MBANDU YAKUDILONGA 35
MWIMBU 123 Ni Ufiyele Woso tu Tumakyenu o Itumu ya Nzambi
Kikwatekesu Phala yo a Akatula mu Kilunga
“Ku dyulu o kusanguluka kuvula dingi, mukonda dya muthu umoxi wadyela o ituxi yê, o makwinyi avwa ni divwa kabhingi kudyela o ituxi yâ, ndenge.”—LUK. 15:7.
ITWANDADILONGA
Twanda dilonga se mukonda dyahi sayi jiphange abhingile kwakatula mu kilunga ni kyebhi o tufunga kyatena kukwatekesa o jiphange jiji kudyela o ituxi yâ n’avutuke mu kilunga.
1-2. (a) Ihi ibanza Jihova yalungu ni athu ata kituxi mu lwelu? (b) Jihova wamesena kwila o athu ate kituxi abhanga ihi?
JIHOVA kaxikina o ukexilu wayibha, mwene wazembe o kituxi. (Jisá. 5:4-6) Mwene wamesena kwila tubelesela o itumu yê yala mu Bibidya. Maji Jihova wejiya kwila tu akwa ituxi, kitutena kubelesela mu ukexilu watenena. (Jisá. 130:3, 4) Mwene kaxikina o athu ayibha mu lwelku. (Jud. 4) O Bibidya yamba kwila ‘o athu ayibha anda kwabwika’ mu ita ya Alumajedone.—2 Ph. 3:7; Dij. 16:16.
2 Maji Jihova kandala kwila kufwa muthu. Kala kitwadilongo kya mu Mulangidi yú, “mwene kamesena kwila kukala muthu ufwa. Maji wamesena kwila athu oso adyela o ituxi yâ.” (2 Ph. 3:9) O tufunga akayela o phangu ya Jihova kyoso kyakwatekesa ni mwanyu woso yó ate kituxi, kulungulula o ukexilu wâ ni kuvutuka kwa Jihova. Maji sayi bhabha o muthu wate kituxi kadyela. (Iza. 6:9) Sumbala o tufunga abhanga nguzu phala ku mukwatekesa, mwene usuluka ni kubhanga ima yayibha. Ihi yatokala kubhanga o tufunga mu maka enyá?
“KATULENU O MUTHU WAYIBHA”
3. (a) O Bibidya yamba kwila o tufunga atokala kubhanga ihi ku jiphange kadyela o ituxi yâ? (b) Mukonda dyahi tutena kuzwela kwila o mukwa ituxi wasolo ku mukatula mu kilunga?
3 Se muthu wate kituxi, maji kadyela, o tufunga atokala kubelesela o kitendelesu kyala mu 1 Kolindu 5:13: “Katulenu o muthu wayibha mwaxaxi kenu.” O mukwa kituxi, wejiya kwila se kadyela, anda ku mukatula mu kilunga. Kiki kyedi kala wabhongolola, ya kunu. (Nga. 6:7) Mukonda dyahi tutena kuzwela kiki? Mukonda o wate kituxi, kaxikina kulunguluka sumbala o tufunga amukwatekesa lwavulu. (2 Jis. 17:12-15) Bhukaxi ka ibhangelu yê, mwene walondekesa kwila kamesena kubelesela o itumu ya Jihova.—Mate. 30:19, 20.
4. Mukonda dyahi mu kilunga abhana ngolokela kyoso kyata muthu mu kamukonde?
4 Kyoso muthu kyamukatula mu kilunga, abhana ngolokela phala kwijidisa o kilunga kwila, mwene ki Mbangi dingi ya Jihova. a O ngolokela yiyi ka ibhana phala kukwatesa jisonyi ku muthu wate kituxi. Abhana o ngolokela yiyi phala o jiphange mu kilunga atene kubelesela o kitendelesu kya kukamba ‘kudilunga’ ni muthu, “né ngó kudya n’ê kumoxi.” (1 Ko. 5:9-11) Poxolo Phawulu wasoneka: “Felemendu yofele ifutununa o fuba yoso ya tiliku yofunge ni menya.” (1 Ko. 5:6) O muthu wate kituxi, maji kadyela, utena kuzozesa o jiphange amubhanga yoso ni yoso phala kubelesela o itumu ya Jihova. (Jisa. 13:20; 1 Ko. 15:33) Tutena kumona kwila Jihova wabhange kyambote mu kutubhana o itendelesu yiyi.
