhanga kima, tutena kuditunda kyambote. Mu kifika: Se o muthu wamesena kwijiya kuxika mbanza, nange wandabhinga kudilonga mu mivu yavulu kate kyandakala hete. Mu kithangana kyenyiki, mwene wandatondala kyavulu, maji se usuluka mu kudilonga, wanda kwijiya kuxika kyambote. Maji ne mwene se wejiya kya kuxika kyambote, sayi ithangana, wanda lweza hanji. Maji ne kiki, mwene kandabhwila, kana. Mwene usuluka mu kuxika, phala kubandekesa o uhete. Kyene kimoxi we, ne mwene se twatolola kya o kifwa kyayibha kitwexile nakyu, nange tutena hanji kuvutuka mu kitondalu kiki. Maji twatokala kusuluka mu kubhanga nguzu. Etwenyoso twene muzwela mba kubhanga ima itubhangesa kudyela; maji o kyabeta kota, o kukamba kubhwila. Jihova wandatukwatekesa kuditunda kyambote. (1 Ph. 5:10) Kindala twandamona o phangu ya kukolokota ya Phetele. O henda yalondekesa Jezú kwa Phetele sumbala ni itondalu ye, itena kutukwatekesa kusuluka mu kusidivila Jihova.

4. Kala kilondekesa Luka 5:​5-10, kyebhi Phetele kyexile mudimona, maji ihi yamudyelelesa Jezú?

⁴ O Bibidya ki izwela se mukonda dyahi Phetele wexile mudimona kala “mukwa ituxi” mba ituxi yebhi yexile muxinganeka. (Tanga Luka 5:​5-10.) Maji nange mwene watele itondalu ya makota. Jezú wejidile kwila Phetele wexile ni woma, mukonda nange mwene wexile mudivwa kwila ka fwamene kukala ni Jezú. Maji Jezú wejidile kwila Phetele wejitena kusuluka mu kukala fiyele. Kyenyiki ni henda yoso Jezú watangela Phetele: ‘Kana kukala ni woma.’ O izwelu yiyi yalungulula o mwenyu wa Phetele, yene yalondekesa kwila Jezú wamudyelele. Ithangana kupholo, Phetele ni phang’ye Mandele a xisa o kikalakalu kya kutamba, ya adibundu ni Jezú mu ukunji. Jihova wa abesowala kyavulu. —Mál. 1:​16-18.

5. Mabesá ebhi atambula Phetele mu kutolola o woma we, ni kuxikina o kixanu kya Jezú?

⁵ Phetele wamono ima yavulu ya katunda mu kukayela Kidistu. Mwene wamono Jezú kusaka jihaxi, kukaya madimonyo, kate mwene ni kufukununa athu. b (Mat. 8:​14-17; Mál. 5:​37, 41, 42) Phetele wamono we kisumwa kya Jezú kala Sobha ya Utuminu wa Nzambi. Se phata mwene nuka wadijimbi o ima yamono mu kizuwa kyenyokyo. (Mál. 9:​1-8; 2 Ph. 1:​16-18) Phetele wamono ima yavulu keji tena ku imona se kexile dixibulu dya Jezú. Ni kidi kyoso, Phetele wasangulukile kyavulu mu  kutolola o ixinganeku yoyo yayibha, ni kutambula mabesá avulu a Jihova!

6. O kwila Phetele watololola o itondalu ye ni lusolo lwoso? Jimbulula.

⁶ Sumbala wamwene ni wevwile ima yavulu kyoso kyexile ni Jezú, Phetele wexile hanji mudibhana ni itondalu ye. Tumone ngo jiphangu. Kyoso Jezú kyajimbulula kwila weji tala hadi ni kufwa phala kukumbidila ikanenu ya Bibidya, Phetele wamutangela kwila kiki ki kyejibhita. (Mál. 8:​31-33) Mu veji javulu, Phetele ni jipoxolo jamukwa azoko se nanyi wabetele dingi kota mudya. (Mál. 9:​33, 34) Mu usuku ande dya Jezú kufwa, Phetele wabhange ima se kuxinganeka yu wabatula ditwi dya diyala. (Nzw. 18:10) Mu usuku wenyo hanji, Phetele wexile ni woma wavulu, yu waditunu mu veji jitatu kwila kexile dikamba dya Jezú. (Mál. 14:​66-72) Kiki kyabhangesa Phetele kudila kyavulu. —Mat. 26:75.

