1. Mbote yahi itukatula kyoso kitutangela akwetu yalungu ni kyebhi kitweza mu kwijiya “o kidi”?

 “KYEBHI kiweza mukwijiya o kidi?” Sé phata eye watambwijila kyá o kibhwidisu kiki mu ithangana yavulu. Kyoso kitumesena kwijiya kyambote phange, twene mu mubhanga o kibhwidisu kiki. Etu twazolo kyavulu kwivwa o jiphange jetu kututangela kyebhi kyeza mukwijiya o kidi ni kuzola Jihova, twawabhela we kyavulu kwatangela se mukonda dyahi twazolo kyavulu o kidi. (Lom. 1:11) O kuzwela ni jiphange jetu kutukwatekesa we kusuluka mukuxinganeka kwila twazolo kyavulu mu kukala Mbangi ya Jihova. Tubhanga we yoso phala tutene ‘kusuluka kwenda mu kidi’—kiki kilombolola kukala ni ukexilu wambote wandatukwatekesa kusangulukisa Jihova ni kutambula o mabesá mê.—3 Nz. 4.

2. Ihi itwandadilonga mu milongi yiyi?

² Mu milongi yiyi twandadilonga se mukonda dyahi twazolo o kidi. Mu kusuluka twandadilonga kyebhi kitutena kusuluka mu kubhana valolo ku ujitu yú. Sé phata kiki kyandatukwatekesa kusakidila kyavulu Jihova mukutubheka mu kilunga kyê. (Nzw. 6:44) Kiki kyanda tubhangesa we kukala dingi ni vondadi ya kutangela o kidi ku akwetu.

3. Kyebhi o kima kyabeta dingi kota kitubhangesa kuzola dingi o kidi?

³ Twala ni ima yavulu itubhangesa kuzola o kidi. Kyabetakota twazolo Jihova Nzambi, o Fixi ya kidi. Bhukaxi ka Maka mê o Bibidya, kitwadilongo ngó kwila mwene o Muteni wa Yoso,  Mubhangi wa dyulu ni ixi, maji twadilongo we kwila mwene Tat’etu ya henda, utulanga ni henda yoso. (1 Ph. 5:7) Etu twejiya kwila o Nzambi yetu, “Nzambi ya jihenda ni kyadi, wa lenduka, u kokoloka mu kuthathamana, u kôla mu kukwatela henda, ufiyele u vula.” (Mak. 34:6) Jihova wazolo o kuyuka. (Iza. 61:8) Mwene ki muyibhila kutumona kutala hadi, ni hanji yoso wamukingila o kithangana phala kuzubha o hadi yoso. Kutusangulukisa kwijiya o kidi kiki. (Jel. 29:11) Mukonda dya kiki Jihova watuzolo kyavulu!

4-5. Mukonda dyahi poxolo Phawulu wasokesa o kidyelelu kyetu ni kifikidilu kya naviyu?

⁴ Kima kyahi kyamukwá kitubhangesa kuzola o kidi? O kidi kitubhekela mabesá avulu. Tala o kifika kiki: Mu Bibidya tusangamu o kidi kitubhana o kidyelelu kyalungu ni hádya. Phala kutukwatekesa kutendela o valolo ya kidyelelu kiki, poxolo Phawulu wasoneka: “O kidyelelu kitwala nakyu ku mwenyu wetu kyedi kala o kifikidilu kya naviyu.” (Jih. 6:19) Kala o kifikidilu kya naviyu mba ulungu, kifidisa o naviyu phala ka itakule kuku ni koko ku mabhuku a kalunga, o kidyelelu kyetu kitunda mu Bibidya kitena kutufikidila kyoso kitudibhana ni ibhidi ku mwenyu wetu.

⁵ Mu divulu didi poxolo Phawulu wakexile muzwela yalungu ni kidyelelu kyala nakyu o Jikidistá ja a undu, o kidyelelu kya kuya ku dyulu. Maji o izwelu yê phala we yó ala ni kidyelelu kya kutunga mu palayizu mu ixi katé ku hádya ni hádya. (Nzw. 3:16) O kudilonga yalungu ni kidyelelu kya mwenyu wakalelaku, kutusangulukisa.

