MBANDU YAKUDILONGA 31
MWIMBU 12 Jihova Nzambi, Muthu Wonene
Kyebhi Jihova Kyene Mukwatela Henda ku Athu Akwa Ituxi?
“Nzambi wazolo kyavulu o mundu, katé kyasuku mu kubhana Mon’ê umoxi-élele.”—NZW. 3:16.
ITWANDADILONGA
Kyebhi Jihova kyene mutukwatekesa mu kubhânga ni ituxi yetu, ni ihi ya bhange mwene phala o jiselevende jê jikale ni mwenyu wa sanguluka sé kituxi.
1-2. (a) O kituxi ihi, ni ihi yene mubhanga Jihova phala ku tubhulula? (Tanga we “Izwelu Yojimbulule.”) (b) Ihi itwanda dilonga mu milongi yiyi ni mu milongi ya kayela? (Tanga we “Ihi i Twanda Dilonga?”)
O KWILA utena kuxinganeka o henda ya Jihova kokwé? Sayi ukexilu wambote wa kusanga o kitambwijilu: Dilonge ihi yene mubhanga Mwene phala kutubhulula ku kalunga ni ku kituxi. O kituxi a nguma yetu, kitutena ku kitolola ngo mu nguzu yetu. Ihi ya bhange Jezú phala kubhulula o athu ku kituxi ni kukalunga? (Lom. 5:12) Maji Jihova ututangela kwila wanda tubhulula ku kituxi ni kalunga!
2 Sumbala o athu akwa ituxi, maji mu 6.000 jamivu ndenge Jihova wene mwakwatekesa kukala makamba mê. Mukonda dyahi? Mukonda mwene watuzolo. Jihova wene mulondekesa kwila wa tuzolo tunde o kithangana kyatubhange. Kyoso kituta kituxi, utukwatekesa phala tukale dingi tu makamba mê. Mwene wejiya kwila o kituxi kitubhekela kalunga, maji mwene kamesena kwila tufwa. Mwene wandala kwila tukala ku mwenyu mwenyu wa kalelaku. Twanda dilonga itambwijilu ya ibhwidisu itatu: (1) Kidyelelu kyebhi kya bhana Jihova ku athu akwa ituxi? (2) M’ukulu ihi ya bhangele o athu atele ituxi phala kusangulukisa Jihova ni kukala dingi makamba mê? (3) Ihi ya bhange Jezú phala kubhulula kate ku hádya ni hádya. (Lom. 6:23) Mwene we wamesena kwila eye ukala ni o athu ku kituxi ni ku kalunga?
KIDYELELU KYEBHI KYA BHANA JIHOVA KU ATHU AKWA ITUXI?
3. Kyebhi Adá ni Eva kya kituka akwa ituxi? (Tala we ofoto.)
3 Kyoso Jihova kya bhange Adá ni Eva mwene wa mesenene kwila ene asanguluka ku mwenyu. Jihova wa akazalesa, wa abhana dibhata ni salu yambote. Ene exile ni ujitu wa kwizalesa o ixi ni twana twa, ni kubhangesa o ixi yoso kukituka Palayizu, kala o njaludi ya Edene. Jihova wa fidisile ngó kima kimoxi ku Adá ni Eva, o kima kiki ki kyabhonzele ku kikumbidila. Jihova wajimbulula se ihi yeji bhita se ene, akamba ku mubelesela ejita kituxi ni kwila ejikufwa. Etu twejiya o kima kyabhiti. O anju yayibha kazolele Jihova ne ngó o athu, wanganala Adá ni Eva, yu wa abhangesa kubhukumukina Jihova. Mu veji dya kwivwa o Tata yâ yahenda, evu o anju yayibha. Ene ate kituxi. Twejiya o ima yabhiti kupholo, Adá ni Eva amateka kukuka, kudisukilu afu. Kala kyatangele Jihova ene avutuka ku mavu.—Dim. 1:28, 29; 2:8, 9, 16-18; 3:1-6, 17-19, 24; 5:5.
