1-2. (a) Mukonda dyahi o makaza a ubhe atokala kudyelela kwa Jihova? (Jisálamu 37:3, 4) (b) Ihi itwanda dilonga mumilongi yiyi?

O KWILA eye wamesena kukazala inga wakazala kindala? Se kyene, se phata eye wamesena kusanguluka ku mwenyu kumoxi ni muthu uzolo kyavulu. Mu kidi, o mwenyu wa ukaza wala ni ibhidi O makaza a ubhe ala ni ima yabetakota phala kusola. Ihi i ubhanga kyoso ki ubhinga kusola ima yanda funyisa o kusanguluka kwé mu ukaza mu mivu kuphholo? Se udyelela kwa Jihova wanda sola ima ni unjimu, o ukaza wé wandakola dingi wanda sanguluka. Se ki ukumbidila o itendelesu ya Nzambi, nange eye wanda dibhana ni ibhidi mu ukaza wé, eye kiwanda sanguluka.—Tanga Jisálamu 37:3, 4.

² Sumbala o milongi yiyi yanda dikwatenena dingi ku makaza a ubhe, maji twanda zwela o ibhidi idibhanayu o makaza oso. Twandatonginina se ihi itutena kudilonga ni phangu ya tuxila o mayala ni ahatu afiyele atumbula mu Bibidya. O jiphangu jiji ja Bibidya jitulonga madisá ututena kukumbidla mu maukexilu avulu ku mwenyu, katé mwene ni mu ukaza. Twandamona we se ihi itutena kudilonga ni phangu ya makaza a izuwa yalelu.

3-4. Ibhidi yebhi itena kudibhana nayu o makaza a ubhe?

³ Sayi athu nange anda swinisa o makaza a ubhe kwambata o mwenyu kala kibhanga o athu oso. Mukifika, o jitata ni jindandu  atena kujijidika o dikaza kukala ni twana mu kithangana ni mbandu se kibhana. Mbaphe, o makamba atena kuswinisa o dikaza kusumba inzo ni ku izalesa ni ima yafwama.

⁴ Se kadilange, o dikaza ditena kusola ima yanda kwabhekela makongo avulu. Kyenyiki, kikale o diyala mba o muhatu anda bhinga kukalakala ola javulu phala kufuta o makongo yó. O fisu mba salu itena kumateka kwanyana o kithangana kyeji ngaxtala mu kudilonga o Bibidya ubheka, kubhanga o ubhezelu ku mwiji, mba kuboka. O dikaza nange ditena kufonga muyônge phala kukalakala dingi ola jengi kusalu mba kubhanga yoso yatena phala ka akaye ku salu. Se abhanga kiki, sayi ima isangulukisa musidivisu ya Jihova ene kandatena ku ibhanga.

5. Ihi iwadilongo mu musoso wa Nyanga ni Mariza?

⁵ O musoso ulondekesa kwila kulunga o mwenyu wetu mu kusota o jimbote kikitubhekela kusanguluka. Tala ihi yadilongo o dikaza adixana Nyanga ni Mariza. * Kyoso ene kya kazala kiyadi kyâ exile mukalakala kizuwa kyoso kyamuvimba, ejikala ni kitadi kyavulu ni jimbote. Maji ene kexile ni kusanguluka kwa kidi. Nyanga wajimbulula: “Etu twexile ni ima itwabhindamene, maji kitwexilyetu ni jimbambe jakubhanga dingi mu sidivisu ya Jihova. Phala kuzwela o kidi, o mwenyu wetu watubhinjikile watubhonzele kyavulu.” Nange eye watale kwila o kulunga o mwenyu we kujimbote kikwakubhekela kusanguluka. Se kyene, kana kuluwala. Tala o jiphangu jambote ja akwenu jitena ku kukwatekesa kulungulula ima iwabhingi. Kyadyanga, tumone se ihi itena kudilonga o anumi ku phangu ya axila o Sobha Jozafate.

