1. Maka ebhi atena kumoneka ku salu mba ku xikola?

 KYEBHI ki udivwa kyoso o koleka ye ya xikola mba ya salu ukubhanga ibhwidisu yalungu ni kixikanu kye? O kwila uthandanganya? Avulu mudyetu twene muthandanganya. Maji o ibhwidisu kala yiyi, itubhangesa kwijiya se ihi ixinganeka mba ixikina o muthu, itubhana we kithangana phala kuzwela yalungu ni njimbu ya mbote ya Nzambi. Sayi bhabha o athu abhanga ngo o ibhwidisu phala kuzoka. O kiki ki kima kya kudiwana. Avulu ene mukwivwa jinjimbu jamakutu jalungu ne’tu. (Ika. 28:22) Kala kitwakijiya twala “mu izuwa isukidilaku,” mu kithangana kya kwila athu avulu kene muxikina kuditendela ni akwa, kate mwene sayi ya “ijibhangânga.”—2 Ti. 3:​1, 3.

2. Mukonda dyahi twamesena kukala tu athu a batama?

² Nange uxinganeka, ‘Kyebhi kingitena kulondekesa o kutululuka kyoso ki kumoneka muthu wamesena kuzoka n’eme yalungu ni njimbu ya Bibidya?’ Wejiya se ihi itena ku kukwatekesa? O kubatama. O muthu wabatama ka kala ni njinda ni lusolo, utululuka kyoso kya mulokalala, mba kyoso kya kamba kwijiya kyebhi kya tambwijila. (Jisa. 16:32) Nange eye udivwa kwila, o kukizwela ki kyabhonzo, maji kyabhonzo o kukibhanga. Kyebhi ki utena kukala u muthu wabatama? Kyebhi ki utena kulondekesa o kubatama se kumoneka muthu wamesena kuzoka n’eye yalungu ni njimbu ya Bibidya? Se eye utata mba umama, kyebhi kiweji kwatekesa o twana twe kuzokela o kixikanu kya ni kubatama? Twanda mona o itambwijilu mu milongi yiyi.

3. Mukonda dyahi tutena kuzwela kwila o kukala muthu wa batama, kilondekesa kuswina ki kuzoza kana? (2 Timote 2:​24, 25)

³ O yo abatama, athu aswina ka azoza kana. Kubhinga nguzu phala kutululuka mu kudibhana ni kibhidi kyabhonzo. O kubatama kidifwa kibhanga mbandu ku “ibundu ya nzumbi.” (Nga. 5:​22, 23) O kizwelu mu dimi dya Ngeleku kyolungulule “kubatama,” sayi ithangana exile mu kitumbula phala kuzwela yalungu ni kabalu ka temene, maji akalongele kutululuka ni kubelesela. Sumbala o kabalu kindala, kalenduka, katululuka, maji o nguzu ye wala nayu hanji. Abha etu, kyebhi ki tutena kukala tu athu abatama, anga tukala hanji ni nguzu mba kuswina? Ki tutena kubhanga kiki mu nguzu yetu. Twabhingi kusamba mukubhinga o nzumbi ikola ya Nzambi phala kutukwatekesa kukala ni kidifwa kiki. Kwala jiphangu javulu jilondekesa kwila tutena kubhanga kiki. Jiphange javulu asuluka mu kulondekesa o kubatama kyoso kyexile mwalokalala. Kiki kyabhana umbangi wambote kwa yo ki Jimbangi ja Jihova. (Tanga 2 Timote 2:​24, 25.) Ihi i utena kubhanga phala o kubatama kikale o kidifwa kye kikubhana nguzu?

4. Ihi yakwatekesa Izake kukala muthu wa batama?

⁴ Mu Bibidya mwala misoso yavulu ilondekesa kwila o kubatama kidifwa kyakatunda. Tala o phangu ya Izake. Kyoso kyayi mu tunga mu mbanza ya Jelale, o jivizinyu je akwa Fidíxa, a mukwatela lwimbi ya axiti o ixima yoso ya kandele tat’e. Muveji dya kuzoka phala ku itambula, Izake ni mwiji we ayi mutunga dikanga, ya akande ixima yengi. (Dim. 26:​12-18) Ne kiki o akwa Fidíxa ambe kwila o menya a ixima yeniyi ya ubhe, a atokalele we. Maji ne kiki, Izake walondekesa o kubatama. (Dim. 26:​19-25) Kyebhi Izake kyatena kudibhana ni ibhidi yiyi ni kubatama, ne mwene kyoso kyexile mu mulokalala mulwelu? Se phata mwene wadilongo kyavulu ni phangu ya kutululuka ya tat’e Mbalahamu, ni ukexilu wa ‘kulenduka ni kubatama’ wa Sala.—1 Ph. 3:​4-6; Dim. 21:​22-34.