6-7. Kyebhi o kudilonga o kidi kyalungu ni hádya kyakwatekesa phange Yvonne?

⁶ Tala o phangu ya phange ya muhatu amwixana Yvonne. Mwene kakudila mu kidi, mu undenge wê wexile ni wôma wakalunga. Mwene ulembalala o izwelu yakexile mu ixinganeka kyavulu: “Kwanda bhixila o thembu ki kwandakala dingi o kizuwa kya mungu.” Mwene wambe: “O izwelu yiyi yangibhangesa kufula o kilu, ni kuxinganeka mu mausuku avulu, yalungu ni hádya. Ngexile mudibhwidisa: ‘Mukonda dyahi tukala ngó kumwenyu tumivu, anga tufwa? Mukonda dyahi ngala bhabha?’ Eme kingamesenene kufwa!”

⁷ Mu kusuluka phange Yvonne amukundu ku Jimbangi ja Jihova. Mwene wambe: “Ngamateka kuxikina kwila ngejitena kukala ni kidyelelu kyalungu ni mwenyu wakalelaku mu Palayizu mu ixi.” Kyebhi o kudilonga o kidi kyakwatekesa phangyetu? Mwene wambe dingi: “Mu mausuku kingifulu dingi o kilu mukukala ni wôma wa hádya mba wakalunga.” Mu kiki o kidi kya Bibidya kyala ni valolo yadikota ku mwenyu wa phange Yvonne, mwene wawabhela kyavulu kutangela akwa o kidyelelu kyala nakyu kyalungu ni hádya.—1 Ti. 4:16.

8-9. (a) Mu kifika kya tele Jezú, valolo yebhi ya bhana o diyala ku jimbongo ja sange? (b) Ku mwenyu wé, valolo yebhi i ubhana ku kidi kya Bibidya?

⁸ O kidi kya Bibidya kyalungu we ni njimbu yambote ya Utuminu wa Nzambi. Jezú wasokesa o kidi kyalungu ni Utuminu wa Nzambi ni jimbongo josweke. Kala kyosoneke mu divulu dya Matesu 13:44, Jezú wambe: “O Utuminu wa dyulu wa difwangana ni jimbote josweke ku mukáwu, anga diyala u jisanga, yu wa jisweka dingi. Mu kusanguluka kwê, uya u sumbisa o imbamba yoso yala nayu, anga usumba o mukáwu.” Tala kwila o diyala didi kexile mukenga jimbongo. Maji kyoso mwene kyajisange waxisa o ima yoso kudima phala akale ni jimbote jenyojo. Mu kidi mwene wasumbisa yoso yakexile nayu. Mwene wejidile o valolo yexile nayu o jimbote jenyojo, jabetele dingi kota o ima yaxisa kudima ndenge.

 ⁹ O kwila kyene we ki udivwa yalungu ni kidi kya Bibidya? Sé phata, kyene mwene ki udivwa! Twejiya kwila mu ngongo mumu ki mwale kima kitusangulukisa dingi o kusidivila Jihova ndenge. Ki mwale we kima kitusangulukisa dingi, o kidyelelu kitwala nakyu kya kukala ni mwenyu wakalelaku ku hádya ku nguvulu wa Utuminu wa Nzambi ndenge. O ujitu utuwala nawu wakukala ni ukamba wambote ni Jihova wala dingi ni valolo, kima kyosokyoso ki twaxisa kudima ndenge. O ujitu wetu wadikota o “ku mu sangulukisa” kyavulu.—Kol. 1:10.

10-11. Ihi yabhangesa manu Mingedi kulungulula o ukexilu wa mwenyu wê?

