1. Mukonda dyahi Jezú wabhingi kwa Jihova phala kulanga o maxibulu mê?

 MU USUKU ande dya kufwa, Jezú wabhingi kima kyakatunda kwa Tata yê ya dyulu. Mwene wabhingi kwa Jihova phala kulanga o maxibulu mê. (Nzw. 17:15, 20) Mu kidi, tunde ukulu Jihova wene mulanga o mundu wê. Maji Jezú wejidile kwila Satanaji weji zukutisa o maxibulu mê ni njinda yoso. Ku mbandu yamukwá, Jezú wejidile we kuma ene ejibhindamena o kikwatekesu kya Jihova phala kutolola o izukutisu ya Satanaji.

2. Kala kilondekesa Jisálamu 33:18-20, mukonda dyahi kitwabhingi kukala ni wôma wakudibhana ni ibhidi?

² Lelu, o mundu wa Satanaji wene mubhekela ibhidi yavulu ku Jikidistá. Twene mudibhana ni ibhidi ituluwalesa, tudibhana we ni jitendasá jene muta o ufiyele wetu kwa Jihova mu kilwezu. Maji kala kitwanda dilonga mu milonga yiyi, kitubhingi kukala ni wôma. Jihova utulanga, mwene umona o ibhidi itudibhana nayu, wala we polondo phala kutukwatekesa ku itolola. Twandadilonga misoso iyadi yotumbule mu Bibidya itulondekesa kwila Jihova ulanga yó “amukala ni woma wê.”—Tanga Jisálamu 33:18-20.

3. Mu ithangana yebhi tutena kudivwa ubheka?

³ Sumbala twala ni jiphange javulu mukilunga, maji sayi bhabha tudivwa ubheka. Mu kifika, o minzangala atena kudivwa ubheka kyoso kya jimbulula o ilongesu ya Bibidya kujikoleka jâ ja xikola mba kyoso kyaya mu kilunga kya ubhe. Sayi athu mudyetu aluwala mba adibhana ni ixinganeku yayibha, mukubanza kwila atokala kudibhana ni ibhidi yâ ubheka wâ. Nange tukala ni hele ya kutangela akwetu kyebhi kitwamudivwa mukubanza kwila ene kanda tutendela. Kabasa kima kitubhangesa kudivwa ubheka, sayi bhabha tudivwa kwila seku muthu utubhana valolo.  Kiki kitubhangesa kukala ni hele yavulu, kudivwa kwila kitwala ni kikwatekesu. Jihova kamesena kwila tudivwa kiki. Mukonda dyahi twamba kiki?

4. Mukonda dyahi polofeta Elija wambe: “Eme ngó nga xala-ku ubheka [wami]”?

⁴ Tala o phangu ya muthu wafiyele, polofeta Elija. Mvwale Jezabele wakanene ku mujibha, mukonda dya kiki mwene walenge mu 40 amivu ndenge. (1 Jis. 19:1-9) Kyoso mwene kyabhixila mu dibânda, mwene wadikola kwa Jihova: “[Ku jipolofeta] eme ngó nga xala-ku ubheka [wami].” (1 Jis. 19:10) Mu ixi mwakexile hanji jipolofeta jamukwa. Mu kifika, Obadiya wabhulula 100 ya jipolofeta phala ka ajibhe ku mvwale Jezabele. (1 Jis. 18:7, 13) Mukonda dyahiphe polofeta Elija wakexile mudivwa ubheka? O kwila mwene wafikile kuma o jipolofeta a abhulula kwala Obadiya, mu kithangana kyenyókyo a ajibhile? O kwila mwene wadivwile ubheka mukonda seku muthu wamatekene kusidivila Jihova, né mwene mukumona kwila Jihova wexile o Nzambi ya kidi ku Mulundu wa Karmelu? O kwila mwene wafikile kuma seku muthu wejidile kuma o jinguma jê amesenene kumujibha, mba seku muthu wamuzolele? O musoso wa Bibidya ki ututangela kyavulu kyebhi o polofeta Elija kyakexile mudivwa. Maji twejiya ni kidi kyoso kwila Jihova watendela se mukonda dyahi polofeta Elija wakexile mudivwa ubheka, wejidile we kyebhi Jihova kyeji mukwatekesa.

