1. Kyoso kituya ni kuboka tutena kukingila ihi? Maji ihi tutena kudyelela?

 KYOSO kituya ni kuboka, tutena kukingila kwila anda tuzukutisa. Nange kuhádya o izukutisu yiyi yanda dibandekesa dingi. (Dan. 11:44; 2 Ti. 3:12; Dij. 16:21) Maji né kiki, tutena kudyelela kuma Jihova wandatubhana o kikwatekesu kitwabhindamena. Tunde ukulu, mwene wene mukwatekesa o jiselevende jê kukumbidila kyambote o ikalakalu yâ, né mwene se o ikalakalu yiyi yabhonzo. Kyebhi kyene? Phala kutukwatekesa kutendela o maka enya, twandadilonga o ima yabhiti kumwenyu wa polofeta Izekiyele, wabokela o Jijudé akexile mu ubhika mu ixi ya Babilonya.

2. Jihova wambe ihi yalungu ni athu mu izuwa ya Izekiyele? Ihi itwandadilonga mu milongi yiyi? (Izekiyele 2:3-6)

² Polofeta Izekiyele watokalele kubokela o athu akidifwa kyebhi? Jihova wambe kuma o athu ya edile kala athu ‘ala ni jipholo ja thathamana,’ “a huku mixima,” ni “dibhata dya xinuka.” Ene ayibhile kyavulu kala minya ni mazalala. Mukonda dya kiki mu ithangana yavulu Jihova wambele Izekiyele: “Kana ku a kwatela wôma”! (Tanga Izekiyele 2:3-6.) Izekiyele watenene kukumbidila kyambote o ukunji wê mukonda dya ima itatu: (1) Jihova mwene wamutumu, (2) watambula o kutena kwa nzumbi ikola ya Nzambi, ni (3) o maka a Nzambi amukwatekesa. Kyebhi o ima itatu yiyi yamukwatekesa? Ni kyebhi yene itukwatekesa we mu izuwa yetu?

3. Izwelu yebhi yaswinisa Izekiyele? Kyebhi Jihova kyamubhana o kidyelelu kwila wexile bhu mbandu yê?

³ Jihova wambela Izekiyele: “Eme nga mu ku tuma.” (Ize. 2: 3, 4) O izwelu yiyi yaswinisa Izekiyele. Mukonda dyahi? Nange mukonda Izekiyele walembalala kwila Jihova wambela o izwelu yiyi kwa Mozé ni kwa Izaya kyoso kya asolo kala jipolofeta Jê. (Mak. 3:10; Iza. 6:8) Izekiyele wejidile we kwila Jihova wakwatekesa o jipolofeta jiji kutolola o ibhidi yadibhele nayu mu ikalakalu yâ. Kyenyiki kyoso Jihova kyambela Izekiyele mu luyadi kuma: “Eme nga mu ku tuma,” o polofeta wejitena mwene kudyelela mu kikwatekesu kya Jihova. Mu divulu dya Izekiyele tusangamu we mu veji javulu o izwelu yiyi: “Kizwelu kya Jihova kyeza kokwami.” (Ize. 3:16) Mu ithangana yavulu mwene wasoneka: “Kizwelu kya Jihova anga ki tulukila koku’ami.” (Ize. 6:1) Sé phata Izekiyele wejidile kwila Jihova mwéne wamutumu. O tata ya Izekiyele wexile mukunji. Nange mwene walongo Izekiyele kwila, tundé ukulu Jihova wakwatekesele o jipolofeta Jê. Jihova wambe o izwelu yiyi kwa Izake, Jakobo, ni Jelemiya: “Ngala kumoxi neye.”—Dim. 26:24; 28:15; Jel. 1:8.

