1. Kyebhi kitutena kudilanga mu ima yoso? (2 Timote 4:5)

 KYOSO kikubhita kima kituluwalesa, o ufiyele wetu kwa Jihova ni ku kilunga kyê atena ku ulola. Kyebhi kitutena kutolola o ibhidi yiyi? Twabhingi kudilanga ni kukolokota mu kixikanu. (Tanga 2 Timote 4:5.) Tutena kudilanga kyoso ki tutululuka, kyoso kitukala ni ibanzelu yambote ni kumona o ima kala kimona Jihova. Se tubhanga kiki, o ibanzelu yetu kanda ku yendesa ku jihanji jetu.

2. Ihi itwandadilonga mu milongi yiyi?

² Mu milongi yatundumu, twamono ibhidi itatu ijila ku athu ki Jimbangi ja Jihova. Mu milongi yiyi, twandamona ibhidi itatu itena kubhita mu kilunga itena kulola o ufiyele wetu kwa Jihova: (1) kyoso kitumona kuma phange watutalatala kyayibha, (2) kyoso kyatubazela ni (3) kyoso o ima mu kilunga kya Jihova ilunguluka. Kyebhi kitutena kudilanga ni kukolokota fiyele kwa Jihova ni ku kilunga kyê kyoso kitudibhana ni ibhidi yiyi?

3. Ihi itena kubhita n’etu se phange watutalatala kyayibha?

³ O kwila eye akutalatala kyá kyayibha kwa phange mu kilunga, nange muthu wala kupholo kala kafunga? Nange mwene kamesenene kubhanga kiki. (Lom. 3:23; Tiy. 3:2) Né kiki eye waluwalele ni kima kyabhiti. Nange eye kiwatenene kuzeka mukonda dya ima yiyi. Nange eye wadibhwidisa: ‘Se phange wabhange kiki, o kwila kiki kyene o kilunga kya Nzambi?’ Satanaji  wamesena kuma tubanza kyenyiki. (2 Ko. 2:11) O ibanzelu yiyi itena kutusandula kwa Jihova ni ku kilunga kyê. Se tumona kuma sayi phange watutalatala kyayibha, ihi itutena kubhanga phala kudilanga ni kukamba kubanza mu ima yayibha?

4. Kyebhi Zuze kyadilange kyoso kyamutalatala kyayibha? Ihi itutena kudilonga ku phangu yê? (Dimatekenu 50:19-21)

⁴ Kana kubhaka phonzo. Kyoso Zuze kyexile monandenge, o jiphange jê amutalatala kyayibha. Sayi mwene jiphange jê amesenene kumujibha. (Dim. 37:4, 18-22) Mu kusuluka, amusumbisa kala mubhika. Mu kubhita 13 kya mivu Zuze wadibhanene ni ibhidi yavulu. Nange Zuze waxinganeka se Jihova wamuzolele mwene. Nange mwene wexile mudibhwidisa se Jihova wamubwazeka mu kithangana kyenyókyo, kyoso kyabhindamene o kikwatekesu. Maji Zuze kabhake phonzo. Mwene wadilange mu kukala ni kutululuka. Kyoso kyexile ni kithangana phala kuvutula phonzo ku jiphange jê, mwene kabhange kiki. Wa alondekesa henda, yu wa aloloka. (Dim. 45:4, 5) Zuze wabhange kiki mukonda wexile ni ibanzelu yambote. Mwene kexile mudikwatenena mu ibhidi yê, maji wexile mubanza mu vondadi ya Jihova. (Tanga Dimatekenu 50:19-21.) Ihi itudilonga? Se akutalatala kyayibha, kana kuluwala ni Jihova mba ki ubanze kwila mwene wakubwazeka. Mu veji dya kiki, xinganeka kyebhi mwene kyamukukwatekesa kukolokota mu ibhidi. Kyoso kyakutalatala kyayibha, sota kuloloka akwenu ni henda yoso.—1 Ph. 4:8.

