MBANDU YAKUDILONGA 47
Kana Kwehela Kima Kyoso-Kyoso ku Kusandula Kwa Jihova
“Eme-phe, nga dyelela ko kwé, u Jihova.”—JISÁ. 31:14.
MWIMBU 122 Tu Kolokotye-nu, ki tu Bhwile!
ITWANDADILONGA a
1. Kyebhi kitwejiya kwila Jihova wamesena kuma tuzukama kwa mwene?
JIHOVA wamesena kwila tuzukama kwa mwene. (Tiy. 4:8) Mwene wamesena kukala Nzambi yetu, Tata yetu, ni Dikamba dyetu. Mwene utambwijila o misambu yetu, utukwatekesa mu ithangana yabhonzo. Mwene utulonga, utulanga we bhukaxi ka kilunga kyê. Maji ihi itwatokala o kubhanga phala tuzukame dingi kwa Jihova?
2. Kyebhi kituzukama kwa Nzambi?
2 Tuzukama kwa Nzambi mu kusamba, mukutanga o Mak’â mê ni mu kwaxinganeka. Kyoso kitubhanga kiki, tumuzola dingi ni kwila tumusakidila mu ima yoso yene mutubhana. Twanda mubelesela ni kumuximana. (Dij. 4:11) Kyoso kitwijiya dingi Jihova, twanda mudyelela dingi ni kwila twanda dyelela dingi ku kilunga. Jihova utukwatekesa bhukaxi ka kilunga kyê.
3. Kyebhi o Dyabhu kyasota kutusandula kwa Jihova, maji ihi yanda tukwatekesa phala kituxise o Nzambi yetu ni kilunga kyê? (Jisálamu 31:13, 14)
3 Maji Dyabhu ubhanga yoso phala kutusandula kwa Jihova, bengebenge kyoso kitudibhana ni ibhidi. Kyebhi mwene kyabhanga kiki? Mwene ubhanga kiki mu kutubhangesa bhofele bhofele kukamba kudyelela kwa Jihova ni ku kilunga kyê. Maji etu tutena kubhanga nguzu phala kumutolola. Kyoso o kixikanu ni kidyelelu kyetu kwa Jihova kyakolo, kitwanda xisa o Nzambi yetu ni kilunga kyê.—Tanga Jisálamu 31:13, 14.
4. Ihi itwandadilonga mu milongi yiyi?
4 Mu milongi yiyi twanda dilonga ima itatu itena kuzozesa o kidyelelu kyetu kwa Jihova ni ku kilunga kyê. Kyebhi o ima yiyi itena kutusandula kwa Jihova? Ni kyebhi kitutena kutolola o mibhetu ya Dyabhu?
KYOSO KITUDIBHANA NI IBHIDI
5. Kyebhi o ibhidi itena kuzozesa o kidyelelu kyetu kwa Jihova ni ku kilunga kyê?
5 Sayi bhabha tudibhana ni ibhidi kala, o kukamba salu mba izukutisu ku mwiji. Kyebhi o ibhidi itena kuzozesa o kidyelelu kyetu ku kilunga kya Jihova ni kutusandula kwa mwene? Kyoso o ibhidi itudibhana nayu ilaleka kyavulu, tutena kukamba kidyelelu mba kukala ni kikote ku muxima. Mu ithangana yenyiyi Satanaji utubhangesa kubanza kwila Jihova katuzolo. O Dyabhu wamesena kuma tuxinganeka kwila Jihova ni kilunga Kyê, ene amututalesa hadi. Kiki kyene kyabhiti ni amoxi ku akwa Izalayele kyakexile ku Ijitu. Ku dimatekenu, axikina kwila Jihova wasolo Mozé ni Alá phala kwabhulula ku ubhika. (Mak. 4:29-31) Maji kyoso Falawó kya atalesa dingi hadi, ene atatele Mozé ni Alá mukonda dya ibhidi yâ, mu kwatangela exi: “Mwa tu nuhisa dizumba dyayibha kwa Falawó, ni akwa mbèle ku mbanza, kífwa mwa a bhana xibhata bhu maku, ya ku tu jibha.” (Mak. 5:19-21) Ene atatele o jiselevende jafiyele ja Nzambi. Kiki kyexile kima kyayibha kinene! Se o ibhidi iwamudibhana nayu yamulaleka kyavulu, kyebhi ki utena kusuluka mu kukolesa o kidyelelu kyê kwa Jihova ni ku kilunga kyê?