5. Phangu jebhi jilondekesa kwila o jitata atena kulonga o twana twawu o valolo ya kukala ni kidifwa kya kubatama?

⁵ Jitata, bhangenu yoso phala kulonga o twana twenu o valolo ya kubatama. Tala o phangu ya phang’yetu ya diyala amwixana Maxence, wala ni 17 a mivu. Mwene wadibhele ni athu akwa njinda, mu xikola ni mu ukunji. Maji o jitata je ni mwanyu woso, amulongo kulondekesa o kubatama. Ene ambe: “Kindala Maxence wejiya kwila ki kubhonzo ku tambwijila ni njinda mba undanda, maji o muthu waswina yo utululuka.” Mu kyenyiki o kubatama kyene o kidifwa kibhana nguzu kwa phang’yetu Maxence.

6. Kyebhi o kusamba kutena kutukwatekesa kulondekesa o kubatama?

⁶ Ihi itutena kubhanga kyoso ki kumoneka muthu uzwela kyayibha yalungu ni Jihova mba o Bibidya? Twatokala kusamba kwa Jihova mu kumubhinga o nzumbi ikola ni unjimu phala tutambwijile ni kubatama. Maji phe ihi twatokala kubhanga se tumona kwila ki twabatula o maka mu ukexilu watokala? Twatokala kusamba dingi ni kuxinganeka se ihi twanda bhanga se kumoneka dingi maka. Se tubhanga kiki, Jihova wanda tukwatekesa kulondekesa o kubatama.

7. Kikwatekesu kyebhi kitwala nakyu phala kulanga itwanda zwela ni kubhanga mu ithangana ya ibhidi? (Jisabhu 15:​1, 18)

⁷ Sayi jivelusu ja Bibidya jitena kutukwatekesa kuzwela ni kutululuka kyoso kitudibhana ni ibhidi. O nzumbi ikola ya Nzambi itena kutukwatekesa kulembalala o jivelusu jiji. (Nzw. 14:26) Mu kifika o itendelesu itusanga mu divulu dya jisabhu itena kutukwatekesa kubatama. (Tanga Jisabhu 15:​1, 18.) O divulu  didi ditulondekesa we o mbote ijila mu kukala tu athu abatama kyoso ki kumoneka ibhidi.—Jisa. 10:19; 17:27; 21:23; 25:15.

8. Mukonda dyahi twatokala kuxinganeka kyambote ande dya kutambwijila muthu utwibhwidisa yalungu ni kixikanu kyetu?

⁸ O kutetuluka kutena we kutukwatekesa. (Jisa. 19:11) O muthu watetuluka wejiya kudilanga kyoso kyadibhana ni ibhidi mu ukunji. Muveji javulu, kyoso athu kyatubhanga ibhwidisu, ene ka tutangela se mukonda dyahi amukwibhwidisa. Kyenyiki ande dya kutambwijila, kima kyambote kulembalala kwila, nange etu kitwejiya se mukonda dyahi o muthu wabhange o kibhwidisu.—Jisa. 16:23.

9. Kyebhi Ngidiyone kyalondekesa unjimu ki kubatama mu kudibhana ni akwa Efalayime?

⁹ Tala kyebhi Ngidiyone kyatambwijila o mayala a Efalayime. Ene exile ni njinda yavulu. A mesenene kwijiya se mukonda dyahi Ngidiyone ka exanene phala kuya mu lwa ita ni jinguma ja akwa Izalayele. Maji phe ihi ya abhangesa kuzwela ni njinda yoso? O kwila adivwile kyayibha mukonda exile mudimona kwila o mwiji wa, wene wabetelekota mu Izalayele? Kikala se kyene mba kana, Ngidyone walondekesa kutetuluka. Mwene wasoto kwijiya se mukonda dyahi o mayala exile ni njinda, yu  wa atambwijila ni kutululuka kwoso. Ihi yabhiti? O Bibidya yamba kwila, “ene atululuka.”—Afun. 8:​1-3.

10. Ihi yanda tukwatekesa kwijiya kyebhi kitutena kutambwijila o athu atwibhula yalungu ni kixikanu kyetu? (1 Phetele 3:15)

¹⁰ Nange o koleka yetu ya salu mba ya xikola utwibhwidisa se mukonda dyahi twene mu kayela o itumu ya Bibidya. Mu kutambwijila, etu twanda bhanga yoso phala kuzokela o kixikanu kyetu. Ku mbandu yamukwa, twanda xila we o ibanzelu ya muthu. (Tanga 1 Phetele 3:15 ) Muveji dya kumona o kibhwisu kala kizukutisu phala etu, twatokala kukimona kala kithangana phala kwijiya ihi yala ku muxima wa muthu. Ne mwene ki twejiya se mukonda dyahi o muthu wabhange o kibhwidisu kiki, etu twatokala kumutambwijila ni kutululuka kwoso. O kitambwijilu kyetu kyanda bhangesa o muthu kuxinganeka mba kulungulula o kibanzelu kye. Ne mwene se o muthu ukala mukwa njinda, etu twatokala kusuluka mukukala tu athu a batama.—Lom. 12:17.