5. Ihi i twatokala kubanza yalungu ni muthu amukatula mu kilunga? Mukonda dyahi?
5 Kyoso muthu kyamukatula mu kilunga, ihi i twatokala kubanza yalungu ni mwene? Sumbala kitwanda dilunga-nê, kitutokala kubanza kwila mwene nuka wanda vutuka kwa Jihova. O mbudi yajimbila itena kuvutuka mu kibhanga kyê. Lembalala kwila o muthu, wabhakula o mwenyu wê kwa Nzambi. Maji mwene kamukumbidila yakanena kwa Jihova, mu kiki mwene wala mu kilwezu. (Ize. 18:31) Mwene utena hanji kuvutuka mu kilunga, mukonda Jihova, mukwa kuloloka. Kyebhi o tufunga kyatena kusuluka ni kukwatekesa o muthu amukatula kilunga?
KYEBHI O TUFUNGA KYAKWATEKESA YO AMUKATULA MU KILUNGA?
6. Ihi yanda bhanga o tufunga phala kukwatekesa yó a akatula mu kilunga?
6 Kyoso o muthu kya mukatula mu kilunga, o kwila o tufunga eha kumukwatekesa kuvutuka kwa Jihova? Kana ngana! Kyoso o tufunga kyatangela o muthu kwila anda mukatula mu kilunga, ene amutangela we yatokala kubhanga phala kuvutuka. Ene amwambela we kwila mu kubhita jimbeji anda mukunda dingi phala kumona se walunguluka. Né mwene se mu kithangana kyenyokyo mwene kadyela hanji o kituxi kyê, ku pholo dya kwenda o tufunga anda mukunda dingi.
7. Kyebhi o tufunga kyatena kukayela o phangu ya Jihova kyoso kyadibhana ni muthu amukatula mu kilunga? (Jelemiya 3:12)
7 O tufunga akayela o phangu ya Jihova, o Nzambi wene mu kwatela henda ku athu kyoso kyata ituxi. Kyoso o akwa Izalayele kyexile muta ituxi, Jihova kexile mwakingila kwiza kokwê, maji mwene mwéne wexile muya kwa ene, sayi bhabha ande dya ene kudyela o ituxi yâ. O milongi ya kayadi ya Mulangidi yú yajimbulula kwila Jihova watangela polofeta Hozeya phala kuloloka muhatu wê, sumbala mwene watele phanda. Mu kubhanga kiki, Jihova walongo o mundu wê kwila mwene mukwa kuloloka. (Hoz. 3:1; Mal. 3:7) Mu kukayela o phangu ya Jihova, o tufunga amesena kwila o muthu wate kituxi, avutuke mu kilunga. Ene kene mubhonzesa o ima.—Tanga Jelemiya 3:12.
8. Jezú watele o kifika kyalungu ni mona wabotesa o jimbongo jê joso. Kala kilondekesa o kifika kiki, kyebhi Jihova kyatalatala yó a akatula mu kilunga? (Luka 15:7)
8 O kwila wamulembalala ihi yabhange o tata mu kifika kya Jezú kyalungu ni mona wabotesa o jimbote jê? O Bibidya yamba kiki: “Kyoso [o mona] kyakexile hanji dikanga, o tat’ê wa mumono, o henda ya mukwata. Mwene anga ulenga ni lusolo u mu ndwakuna, ni henda yoso u mubhana jinzobole.” (Luk. 15:20) Twamono kwila o tata kakingila o mona kumubhinga muloloki. Maji, o tata walenge phala kundwakuna o mona, mukonda wamuzolele. O tufunga ala we ni hanji yiyi. Ene amesena kwila o jimbudi jambila, avutuka kubhata. (Luk. 15:22-24, 32) Kyoso muthu kyatele kituxi, udyela anga uvutuka mu kilunga, Jihova, Jezú ni jiphange joso mu kilunga asanguluka!—Tanga Luka 15:7.