6. Ihi itutena kudilonga ku musoso wa polofeta Habakuke yalungu ni kudibhana ni ibhidi yetu? (Habakuke 3:17-19)
6 Samba kwa Jihova ni muxima woso, kinga kwa mwene phala ku kukwatekesa. Polofeta Habakuke wadibhana ni ibhidi yavulu. Sayi kithangana ku mwenyu wê, wexile ni phata se Jihova wexile mwene mu mulanga. Mu kiki, wazwela kwa Jihova yoso yexile ku muxima wê. Mwene wambe: “Ngi dikola katé bhebhi, Ngana, eye ki wa mu fula ku ngivwa? . . . Phalahi . . . u ngi bhangesa kutala ungulungumba?” (Haba. 1:2, 3) Jihova watambwijila o musambu yú wa selevende yê yafiyele, wa ubhange ni muxima woso. (Haba. 2:2, 3) Kyoso kyazubha mu kuxinganeka kyavulu kyebhi Jihova kyabhulula o mundu wê, Habakuke wasangulukile dingi. Mwene wadyelele dingi kwila Jihova wexile mu mulanga ni kwila weji mukwatekesa kudibhana ni kibhidi kyosokyoso. (Tanga Habakuke 3:17-19.) Ihi itwadilongo ku musoso yú? Kyoso kiwamudibhana ni ibhidi, samba kwa Jihova, mutangele yoso ikukala ku muxima wê. Mu kusuluka kinga kwa mwene, na kukwatekese. Mu kubhanga kiki, wandakala ni kidyelelu kwila Jihova wandakubhana o nguzu iwabhindamena phala kukolokota. Kyoso ki umona o kikwatekesu kya Jihova, o kixikanu kyé kwa mwene kyandakola dingi.
7. O jindandu ja mana Manda asoto kumubhangesa kuxikina mu ihi? Ihi yamukwatekesa phala kazoze mu kudyelela kwa Jihova?
7 Suluka mu kubhanga o ima ikuzukamesa kwa Jihova. Tala kyebhi o kubhanga kiki kwakwatekesa phangyetu mana Manda, watungu mu ixi ya Papua Nova Guiné. Mwene wadibhele we ni ibhidi. b O mwiji wa mana Manda, exile jingadyama, sayi bhabha kwa abhonzele kusanga o kudya. Sayi ndandu yê wasoto kuzozesa o kidyelelu kyê kwa Jihova. O ndandu yê wambe: “Eye wene muzwela kuma o nzumbi ikôla ya Nzambi yene mukukwatekesa, maji o kikwatekesu kyala kwebhi? Katé kiki mwala hanji mu jingadyama. Eye wamuzanga ngó o kithangana kyé mu kuboka!” Mana Manda wambe: “Ngexile mudibhwidisa: ‘Nzambi watusuwu inga kana?’ Mu kithangana kyenyókyo ngasambe kwa Jihova, ngamutangela yoso yakexile ku muxima wami. Ngasuluka mu kutanga o Bibidya, o madivulu metu, mu kuboka ni mu kuya mu yônge.” Mu kusuluka mwene wamono kwila Jihova wexile mulanga o mwiji wê. Ene kexile mubhita ni nzala, asangulukile we. Mana Manda wambe: “Ngamono kwila Jihova wexile mutambwijila o misambu yami.” (1 Ti. 6:6-8) Se usuluka mu kukolesa o ukamba wé ni Jihova, eye ki wandakwehela o ibhidi mba o jiphata ku kusandula kwa Jihova.
KYOSO KYAZUKUTISA O JIPHANGE ALA KUPHOLO
8. Ihi itena kubhita ni jiphange ala kupholo mu kilunga kya Jihova?
8 O jinguma jetu amwanga makutu alungu ni jiphange ala kupholo mu kilunga kya Jihova bhukaxi ka internete, mitelembe ya izuzumbya ni ji rádyu. (Jisá. 31:13) Sayi jiphange a akutu, anga a abalakala kala ifumbe. O Jikidistá ku hama ya dyanga adibhele we ni maka yá kyoso poxolo Phawulu kyamutatela makutu, anga amutele mu kaleya. Ene abhange ihi?