6. Kyebhi Sobha Jozafate kyakumbidila o kitendelesu kitusanga mudivulu dya Jisabhu 3:5, 6, kyoso o kifuxi kyadikota kyamasoladi kyeza kubhânga ni mundu wê?

⁶ Anumi, o kwila sayi kithangana wadivu kya kwila kwanemene kukumbidila o kikalakalu kyé mu ukaza? Se kyene, eye utena kukatula mbote kuphangu ya Jozafate. Kala Sobha, Jozafate wexile ni kikalakalu kya kulanga o kifuxi kyoso! Ihi yabhange mwene phala kukumbidila o kikalakalu kiki kyadikota? Jozafate wabhange o ima yatokalele o kubhanga phala kulanga o mundu wê. Mwene watungu jimbonge, wasokejeka kifuxi kya 1.160.000 amasoladi ndenge. (2 Mal. 17:12-19) Kupholo, Jozafate wadibhana ni kibhidi kyadikota. Masoladi avulu akwa Amone, akwa Mowabe, ni mayala akwa milundu ya Seyíle akusu o sobha, mwiji wê, ni mundu wê. (2 Mal. 20:1, 2) Ihi yabhange Jozafate? Mwene wasoto o kikwatekesu ni nguzu ya Jihova. O kima kyabhangele kyalungu ni kitendelesu kya unjimbu kitusanga mudivulu dya Jisabhu 3:5, 6. (Tanga.) O musambu wakilendu wa Jozafate, tu usanga mu 2 Malunda 20:5-12, ilondekesa kyebhi mwene kyadyelele  kwa Tat’ê ya henda ya dyulu. Kyebhi Jihova kyatambwijila o musambu wa Jozafate?

7. Kyebhi Jihova kyatambwijila o musambu wa Jozafate?

⁷ Jihova wazwela ni Jozafate bhukaxi ka Levita amwixana Jaziyele. Jihova wambe: “Mu sukila ngó mu kanga, hé mu’imana, nda mu mone kyá o ubhulukilu wanda ku mi bhana Jihova.” (2 Mal. 20:13-17) Mukidi, yú kiwene o ukexilu watokala wa kubhânga mu ita! Maji o itendelesu yiyi kiyatundu ku muthu, maji yatundu kwa Jihova. Ni kidyelelu kyoso kwa Nzambi, Jozafate wabhange kala kyamutendelesa. Kyoso mwene kyayi kudisanga ni jinguma, mwene wakexile kupholo dya masoladi mê, o masoladi ambata kexile ni mauhete avulu mu ita, jingividi kijexile ni mata. Jihova wakumbidila o kikanenu kyabhangele kwa Jozafate; Mwene wabwikisa o jinguma.—2 Mal. 20:18-23.

8. Ihi itena kudilonga o anumi mu phangu ya Jozafate?

⁸ Anumi, enu mutena kudilonga ni phangu ya Jozafate. Enu mwala ni kikalakalu kya kudikila o mwiji wenu, kyenyiki, enu mukalakala ni nguzu yoso phala kulanga ni kukwatekesa o mwiji wenu. Kyoso kimudibhana ni maka, enu nange mutena kudivwa kwila mutena kubatula o maka enya, maji kanenu kudyelela mu nguzu yenwenu. Muveji dya kiki, sambenu mukubhinga kikwatekesu kyoso ki ukala ubheka. Kumbandu yengi, jikula o muxima mukusamba kumoxi ni muhatu wê. Sota kwijiya o ixinganeku ya Jihova mukudilonga o Bibidya ni madivulu abhana o kilunga kya Nzambi, ni kukumbila o itendelesu i usangamu. Akamukwa, kanda xikina o ukexilu u usola mukubatula o maka bhukaxi ka Bibidya, ene katé andakuzwela kwila eye watobho. Ene atena kuzwela kwila o kitadi ni ima iwanda sumba yandabhekela kifikidilu ku mwiji wé. Maji lembalala o phangu ya Jozafate. Mwene wadyelele kwa Jihova, yu wakilondekesa bhukaxi ka ibhangelu yê. Jihova kabhana dikunda kudiyala dyodyo, mwene kandakubhana we dikunda. (Jisá. 37:28; Jihe. 13:5) Ihi itena kubhanga o makaza phala kuxikina ni kidi kyoso kwila ene ala ni kusanguluka? Ihi dingi itena kubhanga o makaza phala kukala ni kusanguluka ku kumwenyu?

