1. Ima yebhi yambote yabhange kyá o minzangala yavulu?

 KU MIVU yoso, jiphange javulu minzangala ene mwabatizala. Se eye u munzangala akubatizala kindala, dyelela kuma o jiphange jé joso mu nzumbi asanguluka kyavulu ni kwila Jihova wasanguluka we! (Jisa. 27:11) Xinganeka bhofele mu yoso iwatena kyá kubhanga. Eye wadilongo kyambote o ilongesu ya Bibidya, nange mu mivu yavulu. Mukonda dya kiki eye waxikina kuma o Bibidya yene o Maka a Nzambi. O kima kyabeta dingi kota, Jihova o Muthu wavu o Bibidya, eye wamwijiya dingi kyambote, yu wamateka kumuzola dingi kyavulu. Kuma o henda yé kwa Jihova yakolo dingi, o yene yakubhangesa kudibhakula ni kudibatizala. Twakusangesa mu kima kiwasolo!

2. Ihi itwandadilonga mu milongi yiyi?

 ² Ande dya ku kubatizala eye wadibhana kyá ni ibhidi yavulu yalola o kixikanu kyé. Maji kyoso ki uya ni kukula dingi mu kitala, eye wandadibhana ni jipolova jamukwá. Satanaji wandafikisa kuzozesa o henda yé kwa Jihova ni ku kusandula kwa Mwene. (Efe. 4:14) Eye kiwatokala kwehela o ima yiyi kubhita n’eye. Ihi itena kukukwatekesa kukolokota fiyele kwa Jihova ni kukumbidila o ima iwamukanena kyoso kiwadibhakula kwa mwene? Eye watokala kusuluka “mu kukula mu nzumbi.” (Jih. 6:1) Maji kyebhi ki utena kubhanga kiki?

3. Ihi yatokala kubhanga o Jikidistá joso, kyoso kya abatizala?

³ Kyoso kyatubatizala, etu enyoso twabhingi kubelesela o kitendelesu  kyabhana poxolo Phawulu ku jiphange jê mu mbanza ya Efezu. Mwene wa aswinisa kukala Jikidistá jakulu mu nzumbi. (Efe. 4:13) Kiki kilombolola kwila ene atokalele kusuluka ‘mu kukula mu nzumbi.’ Poxolo Phawulu wasokesa o kukula kwetu mu nzumbi ni kukula kwa mona ndenge. O kabwetele kyoso kyamuvwala, o jitata jê amuzola kyavulu, asanguluka we kyavulu ni mwene. Maji mwene katokala kukala kabwetele katé kuhádya ni hádya. Mu kubhita kithangana, mwene watokala kuxisa “o ifwa ya undenge.” (1 Ko. 13:11) Kyene we kibhita ni Jikidistá. Kyoso kya tubatizala, twatokala kusuluka mu kukula mu nzumbi. Tumone jindunge jandatukwatekesa kubhanga kiki.

4. Kidifwa kyebhi kyandatukwatekesa kukula mu nzumbi? Jimbulula. (Filipe 1:9)

⁴ Bandekesa o henda yé kwa Jihova. Eye wazolo kyá kyavulu Jihova. Maji o henda yé kwa mwene itena kudibandekesa. Kyebhi? Poxolo Phawulu ututangela ukexilu umoxi, mu mukanda ku akwa Filipe 1:9. (Tanga.) Poxolo Phawulu wasambe phala o henda ya akwa Filipe idibandekese “dingi.” Kyenyiki o henda yetu kwa Jihova itena we kudibandekesa. Tutena kubhanga kiki mu kukala ni “kwijiya kwa kidi . . . ni kilunji kya kutongoloka.” Mu kudilonga dingi yalungu ni Jihova, o henda yetu kwa mwene yandadibandekesa, twandazola we dingi o idifwa yê ni ukexilu wê wakubhanga o ima. Tukala dingi ni vondadi ya kumusangulukisa, nuka twandamesena kubhanga kima kimuluwalesa. Etu tubhanga nguzu phala kutendela o ima yamesena Jihova kokwetu ni kyebhi kitutena ku ibhanga.