7. Kyoso kyamufukununa kithangana kyahi kyabhana Jezú kwa Phetele?

⁷ Phetele wadivwile kyayibha mu kima kyabhangele, maji Jezú ka mubhana dikunda. Kyoso kyamufukununa, Jezú wabhana kwa Phetele o kithangana kya kulondekesa o henda ye kwa mwene. Jezú wabhana kwa Phetele o kikalakalu kya kukala mubhidi walenduka wa jimbudi je. (Nzw. 21:​15-17) Kiki kyene mwene kyabhange Phetele. Mwene wexile mwaxaxi ka yo a dyangele kwa unda ni nzumbi ikola mu Jeluzaleme, mu kizuwa kya Pendekoxi.

8. Kitondalu kyebhi kyadikota kyete Phetele kyoso kyexile ku Andiyokiya?

⁸ Ne mwene kyoso kyakituka Kidistá am’undile, Phetele wexile hanji mudibhana ni itondalu ye. Mu muvu wa 36 K.K., Nzambi watumikisa Phetele kwa Kolonelyu, diyala kexile Judé. Bhenyobho, Kolonelyu am’undu ni nzumbi ikola, kiki kyalondekesa ni kidi kyoso kwila “Nzambi ki mukwa katombo,” ni kwila o yo kexile Jijudé ejitena we kubhanga mbandu ya kilunga kya Jikidistá. (Ika. 10:​34, 44, 45) Mu kusuluka Phetele wamateka kudya ni yo kexile Jijudé. Kima nuka wakibhangele ku mwenyu we. (Nga. 2:12) Maji, sayi Jikidistá Jijudé, exile mudivwa hanji kwila, ka tokalele kudya kumoxi ni yo kexile Jijudé. Kyoso amoxi ku Jikidistá exile ni ibanzelu yenyoyo kyabhixila ku Andiyokiya, Phetele weha kudya ni jiphange kexile Jijudé. Mwene nange wexile ni woma wa kuluwalesa o jiphange exile Jijudé. Poxolo Phawulu wamono o mangonya a Phetele, yu wamubazela bhu pholo dya mundu. (Nga. 2:​13, 14) Sumbala ni kitondalu kiki, Phetele kabhwila, maji wakolokota. Ihi yamukwatekesa?

9. Kyebhi o divulu Nzwá 6:​68, 69 dilondekesa kwila Phetele wexile muthu wa fiyele?

⁹ Phetele wexile fiyele; mwene kehela kima kimufidisa kukyela Jezú. Mu kifika, sayi kizuwa mwene walondekesa o ufiyele we, kyoso o maxibulu kya lembwele kutendela kima kyazwelele Jezú. (Tanga Nzwá 6:​68, 69.) Avulu, muveji dya kukingila kwajimbulwila o maka, eha kukayela Jezú. Maji ki kyene kyabhange Phetele. Mwene watendela kwila Jezú ngo wexile ni “maka a mwenyu wakalelaku.”

10. Kyebhi Jezú kyalondekesa kwila wadyelele kwa Phetele? (Tala we ofoto.)

¹⁰ Jezú ka bhana dikunda kwa Phetele. Mu usuku we wasukina mu ixi, Jezú wejidile kwila Phetele ni maxibulu amukwa eji muxisa. Ne kiki, Jezú watangela Phetele kwila wejidile kuma mwene wejimukala fiyele. (Luk. 22:​31, 32) Jezú wejidile kwila “o muthu wamesena kubhanga o kima kyatokala, maji o mukutu-phe wabhwila.” (Mál. 14:38) Mukonda dya kiki, sumbala Phetele waditunu  Jezú, maji mwene kaxisa poxolo ye. Kyoso kyamufukununa, Jezú wamutukulukila—nange kyoso Phetele kyexile ubheka. (Mál. 16:7; Luk. 24:34; 1 Ko. 15:5) Kiki se phata kyaswinisa kyavulu Phetele, waluwalele mukonda dya itondalu yatele!