4. Mukonda dyahi Jihova wazembe o kituxi ni ihi ya bhange mwene phala tukale tumakamba mê? (Loma 8:20, 21)
4 O kima kyabhiti ku njaludi ya Edene kituluwalesa kyavulu. Jihova watumu kukisoneka mu Bibidya phala tutene kutendela kwila mwene wazembe kyavulu o kituxi. O kituxi kitusandula kwa tatetu ya kazola, itubhekela we kalunga. (Iza. 59:2) Mukonda dya kiki Satanaji, o anju yayibha ya bhangesa Adá ni Eva kuta kituxi, wazolo o kituxi yu wamusuluka mu kunganala o athu lelu. Kyoso Adá ni Eva kyate o kituxi, Satanaji mwene waxinganekene kwila mwene wabwikile o vondadi ya Jihova phala o athu. Maji mwene kexile ni kixinganeku kya kwila Jihova watuzolo kyavulu, ni kwila Jihova nuka weji lungulula o vondadi yê yalungu ni twana twa Adá ni Eva. Mwene wazolo o athu. Mukonda dya kiki kyoso Adá ni Eva kyate o kituxi, Jihova wabhana kidyelelu ku twana twâ. (Tanga Loma 8:20, 21.) Jihova wakijidile kwila ku twana twa Adá ni Eva sayi ya eji sola kumuzola ni kumubelesela. Mukonda dya kiki Jihova walondekesa o henda phala ene nakale ni ukamba wambote ni mwene. Ihi ya bhange Jihova?
5. Thembu yebhi Jihova wa bhana o kidyelelu kya dyanga? (Dimatekenu 3:15)
5 Tanga Dimatekenu 3:15. Jihova wabhana o kidyelelu kya dyanga kyoso kya balakala Satanaji yu wamutangela o ima yeji bhita ni mwene. Jihova wambe kwila weji tumikisa o “mbutu” phala kubhulula o athu mu ngongo. O mbutu yiyi yeji bwika Satanaji ni kuzubha o maka oso amoneka ku jaludim ya Edene. (1 Nz. 3:8) Maji phala kubhanga kiki o mbutu yiyi yeji tala hadi. Satanaji weji jibha o mbutu. Kidi kwila o kima kiki kyeji bhekela hadi yavulu kwa Jihova. Maji mwene wexile polondo phala kutala hadi, mukonda mazunda ni mazunda a athu eji bhuluka kukituxi ni kufwa!
IHI YABHANGE O ATHU AKWA ITUXI PHALA JIHOVA KWAXIKINA?
6. Ihi ya bhangele o mayala afiyele kala Abele ni Nowé phala kukala makamba a Jihova?
6 Mivu kupholo, Jihova wajimbulula se ihi ya tokalele o kubhanga o athu akwa ituxi phala kukala ni ukamba wambote ni mwene. Mukifika, Abele o mona wa kayadi ya Adá ni Eva, mwene o muthu wa dyangele kulondekesa kixikanu kwa Jihova mu yoso ya bhiti mu jaludim ya Edene. Abele wa zolele Jihova yu wamesenene kumusangulukisa ni kukala kamba dyê. Mukiki mwene wamesenene kubhana kima kwa Jihova. Abele wexile mubhidi ya jimbudi, mukiki mwene wakatula jimbudi phala kujibhana kwa Jihova kala sata. Kyebhi Jihova kya divu? Mwene “waxikina Abele ni sata yê.” (Dim. 8:20, 21) Jihova waxikina we o jisata ja athu amukwa mukonda a muzolele, ni kwila a mudyelele kala Nowé. (Dim. 8:20, 21) Mukuxikina o jisata jiji, Jihova walondekesa kwila o athu akwa ituxi atena kumusangulukisa ni kukala makamba mê. b
7. Ihi itwadilongo ku kima kyabhingi Jihova kwa Mbalahamu? (Tala we ofoto.)
7 Kupholo dya kwenda Jihova wabhingi kwa Mbalahamu phala kubhanga kima kyabhonzele kyavulu, o kusatela mon’ê Izake. Mu ima yoso ya bhingi Jihova kwa Mbalahamu phala ku ibhanga kiki kyexile o kima kyabhonzele dingi kumwenyu wê woso. Ne kiki Mbalahamu wa solo kubelesela Jihova. Kyoso Mbalahamu kyexile polondo phala kujibha mon’ê Izake Jihova wamufidisa. O kima kya bhingi Jihova kitulonga disá dya katunda. Jihova wejikala polondo phala kubhana mon’ê wa kazola kala sata ya kukula. Kiki kilondekesa kwila Jihova wazolo kyavulu o athu.—Dim. 22:1-18.