4. Izwelu yebhi ya Jihova yabhana nguzu kwa Izekiyele?

⁴ Ihi yejibhanga athu avulu akwa Izalayele mu kwivwa o njimbu ya Izekiyele? Jihova wambe: “O dibhata dya Izalayele, ki dya-nda kwinda ku ku bhana mátwi, mukonda ene ngwa-wâ ku bhana matwi kokwami’eme.” (Ize. 3:7) Mu kudituna Izekiyele, o athu akexile mudituna Jihova. O izwelu yiyi yalondekesa kwa Izekiyele kuma, kyoso o athu kyexile kudituna o njimbu yê, ki kyalombolola kuma wexile polofeta yayibha. Jihova wambe we kwa Izekiyele kuma, kyoso o njimbu yê ya kufundisa yejidikumbidila o athu eji “kwijiya-phe kwila mu kaxi kâ mwejile musesedi mba polofeta.” (Ize. 2:5; 33:33) Sé phata o izwelu yiyi ya Jihova yabhana kwa Izekiyele o nguzu yabhindamenene phala kukumbidila kyambote o ukunji wê.

5. Kala kilondekesa Izaya 44:8, o nguzu yetu itunda kwa nanyi?

⁵ Etu we tuswina kyavulu mu kwijiya kwila, Jihova mwéne watutumu. Mwene utubhana kijingu mu kutwixana tu “jimbangi” jê. (Iza. 43:10) Yú ujitu wadikota! Kala kyambe Jihova kwa Izekiyele: “Kana ku a kwatela wôma,” Jihova utwambela we kwila: “Ki mu kale ni woma.” Mukonda dyahi kitutokala kukala ni wôma wa yó atuzukutisa? Kala Izekiyele, etu we ó watutumu Jihova, twala ni kikwatekesu Kyê.—Tanga Izaya 44:8.

6. (a) Jihova utukwatekesa kyebhi? (b) Kima kyahi kituswinisa, kitubhana nguzu?

⁶ Jihova wakanena kutukwatekesa. Mu kifika, ande dya Jihova kuzwela: “Enu-wenu mu jimbangi jami,” mwene wambe: “Kyoso ki wa kà bhita mu menya mwa zongo, twà kala kiyadi; kyoso ki wà bhita mu jingiji, kwa-nda ku boba; ki wà kà bhita mu túbhya, kwa-nda kujikata; o mulengo ki wa kà tena ku kwata kokwé.” (Iza. 43:2) Mu kuboka sayi bhabha tudibhana ni izukutisu yedi kala menya azongo, ni maka edi kala túbhya. Ne kiki ni kikwatekesu kya Jihova etu twamusuluka ni kuboka. (Iza. 41:13) Kala kyabhiti mu izuwa ya Izekiyele, mu izuwa yetu athu avulu ene mudituna o njimbu itwene mwa bokela. Etu twejiya kuma né mwene se ene adituna o njimbu itwa mwabokela, o kiki kikilombolola kuma kitwejiya kuboka. Tuswina kyavulu mu kwijiya kwila Jihova usanguluka kyoso ki tusuluka mu kuboka o njimbu yê ni ufiyele woso. O poxolo Phawulu wambe: “Kala muthu wanda tambula o futu yê mu kikalakalu kyê.” (1 Ko. 3:8; 4:1, 2) Sayi phange yamuhatu muboki wathembu yoso mu mivu yavulu wambe: “Ngisanguluka kyavulu mukwijiya kuma Jihova ubhana valolo mu nguzu itubhanga.”

7. O kuxinganeka mu kisuma kyamono kyexile mukwatekesa kyebhi Izekiyele? (Tala ofoto yakapa.)

⁷ Izekiyele wamono ku mwenyu wê o kutena kwa nzumbi ikôla ya Nzambi. Ku kisuma, mwene wamono o nzumbi ikôla kukwatekesa ji anju jala ni kutena ni kukwatekesa dikalu dya Nzambi. (Ize. 1:20, 21) Kyebhi kyadivu Izekiyele? Mwene wasoneka o kima kyabhiti. “O kyenyiki kyoso ki nga ki mono, nga dibhale o pholo bhoxi.” Izekiyele wadiwana kyavulu, yu wafukama. (Ize. 1:28) Mu kubhita kithangana, kyoso Izekiyele kyexile muxinganeka ku kisuma kiki, wexile mukala ni kidyelelu kwila ni kikwatekesu kya nzumbi ikôla ya Nzambi, mwene wejitena kukumbidila o ukunji wê.