9. Sayi Jikidistá abhange ihi kyoso Phawulu kyamutele mu kaleya?
9 Sayi Jikidistá ku hama ya dyanga, eha kukwatekesa poxolo Phawulu kyoso mwene kyexile mukaleya ku Loma. (2 Ti. 1:8, 15) Mukonda dyahi? O kwila ene exile ni jisonyi ja Phawulu mukonda o athu exile mu mumona kala kifumbe? (2 Ti. 2:8, 9) Inga akexile we ni wôma wa kwazukutisa? Kabasa kima kya abhangesa kulenga poxolo Phawulu, xinganeka ngó kyebhi mwene kyadivu! Mwene wakolokotele mu ibhidi yavulu, katé watele o mwenyu wê mu kilwezu mukonda dya ene. (Ika. 20:18-21; 2 Ko. 1:8) Kitwatokala kukala kala yó axisa Phawulu mu kithangana kyabhindamene o kikwatekesu kyâ! Ihi itwatokala kuxinganeka kyoso o jiphange jetu ala kupholo kya mwazukutisa?
10. Ihi itwatokala kulembalala se mukonda dyahi o jiphange jetu ala kupholo amwazukutisa, ni mukonda dyahi?
10 Lembalala se mukonda dyahi amutuzukutisa ni nanyi wenemubheka o kizukutisu kiki. O mukanda wa kayadi kwa Timote 3:12 wambe: “Oso adibhakula mu kusidivila Nzambi mu ukamba ni Kidistu Jezú, anda kwa zukutisa we.” Kyenyiki kitudiwana mu kumona kwila Satanaji uzukutisa bengebenge o jiphange atukala kupholo. Mwene wamesena kwila o jiphange jiji akamba kukala fiyele kwa Jihova, wamesena we kutukwatesa wôma.—1 Ph. 5:8.
Sumbala Phawulu wexile mu kaleya, Onezifolo ni kuswina kwoso wamukwatekesa. Kala kilondekesa o foto, lelu o jiphange jetu ene mukwatekesa akwâ ala mu kaleya (Tala ojikaxi 11-12)
11. Ihi itwadilongo mu phangu ya Onezifolo? (2 Timote 1:16-18)
11 Suluka mukukala fiyele ni kukwatekesa o jiphange jé. (Tanga 2 Timote 1:16-18.) Mu ukulu sayi Kidistá amwixana Onezifolo mwene kabhangele kala kyabhange o jikidistá jojo kamesenene kukwatekesa Phawulu. ‘Mwene kakexile ni jisonyi ja Phawulu mukonda dya kumuta mu kaleya.’ Onezifolo wasoto Phawulu, kyoso kya musange, mwene wamesenene kumukwatekesa mu yoso yabhindamene. Mukubhanga kiki, Onezifolo wate o mwenyu wê mu kilwezu. Ihi itwadilongo mu phangu yê? Kitwatokala kubhangesa o woma kutufidisa kukwatekesa o jiphange jetu abhindamena kikwatekesu. Muveji dya kiki twatokala kwakwatekesa mu yoso yabhindamena. (Jisa. 17:17) Ene amesena kyavulu o henda yetu ni kikwatekesu kyetu.
12. Ihi itwadilongo ni phangu ya jiphange jetu ku Rússia?
12 Tala o phangu ya jiphange jetu atungu mu ixi ya Rússia, ene keha kukwatekesa o jiphange jetu ja mala ni jahatu ala mu kaleya. Kyoso o jiphange jetu kya ambata mu inzo ya kufundisa, o jiphange jamukwa abhanga yoso ni yoso phala kuyamu phala kwakwatekesa. Ihi itwadilongo mu phangu yâ? Kyoso o jiphange jetu ala kupholo kya atatela makutu, kya ata mukaleya mba kya azukutisa, kana kukala ni woma. U atumbula mu misambu yé, kwatekesa we miji yâ, banza we mu maukexilu engi u utena kwakwatekesa.—Ika. 12:5; 2 Ko. 1:10, 11.