8. O jisata jexile mubhana o akwa Izalayele yexile mulondekesa ihi? (Ijila 4:27-29; 17:11)
8 Mivo ku pholo, Jihova wabhanene Kijila ku mundu wa Izalayele, o kijila kiki kyambele kiki ene eji satela ibhaku phala kwaloloka o ituxi yâ. (Tanga Ijila 4:27-29; 17:11.) O jisata jojo jexile mulondekesa kwila, ku hadya Jihova weji bhanga kima kyeji bhwisa o kituxi kya athu mu ngongo yoso. Jihova watumina o jipolofeta kuzwela yalungu ni mbutu yê. Ene ajimbulula kwila o mbutu yiyi, o mona wa kazola wa Nzambi, weji tala hadi yavulu ni kufwa, o mbutu yiyi eji musatela kala mbudi. (Iza. 53:1-12) Xinganeka: Jihova wasatela mon’ê wa kazola phala kubhulula o athu oso ku kituxi ni ku kalunga kate mwene eye!
IHI YABHANGE JEZÚ PHALA KUBHULULA O ATHU KU KITUXI?
9. Ihi ya zwela Nzwa dya Batizu yalungu ni Jezú? (Jihebelewu 9:22; 10:1-4, 12)
9 Mu muvu wa 29 K.K., Nzwa dya Batizu wamono Jezú dya Nazale yu wambe: “Talenu o Kambudi ka Nzambi, kakatula o kituxi mu ngongo!” (Nzw. 1:29) O izwelu yiyi ilondekesa kwila Jezú mwene wexile o mbutu ya kanene Jihova. Jezú weji bhana o mwenyu we kala sata phala o athu oso mu ngongo. Mu kithangana kiki, o kidyelelu kya bhana Jihova phala kubhulula o mundu ku kituxi kyexile kya kidi.—Tanga Jihebelewu 9:22; 10:1-4, 12.
10. Kyebhi Jezú kya londekesa kwila weza “mu kwixana” o akwa ituxi?
10 Jezú wexile mukwatela henda benge-benge kwa yo exile mutala hadi yavulu yu wexile mwa exana phala kukala akayedi’ê. Mukidi Jezú wejidile kwila o kima kyexile mubhangesa o athu kutala hadi kyexile o kituxi. Mukonda dya kiki, mwene wexile mubhanga yoso ni yoso phala kukwatekesa o mayala ni ahatu exile mutala hadi mukonda dya kituxi kya tele. Sayi kizwa, Jezú wa jimbulula o kidi kiki mukuta kifika. Mwene wambe: “O athu adisanze ka bhindamena musaki, maji yó akate.” Mukusuluka, mwene wambe: “Ki ngeza mu kwixana o athu a yuka, maji o akwa ituxi.” (Mat. 9:12, 13) Kyene mwene kya bhange Jezú. Mwene wexile mukwa henda yu waloloka o ituxi ya muhatu wa sukula o inama yê ni masoxi mê. (Luk. 7:37-50) Mwene walongo o kidi kwa muhatu mukwa Samadiya, sumbala mwene wa kijidile kwila mwene watungile ni diyala kexile kaza dyê. (Nzw. 4:7, 17-19, 25, 26) Kate mwene Nzambi wa bhana kwa Jezú o kutena phala kuzubha o kalunga, ijila bhukaxi ka kituxi. Kyebhi kya bhange kiki? Jezú wabhange kiki mu kufukunununa mayala, ahatu ni ana ndengi.—Mat. 11:5.
11. Mukonda dyahi o athu akwa ituxi kexile mukala ni woma wa kuzwela ni Jezú?
11 Mukonda dyahi o athu akwa ituxi kexile mukala ni woma wa kuzwela ni Jezú? Mukonda Jezú wexile mulondekesa henda ku athu ni kutendela kyebhi kyexile mudivwa. Mukonda dya kiki kate mwene o athu exile muta ituxi ya makota exile mudivwa kyambote mukukala kumbandu ya Jezú. (Luk. 15:1, 2) Jezú wexile muximana ni kubesowala o athu exile mulondekesa kixikanu kwa mwene. (Luk. 19:1-10) Mu kubhanga kiki Jezú walondekesa o kidifwa kya katunda ya Jihova o henda. (Nzw. 14:9) O ima ya zwela ni yabhange Jezú ilondekesa kwila o Tat’ê ya kazola, wa zolo o athu ni kwila wamesena ku kwatekesa kala muthu mudyetu kutolola o kituxi. Kumbandu yengi, Jezú wakwatekesa o athu akwa ituxi kukala ni hânji ya kulungulula o ukexilu wa mwenyu wâ ni kumukayela.—Luk. 5:27, 28.