8-9. (a) Kitumu kyahi kyabhana Jihova kwa Izekiyele? (b) Kyebhi Jihova kyakolokotesa dingi Izekiyele mu izukutisu yejidibhana nayu mukonda dya athu wejikwabokela?

⁸ Jihova wabhana o kitumu kiki kwa Izekiyele: “Eye [mon’a] muthu, balumuka wimane, nga-nda ku ku zwelesa.” O kitumu kiki ni nzumbi ya Nzambi yabhana kwa Izekiyele o nguzu yabhindamenene phala kubalumuka. Izekiyele wasoneka kiki: “Nzumbi ya Ngana ya bokona momu’ami yi ya ng’imanesa.” (Ize. 2:1, 2) Mu ukunji wê woso, o “lukwaku lwa” Nzambi—kifwa o nzumbi ya Nzambi—lwendesa Izekiyele. (Ize. 3:22; 8:1; 33:22; 37:1; 40:1) O nzumbi ikôla ya Nzambi yabhana nguzu kwa Izekiyele phala kubhanga o kikalakalu kyatambula, kya kubokela o athu a “huku,” akolele mixima. (Ize. 3:7) Jihova wambela Izekiyele, wixi: “Kyene ki nga bhangela kwila o pholo yé ya kolokota mu kutala o jipholo jâ ene ja kolokota, ni dibhômo dyé-eye dya swina mu kutala o dibhomo dya ene. O dibhomo dyé nga di bhange kala utadi wa diyamande mu kukola, dyene dya beta kukola o ditadi dya fijilu ndenge; wila  kiki-phe, kana ku a kala ni wôma, mba u teketa ki u mona o jipholo jâ.” (Ize. 3:8, 9) Mu kidi, Jihova wexile mutangela kiki kwa Izekiyele: ‘Kana kweha o kukola kwa mixima yâ ku kuzozesa. Nganda kukolokotesa!’

⁹ Mu kusuluka, o nzumbi ya Nzambi yendesa Izekiyele mu jimbandu joso mwakexile kuboka. Izekiyele wasoneka: “O lukwaku lwa Jihova lwa kexile ni nguzu yavulu ku thandu dyami.” Kwabhiti semana imoxi, phala Izekiyele kutendela kyambote o njimbu yatambula ni ku ibokela ni kidyelelu kyoso. (Ize. 3:14, 15) Jihova anga wamutumu kuya mu kididi mwamubokona o nzumbi ya Nzambi. (Ize. 3:23, 24) Kyenyiki, Izekiyele wexile polondo phala kumateka o ukunji wê.

10. Kikwatekesu kyahi kitwabhindamena phala kukumbidila kyambote o ukunji wetu ni mukonda dyahi?

¹⁰ Kikwatekesu kyahi kitwabhindamena phala kukumbidila kyambote o ukunji wetu? Phala kutambwijila o kibhwidisu kiki, xinganeka dingi ku ima yabhiti ku mwenyu wa Izekiyele. Ande dya kumateka o ukunji wê, o nzumbi ikôla ya Nzambi yamubhele o nguzu yabhindamenene. Kala kyabhiti ni Izekiyele, etu we lelu, tutena ngó kukumbidila o ukunji wetu ni kikwatekesu kya nzumbi ikôla ya Nzambi. Mukonda dyahi? Mukonda Satanaji wamubhânga n’etu phala twehe o kuboka. (Dij. 12:17) Athu avulu abanza kwila, Satanaji wala ni nguzu yavulu etu kitutena kumutolola. Maji bhukaxi ka kikalakalu kyetu kya kuboka, twa mumutolola mwene! (Dij. 12:9-11) Kyebhi? Kyoso kitwamuboka, tulondekesa kwila kituteketa ni ima izwela Satanaji. Ithangana yoso ituboka, twamutolola Satanaji. Kyoso kituboka né mwene ni izukutisu, kiki kilondekesa ihi? Kiki kilondekesa kuma o nzumbi ikôla yene itubhana o kutena ni kwila Jihova wasanguluka n’etu.—Mat. 5:10-12; 1 Ph. 4:14.