5-6. Kyebhi kitutena kubandekesa o henda yetu kwa Jihova? Jimbulula.

⁵ O henda yetu kwa Jihova itena kudibandekesa dingi mu kwijiya kyambote Mon’ê, Jezú, mukonda mwene wakayela o idifwa ya Tata yê mu ukexilu wayuka. (Jih. 1:3) O ukexilu wabetakota wa kwijiya Jezú, o kudilonga o divulu dya Matesu, dya Máluku, dya Luka ni dya Nzwá. Se eye kiwene mutanga hanji o Bibidya izuwa yoso, utena kumateka kindala mu kutanga o madivulu yá. Kyoso ki uya ni kutanga o madivulu yá, tonginina o idifwa ya Jezú. O athu awabhelele kukala ni mwene ni kuzwelanê, ni henda yoso mwene wondeleka o tubwetele. (Mál. 10:13-16) Jezú wexile mukwa henda ni maxibulu mê, wawabhelele we kuzwela nawu, ene we exile mumutangela yoso yakexile mubanza ni kyebhi kyexile mudivwa. (Mat. 16:22) Mu kubhanga kiki, mwene wakayela o phangu ya Tata yê yadyulu. Jihova we wawabhela kuzwela ni athu. Tutena kuzwela ni mwene bhukaxi ka misambu. Kyoso kitusamba, tutena kumutangela yoso yala ku muxima wetu. Twadyelela kwila mwene kandatufundisa. Mwene watuzolo, utulanga we.—1 Ph. 5:7.

⁶ Jezú wakwatela henda ku athu. Poxolo Matesu wambe: “Mu kumona o athu, henda ya mu kwata, mukonda akexile mwa tatesa ni kwa lundujula kála jimbudi ja kambe mubhidi.” (Mat. 9:36) Jihova udivwa kyebhi kyamona o athu? Jezú wambe: “Tata yami wene ku dyulu kamesena kwila, ku twana twa ndenge tutu kutexika né ngó kana kamoxi.” (Mat. 18:14) O izwelu yiyi itutula mwene ku muxima! Kyoso kitwijiya kyambote Jezú, o henda yetu kwa Jihova yandadibandekesa we.

7. Kyebhi o kudilunga ni Jikidistá akulu mu nzumbi kutena ku kukwatekesa?

⁷ Eye utena we kudilonga kulondekesa dingi henda ni kukula mu nzumbi, mu kwijiya kyambote o jiphange jakulu kyá mu nzumbi ala mu kilunga kyé. Tala o kusanguluka kwala naku. Ene kadyela mu kusola kusidivila  Jihova. Bhingawu na kutangela ima yabhiti mu sidivisu yâ kwa Jihova. Kyoso ki umesena kusola kima, utena we kwabhinga itendelesu. Lembalala kwila, “bhwala o nzungule ya jindongixi, mundu a tunga a soma.”—Jisa. 11:14.

8. Ihi i utena kubhanga se ukala ni phata yalungu ni ilongesu ya Bibidya?

⁸ Tolola o phata i ukala nayu. Kala kyotumbule mu  kaxi 2, Satanaji wandafikisa ku kuzozesa phala ku kale ni kixikanu kyakolo ni kuzukama dingi kwa Jihova. Ukexilu umoxi utena kubhanga kiki, o ku kubhangesa kukala ni phata yalungu ni ilongesu ya Bibidya. Mu kifika, nange sayi athu andafikisa ku kuxikinisa kwila Nzambi katubhange, kwila twala ku mwenyu mukonda o ima yamoneke ngó. Kyoso kiwexile u mona ndenge nange kiwakexile muxinganeka mu maka yá, maji kindala kuma wakulu kyá, nange amukulonga o maka yá ku xikola. O ima ilonga o alongexi’ê, nange umona kwila ya kidi mwene. Maji nange ene nuka asoto kutokwesa se kwene mwene Mubhangi. Lembalala o kitendelesu kyala mu divulu dya Jisabhu 18:17: “Muthu kya kwata ku diba dyê, u di mona kulunga; katé mukwá wiza anga u mu fula.” Mu veji dya kuxikina yoso i udilonga mu xikola, watokala kutokwesa ihi ilonga o Mak’â Nzambi. Tokwesa mu madivulu metu. Zwela ni jiphange axikinine m’ukulu kwila o ima yamoneke ngó. Wa ebhwidisa se ihi ya abhangesa kuxikina kwila kwene Mubhangi watuzolo. Kuzwela nawu kwanda kukwatekesa kumona kwila kwene mwene Mubhangi.