11. Kyebhi Jezú kyadyelelesa kwa Phetele kwila Jihova weji mulanga?

¹¹ Jezú wadyelelesa Phetele kwila Jihova weji mulanga. Kyoso Jezú kyamufukununa, wabhange dingi madiwanu a bhangesa Phetele ni jipoxolo jamukwa, kukwata ndumba dya jimbiji. (Nzw. 21:​4-6) O madiwanu enya, se phata adyelelesa Phetele kwila ki kyejibhonza phala Jihova kudikila o ibhindamu ye yoso. Nange mwene wadilembalala o izwelu ya Jezú kwila Jihova wejilanga o ibhindamu ya yo ‘adyanga kusota o Utuminu wa Nzambi.’ (Mat. 6:33) O ima yoso yiyi, yakwatekesa Phetele kuta o sidivisu ya kuboka kupholo, muveji dya kikalakalu kye kya kutamba o jimbiji. Mwene waboko ni kuswina kwoso mu kizuwa kya Pendekoxi kya 33 K.K., mu kukwatekesa athu avulu kuxikina o njimbu yambote. (Ika. 2:​14, 37-41) Kupholo dya kwenda, mwene wa kwatekesa akwa Samadiya ni yo kexile Jijudé, kudilonga dingi yalungu ni Kidistu. (Ika. 8:​14-17; 10:​44-48) Tutena kumona kwila, Jihova wakwatekesa kyavulu Phetele kubheka athu a maukexilu oso mu kilunga.

12. Kyebhi o phangu ya Phetele itena kutukwatekesa, se twamudibhana ni kitondalu kyabhonzo mu thembu yevulu?

¹² Jihova utena kutukwatekesa kukolokota. Sayi ithangana kitena kubhonza kukolokota, bengebenge se twamudibhana ni kitondalu mu thembu yavulu maji ki twamutena ku kitolola. Nange tumona kala o itondalu yetu yabhonzo dingi o yadibhanene nayu Phetele ndenge. Maji Jihova utena kutubhana nguzu phala ki tubhwile. (Jisá. 94:​17-19) Mu kifika, tala o phangu ya phange ya diyala wexile ni kifwa kya kuzeka ni mayala ni akwa mu mivu yavulu, ande dya kukituka Mbangi ya Jihova. Mwene walungulula o mwenyu we, yu wamateka kubelesela o itumu ya Bibidya. Maji ne kki, sayi ithangana wene mudibhana luwa ni jihanji ja ibha. Maji ihi imukwatekesa kukolokota? Mwene wambe: “Jihova ungiswinisa. Ni kikwatekesu kya nzumbi ikola . . . , Ngadilongo kwila ngitena [kusuluka] mu njila ya kidi . . . Sumbala ni itondalu yami, Jihova wene musuluka mu kungibhana ikalakalu ni kungikolokotesa.”

13. Kyebhi kitutena kukayela o phangu ya Phetele, kala kyolondekese mu Ikalakalu 4:​13, 29, 31? (Tala we ofoto.)

 ¹³ Phetele wate itondalu mukonda dya woma wa athu. Maji mwene wexile musamba mu kubhinga nguzu, yu watena kulondekesa o kuswina. (Tanga Ikalakalu 4:​13, 29, 31.) Etu we tutena kutolola o woma. Tala yabhiti ni phange Horst, munzangala watungile mu ixi ya Alemanha mu kithangana kya Ita ya Kayadi Yabhiti ku Mundu Woso. Mu kithangana kyenyokyo o athu exile mwajijidika kumenekena mu kwamba, “Hitler wanda kutubhulula.” Sumbala phange Horst wejidile kwila o umenekenu yu wexile wayibha, mukonda dya woma wa alongexi a xikola ni jikoleka, mwene watumbula we o izwelu yenyoyo!” Kyoso kyakitangela ku jitata je, ene ka mubazela, muveji dya kiki, asambe kumoxi mu kubhinga kwa Jihova n’amubhane o kuswina. Ni kikwatekesu kya jitata je, ni kudyelela kwa Jihova, Horst wasange nguzu phala kukolokota. Kupholo, mwene wambe: “Jihova nuka wangixisa.” c

