1. Polova yebhi yadibhana nayu Zuze, ni ihi yabhange mwene?

 O MON’A Jakobo, Zuze, wabhiti mu polova. Sayi muhatu wamutangela: “Ndoko, tu zekyetu.” Wexile o muhatu wa ngana yê Potifale. Zuze walenge o polova yiyi. Lelu sayi muthu utena kudibhwidisa: ‘Mukonda dyahi Zuze waditunu o tendasá yiyi?’ Potifale kexile kubhata. O kiki kya ibhile dingi mukonda Zuze wexile mubhika mu inzo yenyoyo. Mu kudituna o tendasá yiyi, o muhatu wenyó wejitena kumutalesa hadi. Né mwene mu kwijiya o maka yá, Zuze wasuluka ni kudituna o kijijidiku kya muhatu phala kuzekanê. Mukonda dyahi? Mwene wambe: “Eme-phe ngi tena kyebhi kubhanga kuyibha kwos’uku ni kuta kituxi kwa Nzambi?”—Dim. 39:7-12.

2. Kyebhi Zuze kyejidile kwila o kuta phanda kyexile kituxi bhupholo ya Nzambi?

² Kyebhi Zuze kyejidile kwila ku mesu a Jihova o kuta phanda, kyexile “kituxi” kyadikota? O Kitumu kya Mozé kyambele kiki: “Kana kuta phanda.” O akwa Izalayele atambwile o kitumu kiki hama jiyadi ja mivu kupholo, tundé kyafu Zuze. (Mak. 20:14) Né kiki Zuze wejidile kyambote Jihova, mwene wejidile we kwila, ku mesu a Jihova, o kuta phanda kyexile kituxi. Mu kifika, Zuze wakijidile kuma Jihova wabhange o ukaza, phala mu ukaza mukale ngó diyala dimoxi ni muhatu umoxi. Mwene nange wevu kyebhi mu ithangana iyadi Jihova kyalange kukululu’ê Sala, kyoso mayala kyamesenene kuzekanê. Mu ukexilu wenyú Nzambi walange we o muhatu wa Izake, Bebeka. (Dim. 2:24; 12:14-20; 20:2-7; 26:6-11) Mu kubanza mu misoso iyadi yiyi, Zuze watendela o ima yayuka ni ima yayibha bhupholo ya Nzambi. Kuma Zuze wazolele Jihova ni itumu yê, mwene wamesenene kubhanga o ima yayuka bhupholo ya Nzambi.

3. Ihi itwandadilonga mu milongi yiyi?

 ³ O kwila eye wazolo o kuyuka? Sé phata eye wazolo mwene. Maji etu enyoso tu akwa ituxi, o ukexilu wa mundu yú wa kumona o kuyuka utena kutufunyisa. (Iza. 5:20; Lom. 12:2) Kyenyiki twandadilonga se o kuyuka ihi, ni mbote yebhi itukatula mu kuzola o ima yayuka. Twandadilonga we ima itatu itutena kubhanga phala kutukwatekesa kuzola dingi o ijila yayuka ya Jihova.

4. Ibanzelu yebhi yayibha yala nayu o athu ku mundu yalungu ni muthu wayuka?

⁴ O athu ku mundu abanza kuma o muthu wayuka yó mukwa ukumbu, ulokalala akwâ, udimona kwila wala ni valolo yavulu. Maji Nzambi kawabhela o muthu wala ni idifwa yiyi. Kyoso kyexile mu ixi Jezú wabazela ni kuswina kwoso o atwameni a jingeleja, mukonda akexile mulonga o athu kubelesela o kuyuka kala kyexile muxinganeka ene. (Ndo. 7:16; Luk. 16:15) Maji o muthu ubhanga o ima yayuka bhupholo ya Jihova kabanze kuma mwene wabeta dingi kota akwa ndenge.