9. Ihi iwadilongo mu phangu ya phange Melisa?

⁹ Sayi phange ya muhatu amwixana Melisa watokwesa o maka alungu ni ibhangelu, kiki kyamukwatekesa kutolola o phata yakexile nayu. * Mwene wambe: “Mu xikola o alongexi, mu kulonga kwila o ima yamoneke ngó, ene abhanga kiki mu ukexilu ubhangesa o muthu kuxikina kwila kiki kidi. Ku dimatekenu kingamesenene kutokwesa, mukonda ngexile ni wôma wa kumona kuma o ilongesu yamba kwila o ima yamoneke ngó ya kidi mwene. Maji ngaxinganeka kwila Jihova kamesena kuma tumusidivila sé kixikanu kya kidi. Kyenyiki ngamateka kutokwesa. Ngatange o divulu Existe um Criador Que Se Importa com Você? ni tumadivulu A Vida—Teve um  Criador? ni A Origem da Vida—Cinco Perguntas Que Merecem Resposta. Kiki kyene kingatokalele kubhanga. Ngamono kwila kota se ngakibhangele selu.”

10-11. Ihi itena ku kukwatekesa kutolola o ixinganeku ya undumbu? (1 Tesalonika 4:3, 4)

¹⁰ Ditune o ima yayibha. Mu kitala kya kikumbi, o jihanji jaxitu jitena kuvula, o athu atena we ku kujijidika kyavulu phala kubhanga undumbu. Satanaji wamesena kwila uxikina o ijijidiku ya athu. Ihi itena ku kukwatekesa kudituna o jitendasá? (Tanga 1 Tesalonika 4:3, 4.) Kyoso ki wamusamba ubheka wé, tangela kwa Jihova kyebhi ki wamudivwa, mubhinge phala kukubhana nguzu. (Mat. 6:13) Lembalala kwila Jihova wamesena ku kukwatekesa, kamesena kukufundisa, kana. (Jisá. 103:13, 14) O Mak’â Nzambi atena we kukukwatekesa. Mana Melisa, twamutumbula kyá, wabhange nguzu yavulu phala kutolola o ixinganeku ya undumbu. Mwene wambe: “Kutanga o Bibidya izuwa yoso, kwa ngikwatekesa kutolola o ixinganeku yami yabolo. Yene yangilembalesa kwila ngatokala kwa Jihova, ni kwila ngamesenene kumusidivila.”—Jisá. 119:9.

¹¹ Kana kusota kubatula o maka mé ubheka wé. Zwela ni jitata jé. Mu kidi, kubhonza mwene kuzwela o maka enyá, maji kima kyambote kubhanga kiki. Mana Melisa wambe dingi: “Ngasambe kwa Jihova phala kungibhana nguzu, anga ngatangela o maka mami kwa tat’etu. Kyoso kingabhange kiki, ngatululukile dingi ku muxima. Ngamono kwila Jihova wasangulukile kyavulu n’eme.”