9. Jihova wamesena kwila o athu ate kituxi, abhanga ihi?
9 Katé bhabha twadilongo kwila Jihova kehela o athu ate kituxi kunangenena mu kilunga. Né kiki mwene usuluka mu kwakwatekesa. Mwene wamesena kwila ene avutuka. Tala yazwela Jihova mu Bibidya yalungu ni maka enyá: “Ng’a zola mwene ni muxima woso, mukonda njinda yami ku thandu dyâ ki yala-ku dingi.” (Hoz. 14:4) Kala kyene mu bhanga Jihova, o tufunga amona se o muthu wate kituxi, wadyela. O izwelu yiyi iswinisa we o athu a akatula mu kilunga, kuvutuka ni lusolo lwoso kubhata dyâ, bhu maku a Jihova!
10-11. Ihi yatokala kubhanga o tufunga phala kukwatekesa yó a akatula mu kilunga mu mivu yavulu?
10 Ihi yatokala kubhanga o tufunga phala kukwatekesa yó a akatula mu kilunga mu mivu yavulu? Nange athu yá, kamubhanga dingi o kima kya abhangesa kwakatula mu kilunga. Nange kamulembalala dingi se mukonda dyahi a akatula mu kilunga. Kabasa muvu mba mivu o muthu kala mu kilunga, o tufunga anda bhanga yoso phala kwijiya o inzo yê ni ku mukunda. Kyoso o tufunga kya akunda, asamba kumoxi ni ene, a aswinisa phala kuvutuka mu kilunga. Se muthu amukatula mu kilunga mu mivu yavulu, kuma wazoza kyavulu mu nzumbi, sé phata mwene watokala kuswinisa o ukamba wê ni Jihova. Kyenyiki se mwene ulondekesa kwila wamesena kuvutuka mu kilunga, o tufunga anda bhinga ku muthu phala kudilonga-nê o Bibidya, ande dya kuvutuka. Maji o tufunga éne atokala kusola o muthu wanda mulonga.
11 O tufunga akayela o phangu ya Jihova mu kukwatela henda ku athu. Ene akwatekesa oso ala a akatula mu kilunga, kuvutuka kwa Jihova. Kyoso o muthu watele kituxi kyalondekesa kwila wadyela ni kwila walungulula o ukwexilu wê, mwene utena kuvutuka mu kilunga.—2 Ko. 2:6-8.
12. (a) O tufunga atokala kudilanga mu kudibhana ni athu ebhi? (b) Mukonda dyahi kitutokala kubanza kwila o muthu wate kituxi mu lwelu, Jihova nuka wanda muloloka? (Tala we kulwiji.)
12 Maji o tufunga atokala kudilanga mu kudibhana ni athu azangatele mona-ndenge, abalukile o kilunga ni yó asotele ndunge phala kubatula o ukaza. O tufunga atokala kutonginina se adyela mwene mu kidi, phala kulanga o jimbudi ja Jihova. (Mal. 2:14; 2 Ti. 3:6) Twatokala we kutendela kuma Jihova, uxikina phala kuvutuka mu kilunga o muthu wadyela mu kidi o kituxi kyê, yu walungulula o ukexilu wê. Sumbala o tufunga atokala kutonginina kyambote o athu atele kituxi mu lwelu, maji katokala kubanza kwila Jihova nuka wanda loloka o athu yá. b—1 Ph. 2:10.
IHI ITENA KUBHANGA O KILUNGA?
13. Kyebhi kitutokala kutalatala o muthu amukatwile mu kilunga, maji kindala wavutuka? Kyebhi kitutokala kutalatala o muthu amukatula mu kilunga?
13 Kala kitwadilongo mu milongi yatundu-mu, kyoso mu kilunga kyabhana o ngolokela ya kwila o muthu amubazela, tutena kudilunga-nê mukonda walungulula o ukexilu wê. (1 Ti. 5:20) Mwene watokala mu kilunga, wabhindamena o kiswinisu kya jiphange phala kusuluka mu kubhanga o ima yambote. (Jih. 10:24, 25) Ki kyene kimoxi, kyoso o muthu kyamukatula mu kilunga. Kitutokala ‘kudilunga-nê, né ngó kudya n’ê kumoxi.’—1 Ko. 5:11.