11-12. (a) Ihi itwatokala kuxinganeka ande dya kutambwijila ibhwidisu yabhonzo? (Tala we ofoto.) (b) Kyoso kituzubha kuxinganeka, kyebhi ki tutena kutambwijila?

¹¹ Mu kifika, se koleka ya salu utwibhwidisa mukonda dyahi ki twene mubhanga fesa ya uvwalukilu, tutena kuxinganeka: O kwila mwene wamesena kwijiya se ki twene mukatula kithangana phala kutonoka? Inga mwene uxinganeka kwila o kukamba kubhanga o jifesa jiji kwejizanga o ukamba umwala nawu ni jikoleka jamukwa? Etu tutena kumuximana mu kubanza mu mbote ya jikoleka jetu ni ditenda dyetu, tutena we ku mutangela kwila twamesena kusuluka mu kukalakala nawu. Kyenyiki twanda tena kutululukisa koleka yetu, nange twanda tena we kujikula njila phala kujimbulula se ihi izwela o Bibidya yalungu ni jifesa ja uvwalukilu.

¹² Tutena we kubhanga kiki kyoso muthu kya tubhanga kibhwidisu kyalungu ni maka amukwa a bhonzo we. Mu kifika, koleka yetu nange uzwela kwila o Jimbangi ja Jihova atokala kulungulula o ibanzelu ya yalungu ni mayala azeka ni mayala ni akwa, mba ahatu azeka ni ahatu. O kwila wamuzwela kiki mukonda kejiya kyambote ihi ixikina o Jimbangi ja Jihova? Inga mwene wala ni dikamba wene muzeka ni mayala ni akwa, mba ahatu ni ahatu? O kwila mwene uxinganeka kwila etu twazembe o athu ala ni ukexilu yu? Nange twanbhingi ku mujimbulwila kwila etu twazolo athu oso, ni kwila tuxikina kuma athu oso ala ni ufolo wa kusola ihi yatokala kubhanga. b (1 Ph. 2:17) Nange twanda tena ku mujimbulwila kyebhi o kukayela o itumu ya Bibidya kwene mu tusangulukisa ku mwenyu.

13. Kyebhi ki utena kukwatekesa muthu uxinganeka kwila ki unjimu kuxikina kwa Nzambi?

¹³ Kyoso kitudibhana ni muthu udikwatenena kyavulu mu ixinganeku ye, kitutokala kubanza kwila twejiya kya ihi ixikina mwene. (Tit. 3:2) Mu kifika, ihi iwejibhanga se koleka ye ya xikola uzwela kwila mwene ka xikina kuma kwene Nzambi? O kwila wejibanza kuma mwene uxikina kwila o ima yamoneke ngo, ni kwila mwene wejiya kyavulu yalungu ni maka enya? Nange mwene wa mubhitulula ngo o ima yevu akwa kuzwela, maji nuka wakatula kithangana phala kuxinganeka mu maka enya. Muveji dya kumateka kuzoka yalungu ni maka a jingijiye, sota kuzwela kima kibhangesa koleka ye kuxinganeka. Nange utena kumulondekesa milongi yalungu ni ibhangelu, yala mu sayte jw.org. Nange mu kizuwa kyengi, mutena kuzwela yalungu ni milongi mba vidyu yasange mwenyomo. Kyoso kituxila o athu mu ukexilu yu, kiki kitena ku akwatekesa kumesena kwijiya dingi yalungu ni Bibidya.

14. Kyebhi phange Niall kyalondekesa bhukaxi ka sayte jw.org, kwila o ima izwela o athu yalungu ni Jimbangi ja Jihova, makutu?

 ¹⁴ Sayi munzangala amwixana Niall walondekesa bhukaxi ka sayte jw.org kwila, o ima izwela o athu yalungu ni Jimbangi ja Jihova, ki yakidi. Mwene wambe: “Sayi koleka wexile muzwela kwila eme ki ngixikina mu maka a jingijiye mukonda ngixikina mu divulu dyosoneke kwala o athu muveji dya milongi ya kidi ya jingijiye.” Kuma o koleka kamesenene kwila amujimbulwila o maka, phange Niall wamuswinisa kubokona mu sayte jw.org mu mbandu “A Ciência e a Bíblia.” Ithangana kupholo, Niall wamono kwila koleka ye watokwesa mwene mu sayte, ni kwila wawabhelele kya kuzwela yalungu ni ibhangelu. Kiki kitena we kubhita neye.