KYOSO KYATULOKALALA
13. Kyebhi o kutulokalala kutena kuzozesa o kidyelelu kyetu kwa Jihova ni ku kilunga kyê?
13 O jindandu jetu kamubheza Jihova, o jikoleka jetu ja salu mba ja xikola, nange ene atulokalala mukonda dya kuboka o njimbu yambote mba mukonda dya kubelesela o ijila ya Jihova. (1 Ph. 4:4) Ene nange atwambela: “Eme ngakuzolo kyavulu, maji o ngeleja yé yala ni ijila yavulu, ngeleja phala o adyakime akuka kyá.” Amukwá atuxongwena mukonda dya ukexilu utwene mudibhana ni muthu amute mu kamukonde, mu kwamba kuma: “Se enu mu akwa henda, kyebhi kimutalatala o athu mu ukexilu yú?” Ibanzelu kala yiyi itena kutubhangesa kudibhwidisa se o ijila ya Jihova yayuka mwene. Tutena kubanza kiki: ‘O kwila Jihova ka mungijijidika kyavulu? Mu kilunga kya Jihova kimwala we ijila yavulu?’ Se wamubhita mu maka yá, kyebhi ki utena kudikwatenena kwa Jihova ni mu kilunga kyê?
Jobe waditunu o makutu a makamba mê a mangonya, kyoso kyakexile mu mulokalala. Mwene wexile polondo phala kukolokota mu ufiyele wê kwa Jihova (Tala okaxi 14)
14. Ihi itwatokala kubhanga kyoso o athu kyatulokalala mukonda dya kubelesela o ijila ya Jihova? (Jisálamu 119:50-52)
14 Suluka mu kubelesela o ijila ya Jihova. Jobe wexile mubelesela o ijila ya Jihova sumbala ni kumulokolala. Sayi dikamba dya makutu dya Jobe, wasoto kumuxikinisa kwila Nzambi kamesenene kwijiya se Jobe wexile mubelesela o ijila yê mba kana. (Jobe 4:17, 18; 22:3) Maji Jobe waditunu o makutu yá. Mwene wejidile kwila o ijila ya Jihova yalungu ni yawabha ni yayibha yayuka mwene, mwene wexile polondo phala ku ibelesela. Mwene kehela muthu wosowoso kuzozesa o ukamba wê ni Jihova. (Jobe 27:5, 6) Ihi itwadilongo mu phangu ya Jobe? Kana kwehela kwila o ku kulokalala ku kubhangesa kukala ni jiphata jalungu ni ijila ya Jihova. Banza mu yoso yabhiti ku mwenyu wé. Nange eye wamono kyá kwila o mwenyu wé uwabha dingi kyoso ki ubelesela o ijila ya Jihova. Kala polondo phala kubelesela o ijila itubhana o kilunga kya Jihova. Se tubhanga kiki, kitwanda kweha kusidivila Jihova né mwene se atulokalala kyavulu.—Tanga Jisálamu 119:50-52.
15. Mukonda dyahi mana Biatriji amulokalala?
15 Tala o phangu ya phange ya muhatu watungu mu ixi ya Índia, amwixana mana Biatriji. O jindandu jê amuxongwena mukonda dya kixikanu kyê. Mwene amubatizala mu muvu wa 1997. Mu kubhita kakithangana, mwadi wê kexile dingi mu kalakala. Kyenyiki, mwene wambe kwila mana Biatriji ni twana twâ twa ahatu atokalele kuya ku inzo ya jitata ja diyala, atungile mu mbanza yengi. Maji mana Biatriji wabhiti mu ibhidi yavulu kwenyoko. Kuma mwadi wê kakexile mukalakala, mwene watokalele kukalakala o kizuwa kya muvimba phala kukwatekesa o mwiji wê. O kilunga kyamuzukamene dingi kyakexile ku 350 ja jikilometulu. O mwiji wa mwadi wê wexile kumuzukutisa mukonda dya kixikanu kyê. O kizukutisu kyadibandekesa kyavulu, mukonda dya kiki mana Biatriji ni mwiji atokalele dingi kuyila kwengi. Ku pholo dya kwenda mwadi wê wafu. Anga mon’ê umoxi wa muhatu wexile ni 12 kya mivu wafu ni kijimbu. Phala kubhonzesa dingi o ima, o jindandu ja mana Biatriji amutangela kwila o ima yoso yiyi yexile mubhita ku mwenyu wê, yexile kikuma kya mwene. Ene amwambela kuma se kejikituka Mbangi ya Jihova, o ibhidi yoso yiyi ki yejibhita. Né kiki, mwene wasuluka mu kudyelela kwa Jihova ni kudikwatenena ku kilunga kyê.