¹⁰ Etwenyoso twaxisa ima yavulu kudima phala kukala ni ukamba ni Jihova. Amoxi axisa ima yakatunda kudima, amukwa aditunu kukala jimvwama, sayi yá alungulula o ukexilu wa mwenyu wâ, kyoso kyejidile o kidi kyalungu ni Jihova. Kiki kyene kyabhiti ni manu Mingedi. Mwene ka muvwalela mu kidi. Kyoso kyexile munzangala mwene wadilongo o ufunu wa kubhânga, a wixana karaté. Mwene wambe: “Ngexile mudizangeleka kyavulu mukonda dyakukala ngi muthu wambote ni sawidi yambote. Sayi ithangana, ngexile mudivwa kwila seku muthu wejitena ku ngitolola.” Kyoso mwene kyamateka kudilonga o Bibidya, wadilongo yalungu ni kyebhi Jihova kyamona o usweya. (Jisá. 11:5) Yalungu ni dikaza dya Jimbangi ja Jihova adilongonê o Bibidya, manu Mingedi wambe: “Ene nuka angitangela kwila ngatokala kuxisa o ufunu wa karaté, ene exile ngó mungilonga o kidi kya Bibidya.”

¹¹ Kyoso mwene kyexile mudilonga o Bibidya, o henda yê kwa Jihova yadibandekesa dingi. O kima kyamutula dingi ku muxima, o kudilonga o henda yakwatela Jihova ku jiselevende jê. Mu kubhita kithangana, manu Mingedi wamono kwila wabhingile kulungulula o ukexilu wa mwenyu wê. Mwene wambe dingi: “Ngejidile kwila o kuxisa o ufunu wa karaté kyeji kala o kima kyabhonzo dingi ku mwenyu wami.” Yu wambe dingi: “Maji ngejidile we kwila kyeji sangulukisa Jihova. Ngaxikinine ni kidi kyoso kwila kyene o kima kyabetele dingi kota, o ima yoso yamukwa ingaxisa kudima ndenge.” Manu Mingedi wamono o valolo ya kidi kya sangele mukudilonga o Bibidya, o valolo yiyi yamubhangesa kulungulula o ukexilu wa mwenyu wê.—Tiy. 1:25.

12-13. Kyebhi o kidi kya Bibidya kyakwatekesa manu Mayli?

¹² Phala kulondekesa o valolo ya kidi, o Bibidya isokesa o kidi ni kandeya kamwikina mwavundu. (Jisá. 119:105; Efe. 5:8) Sayi phange watungu ku ixi ya Azerbaijão, amwixana Mayli, ubhana valolo yavulu ku kikwatekesu kya tambula mu Maka a Nzambi. Kyoso kyakulu, o jitata jê atokalele ku jingeleja kijidifu. Tat’ê wexile Musulumanu, o mama watokalele ku ngeleja ya Jijudé. Mwene wambe: “Sumbala ngejidile kwila kwene Nzambi, maji ngexile ni phata yalungu ni ima yavulu. Ngexile mu dibhwidisa se mukonda dyahi Nzambi wabhange o athu? Mukonda dyahi o muthu watokala kutala hadi mu ixi anga amukastikala dingi katé ku hádya ni hádya mu infernu? Kuma o athu exile muzwela kwila kyene kyamesena Nzambi, ngexile mu dibhwidisa: ‘O kwila Nzambi wadifu ni mutonoki wa iteka, utonoka ni athu, anga usanguluka kyoso kya amona kutala hadi?’”

¹³ Manu Mayli wasuluka mukusota o itambwijilu ya ibhwidisu yê. Mu kusuluka mwene wamateka kudilonga o Bibidya yu wakituka Mbangi ya Jihova. Mwene wambe: “O itambwijilu ya Bibidya yangikwatekesa kusanguluka  ku mwenyu. O ima yojimbulule mu Maka a Nzambi yangitululukisa o muxima.” Kala manu Mayli, etwenyoso tuximana Jihova “Yó wa [tu]katula mwavundu, yu wa [tu]bheka mu mukengeji wê wakatunda.”—1 Ph. 2:9.