15. Kyebhi o jitata kyatena kukwatekesa o twana twawu kutambwijila ni kubatama, kyoso kya ebhwidisa yalungu ni kixikanu kya?

¹⁵ O jitata atena kulonga o twana twa kyebhi kyatena kutambwijila ni kubatama, kyoso kya ebhwidisa yalungu ni kixikanu kya. (Tiy. 3:13) Sayi jitata a longa o twana twa kubhanga kiki, mu ubhezelu ku mwiji. Ene a sola dyambu dyalungu ni maka atena kumoneka ku xikola, abhanga ifika yalungu ni kyebhi kyatena kutambwijila, anga a longa o twana twa kuzwela ni kubatama kwoso, mu ukexilu ubhangesa o athu kumesena kwijiya dingi.—Tala o kaxa “ Dilonge ni Mwiji we.”

16-17. Mukonda dyahi o kudilonga ande dya kutambwijila kutena kukwatekesa o minzangala?

¹⁶ O kudilonga kutena kukwateksa o minzangala kujimbulula o kixikanu kya ku akwa, ni ku adyelelesa kwila kima kyambote kuxikina mu milongi ya Bibidya. Mu mbandu “Ibhwidisu Ibhanga o Minzangala” mu sayte jw.org, mwala milongi itena kukwatekesa o minzangala. Yene a ibhange phala kukwatekesa o minzangala  kukolesa o kixikanu kya, ni ku akwatekesa we kusokejeka itambwijilu itunda mu mixima ya. Kyoso o mwiji kyadilonga o milongi yiyi kumoxi, enyoso a dilonga kyebhi kyatena kuzokela o kixikanu kyawu, ni kutambwijila ni kubatama kwoso, mu ukexilu ubhangesa o athu kukala ni hanji ya kwijiya dingi.

¹⁷ Sayi munzangala amwixana Matthew ujimbulula kyebhi o kudilonga kwamukwatekesa. Mu ubhezelu ku mwiji, Matthew ni jitata je exile mutokwesa milongi yalungu ni maka ejitena kumoneka ku xikola. Mwne wambe: “Twexile muxinganeka mu ibhwidisu nange yeji ngibhanga o jikoleka jami, mu kusuluka twexile mutokwesa ni kudilonga kyebhi kingeji tambwijila. Mu kutendela kyambote se mukonda dyahi ngaxikinine mu Bibidya, ngexile mu swina dingi, ki kyexile we mungibhonza kutambwijila ni kubatama, kyoso kyexile mungibhanga ibhwidisu.”

18. Ihi itulonga o divulu dya Kolose 4:6?

¹⁸ Kidi kwila o kujimbulula kyambote o maka ki kilombolola kwila o athu anda xikina. Maji o kuzwela ni kilendu ni kubatama, kitena kukwatekesa. (Tanga Kolose 4:6.) O kuzwela yalungu ni ima ituxikina kwadifu ni kutakula bola ku muthu. Etu tutena kutakula o bola malembe, mba ni nguzu yavulu. Se tutakula o bola malembe, ki kyandabhonza phala o muthu wengi ku ikwata ni kusuluka mu kutonoka. Kyene we kimoxi, kyoso kituzwela ni kilendu ni kubatama, o athu andamesena dingi kuwivwa ni kusuluka mukuzwela n’etu. Kidi kwila, se o muthu wamesena kuzoka mba kuzwela kyayibha yalungu ni kixikanu kyetu, ki tubhingi kusuluka mu kuzwela ne, ni kumutambwijila. (Jisa. 26:4) Maji ki athu oso anda mesena kuzoka. Mu kidi, nange avulu anda twivwa.

19. Ihi yatokala kutuswinisa kulondekesa o kubatama kyoso kituzokela o kixikanu kyetu?

¹⁹ Twamono kwila o kukala muthu wabatama kwala ni valolo yavulu. Samba kwa Jihova mu kumubhinga o nguzu iwabhindamena phala usuluke mu kukala muthu wabatama, kyoso kikumoneka muthu o kwibhwidisa mba ukutatela mukonda dya kixikanu kye. Lembalala kwila, o kutambwijila ni kubatama kwoso, kitena kufidisa o kuzoka. O kutambwijila ni kuxila kwoso ni kubatama, kitena kubhangesa amoxi kumesena kutwivwa ni kulungulula o ixinganeku ya yalungu n’etu ni Bibidya. ‘Kala jinga polondo phala kuzokela o kixikanu kye,’ mu kukibhanga “ni kubatama ni kuxila kwoso. (1 Ph. 3:15) Bhanga jinga yoso phala kukala u muthu wabatama ni kulondekesa kwila eye u muthu waswina!