5. Kyebhi Jihova kyaxikinisa polofeta Elija kwila kexile ubheka wê?

⁵ Jihova wakwatekesa o polofeta Elija mu maukexilu avulu. Mwene wabhangesa polofeta Elija kuzwela o ima yakexile mu mutandanganyesa. Jihova webhwidisa Elija mu luyadi: “Wa mu bhanga’hi bhabha?” (1 Jis. 19:9, 13) Mu ithangana yoso, kyoso Elija kyexile muzwela kwa Jihova kyebhi kyexile mudivwa, Jihova wexile mu mubhana mátwi. Jihova watambwijila Elija mu kumulondekesa kwila wakexilenê kumoxi, ni kwila mwene o Muteni wa Yoso. Mwene waxikinisa we Elija kwila, mu Izalayele athu avulu hanji akexile mumubheza. (1 Jis. 19:11, 12, 18) Sé phata Elija wadivwile kyambote mu kuzwela kwa Jihova yakexile ku  muxima wê, ni kwivwa o kitambwijilu kya Jihova. Jihova wabhana ikalakalu yavulu kwa polofeta Elija. Wamutangela phala ku unda Hazayele kala sobha ya Sídya, Jehú kala sobha ya Izalayele, ni Elizewu kala polofeta. (1 Jis. 19:15, 16) Mu kubhana o fisu yiyi kwa polofeta Elija, Jihova wamukwatekesa kulunga o muxima ku ima yambote. Jihova wamubhana dikamba dyambote polofeta Elizewu. Kyebhi Jihova kyatena ku kukwatekesa kyoso ki udivwa ubheka?

6. Kyoso ki udivwa ubheka wé, watokala kusamba yalungu ni ihi? (Jisálamu 62:8)

⁶ Jihova ukwixana phala kusamba kwa mwene. Mwene umona o ibhidi i udibhana nayu, ukuxikinisa we kwila wandakwivwa o misambu yé kabasa kithangana. (1 Te. 5:17) Jihova usanguluka kyavulu mu kwivwa o misambu ya jiselevende jê. (Jisa. 15:8) Kyoso ki udivwa ubheka wé utena kusamba yalungu ni ihi? Kala kyabhange polofeta Elija, zwela kwa Jihova yoso ya kukala ku muxima wé. (Tanga Jisálamu 62:8.) Mutangele o ima ya mu kutandaganyesa ni kyebhi ki udivwa mukonda dya ima yiyi. Bhinga kwa Jihova phala ku kukwatekesa kwijiya se ihi iwatokala kubhanga kyoso ki udivwa ubheka mba kyoso ki uluwala. Mu kifika, kyoso ki udivwa ubheka ni kukala ni wôma wakubhana umbangi muxikola, bhinga kwa Jihova phala kukubhana o kikwatekesu ki wabhindamena phala ni utene kuzwela. Utena we kumubhinga unjimu ni ujumbulule o kidi kya Bibidya ni kuswina kwoso sé kuxinga akwenu. (Luk. 21:14, 15) Se udivwa ubheka wé mba uluwala, bhinga kwa Jihova phala ku kukwatekesa kuzwela o maka enyá ni phange wakulu mu nzumbi. Bhinga kwa Jihova phala kukwatekesa o muthu uwanda zwelane kyebhi kiwamudivwa. Zwela kwa Jihova yoso yala ku muxima wé, sota kutendela kyebhi mwene kyatambwijila o misambu yé, xikina o kikwatekesu kya akwenu. Mukubhanga kiki kiwandadivwa dingi ubheka.