16. Mabesá ebhi atambula mana Biatriji mukonda dya kudikwatenena kwa Jihova ni ku kilunga kyê?
16 Kuma mana Biatriji wexile dikanga dya kilunga kyê, o kafunga ka ilunga wamuswinisa kubokela o athu atungile mu dyembu dyê, ni kubhanga o yônge kubhata dyê. Ku dimatekenu, mwene wabanze kwila kiki kyabhonzo kyavulu. Maji wabelesela o kitendelesu kyokyo. Mwene wamateka kubokela o athu mu dyembu dyê, wexile mubhanga o yônge kubhata, wexile we mubhanga o ubhezelu ku mwiji ni twana twê twa ahatu. Ihi yabhiti? Mana Biatriji wamateka kulonga o Bibidya ku athu avulu, nzungule mudyâ a abatizala. Mu muvu wa 2005 wakituka muboki wathembu yoso. Mukonda dya kudyelela kwa Jihova ni ku kilunga kyê, mwene watambula mabesá avulu. O twana twê twa ahatu amusidivila Jihova ni ufiyele woso, kindala mu dyembu dyê mwala kyá ilunga iyadi! Mana Biatriji uxikina kwila Jihova mwéne wamubhana o nguzu phala kudibhana kyambote ni ibhidi yê yoso ni kukolokota ku ixongwenu ya mwiji wê.
KOLOKOTA FIYELE KWA JIHOVA NI KU KILUNGA KYÊ
17. Twabhingi kukala polondo phala kubhanga ihi?
17 Satanaji wamesena kutuxikinisa kwila Jihova utubwazeka kyoso kitudibhana ni ibhidi ni kwila o kukwatekesa o kilunga kya Jihova kyanda bhonzesa dingi o mwenyu wetu. Satanaji wamesena kwila tukala ni wôma, kyoso kyatanga makutu alungu ni jiphange jala kupholo mu kilunga kya Jihova, kyoso kya azukutisa mba kya ata mu kaleya. Bhukaxi ka athu atuxongwena, mwene wamesena we kuzozesa o kidyelelu kyetu ku ijila ya Jihova ni ku kilunga Kyê. Maji twejiya o jiphito ja Satanaji, mwene katena dingi kutunganala. (2 Ko. 2:11) Kala polondo phala kudituna o makutu a Satanaji ni kukolokota fiyele kwa Jihova ni ku kilunga Kyê. Lembalala kwila Jihova nuka wandakubwazeka. (Jisá. 28:7) Kana kwehela kima kyosokyoso ku kusandula kwa Jihova!—Lom. 8:35-39.
18. Ihi itwandadilonga mu milongi yakayela?
18 Mu milongi yiyi, twadilongo ibhidi ijila ku athu ki Jimbangi ja Jihova. Maji o kidyelelu kyetu kwa Jihova ni ku kilunga kyê atena we ku kilola mu kilunga bhukaxi ka jiphange jetu mu nzumbi. Kyebhi kitutena kudibhana kyambote ni ibhidi yiyi? Twandadilonga o maka enyá mu milongi yakayela.
MWIMBU 118 “Tu Vudise Dingi o Kuxikana Kwetu”
a Phala kukolokota mu ufiyele wetu mu izuwa yiyi yasukidilaku, twatokala kusuluka mu kudyelela kwa Jihova ni mu kilunga kyê. Satanaji wamesena kubwika o kidyelelu kyetu. Mu milongi yiyi twandadilonga ima itatu yene mubhanga Satanaji phala kutuzozesa ni ihi itwatokala kubhanga phala kukala fiyele kwa Jihova ni mu kilunga kyê.
b Sayi majina a alungulula.