9. Ihi itutena kuzwela yalungu ni polofeta Izaya ni muhatwê?

⁹ Polofea Izaya ni muhatwê alungila o mwenyu wâ musidivisu ya Jihova. Izaya wexile polofeta nange o muhatwê wexile we ni ikalakalu yê ya upolofeta, mukonda exile mu mwixana “polofeta.” (Iza. 8:1-4) Kala dikaza Izaya ni muhatwê, se phata alungile o mwenyu wâ woso mu ubhezelu wâ kwa Jihova. Phangu yambote yaxisa ene phala o makaza a izuwa yalelu!

10. Kyebhi o kudilonga o jipolofesiya ja Bibidya kutena kukwatekesa o makaza kumesena kubhanga dingi yoso yatena phala Jihova?

¹⁰ O makaza a izuwa yalelu, atena kukayela o phangu ya Izaya ni muhatwê mukubhanga yoso yatena musidivisu ya Jihova. Ene atena kukolesa o kidyelelu kyâ kwa Jihova mukudilonga o jipolofesiya ja Bibidya ni kumona kyebhi o jipolofesya jiji jakidi mwene. * (Titu 1:2) Ene atena kuxinganeka se ihi yatena kubhanga phala kukwatekesa kukumbidila dingi jipolofesya jengi ja Bibidya. Mukifika, atena kubhanga mbandu mu kukumbidila o polofesya ya Jezú yalungu ni kutudila o njimbu mungongo yoso, andi dya kwiza o dizubhilu. (Mat. 24:14) O dikaza dyejiya kwila o Jipolofesya  jiji janda dikumbidila mwene, andakala polondo phala kubhanga yoso yatena phala Jihova.

11. Pidisila ni Akwila atena kubhanga ihi ni mukonda?

¹¹ O makaza a ubhe atena kudilonga ni phangu ya Pidisila ni Akwila, dikaza dya Jijude atungile mu mbanza ya Loma. Ene evwile o njimbu yambote yalungu ni Jezú, ya akituka Jikidistá. Se phata ene awabhelele o ukexilu wa mwenyu wâ. Maji, o mwenyu wâ walunguluka mu kithangana ni mbandu kyoso o unguvulu wa akwa Loma, Kalawdyu wabhanene o ngolokela ya kwila oJijude atokalele kuxisa o mbanza ya Loma. O kwila utena kuxinganeka se ihi yeji bhita ni akwila ni Pidisila? Ene ejitena kuxisa mwiji ni kuya kusota inzo yengi ni kumateka kukalakala mu kididi kyengi. O kwila o ima yiyi yalunguluka mukithangana ni mbandu ya afidisa kubhanga dingi yoso yatenene kubhanga phala Jihova? Eye nange utena kutambwijila o kibhwidisu kiki. Mu inzo yâ ya ubhe mu Kolindu, Akwila ni Pidisila amateka kukalakala ni nguzu yoso kumoxi ni poxolo Phawulu phala kukwatekesa o jiphange mukilunga kya Kolindu. Mukusuluka ayi mumbanza yengi mwabhindamene dingi aboki. (Ika. 18:18-21; Loma 16:3-5) Ku mwenyu wâ exile ni ima yavulu phala kubhanga, ene asangulukile!