5. Ihi yabhange manu Mikeya kyoso kyamono kwila amutalatala kyayibha?

⁵ Tala o phangu ya kafunga watungu ku America do Sul amwixana Mikeya. b Mwene ulembalala kyoso kyamono kuma o jiphange ala kupholo mu kilunga kya Jihova, amutalatala kyayibha. Mwene wambe: “Nuka ngadivwile kyayibha kala mu kithangana kyenyókyo. Ngexile ni hele yavulu. Mu usuku wenyó kingatenene kuzeka, ngexile mudila mukonda ngadivwile kwila seku kima kingejitena kubhanga.” Né kiki manu Mikeya kabhange ima yayibha, maji wabhange yoso ni yoso phala kulanga o jihânji jê. Mu ithangana yoso mwene wexile musamba, mu kubhinga o nzumbi ikôla ya Jihova ni nguzu phala kukolokota. Wexile we mutokwesa milongi mu madivulu metu phala kumukwatekesa. Ihi itudilonga? Se wamono kwila sayi phange wakutalatala kyayibha, tululuka, bhanga yoso phala kulanga o jihânji joso jayibha ji utena kukala naju. Nange eye kiwejiya se ihi yabhangesa o muthu kuzwela mba kubhanga o kima kyenyókyo. Mu kiki zwela ni Jihova bhukaxi ka musambu, mubhinge o kikwatekesu kyê phala ni umone o ima mu ukexilu wa muthu wengi. Kubhanga kiki kyanda kukwatekesa kumona kuma o phange kamesenene ku kubhanga kyayibha, kyanda kukwatekesa we kumuloloka. (Jisa. 19:11) Lembalala kwila Jihova wejiya o kibhidi ki wamudibhana nakyu, mwene wandakubhana nguzu iwabhindamena phala kukolokota.—2 Mal. 16:9; Ndo. 5:8.

6. Mukonda dyahi twabhingi kutendela kwila Jihova utubazela mukonda watuzolo? (Jihebelewu 12:5, 6, 11)

⁶ Kyoso Jihova kyatubazela, tutena kuluwala kyavulu. Maji kyoso kitudikwatenena ngó mu kuluwala kwetu, tutena kumateka kubanza kuma katubazela mu ukexilu wambote mba o kibazelu ki kyatutokalele. Kiki kitena kutufidisa kutendela kima kya katunda, kya kwila Jihova wa mutubazela mukonda watuzolo. (Tanga Jihebelewu 12:5, 6, 11.) Se  twehela o jihânji jetu kutulanga, twamujikula njila phala Satanaji kulanga o jihânji jetu. Mwene wamesena kuma tudituna o kutubazela, ni kwila tusandula kwa Jihova ni ku kilunga kyê. Se akubazela, kyebhi ki utena kulanga o jihânji jê?

7. (a) Kala kilondekesa o jifoto, kyoso Phetele kyamubazela, mukubhita thembu Jihova wamubhana ikalakalu yebhi? (b) Ihi iwadilongo mu phangu ya Phetele?

⁷ Xikina o kibazelu, lungulula o ima iwabhingi o kulungulula. Mu ithangana yavulu Jezú wabazela Phetele bhupholo dya jipoxolo ja mukwá. (Mál. 8:33; Luk. 22:31-34) Nange kiki kyabhangesa Phetele kudivwa kyayibha! Né kiki Phetele wadikwatenena kwa Jezú. Mwene waxikina kumubazela, yu wadilongo yalungu ni itondalu yê. Mukonda dya ufiyele wê, Jihova wabesowala Phetele mu kumubhana ikalakalu ya katunda mu kilunga. (Nzw. 21:15-17; Ika. 10:24-33; 1 Ph. 1:1) Ihi itutena kudilonga mu phangu ya Phetele? Kitutokala kudikwatenena mu kuluwala mukonda dya kutubazela, majiphe twatokala kuxikina o kibazelu ni kulungulula o ima itwabhingi o kulungulula. Kubhanga kiki, kyandabhekela mbote kokwetu ni ku akwetu. Twandakala dingi ni valolo bhupholo ya Jihova ni ya jiphange jetu.