12. Kyebhi ki utena kusola kyambote o ima?

¹² Belesela o itumu ya Bibidya ku mwenyu wé. Kyoso ki uya ni kukula o jitata jé andakubhana dingi ufôlo phala kusola o ima i wamesena kubhanga. Maji sayi hanji ima yavulu i wakambe kwijiya. Kyebhi ki utena kukamba kubhanga ima itena kuta o ukamba wé ni Jihova mu kilwezu? (Jisa. 22:3) Sayi phange ya muhatu amwixana Katidi wajimbulula ihi yamukwatekesa kusola kyambote o ima. Mwene wamono kwila o Jikidistá jakulu mu nzumbi kabhindamena kukala ni ijila mu ima yoso yandabhanga. Mwene wambe: “Ngatokala kutendela se ihi ibanza Jihova yalungu ni kima kingamesena kubhanga, mu veji dya kukayela ngó o ijila.” Kyoso ki wamutanga o Bibidya, dibhwidise: ‘O velusu yiyi ingilonga ihi yalungu ni Jihova? O kwila mu velusu mwala milongi itena kungikwatekesa kubhanga o ima yatokala? Se kyene, mbote yahi ingandakatula se ngibelesela ingilonga o Bibidya?’ (Jisá. 19:7; Iza. 48:17, 18) Mu kutanga o Bibidya ni kuxinganeka mu ima yalamu, kikyanda kubhonza kusola o ima isangulukisa Jihova. Kyoso ki uya ni kukula mu nzumbi, wandamona kwila, eye ku bhindamena kukala ni ijila mu ima yoso i wandabhanga mukonda mu maka u wala nawu, eye wandatendela o ixinganeku ya Jihova.

13. Kyebhi o makamba ambote atena kukukwatekesa? (Jisabhu 13:20)

¹³ Sola makamba azolo Jihova. Kala kyotumbule ku dimatekenu, o makamba u usola atena kukukwatekesa kukula mu nzumbi. (Tanga Jisabhu 13:20.) Sayi phange ya muhatu amwixana Sala wamateka kukala ni mukôndo. Maji kwabhiti kima kyamukwatekesa kukala dingi ni kusanguluka. Mana Sala wambe: “O makamba mami ambote eza mwene mu kithangana kyatokala ku mwenyu wami. Ngexile mudilonga O Mulangidi semana joso ni phange imoxi ya muhatu, munzangala. Sayi phange ya mukwá ya muhatu, munzangala we, wangikwatekesa kumateka kutambwijila mu yônge. Mukonda dya kikwatekesu kya  makamba mami, ngamateka dingi kudilonga ubheka wami ni kusamba dingi ni nguzu yoso. Ngamateka kukala ni ukamba wambote ni Jihova, ni kusanguluka dingi.”

14. Kyebhi manu Julianu kyabhange makamba ambote?

¹⁴ Kyebhi ki utena kukala ni makamba andakukwatekesa? Manu Julianu, wamusidivila kala kafunga wambe: “Kyoso kingexile ngi munzangala, ngabhange ukamba wambote ni jiphange ngakexile muboka nawu. O jiphange jiji exile muboka ni nguzu yoso, ene angikwatekesa kusanga o kisangusangu kya sidivisu ya kuboka. Kyenyiki, ngaxindi o mbambe ya kubokona mu sidivisu ya thembu yoso. Ngamono we kwila kingakexile ni makamba avulu ambote mukonda, ngexile ngó mubhanga ukamba ni athu akitala kyami. Mu kubhita thembu, ngabhange we ukamba ni jiphange ku Betele. O phangu yâ yangikwatekesa kusola kyambote o itonokenu yami, kiki kyangizukamesa dingi kwa Jihova.”

15. Poxolo Phawulu wadimuna Timote ku ihi? (2 Timote 2:20-22)

¹⁵ Majiphe ihi iwatokala o kubhanga se umona kwila sayi muthu mu kilunga ki dikamba dyambote phala eye? Poxolo Phawulu wejidile kwila sayi athu mu kilunga mu hama yadyanga kexile ni wendelu wambote, kyenyiki mwene wadimuna Timote phala kadilunge nawu. (Tanga 2 Timote 2:20-22.) O ukamba wetu ni Jihova wala ni valolo yavulu. Kitutokala kwehela muthu wosowoso kuta mu kilwezu o ukamba utwala nawu ni Tat’etu ya dyulu, mukonda phala kukala ni ukamba yú twabhange nguzu yavulu.—Jisá. 26:4.