5. Kala kilonga o Bibidya, o muthu wayuka ukala kyebhi? Ta kifika.

⁵ O kuyuka kidifwa kyambote. O kuyuka kulombolola kubhanga o ima yambote bhupholo ya Jihova Nzambi. O itumu ya Jihova, itumu ya katunda. Mu Bibidya o kizwelu kilombolola “kuyuka”, kyalungu ni kubelesela o itumu ya Jihova. Mu kifika Jihova watendelese o asumbisi kukala “ni pezo ya kidi.” (Mate. 25:15) O kizwelu mu dimi dya Hebalayiku mukwa “kidi” atena we kukilungulula kala “muthu wayuka.” Kyenyiki o Kidistá wandala kukala muthu wayuka bhupholo ya Nzambi, katokala kunganala akwâ mu kubhanga o wenji. O muthu wazolo kubhanga o ima yayuka, kasanguluka mu kumona o athu kwatalatala mu ukexilu wayibha. Phala kusangulukisa Jihova, o muthu wayuka uxinganeka kyebhi Jihova kyamona o ima yandasola ku mwenyu wê.—Kol. 1:10.

6. Mukonda dyahi tutena kudyelela o ijila ya Jihova yalungu ni kusola kyawabha ni kyayibha? (Izaya 55:8, 9)

⁶ O Bibidya yamba kuma Nzambi mwéne o Fixi ya kuyuka. Mukonda dya kiki, amwixana kala “Kibuta kya Kuyuka.” (Jel. 50:7) Kuma Mubhangi wa ima yoso, Jihova mwéne ngó wala ni ungana wa kutangela o ima yayibha ni ima yawabha yatokala kubhanga o muthu. Kuma tu akwa ituxi kutubhonza kyavulu kwijiya o ima yawabha ni yayibha, maji kuma Jihova o Muthu wayuka, wejiya o ima yawabha ni ima yayibha. (Jisa. 14:12; tanga Izaya 55:8, 9.) Kuma atubhange mu kidifwanganu kya Nzambi, tutena kubhanga itubhinga mwene. (Dim. 1:27) Etu twazolo we kubhanga kiki. Kuma twazolo Tata yetu, tubhanga yoso ni yoso phala kumukayela.—Efe. 5:1.

7. Mukonda dyahi twabhindamena o ijila? Ta kifika.

⁷ Etu tukatula mbote mu ijila ya Jihova yalungu ni kyawabha ni kyayibha. Watendela se mukonda dyahi? Xinganeka yejibhita se kala bangu ya kitadi ikala ni ijila ya kujimbulula o valolo yala nayu o kitadi. Kwejikala maka avulu. Se o jidotolo kakayela o ijila yalungu ni kutalatala o haxi, o haxi yiyi itena kufwa. Mu kidi kyoso athu kyakala ni ukexilu wayuka wa kubatula o maka, o ukexilu wenyú utena kwalanga. Kyene we kimoxi, o ijila ya Nzambi yalungu ni yawabha ni yayibha itulanga we.

8. Mabesá ebhi akingila yó enemubhanga o ima yayuka?

⁸ Jihova ubesowala yó ene mubelesela o ijila yê. Mwene ukanena: “Ixi-phe i xalela ku athu yá ayuka, ene a i lundula, mwene mwa tunga, o thembu yâ ki ibhu.” (Jisá. 37:29) Xinganeka o paze ni kusanguluka kwandakala naku o athu, kyoso athu oso kyandabelesela o  ijila ya Jihova! Jihova wamesena kwila tukala ni mwenyu wasanguluka kala yú. Sé phata kwene ima yavulu itubhangesa kuzola o ima yayuka bhupholo ya Jihova! Kyebhi kitutena kuzola dingi o kidifwa kiki? Twandadilonga ima itatu itutena kubhanga.

9. Ihi yandatukwatekesa kuzola o kuyuka?

⁹ Kyadyanga: Zola o Muthu ubhana o ijila. Phala kuzola o kuyuka, twatokala kuzola Jihova Yó ubhana o ijila yalungu ni yawabha ni yayibha. Se tuzola kyavulu Jihova, twandamesena we kyavulu kubelesela o ijila yê. Mu kifika, se Adá ni Eva azolele Jihova, ene kejibhukumukina o kijila kyê kyayuka.—Dim. 3:1-6, 16-19.