8-9. Kyoso kya mubazela, ku dimatekenu manu Belenadu wexile mudivwa kyebhi? Maji ihi yamukwatekesa kubanza mu ukexilu wambote?

⁸ Tala yabhiti ni manu Belenadu, phange watungu mu ixi ya Moçambique. Amukatula o ujitu wakukala kafunga. Ku dimatekenu kyebhi kyadivu manu Belenadu? Mwene wambe: “Ngaluwalele, ngathathamene we kyavulu mukonda kingawabhelele o kibazelu.” Watandanganyele kyavulu kyebhi o jiphange mu kilunga kyeji mumona. Mwene wambe dingi: “Phala kumona o kibazelu mu ukexilu watokala, ni kudyelela dingi kwa Jihova ni ku kilunga kyê, kwabhiti jimbeji.” Ihi yakwatekesa manu Belenadu kumona o ima mu ukexilu watokala?

⁹ Manu Belenadu wamateka kubanza mu ukexilu wambote. Mwene wambe: “Kyoso kingexile ngi kafunga, ngexile mutanga o mukanda wa Jihebelewu 12:7 phala kukwatekesa o jiphange kumona o kibazelu kya Jihova mu ukexilu watokala. Ngexile mudibhwidisa: ‘Nanyi watokala kukumbidila o velusu yiyi?’ O jiselevende joso ja Jihova, neme we.” Manu Belenadu wabhange dingi ima ya mukwa phala kudyelela dingi kwa Jihova ni ku kilunga kyê. Mwene wexile mutanga o Mak’â Nzambi ni kuxinganeka kyavulu mu ima yexile mutanga.  Sumbala mwene wexile hanji muxinganeka kyebhi o jiphange kyeji mumona, mwene wexile mu boka nawu ni kuya we mu yônge. Mu kubhita ithangana, manu Belenadu amusolo dingi phala kukala kafunga. Se eye akubazela kala kyabhiti ni manu Belenadu, kana kuxinganeka kyavulu kyebhi ki wamudivwa, lungulula o ima iwabhingi o kulungulula. c (Jisa. 8:33; 22:4) Se ubhanga kiki, ejiya kuma Jihova wanda kubesowala mukukolokota fiyele kwa mwene ni ku kilunga kyê.

10. Mu ukulu, ima yebhi yalunguluka, yalola o ufiyele wa mayala akwa Izalayele?

¹⁰ Kyoso Kilunguluka o ima mu kilunga kya Jihova, kiki kitena kulola o ufiyele wetu. Se kitudilange, tutena kwehela o ima yiyi kutusandula kwa Jihova. Mu kifika, xinganeka o ima yalunguluka ku mwenyu wa akwa Izalayele kyoso kyatambula o Kijila Kya Mozé. Ande dya kutambula o Kijila, o atwameni a miji ene akexile mubhanga o ima yatokalele kubhanga o akunji. Ene exile mutunga jikalatódyu ni kusatela o yama phala o mbote ya miji yâ. (Dim. 8:20, 21; 12:7; 26:25; 35:1, 6, 7; Jobe 1:5) Maji kyoso kyatambula o Kijila kiki, o atwameni a miji katokalele dingi kubhanga o ima yiyi. Jihova wasolo akunji, athu atokalele ku mwiji wa Alá phala kusatela o yama. Tundé mu kithangana kyenyókyo, se kwexile mutwameni wa mwiji katokalele ku mbutu ya Alá wejibhanga o kikalakalu kya mukunji, atokalele kumujibha. d (Iji. 17:3-6, 8, 9) O kwila kiki kyene kyabhange Kolá, Datane, Abilamu ni 250 ja mala kubhukumukina Mozé ni Alá? (Dya. 16:1-3) Kitwejiya! Kabasa kima kya abhangesa kubhukumuka, Kolá ni yó akexilenê kumoxi, kakolokotele mu ufiyele wâ kwa Jihova. Se sayi kima kyalunguluka mu kilunga kyamulola o kixikanu kyé, ihi iwatokala o kubhanga?