7. Ihi itutena kudilonga ku phangu ya phange Mauricio?

⁷ Jihova watubhana o kikalakalu kitusangulukisa. Ejiya ni kidi kyoso kwila Jihova ukumona mwene, ubhana valolo ku ima yoso i ubhanga, phala kukumbidila o kikalakalu kyé mu kilunga ni musidivisu ya kuboka. (Jisá. 110:3) Kyebhi o kudibhakula mu sidivisu yiyi ikukwatekesa kyoso ki udivwa ubheka wé? Tala o phangu ya munzangala amwixana Mauricio. * Kyoso kyamubatizala, mu kubhita tu ithangana kamba dyê dimoxi dyakazola, wamateka kuxisa o kilunga bhofelebhofele. Manu Mauricio wambe: “Kumona kamba dyami kuxisa o kilunga, kyangizozesa. Ngexile mu dibhwidisa se ngejitena kukumbidila o kikanenu kyami kya kukala fiyele kwa Jihova, ni kusuluka mu kubhanga mbandu ya mwiji wê. Eme ngexile mudivwa ubheka, ngafikile kwila o athu kejitena kutendela o ima ingexile mu zwela.”  Ihi yakwatekesa manu Mauricio? Mwene wambe: “Ngabandekesa dingi o kithangana kyami kya kuboka. Kiki kyangikwatekesa kweha kudixinganeka mudyami ni kweha o ibanzelu yayibha. Kingexile dingi mudivwa ubheka, ngasangulukile we kyoso kingexile muboka ni akwetu.” Mu kidi, né mwene kyoso kitukamba kukala kumoxi ni jiphange jetu phala kuboka, o kuboka nawu bhukaxi ka mitelembe mba bhukaxi ka mikanda, kutuswinisa we kyavulu. Ihi dingi yakwatekesa manu Mauricio? Mwene wabandekesa: “Ngadibhakula dingi phala kubhanga ikalakalu yamukwá mukilunga. Ngexile mubhanga yoso phala kupelepalala o jimbandu ja maxibulu mu kilunga ni kujibhanga. O ikalakalu yiyi yangibhangesa kudivwa kwila Jihova ni jiphange, angizolo.”

8. Kyebhi kitudivwa mukonda dya ibhidi?

⁸ Mu izuwa yiyi isukidilaku, etu tukinga kudibhana ni ibhidi. (2 Ti. 3:1) Maji o kithangana ni ibhidi itwandabhita nayu ki twakijiya. Tutena kubhita ni ibhidi ya kukamba o kitadi, nange o dotolo ututangela kuma twala ni uhaxi wabhonzo, mba muthu umoxi utwamuzolo, mwene ufwa. Mukithangana kiki, nange tutena kudivwa kyayibha mba kuluwala, bengebenge se twamudibhana ni ibhidi yavulu mukithangana kimoxi. Maji lembalala kwila, Jihova wejiya o ibhidi yoso itubhita nayu, maji ni kikwatekesu kya Jihova, tutena kudyelela kwila mwene utubhulula mu kibhidi kyosokyoso kitubhita nakyu.

9. Jimbulula o ibhidi yabhiti nayu Jobe.

⁹ Xinganeka kyebhi Jihova kyakwatekesa o selevende yê yafiyele amwixana Jobe. Jobe wabhiti ni ibhidi mu tu ithangana twofele. Mu kizuwa kimoxi, Jobe amutangele kwila o ibhaku yoso yafu ni jiselevende jê a ajibha we, mukusuluka o twana twê twakazola, a ajibha we. (Jobe 1:13-19) Kyoso Jobe kyakexile ni mukôndo, mwene wakatele dingi kyavulu, o uhaxi yú wamubhekela ndolo yavulu, wamubhangesa kuyibha o pholo. (Jobe 2:7) Jobe wexile mudibhana ni ibhidi yavulu, yu wazwela wixi: “Mwenyu wami wa ngi kumu, ngwami kukola mwenyu izuwa yoso.”—Jobe 7:16.