10. Ihi yabhange Mbalahamu phala kutendela o ukexilu wa kubanza wa Jihova?

¹⁰ Kitumesena kuta o kituxi kyatele Adá ni Eva. Tutena kulenga o kilwezu kiki mu kusuluka kudilonga yalungu ni Jihova, kubhana valolo ku idifwa yê ni kutendela o ukexilu wê wa kubanza. Se tubhanga kiki, o henda yetu kwa Jihova yandadibandekesa. Banza mu phangu ya Mbalahamu. Mwene wazolele kyavulu Jihova. Né mwene kyoso kyamubhonzele kutendela yamutumine Jihova, Mbalahamu kamubhukumukina. Mu veji dya kiki, mwene wabhange yoso phala kwijiya dingi kyambote Jihova. Mu kifika kyoso mwene kyejidile kwila Jihova wejibwika o mbanza ya Sodoma ni ya Ngomola, ku dimatekenu Mbalahamu wexile ni wôma wa kwila, o “Mufundixi u fundisa yoso mu ngongo” wejibwika o athu ayuka kumoxi ni athu ayibha. Maji Mbalahamu kaxikinine kwila o kima kyokyo kyejibhita mwene. Mukonda dya kiki, ni kulenduka kwoso wabhange ibhwidisu yavulu kwa Jihova. Jihova wamutambwijila ni mwanyu woso. Mu kusukako, Mbalahamu watendela kwila Jihova utonginina o mixima ya athu enyoso, ni kwila Mwene nuka wandafundisa o athu ambote kumoxi ni athu ayibha.—Dim. 18:20-32.

11. Kyebhi Mbalahamu kyalondekesa kwila wazolele Jihova ni ku Mu dyelela?

¹¹ O ima yazwela Mbalahamu ni Jihova yalungu ni mbanza ya Sodoma ni ya Ngomola, yakwatekesa kyavulu Mbalahamu. Kyoso kyabhiti o kima kiki, mwene wamateka kuzola ni kuxila dingi kyavulu Jihova, Tata yê. Mu kubhita mivu, Mbalahamu wabhiti mu kima kyamubhonzele kyavulu kulondekesa kwila wadyelele kwa Jihova. Jihova wamubhingi phala kusatela mon’ê wa kazola, Izake. Maji mu kithangana kyenyókyo Mbalahamu wejidile kyá kyambote o Nzambi yê, kyenyiki kamubhangele dingi ibhwidisu. Mwene wamesenene ngó kubhanga yamubhingile Jihova. Xinganeka o ndolo yakexile nayu Mbalahamu ku muxima, kyoso kyexile mu disokejeka phala kukumbidila o kima kyamubhingile Jihova! Mbalahamu nange wexile mubanza kyavulu mu ima yadilongele yalungu ni Jihova. Mwene wakijidile kwila Jihova kejitena kubhanga kyayibha. Kala kyasoneka poxolo Phawulu, Mbalahamu wejidile kwila Jihova wejifukununa mon’ê wakazola, Izake. (Jih. 11:17-19) Kyabetakota, Jihova wakanene kwila Izake wejikala tata ya kifuxi, maji mu kithangana kyenyokyo Izake kexile luwa ni mona. Mbalahamu wazolele Jihova, mukonda dya kiki mwene wadyelele kwila o Tata yê wejibhanga o ima ni kuyuka kwoso. Sumbala kyamubhonzele kyavulu, maji o kixikanu kyê kyamubhangesa kubelesela Jihova.—Dim. 22:1-12.

12. Kyebhi kitutena kukayela o phangu ya Mbalahamu? (Jisálamu 73:28)

¹² Kyebhi kitutena kukayela o phangu ya Mbalahamu? Kala Mbalahamu twabhingi we  kusuluka ni kudilonga yalungu ni Jihova. Kyoso kitubhanga kiki, twandamuzukama ni kumuzola we dingi. (Tanga Jisálamu 73:28.) Twandalonga o kitongolwelu kyetu phala kitukwatekese kukala ni ibanzelu yadifu ni ya Nzambi. (Jih. 5:14) Mukonda dya kiki se muthu utubhinga kubhanga kima kyayibha, etu twandadituna. Twandadituna kubhanga ima iluwalesa Tata yetu, itena we kuta o ukamba wetu ni mwene mu kilwezu. Ihi dingi itutena kubhanga phala kulondekesa kwila twazolo o kuyuka?

13. Kyebhi kitutena kusota o kuyuka? (Jisabhu 15:9)

¹³ Kayadi: Izuwa yoso bandekesa o henda yé mu kuyuka. Kala kitwene mutungutisa o mukutu wetu izuwa yoso ni tuswine dingi, twabhingi we kubhanga nguzu phala ni tutene kuzola o ijila ya Jihova yalungu ni kuyuka. Jihova utendela kyambote, mwene kakingila kwila tubhanga o ima yatúndu o nguzu yetu. (Jisá. 103:14) Mwene utuxikinisa kwila “wa diwabhela ni woso u kayela o kuyuka.” (Tanga Jisabhu 15:9.) Se twaxindi mbambe mu sidivisu yetu kwa Jihova, tubhanga nguzu phala ku ikumbidila. Kyene kitubhanga kyoso kitusota o kuyuka. Ni mwanyu woso Jihova wandatukwatekesa, kyoso kituya ni kubhanga yoso ni yoso phala kulondekesa o kuyuka.—Jisá. 84:5, 7.