14. Kyebhi kitutena kulondekesa kwila twazolo dingi o kidi? (Tala we o kaxa “ O Bibidya Isokesa we o Kidi ni Ima Yiyi.”)

¹⁴ O jiphangu jiji jitulondekesa o valolo ya kidi kya Bibidya. Sé phata eye wejiya phangu ya athu engi. Mukudilonga ubheka wé utena kusota ima yengi ikubhangesa kuzola o kidi. Mu kuzola dingi o kidi, twandasota dingi maukexilu amukwá phala tulondekese kwila twazolo o kidi.

15. Mu ukexilu webhi ututena kulondekesa kwila twazolo o kidi?

¹⁵ Tulondekesa kwila twazolo o kidi mu kutanga jinga o Bibidya ni mukudilonga o madivulu metu. Né mwene se twala kyá mivu yavulu mu kilunga, kwala hanji ima yavulu itwabhingi kudilonga. O Mulangidi wadyanga wasokesa o kidi ni kithulu kyósweke mwaxaxi ka minya. Wene wambele kiki: “Phala kusanga kithulu, o muthu watokala kukisota  ni mwanyu woso. O muthu kyoso kya kisanga, mwene katokala kwimana ni kusanguluka ngó mukonda dya kithulu kimoxi. Mwene watokala kusuluka mu kusota, phala kusanga ithulu yakamukwá.” Kubhinga nguzu yavulu phala kudilonga, majiphe kutukwatekesa we kyavulu.

16. Phala kukatula dingi mbote, mu ukexilu webhi uwene mutanga o Bibidya? (Jisabhu 2:4-6)

¹⁶ Mwaxaxi ketu, ki athu oso azolo kutanga ni kudilonga. Maji Jihova utwixana phala tusuluke mu ku “sota ni mwanu” ni tutene kutendela dingi kyambote o kidi. (Tanga Jisabhu 2:4-6.) Etu tukatula mbote kyoso kitubhanga kiki. Yalungu ni kitangelu kyê Bibidya, manu Corey wambe kwila kyoso kyamutanga o Bibidya mwene utonginina velusu ni velusu. Mwene wajimbulula: “Ngitanga o jinota joso, ngisota o jivelusu jala bhukaxi ka difwe dya Bibidya, anga ngitokwesa dingi. . . . O ukexilu yú ungibhangesa kudilonga ima yavulu!” Né mwene se tudilonga mu ukexilu yú mba wamukwá, tulondekesa kwila tubhana valolo ku kidi kya Bibidya kyoso kitukatula kithangana kyasoko phala ku itanga.—Jisá. 1:1-3.

17. Kyebhi kitutena kulondekesa ku mwenyu wetu kwila twamukumbidila o ima itwamudilonga? (Tiyaku 1:25)

¹⁷ Twejiya kwila ki kisoko ngó kudilonga o kidi. Phala kukatula mbote, twatokala kukumbidila ku mwenyu wetu, o ima itwamudilonga. Kyene ngó ki twandakala ni kisangusangu kya kidi. (Tanga Tiyaku 1:25.) Kyebhi ki tutena kulondekesa kwila twamukumbidila o ima itwamudilonga? Sayi phange wabhana o ndunge yakwila tutena kuditonginina phala kumona se ima yebhi itwamubhanga kyambote ni ima yebhi itwatokala kulungulula. Poxolo Phawulu wambe kiki: “Kuma twala kyá ni kixikanu kyakolo, twatokala kusuluka mu kwenda mu ukexilu yú.”—Fil. 3:16.

18. Mukonda dyahi tubhanga yoso ni yoso phala ‘kusuluka kwenda mu kidi’?

¹⁸ Xinganeka o mabesá utukala nawu mukubhanga yoso ni yoso mu ‘kusuluka kwenda mu kidi!’ Mukubhanga kiki kitwandasanguluka ngó ku mwenyu, kana, maji twandasangulukisa we Jihova ni jiphange jetu. (Jisa. 27:11; 3 Nz. 4) Yiyi yene o ima yabetakota itubhangesa kuzola o kidi ni ku kikumbidila ku mwenyu wetu.