10. Kyebhi Jihova kyabhana kwa Jobe yoso yabhindamene phala natene kukolokota mu ibhidi yê? (Tala ofoto yakapa.)

¹⁰ Maji Jihova wakexile ku mbandu ya Jobe. Kuma Jihova wazolele Jobe, Mwene wamubhana yoso yabhindamene phala kukolokota mu ibhidi yê ni kukala fiyele. Jihova wazwela ni Jobe, wamulembalesa o unjimu wê wonene ni kyebhi kyalanga o ibhangelu yê ni henda yoso. Mwene wazwela ni Jobe yalungu kutena kwa yama yavulu. (Jobe 38:1, 2; 39:9, 13, 19, 27; 40:15; 41:1, 2) Jihova waswinisa Jobe bhukaxi ka diyala dimoxi dyafiyele amwixana Edihu. Edihu wamuxikinisa kwila Jihova ubesowala jinga o abhezi’ê mukonda dya kukolokota kwâ. Maji Jihova wabhangesa we Edihu ubhana kitendelesu kya henda kwa Jobe. Edihu wakwatekesa Jobe phala mwene kabanzele kyavulu kwa mwene, mu kumulembalesa kwila etu twatolo kyavulu mu kudisokesa ni Jihova, o Mubhangi wa ngongo yoso. (Jobe 37:14) Jihova watangela we Jobe phala natene kubhanga kima, mwene wamutangela phala kusamba yalungu ni makamba mê atele o kituxi. (Jobe 42:8-10) Mu izuwa yalelu, kyebhi Jihova kyatukwatekesa kyoso kitubhita mu ibhidi?

11. Kyebhi o Bibidya itena kutukwatekesa mu ibhidi itudibhana nayu?

¹¹ Jihova kazwela netu kala kyazwelele ni Jobe, maji mwene uzwela netu bhukaxi ka Maka Mê, o Bibidya. (Lom. 15:4) Mwene utuswinisa mu kutubhana kidyelelu kyalungu ni hádya. Tala o ifika itena kutukwatekesa  kuswina kyoso kitudibhana ni ibhidi. Mu Bibidya Jihova utudyelelesa kwila, kanaku kima kyosokyoso—katé mwene ni ibhidi itudibhana nayu—“kitena ku tufidisa kutambula o henda ya tulondekesa Nzambi.” (Lom. 8:38, 39) Mwene utuxikinisa we kwila “Jihova wazukama kwa yó adikola kwa mwene” bhukaxi ka misambu. (Jisá. 145:18) Jihova ututangela we kwila se tudyelela kwa mwene, tutena kukolokota mu kibhidi kyosokyoso, anga tusanguluka we né mwene kyoso kitubhita mu izukutisu yavulu. (1 Ko. 10:13; Tiy. 1:2, 12) O Mak’â Nzambi atutangela we kuma, o ibhidi itudibhanayu ya kithangana ngó, yabhebhuluka we kyoso ki tu isokesa ni mabesá andatubhana mwene ku hádya. (2 Ko. 4:16-18) Jihova utwambela we kuma, mwene wandabwika yó ene mu tubhekela o ibhidi yoso yiyi—Satanaji Dyabhu ni yó oso ala ku mbandu yê. (Jisá. 37:10) O kwila wabhake misoso ya Bibidya mu kilunji kyé itena ku kukwatekesa kukolokota kyoso kiwanda dibhana ni ibhidi?

12. Jihova wamesena kwila tubhanga ihi phala tutene kukatula mbote yavulu ku Maka mê?

¹² Jihova wamesena kwila tukatula kithangana phala ni tutene kutanga o Bibidya ni tuxinganeke mu yoso itwatange. Kyoso kitukumbidila yoso itwadilongo, tukala dingi ni kixikanu kyakolo, tuzukama dingi kwa Tata yetu ya dyulu. Mukonda dya kiki, tutena kukala dingi ni nguzu yavulu phala tutene kudibhana ni izukutisu yandakwizaku. Jihova ubhana we o nzumbi ikôla kwa yó adyelela mu Maka mê. O nzumbi ikôla itena “kutubhana o kutena kusomboka o kutena kwa athu” phala tutene kukolokota mu ibhidi yosoyoso.—2 Ko. 4:7-10.

13. Kyebhi o kudya mu nzumbi kwene mutubhana o “kimbadi kya fiyele kya dimuka” kyene mu tukwatekesa mu ibhidi itudibhana nayu?