14. “O kivunga-thulu kya kuyuka” ihi, ni mukonda dyahi twakibhindamena?

¹⁴ Ni henda yoso Jihova utulembalesa kwila kikyabhonzo kubelesela o ima yamba mwene kwila yayuka. (1 Nz. 5:3) O ijila yiyi itulanga. Izuwa yoso twabhindamena o kudilanga kuku. Xinganeka yalungu ni kibhakatu mu nzumbi kyazwela poxolo Phawulu. (Efe. 6:14-18) Mbandu yebhi yexile mulanga o muxima wa disoladi? “O kivunga-thulu kya kuyuka,” kilombolola o ijila yayuka ya Jihova. Kala o kivunga-thulu kyakexile mulanga o muxima wa disoladi, o itumu yayuka ya Jihova itena kulanga o muxima wetu, o ukexilu wetu ni ixinganeku yetu. Kyenyikiphe bhanga yoso phala mu kibhakatu kyé mu nzumbi, mu kale we o kivunga-thulu kya kuyuka!—Jisa. 4:23.

15. Kyebhi ki utena kuzwata o kivunga-thulu kya kuyuka?

 ¹⁵ Kyebhi ki utena kuzwata o kivunga-thulu kya kuyuka? Utena kubhanga kiki mu kuxinganeka ihi yamesena Nzambi mu ima i usola kubhanga kizuwa ni kizuwa. Kyoso ki usola o ima iwandazwela, o mwimbu u wandakwivwa, o ima iwandamona mu mutelembe wa izuzumbya, o divulu diwandatanga, kyadyanga dibhwidise hanji: ‘Ima yahi ingandata ku muxima wami? O kwila o ima yiyi yandasangulukisa Jihova? O kwila o ima yiyi ifunyisa o muthu kubhanga undumbu, usweya, kukala ni lwimbi, mba kudizangeleka—ima yazembe Jihova?’ (Fil. 4:8) Se o kima kiwandasola kyalungu ni vondadi ya Jihova, eye wandakwehela o ijila yayuka ya Jihova kulanga o muxima wé.

16-17. Kyebhi o divulu dya Izaya 48:18 dituxikinisa kwila tutena kubelesela o ijila ya Jihova katé kuhádya ni hádya?

¹⁶ O kwila sayi kizuwa wadibhwidisa kyá se eye wejitena kubelesela o ijila yayuka ya Jihova, kizuwa ni kizuwa, muvu ni muvu? Tala o kifika kyabhana Jihova kyala mu divulu dya Izaya 48:18. (Tanga.) Jihova wakanena kwila o kuyuka kwetu kwejikala “kala mabhuku ma musanza wa Kalunga.” Xinganeka kwila eye wamukwenda bhu ndundu ya musanza wa kalunga, o mabhuku aya ni kudiphupha mudyâ. Kyoso ki uya ni kumona o kutululuka kwa musanza wa kalunga, o kwila wejixinganeka kuma sayi kizuwa o mabhuku kandadiphupha dingi? Kana ngana! Eye wejiya kwila o mabhuku ku musanza ene mudiphupha kyá mazunda ni mazunda a mivu, o ene andasuluka.

¹⁷ O kuyuka kwé kutena kudifwangana ni mabhuku a musanza wa kalunga! Kyebhi? Kyoso kiwamesena kubatula o maka, eye watokala kwijiya hanji se ihi yamesena Jihova kokwé. Mu kusuluka, eye ubhanga kiki. Kikale se o maka u wandabatula abhonzo mba kana, o Tata yê yakazola wandakubhana o nguzu ni kikwatekesu kiwabhindamena phala kubhanga o ima yatokala kizuwa ni kizuwa.—Iza. 40:29-31.