12. Mukonda dyahi o dikaza dya tokala kuxinda jimbambe mu nzumbi?

¹² O makaza a izuwa yalelu atena kukayela o phangu ya Pidisila ni Akwila mukuta o Utuminu wa Nzambi kupholo. O kithangana kyambote phala o dikaza kuzwela yalungu ni jimbambe jâ o kithangana kya kuditangesa mba andi kya kukazala. Kyoso o dikaza kya xinda o jimbambe musidivisu ya Jihova ni kukalakala kumoxi ni nguzu yoso phala kukumbidila o jimbambe jiji, ene andamona o kikwatekesu kya Jihova ku mwenyu wâ. (Ndo. 4:9, 12) Tala o musoso wa phange Luka ni Elizabeti. Phange Luka wambe, “Andi dya kukazala twazwelele kyá se ihi itwamesenene kubhanga phala Jihova.” Elizabeti wambe, “Etu twazwele yalungu ni ima itwejidibhana kupholo kyoso kitweji bhinga kusola ima, etu twatokalele kwijiya kwila o ima itweji sola  kiyeji fidisa o jimbambe jetu.” Sayi ima yabhangesa phange Luka ni Elizabeti yakwatekesa kuya musidivila ku Micronesia mwexile ibhindamu yadikota ya aboki.

13. Kala kilondekesa Jisálamu 28:7, ihi yanda bhita kyoso kitudyelela kwa Jihova?

¹³ Kala phange Luka ni Elizabeti, makaza avulu ene musola kuxisa ima yavulu kudima phala atene kungaxtala ithangana yosoko mukuboka ni mukulonga o njimbu yambote. Kyoso o makaza kya xinda jimbambe jakubhanga yoso yatena phala Jihova, kyenyiki ene akalakala kumoxi phala atene kukumbidila o jimbambe jâ, o kiki kyandakwabhekela ima yavulu yambote. Ene andamona kyebhi Jihova kya alanga, o kikyelelu kyâ kwa Jihova kyanda dibandekesa dingi, ene andakala ni kusanguluka kwa kidi.—Tanga Jisálamu 28:7.

14. Kyebhi poxolo Phetele ni muhatwê kyalondekesa kwila adyelele mu ikanenu itusanga mu divulu dya Matesu 6:25, 31-34?

¹⁴ O makaza atena we kudilonga ni phangu ya axila poxolo Phetele ni muhatwê. Mukubhita samanu dya Jimbeji tunde kyadisangele ni Jezú muveji yê yadyanga, Phetele wabhingile kusola kima kyabetakota ku mweyu wê. Phetele wexile mudikila o mwiji wê ni ufunu wa mutambi. Kyoso Jezú kyexanene Phetele phala kumukayela musidivisu ya tembu yoso, Phetele wabhingile kuxinganeka yalungu ni muhatwê kyoso mwene kyeji sola kuxikina o kixanu kiki. (Luka 5:1-11) Phetele wasolo kukayela Jezú mukikalakalu kyê kya kuboka. Mwene wasolo ni unjimu! Etu twala ni ima yavulu ituxikinisa kwila o muhatu wa Phetele wamukwatekesa mu kima kyasolo. O Bibidya ilondekesa kwila kyoso Jezú kyamufukununa, sayi ithangana Phetele ni muhatwê ende njila kumoxi. (1 Kol. 9:5) Se phata, o muhatu wa Phetele wexile phangu yambote kala Kidistá, Phetele watenene kuzwela ni kidi kyoso mukubhana o itendelesu ku anumi ni kwa ahatu exile Jikidistá. (1 Phe. 3:1-7) Mukidi, kikale Phetele kikale o muhatwê adyelele mu ikanenu ya Jihova ya kwila mwene weji kwa dikila se ene atele o Utuminu wa Nzambi kupholo ku mwenyu wâ.—Tanga Matesu 6:25, 31-34.