¹³ Ni kikwatekesu kya Jihova o “kimbadi kya fiyele kya dimuka” kyene mutubhana milongi yavulu, jividyu, madivulu ni mimbu itena kutukwatekesa kukala ni kixikanu kyakolo phala tukale kumesu azele. (Mat. 24:45) Twabhingi kukatula mbote ku milongi yene mutubhana Jihova. Phange ya muhatu watungu ku Estados Unidos, wasakidila kyavulu mu kudya kwoso mu nzumbi kwene mutambula. Mwene wambe: “Mu 40 amivu u ngene musidivila Jihova, o ufiyele wami ene mu ulola kithangana ni kithangana.” Mwene wabhiti mu ibhidi yavulu. Kukwê amujibha ku mwendexi wadikalu wakowidile, o jitata jê afu ni uhaxi, mu ithangana iyadi mwene wakexile ni kijimbu kyadikota. Ihi yamukwatekesa kukolokota? Mwene wambe dingi: “Jihova ungilanga izuwa yoso. O  kudya mu nzumbi kwene mubhana o kimbadi kya fiyele kya dimuka, kwene mu ngikwatekesa kukolokota. Mukonda dya kiki, ngidivwa kala kyadivwile Jobe, kyoso kyambe: ‘Katé bhu nga kà fwila, nuka ngi di sandula mu kidi kyami.’”—Jobe 27:5.

14. Kyebhi Jihova kya tukwatekesa bhukaxi ka jiphange jetu mu kithangana kya ibhidi? (1 Tesalonika 4:9)

¹⁴ Jihova wene mulonga o mundu wê kudizola ni kudikonda o malamba mu kithangana kya ibhidi. (2 Ko. 1:3, 4; tanga 1 Tesalonika 4:9.) Kala Edihu, o jiphange jetu ala polondo phala kutukwatekesa kukolokota mu ufiyele wetu kyoso kitwamubhita mu ibhidi. (Ika. 14:22) Mu kifika, tala kyebhi mana Minga kya muswinisa mu kilunga kyê, phala akale ni nguzu mu nzumbi kyoso mwadi wê kyakwata uhaxi wabhonzo. Mwene wambe: “Kithangana kyenyókyo kyabhonzele kyavulu mwene. Maji twamono o lukwaku ni nguzu ya Jihova ku mwenyu wetu mu ithangana yoyo yabhonzo. O kilunga kyetu kyabhange yoso phala kutukwatekesa. O jiphange atukundu, atuxindi mu mutelembe, atundwakuna, yiyi yene o ima itwabhindamene phala kusuluka mu kukolokota. Kuma kingitena kwendesa dikalu, o jiphange akexile mu ngambata phala kuboka ni kuya mu yônge kyoso kingatenene.” Dibesá dyadikota kubhanga mbandu ku mwiji yú wahenda mu nzumbi!

15. Mukonda dyahi twadyelela kwila tutena kukolokota mu kibhidi kyosokyoso?

¹⁵ Ni kidi kyoso etwenyoso twandadibhana ni ibhidi. Maji kala kitwadilongo, nuka twandakala ubheka wetu. Kala Tata yahenda, Jihova utulanga mu ithangana yoso. Mwene wala polondo, wala ku mbandu yetu phala kutwivwa ni kutukwatekesa. (Iza. 43:2) Twadyelela kwila, tutena kudibhana ni kibhidi kyosokyoso mukonda mwene utubhana yoso itwabhindamena phala kukolokota. Mwene watubhana o ujitu wakusamba, o Bibidya, kudya kwavulu mu nzumbi ni jiphange jakazola jene mutukwatekesa mu ibhidi.

16. Ihi itwatokala kubhanga phala Jihova nasuluke kutulanga?

¹⁶ Twasanguluka kyavulu mukonda o Tata yetu ya dyulu utulanga! “Muxima wetu usangulukila mwa mwene.” (Jisá. 33:21) Tutena kulondekesa kwa Jihova kwila tusakidila o kilangidilu kyê kya henda mu kukatula mbote mu ima yoso yene mutubhana phala kutukwatekesa. Twabhingi we kubhanga kima phala Nzambi nasuluke kutulanga. Kiki kilombolola kwila se tusuluka mukubelesela o ima yoso yene mutulonga Jihova ni kubhanga o ima yayuka bhu mesu mê, mwene wandatulanga katé ku hádya ni hádya!—1 Ph. 3:12.