14. Kyebhi o tufunga twa henda kyatena kukwatekesa yo aluwala?

¹⁴ Jihova ni Jezú, nuka andatubhana dikunda. Kyoso Phetele kyaditunu Jezú, mwene wabhingile kusola kima ni ujimu. O kwila weji kweha kukayela Kidistu, inga wejisuluka mu kukolokota? Jezú wadyondo kwa Jihova phala o kixikanu kya Phetele ki kizoze. Jezú watangela Phetele yalungu ni musambu wenyo, yu walondekesa kwila wadyelele kuma Phetele weji swinisa we o jiphange. (Luk. 22:​31, 32) Nange Phetele wexile muswina kyavulu, kyoso kyexile mulembalala o izwelu ya Jezú! Kyoso kitumesena kusola kima ku mwenyu wetu, Jihova utena kutukwatekesa kukala fiyele. Mwene utena kubhanga kiki bhukaxi  ka tufunga twa henda. (Efe. 4:​8, 11) Sayi phange amwixana Paul, kafunga kya mu mivu yavulu, wene musota kukwatekesa mu ukexile wenyu. Kyoso o muthu kyabanza kweha kubheza Jihova, mwene umukwatekesa kuxinganeka kyebhi Jihova kyamusungu mu kilunga Kye. Mu kusuluka, mwene umudyelelesa kwila Jihova nuka wanda muxisa, mukonda wamuzolo kyavulu. Mwene wambe: “Ngamono kya phange javulu azozele, kukolokota dingi ni kikwatekesu kya Jihova.”

15. Kyebhi o phangu ya Phetele ni Horst, ilondekesa kwila tutena kudyelela mu izwelu itusanga mu Matesu 6:33?

¹⁵ Kala Jihova kya dikila o ibhindamu ya Phetele ni jipoxolo jamukwa, Mwene we wandadikila o ibhnidamu yetu, se tuta o utuminu kupholo. (Mat. 6:33) Phange Horst, twamutumbula kudima, wamesenene kukala muboki wa thembu yoso, kyoso kyabhu o Ita ya Kayadi Yabhiti ku Mundu. Maji mukonda dya wadyama, wexile mubanza kwila kejitena kudidikila, phala kusuluka mu ukunji. Ihi yabhange? Horst wasoto kumona se Jihova wejilanga mwene o ibhindamu ye. Kyoso kyexile mwakunda ku kafunga ka ilunga, mwene waboko o semana yoso. Ku disukilu dya semana, mwene wadiwana kyoso o kafunga ka ilunga kyamubhana envelope mwexile kitadi, kyatumikisine phange ka tumbula o dijina dye. O kitadi kyokyo kyasokele phala kudikila o ibhindamu ye mu jimbeji javulu. Horst wamono o ujitu wenyo kala kilondekesu kya kwila Jihova weji langa o ibhindamu ye. Mwene wasuluka mu kuta o Utuminu kupholo, ku mwenyu we woso.—Mal. 3:10.

16. Mukonda dyahi kima kyambote kudilonga dingi yalungu ni Phetele ni mikanda yasoneka?

¹⁶ Se phata Phetele wasangulukile kyavulu mukonda Jezú ka tundile bhu mbandu ye, kala kyamubhingile! Jezú wasuluka mu kulonga Phetele n’akituke poxolo ya fiyele ni phangu yambote phala o Jikidistá. Etu tutena kukatula mbote yavulu, mu yoso yamulongo Jezú. Mu mikanda iyadi ibhanga mbandu ya Bibdiya, yatumikisa ku ilunga mu hama yadyanga, Phetele wazwela yalungu ni mbote yakatula. Mu milongi yakayela twandamona itendelesu yala mu mikanda yenyiyi, ni kyebhi kitutena ku ikumbidila lelu.