11. Kyebhi o nzumbi ikôla ya Nzambi yanda tukwatekesa? Ihi itwatokala kubhanga phala tusuluke mu ku itambula?

¹¹ Ihi itutena kudilonga dingi kyoso kituxinganeka  kyebhi Jihova kyabhana kwa Izekiyele o nguzu yabhindamenene phala kuboka? O nzumbi ikôla ya Nzambi itubhana o nguzu itwabhindamena phala kutolola kibhidi kyosokyoso kitudibhana nakyu mu ukunji. (2 Ko. 4:7-9) Ihi itwatokala kubhanga phala tusuluke mu kutambula o nzumbi ikôla ya Nzambi? Mu ithangana yoso twatokala ku ibhinga jinga, mu kudyelela kwila Jihova wandakwivwa o misambu yetu. Jezú wazwela kiki ku maxibulu mê: “Kolokotenu mu kubhinga, . . . kolokotenu mu kusota, . . . kolokotenu mu kuphupha.” Jihova phe wandabhana o “nzumbi ikôla kwa yó a mubhinga.”—Luk. 11:9, 13; Ika. 1:14; 2:4.

12. Kala kilondekesa Izekiyele 2:9–3:3, o mukanda watundu kwebhi? Asonekamu ihi?

¹² O nzumbi ikôla ya Nzambi yabhana kwa Izekiyele o nguzu yabhindamenene phala kuboka. Maji o mak’â Nzambi amuswinisa we. Mu kisuma kimoxi, Izekiyele wamono lukwaku lwakwata mukanda. (Tanga Izekiyele 2:9–3:3.) O mukanda watundu kwebhi? Asonekamu ihi? Kyebhi o mukanda yú wabhana nguzu kwa Izekiyele? Yá ene o maka utwandadilonga. O mukanda watundu ku kyandu kya Nzambi. Nange Jihova watumukisa anju imoxi yamwene Izekiyele, phala kubhana o mukanda kwa Izekiyele. (Ize. 1:8; 10:7, 20) Mu mukanda mwexile o mak’â Nzambi, kifwa o njimbu yalungu ni kufundisa yejiboka Izekiyele. (Ize. 2:7) O njimbu a isoneka mu jimbandu jiyadi ja mukanda.

13. Jihova watumu polofeta Izekiyele kubhanga ihi ni mukanda? Mukonda dyahi watowalele?

¹³ Jihova watumu polofeta Izekiyele phala kudya o mukanda ni kwizalesa o dikutu ni mukanda wenyó. Izekiyele wabelesela, yu wadi o mukanda woso. O kiki kyabhange Izekiyele kilombolola ihi? Kilombolola kwila Izekiyele watokalele kutendela yoso yalungu ni njimbu yatokalele kuboka. Phala kuboka o njimbu yoyo, mwene watokalele ku ixikina. Mu kusuluka kwabhiti kima kyabhangesa Izekiyele kudiwana. O mukanda mu kanu dyê, watowalele “kala wiki.” (Ize. 3:3) Mukonda dyahi? Mukonda, Izekiyele, wawabhelele kyavulu o ujitu wa kuboka o mak’â Jihova. (Jisá. 19:8-11) Mwene wasangulukile kyavulu mu kwijiya kwila Jihova wamusolo phala kukala polofeta Yê.

14. Ihi yakwatekesa Izekiyele kukala polondo phala o kikalakalu kyê?

¹⁴ Mu kusuluka Jihova wambele Izekiyele: “Tá mu thulu yé o maka mami oso u nga-nda ku ku tangela.” (Ize. 3:10) Ni kitendelesu kiki, Jihova wambe kwa Izekiyele phala kubhaka mu kilunji kyê o izwelu yakexile ku mukanda, ni ku ixinganeka. Kyoso Izekiyele kyabhange kiki o kixikanu kyê kyakolele dingi. Mwene watokalele kuboka o njimbu yakexile ni valolo yavulu. (Ize. 3:11) Ni njimbu ya Nzambi ku muxima wê ni mu kanu dyê, Izekiyele wexile polondo phala kumateka kuboka, katé kyejizubha o kikalakalu kyê.—Sokesa ni Jisálamu 19:14.