11. Ihi itwadilongo mu phangu ya akwa Kohate?

¹¹ Se sayi kima kilunguluka mu kilunga kya Jihova, xikinakyu ni muxima woso. Kyoso kyakexile mu kikangalakata, o an’â Kohate akexile mubhanga kikalakalu kya katunda. Kyoso o akwa Izalayele kyexile mu tunda mu kididi mwakexile phala kuya ku kididi kyengi, sayi athu atokalele ku mwiji wa Kohate akexile mukwambata o alaka ya kikutu bhu pholo dya mundu. (Dya. 3:29, 31; 10:33; Josu. 3:2-4) Yu wexile ujitu wadikota! Maji o ima yalunguluka kyoso o akwa Izalayele kyabokona mu Ixi Yokanene. Mu ithangana yoso o Alaka ki yatokalele dingi ku ikatula bhu yakexile phala ku ita bhu kididi kyengi. Kyoso Solomá kyexile o sobha, sayi athu atokalele ku mwiji wa Kohate atambula o ujitu wa kukala jingimbidi, amukwa a asolo phala kulanga o myelu, akwawu we phala kulanga o ididi ya kubhakela o kúdya. (1 Mal. 6:31-33; 26:1, 24) Seku kima kilondekesa kwila o mwiji wa Kohate ajijidika kwa abhana kikalakalu kya katunda mukonda ene exile mukwambata o alaka ya kikutu. O phangu yiyi itulonga ihi? Kyoso o ima ilunguluka mu kilunga kya Jihova, twatokala kudibhakula phala kukwatekesa, né mwene se twala mwaxaxi ka athu atambula kikalakalu kya ubhe. Twatokala kusanguluka ni maujitu oso oso ututambula. Lembalala kwila o valolo iwala nayu bhu pholo ya Jihova ki yalungu ni maujitu uwala nawu. Phala Jihova o kubelesela kwé kyene o kima kya beta dingi kota.—1 Sam. 15:22.

12. Kyebhi kyadivu mana Suzana kyamukatula ku Betele?

 ¹² Tala o phangu ya mana Suzana, amukatula ku kikalakalu kya wabhelele kyavulu, anga amubhana kikalakalu kyengi. e Kyoso kyabhange 23 amivu ndenge ku Betele, amusolo phala kukalakala kala muboki wa katunda. Mwene wambe: “Ngaluwalele mukonda dya ujitu yú. Ngadivwile kuma ki ngala ni valolo, ngexile mu dibhwidisa, ‘Ngalweza kwebhi?’” Phala kubhonzesa dingi o ima sayi jiphange mu kilunga a mwambela kiki: “Se eye wexile u muthu wambote, o kilunga kya Jihova ki kyeji kukatula ku Betele.” Mana Suzana wabhiti thembu yavulu ni kikote ku muxima, mukonda dya kiki mu mausuku mwene wexile mudila kyavulu. Maji mwene wambe: “Nuka ngexile ni phata ya kwila Jihova ni kilunga kyê angizolo.” Kyebhi mana Suzana kyakolokota mu kulanga o ixinganeku yê?

13. Ihi yabhange mana Suzana phala kutolola o ibanzelu yayibha?

¹³ Mana Suzana watenene kutolola o ibanzelu yê yayibha. Kyebhi? Mwene wexile mutanga milongi mu madivulu metu yalungu ni maka yexile mubhita nawu. O milongi mu A Sentinela 1 de Fevereiro de 2001 ni dyambu, “Você Pode Vencer o Desânimo!” yamukwatekesa kyavulu. O milongi yiyi ijumbulula kyebhi o musoneki wa Bibidya Máluku, kyadivu kyoso kya mubhana we kikalakalu kya ubhe. Mana Suzana ulembalala: “O phangu ya Máluku yangikwatekesa kutolola o ixinganeku yayibha.” Mana Suzana wadikwatenena ku makamba mê. Mwene keha kukala ni jiphange ni kuboka nawu, ni kwila kexile mudikwatela henda. Wamono kuma o nzumbi ikola yendesa o ima mu kilunga kya Jihova, ikwatekesa we o jiphange ala kupholo kusola kyambote o ima. Maji mwene wamono kuma o kilunga kya Nzambi kyatokala kubhanga yoso phala o ikalakalu ya Jihova yende ku pholo.