14. Kala Kidistá usola kubhanga ihi, se muthu amukatula mu kilunga wiza mu kyonge? (Tala we ofoto.)
14 O kwila kiki kilombolola kuma o muthu amukatula mu kilunga, kitutokala kumwixana phala kuya mu kyonge mba ku mumenekena se wiza mu kyonge? Kana. Maji kitutena kudilunga-nê. Maji se muthu amukatula mu kilunga, ndandu yetu, mba wexile kamba dyetu, o Kidistá mwéne watokala kusola se wanda kumwixana phala kuya mu kyonge. Ihi i tutena kubhanga se mwene uya ku kyonge? Mu ukulu, kitwexile mumenekena o muthu. Lelu, kala Kidistá watokala kusola se umumenekena mba umusangesa. Maji kitutokala kuzwela-nê kyavulu.
O Kidistá mwéne watokala kusola se wanda kwixana o muthu amukatula mu kilunga phala kuya mu kyonge, mba se wanda mumenekena mu kyonge (Tala okaxi 14)
15. O 2 Nzwá 9-11 wamuzwela yalungu ni nanyi? (Tala we o kaxa “ O Kwila Poxolo Phawulu ni Nzwá, o Maka Exile Muzwela Ene Amoxi?”)
15 Phange utena kudibhwidisa: ‘O Bibidya kiyamba kwila woso umenekena o muthu amukatula mu kilunga, wamu mukwatekesa mu ibhangelu yê yayibha?’ (Tanga 2 Nzwá 9-11.) O mukanda wa kayadi wa Nzwá ulondekesa kwila o jivélusu jiji jalungu ni yó akwa kulungulukila o kidi ni yó ene muswinisa o athu kubhukumukina Jihova. (Dij. 2:20) O tufunga katokala kukunda o athu enyá. Nange ku hádya o muthu yu utena kuvutuka kwa Jihova. Maji se kavutuka luwa, kitwatokala kumumenekena né kumwixana phala kuya mu kyonge.
KAYELA O PHANGU YA HENDA YA JIHOVA
16-17. (a) Jihova wamesena kwila yó ate kituxi abhanga ihi? (Izekiyele 18:32) (b) Kyebhi o tufunga kyatena kukalkala kumoxi ni Jihova, kyoso kyaya ni kukwatekesa muthu wate kituxi?
16 Ihi i twadilongo mu Mulangidi yú? Jihova kamesena kwila kufwa muthu! (Tanga Izekiyele 18:32.) Mwene wandala kwila o yó ate kituxi avutuke kokwê phala kumubheza. (2 Ko. 5:20) Mukonda dya kiki, mwene wene mu kingila kwila o yó atele o kituxi, adyela anga avutuka kwa mwene. O tufunga akalakala kumoxi ni Jihova phala kukwatekesa yó a akatula mu kilunga, phala kuvutuka kwa Jihova.—Lom. 2:4; 1 Ko. 3:9.
17 Ku dyulu kukala kusanguluka kwa dikota, kyoso muthu wate kituxi, udyela! O Tat’etu ya dyulu, Jihova usanguluka kyoso o mbudi yajimbidila uvutuka mu kilunga. Kyoso kituya ni kuxinganeka ku muloloki wa Jihova ni mu ngalasa yê, o henda yetu kwa mwene idibandekesa dingi!—Luk. 1:78.
MWIMBU 111 O Kusanguluka Kwetu
a Kitwanda zwela dingi kwila o muthu wala mu kamukonde. Kala kyamba o izwelu ya Phawulu yala mu 1 Kolindu 5:13, kindala twanda zwela kwila ene a akatula mu kilunga.
b O Bibidya yamba kwila sayi athu kanda kwaloloka. Athu enyá asolo kukala jinguma ja Nzambi. Jihova ni Jezú éne ngó atokala kuzwela se sayi muthu anda muloloka mba kana.—Mál. 3:29; Jih. 10:26, 27.