12. Ihi yalongo Jezú yalungu ni kufwa kwê?
12 Jezú wejidile kwila weji fwa. Mu ithangana yavulu mwene wazwela ku akayedye kwila eji mu bhakula bhu maku a akunji a makota ni jimesene ja kulonga o Kitumu ni ku mu phaphela ku taka (Mat. 17:22; 20:18, 19) Kala kya zwelele Nzwa ni jipolofeta ja mukwa Jezú wejidile kwila o sata yiyi yeji katula o kituxi ku mundu, Jezú wambe we kwila kyoso kyeji fwa, mwene weji “bheka athu a idifwa yoso”. (Nzw. 12:32) Kiki kilombolola kwila woso ulondekesa kixikanu kwa Jezú ni kukituka mukayedye wanda sangulukisa Jihova. Woso abhanga kiki anda kwajituna “ku ituxi.” (Lom. 6:14, 18, 22; Nzw. 8:32) Mukonda dya kiki Jezú ni kuswina kwoso wexile polondo phala kutala hadi ni kufwa.—Nzw. 10:17, 18.
13. Kyebhi Jezú kyafu? O kufwa kwê kutulonga ihi yalungu ni Jihova Nzambi? (Tala we ofoto.)
13 Jezú amubhakula bhu maku a akunji ku kamba dye dyakazola. Mukusuluka, o jinguma jê amukutu, amulokalala yu amutatela ima kayibhange. A mu mbalakala phala kufwa, ya amubeta kyavulu, kudisukilu o masoladi a muphaphela ku taka. Mukidi o ima yoso yiyi yabhekela hadi yavulu kwa Jezú. Maji sayi muthu wabetele dingi kota mukutala hadi: O muthu yu Jihova Nzambi. Jihova wabhange nguzu yavulu phala kakatule o hadi yexile mutala mo’ne ni kufwa. Mukonda dyahi? Ihi yabhangesa Jihova kwehela mon’ê kutala hadi ni kufwa? Mwene wabhange kiki mukonda dya henda. Jezú wambe: “Mukonda Nzambi wazolo kyavulu o mundu, katé kyasuku mu kubhana Mon’ê umoxi-élele, phala woso u muxikana káfwe, maji akale ni mwenyu wakalelaku.”—Nzw. 3:16.
Jihova watale hadi yavulu kyoso kyabhanga Mon’ê phala kufwa phala kutubhulula ku kituxi ni ku kalunga (Tala okaxi 13)
14. O sata ya Jezú ilondekesa ihi phala eye?
14 Jihova walondekesa kwila wazolo o twana twa Adá ni Eva bhukaxi kasata ya kukula. O sata yiyi ilondekesa kwila Jihova wakuzolo kyavulu. Jihova watale hadi yavulu mu kubhana mon’ê phala ku tubhulula ku kituxi ni ku kalunga. (1 Nz. 4:9, 10) Sé phata, Jihova wamesena kutukwatekesa kubhânga ni ituxi yetu ni kwitolola!
15. Ihi itwatokala o kubhanga phala o ituxi yetu a iloloke?
15 O ujitu yu wa Nzambi, o sata ya mon’ê Jezú, ubhangesa kuloloka o ituxi yetu. Maji phala kutuloloka o ituxi twatokala kubhanga kima. Nzwá dya Batizu ni Jezú azwela o ima itwatokala o kubhanga: “Dyelenu, mukonda o Utuminu wa dyulu wazukama.” (Mat. 3:1, 2; 4:17) Mukiki, phala kubhânga ni ituxi yetu ni ku itolola ni kukala ni ukamba wambote ni Tat’etu, twatokala kudyela o ituxi yetu. Maji o kudyela kulombolola ihi? Ni kyebhi o kima kiki kitukwatekesa kubhânga ni kituxi? O milongi ya kayela yanda tambwijila o ibhwidisu yiyi.
MWIMBU 18 Twa Sakidila o Sata ya Kukula
a IZWELU YOJIMBULULE: Mu Bibidya, o kizwelu “kituxi” kitena kulombolola ibhangelu yayibha mba kyoso o muthu kya kamba kubelesela o itumu ya Jihova yalungu ni ima yawabha ni ima yayibha. Maji o kizwelu “kituxi” kitena kulombolola wê o kituxi kitwalundula kwa Adá ni Eva. Etu tufwa mukonda dya kituxi kitwalundula.