18. Mukonda dyahi kitutokala kufundisa akwetu bhukaxi ka kuyuka kwetu?

¹⁸ Katatu: Ehela Jihova kusola o ima. Kyoso kituya ni kubelesela o ijila yayuka ya Jihova, kitutokala kufundisa akwetu, kitutokala we kudimona kwila twayuka dingi ene ndenge. Mu veji dya kutolesa akwetu ni kwafundisa bhukaxi ka kuyuka kwetu, etu tulembalala jinga kwila Jihova mwéne ngó o “Mufundixi u fundisa yoso mu ngongo.” (Dim. 18:25) Jihova katubhana o kikalakalu kiki kya kufundisa akwetu. Mu kidi, Jezú watubhana o kitendelesu kiki: “Kanenu kufundisa akwenu, phala ka mi fundise.”—Mat. 7:1. *

19. Kyebhi Zuze kyalondekesa kwila wadyelele mu kufundisa kwa Jihova?

¹⁹ Tudilonge dingi o kifika kya diyala wexile mubelesela Jihova ni ufiyele woso, amwixana Zuze. Mwene kafundisa akwâ, né mwene yó amutalatala kyayibha. O jiphange jê amukwata, amusumbisa mu ubhika, ya abhangesa tata yâ kuxikina kwila Zuze amujibha. Mivu kupholo Zuze wadisange ni mwiji wê. Mu kithangana kyenyokyo, Zuze wexile nguvulu ni kutena kwavulu. Mwene wejitena kufundisa o jiphange jê ni undanda woso ni kwavutwila phonzo. Sumbala o jiphange ja Zuze adyela mu kidi, mukonda dya ima yabhangele, ene exile ni wôma wa kwila Zuze weji kwafundisa ni undanda ni kwavutwila phonzo. Maji Zuze  wa axikinisa: “Ki mu kale ni woma. Kifwa ki ngal’iki eme ngala bhu kididi kya Nzambi?” (Dim. 37:18-20, 27, 28, 31-35; 50:15-21) Ni kulenduka kwoso Zuze wamono kwila Jihova mwéne ngó watokalele kufundisa o jiphange jê.

20-21. Kyebhi kitutena kukamba kukala tu athu ayuka bhupholo yetu?

²⁰ Kala Zuze, twehela o ima bhu maku a Jihova. Mu kifika, etu kituzwela kwila twejiya kyá se mukonda dyahi o jiphange jetu abhange kima kimoxi. Etu kitutena kumona o ima yala ku mixima ya athu; “Jihova-phe, mwene [ngó] mukwa kuzonga mixima.” (Jisa. 16:2) Mwene wazolo o athu oso, kikale o jingadyama, o jimvwama, o ambundu, o mindele, ni athu akwa jixi joso. Jihova utuswinisa kujikula “o mixima” yetu. (2 Ko. 6:13) Etu twatokala kuzola o jiphange jetu joso, kitwatokala kwafundisa kana.

²¹ Kiki kilombolola kwila kitutokala we kufundisa yó ki jiphange jetu mu nzumbi. (1 Ti. 2:3, 4) O kwila sayi kizuwa wafundisa kyá ndandu yé ki Mbangi ya Jihova mu kubanza kwila, “mukwetu yú nuka wandakala Mbangi ya Jihova”? Kana ngana! Se tubhanga kiki twamubhanga o kikalakalu ki kyatutokala, twandakala tu athu ayuka bhupholo yetu. Jihova wamubhana hanji o kithangana ku “athu mu ngongo yoso n’a dyele o ituxi yâ.” (Ika. 17:30) Lembalala kwila o athu adimona kuma ayuka dingi akwâ ndenge, Jihova u amona kala athu kabelesela o ijila yê.

22. Mukonda dyahi eye wamesena kuzola jinga o ijila ya Jihova?

²² O henda yetu ku ijila yayuka ya Jihova yandatusangulukisa, ni kukwatekesa akwetu kuzukama dingi kokwetu ni kwa Nzambi yetu. Kitutokala kwimana mu kukala “ni nzala ni dinyota dya ima yayuka ya Nzambi.” (Mat. 5:6) Ijiya kwila Jihova umona o nguzu yoso i ubhanga, ni kwila umusangulukisa kyoso ki ubhanga yoso phala kubelesela o ijila yê. Kyoso o athu ku mundu yú kyaya dingi ni kukamba o kuyuka, sanguluka mu kwijiya kwila “Jihova u zola yó ayuka.”—Jisá. 146:8.