15. Phala kukolokota mu ukunji, ihi itwatokala kuta “mu thulu” yetu?

¹⁵ Phala kukolokota mu ukunji wetu, twatokala we kusuluka mu kukolesa o kixikanu kyetu. Twabhingi kuta “mu thulu” yetu yoso yatutangela Jihova. Lelu Jihova uzwela n’etu bhukaxi ka Bibidya. Ihi itutena kubhanga phala o Mak’â Nzambi asuluke mu kulungulula o ibanzelu yetu ni ima yala ku muxima wetu?

16. Ihi itwatokala o kubhanga phala tutene kutendela kyambote o Mak’â Nzambi?

¹⁶ Kyoso kitudya kudya kwambote muxitu, o mukutu wetu ukola dingi, tukala we ni sawidi  yambote. Kyene we kimoxi kyoso kitudilonga ni kuxinganeka mu Mak’â Nzambi, o kixikanu kyetu kikola dingi. Mu kiki, twabhingi kukatula mbote ku kisuma kya mukanda wamono Izekiyele. Jihova Nzambi wamesena kuma twatokala ‘twizalesa’ o kilunji kyetu ni Maka mê. Kiki kilombolola kwila mwene wamesena kuma tutendela kyambote o Bibidya. Tubhanga kiki mu kusamba, mu kutanga ni mu kuxinganeka. Kyadyanga etu tusamba phala kupelepalala o muxima wetu ni tutene kutendela kyambote o ixinganeku ya Nzambi. Mu kusuluka tutanga musoso wa Bibidya. Anga twimana hanji phala kuxinganeka mu ima itwatange. Mbote yahi ijila mukubhanga kiki? Kyoso kituxinganeka dingi, twandatena kutendela kyambote o Mak’â Nzambi, o kiki kyanda kolesa dingi o kixikanu kyetu.

17. Mukonda dyahi kima kyambote kuxinganeka mu ima itutanga mu Bibidya?

¹⁷ Mukonda dyahi kima kyambote kutanga o Bibidya ni kuxinganeka mu ima itwatange? Kiki kyene kyanda tubhana o nguzu phala tuboke o njimbu ya Utuminu wa Nzambi, ni kuboka o ima yandabhita kuhádya. Mu kiki kyoso kituxinganeka mu idifwa ya Jihova, o ukamba wetu ni mwene ukôla dingi. Kiki kyanda tubhana kima kyatowala, mba kyawabha: o kutuluka kwamuxima ni kusanguluka kwa kidi.—Jisá. 119:103.

18. O athu mu mbambe yetu anda kwijiya ihi, ni mukonda dyahi?

¹⁸ Izekiyele wexile polofeta, maji etu kana. Né kiki, twamusuluka mukuboka o njimbu ya Jihova yala mu Bibidya katé kyoso mwene kyanda zwela kuma kitutokala dingi kubhanga o kikalakalu kiki. Kyoso kyandabhixila o dizubhilu, o athu mu mbambe yetu kandatena kuzwela kwila ka atangela kima mba Nzambi wa ajimbi. (Ize. 3:19; 18:23) Mu veji dya kiki, ene anda kwijiya kuma o njimbu itwabokela itunda kwa Nzambi.

19. Ihi yanda tukwatekesa kukumbidila kyambote o ukunji wetu?

¹⁹ Ihi yanda tubhana nguzu phala kukumbidila o ukunji wetu? O ima itatu ya kolokotesa Izekiyele. Etu tuboka mukonda twejiya kuma Jihova mwene watutumu, o nzumbi ikola ya Nzambi yene itubhana nguzu, ni kudilonga o Mak’â Nzambi. Ni kikwatekesu kya Jihova, twala ni nguzu phala tusuluke ni ukunji wetu ni kukolokota “katé ku dizubhilu.”—Mat. 24:13.