15. Ihi iwadilongo mu musoso wa Tiyaku ni Estele?

¹⁵ Se eye wakazala ukulu, kyebhi ki utena kusuluka ni kubhanga dingi musidivisu ya Jihova? O ukexilu umoxi o kukatula mbote wa musoso wa makaza engi. Mukifika eye utena kutanga o milongi ni dyambu: “Eles se Ofereceram.” O milongi yiyi yakwatekesa Tiyaku ni Estele, dikaza atungu ku Brazil, kumesena kuya mu ididi mwexile ibhandamu ya aboki. Tiyaku wajimbulula: “Kyoso kitwatange o musoso wakumona kyebhi Jihova kya kwatekesa o jiselevende jê mu izuwa yalelu, etu twamesenene kumona o lukwa lwa Jihova kutandu dyetu mukutwendesa ni kutulanga.” Ene ayi mu ixi ya Paraguai, kwene kwa sidivila mukilunga kya phutu tunde ku 2014. Phange Estele wambe: “O velusu itwa wabhela kyavulu kiyadi kyetu Efezu 3:20. Muveji javulu twene mumona kyebhi o velusu yiyi idikumbidila mwene netu musidivisu yetu kwa Jihova.” Mu mukanda yú Phawulu wakanena kwila Jihova wejibhana dingi ima, o itwabhingi ndenge. O kikanenu kiki twene mukimona kudikumbidila muveji javulu!

16. Jindungi jebhi jitena kukwatekesa o makaza a ubhe kyoso ene kyamuxingeneka kuxinda jimbambe ku mwenyu wâ?

¹⁶ O makaza a ubhe lelu atena kukatula mbote ku musoso a yó adilondo kudyela kwa Jihova. Sayi makaza angaxtala mivu yavulu  musidivu ya tembu yoso. Bhinga jindunge se mwamuxinganeka kuxinda jimbambe ku mwenyu wenu. Yú ukexilu wakamwakwa wakulondekesa kwila enu mwadyelela kwa Jihova. (Jisa. 22:17, 19) O tufunga atena kukwatekesa o makaza a ubhe kuxinda jimbambe munzumbi.

17. Ihi yabhiti ni Nyanga ni Mariza, ihi itutena kudilonga mu phangu yâ?

¹⁷ Sayi ithangana, mukusola kubhanga dingi phala Jihova, o ima ki ibhita kala kitwakingile. Tala o phangu ya Nyanga ni Mariza, twa atumbula kudima. Mukubhita mivu itatu tunde kya kazala, ene ayi kukwatekesa mukikalakalu kya kutunga mu filiyale ya Finlândia. Maji kupholo evu kuma eji tena kukalaku ngo mbeji jisamanu. Kudimatekenu ene aluwalele. Maji kupholo o ima yalunguluka, a exana phala kudilonga o dimi dya árabe, ene kindala asanguluka mukusidivila mu dimi Árabe mu ixi yengi. Mukuxinganeka mu ima yabhiti, phange Mariza wambe: “Eme ngexile ni woma wakubhanga ima nuka nga ibhangele, kwabhingile kudyelela kwa Jihova ni muxima woso. Maji ngamono kyebhi Jihova kyatu kwatekesa jinga mu ukexilu kitwa uxinganekene. Kyoso kingabhiti mu ima yiyi o kixikanu kyami kyadibandekesa dingi.” Kala kyalondekesa o musoso yú, eye utena kudyelela ni kidi kyoso kwila Jihova wandakubesowala se eye umudyelela ni muxima woso.

18. Ihi yatokala kubhanga o makaza phala kusuluka ni kudyelela kwa Jihova?

¹⁸ O ukaza ujitu wa Jihova. (Mat. 19:5, 6) Mwene wamesena kwila o makaza asanguluka ni ujitu yú. (Jisa. 5:18) Enu mumakaza a ubhe, mwa tonginina kya kyebhi kimwanda kwambata o mwenyu wenu? O kwila enu mwamubhanga yoso imutena phala kulondekesa kwa Jihova kwila enu mwa sanguluka ni ujitu yu wakatunda wamibhana? Zwelenu ni Jihova bhukaxi ka musambu. Sotenu itendelesu mu Maka mê idikumbidila ni enu. Kyenyiki, kumbidilelu o itendelesu imibhana Jihova. Eye utena kudyelela ni kidi kyoso kwila mwandasanguluka ni kutambula mabesá mukonda dya kuta o Utuminu wa Nzambi kupholo dya mwenyu wenu!