16. Jimbambe jebhi ji utena kusuwa?

¹⁶ Suwa jimbambe janda kukwatekesa. Suwa jimbambe janda ku kukwatekesa kukolesa o kixikanu kyé ni kukula mu nzumbi. (Efe. 3:16) Mu kifika, eye utena kusola kutanga ni kudilonga dingi o Bibidya. (Jisá. 1:2, 3) Mba nange utena kuxinda o mbambe ya kusamba dingi, ni kubhanga misambu itunda ku muxima wé. Nange utena kuditumina dingi o jihanji jé mu kusola o itonokenu yé mba o kithangana ki ungastala mu ima yamukwá. (Efe. 5:15, 16) Kyoso Jihova kyakumona kubhanga nguzu phala kukula dingi mu nzumbi, mwene wandasanguluka kyavulu neye.

17. Kisangusangu kyebhi kijila mu kukwatekesa o athu?

 ¹⁷ Eye utena kukula mu nzumbi mu kukwatekesa o athu. Jezú wambe: “O kubhana kusangulukisa dingi, o kutambula ndenge.” (Ika. 20:35) Eye wandasanguluka kyavulu se ungastala o kithangana kyé ni nguzu yé phala kukwatekesa akwenu. Mu kifika, eye utena kusuwa o mbambe ya kukwatekesa o adyakime ni yó akate mu kilunga kyé. Nange utena kwakwatekesa kusumba ima mu kitanda mba kwakwatekesa kwijiya kukalakala ni mitelembe yâ. Se eye u phange yadiyala utena kusuwa o mbambe yakukala mukwatekexi wa tufunga phala utene kukwatekesa o jiphange jé. (Fil. 2:4) Eye ulondekesa we o henda kwa yó ki jiphange jetu mu nzumbi, mu kwabokela o njimbu yambote ya Utuminu. (Mat. 9:36, 37) Se kibhana, xinda we o mbambe ya kubokona mu sidivisu ya thembu yoso.

18. Kyebhi o kukala mu sidivisu ya thembu yoso itena ku kukwatekesa kukula mu nzumbi?

¹⁸ O sidivisu ya thembu yoso itena ku kukwatekesa kukula dingi mu nzumbi. O kukala u muboki wa thembu yoso, kutena ku kukwatekesa kudilonga mu Xikola ya Akunji a Utuminu. Utena we kukalakala ku Betele mba mu kibuka kya kutunga. Sayi phange ya muhatu, munzangala, amwixana Katarina wambe: “Kyoso kyangibatizala, o kuboka kumoxi ni jiphange akulu mu nzumbi, kwangikwatekesa kyavulu kukula mu nzumbi. O phangu yâ, yangiswinisa kudilonga dingi o Bibidya ni kubandekesa o uhete wami wa kulonga.”

19. Mabesá ebhi uwandatambula kyoso ki uya ni kukula mu nzumbi?

¹⁹ Kyoso ki uya ni kukula mu nzumbi, wandatambula mabesá avulu. Eye kiwandangastala o nguzu yé mu kubhanga ima yakambe valolo. (1 Nz. 2:17) Eye kiwandadibhana ni ndolo ijila mu kusola o ima yayibha. Mu veji dya kiki, wandasanguluka mwene mu kidi. (Jisa. 16:3) O phangu yé yambote yandaswinisa o jiphange jé mu nzumbi, kikale o minzangala mba o adyakime. (1 Ti. 4:12) Kyabeta dingi kota, wandakala ni paze ni kisangusangu kijila mu kusangulukisa Jihova ni mu kukala ni ukamba wambote ni mwene.—Jisa. 23:15, 16.