14. Kima kyahi kyalunguluka mu kilunga mwakexile papá Vadu kyamubhonzele kuxikina?

¹⁴ Sayi phange watungu ku ixi ya Eslovénia, wala ni 73 amivu, amwixana papá Vadu. Mwene watale hadi yavulu kyoso o kilunga kyê akibundu ni kilunga kyengi, ni kwila o Kididi Kya Ubhezelu akijika. Mwene wambe: “Eme kingexile mutendela se mukonda dyahi atokalele kujika o kididi kya Ubhezelu se kyexile kididi kya fwamene kyavulu. Ngexile ni ndolo yavulu ku muxima, mukonda tunde kitwa kiyudika  ki kwabhitile kithangana kyavulu. Eme ngi musongi wa mabaya ngabhangele ima ya ubhe. Kyoso kyabundu o ilunga iyadi yiyi o ima yalunguluka, phala etu tu aboki twakuka kyá kyatubhonzele kyavulu.” Ihi ya kwatekesa papá Vadu kuxikina o itendelesu yiyi? Mwene wa jimbulula: “Mu ithangana yoso kukayela o itendelesu ya ubhe ya kilunga kya Jihova, kubhekela mabesá. Kiki ki tupelepalala phala o ima yandalunguluka ku hádya.” O kwila kya mukubhonza kuxikina o kitendelesu kya ubhe kyalungu ni kubunda ilunga iyadi mba watambula kikalakalu kyengi mu kilunga kya Jihova? Ejiya kwila Jihova wejiya kyambote kyebhi kiwamudivwa. Kyoso ki uxikina o ima yiyi yalunguluka, anga ukolokota fiyele kwa Jihova ni ku kilunga kyê, eye wandatambula mabesá avulu.—Jisá. 18:25.

15. Kyebhi kitutena kusuluka mu kulanga o ibanzelu yetu kyoso kitudibhana ni itendelesu mu kilunga kya Jihova?

¹⁵ Kyoso kituzukama kudizubhilu dya mundu yú, tutena kukinga kudibhana ni itendelesu itunda mu kilunga kya Jihova. O ima yiyi itena kulola o kixikanu kyetu. Mu kiki twatokala kusuluka mu kulanga o ibanzelu yetu. Se sayi phange wakutalatala kyayibha, kana kubhaka phonzo. Se akubazela mu kilunga kya Jihova, kana kudikwatenena ngó mu kuluwala kwé, xikina o kibazelu ni muxima woso, lungulula o ima iwabhingi kulungulula. Kyoso kilunguluka kima mu kilunga kya Jihova ni kwila o kima kiki kyalungu n’eye, xikinakyu ni muxima woso, belesela we o itendelesu.

16. Kyebhi ki utena kusuluka mu kudyelela kwa Jihova ni mu kilunga kyê?

¹⁶ Kyoso kyalola o ufiyele wé, eye utena kusuluka mu kudyelela kwa Jihova ni mu kilunga kyê. Phala kubhanga kiki, eye watokala kudilanga. Kiki kilombolola kwila, eye watokala kutululuka, kuxinganeka kyambote ni kumona o ima mu ukexilu wa Jihova. Suluka mu kudilonga o misoso ya athu otumbule mu Bibidya aditundu kyambote mu ibhidi yadifu ni ibhidi iwamudibhana nayu, xinganeka mu phangu yâ. Bhinga o kikwatekesu kya Jihova bhukaxi ka musambu. Kana kweha kuya mu yônge ni mu kukala ni jiphange jé. Kyenyiki, kize ki kizé, Satanaji kanda kusandula kwa Jihova ni ku kilunga Kyê.—Tiy. 4:7.