O KWILA kwene mukubhonza kudilonga mu jisemana joso? Etu enyoso sayi ithangana tudivwa kiki. Maji banza hanji mu ima itubhanga ithangana yoso, kala o kuzowa. Kubhinga nguzu ni kithangana phala muthu kuzowa. Maji kyoso kitubhanga kiki tudivwa kyambote! O kudilonga o Bibidya tutena ku kusokesa ni kudizelesa “ni menya bhukaxi ka mak’â Nzambi.” (Efe. 5:26) Tala o jindunge ja kayela:

• Sola o kizuwa kiwanda dilonga. Twejiya kwila o kudilonga o Bibidya kwala mwaxaxi ka “ima yabetakota” itwatokala kubhanga. (Fil. 1:10) Phala kujimbe o kizuwa kyê kya kudilonga, soneka-kyu bhu phaphela, anga o phaphela tula-yu bhu kididi bhu wanda tena kumona. Mba ta kima mu mutelembe kyanda ku kulembalesa o kizuwa kyé kya kudilonga.

• Sola o kithangana kyanda kukwatekesa kudilonga. Kyebhi ki wamesena o kudilonga: Kudilonga lumoxi, mu ola imoxi inga kudilonga mu izuwa yavulu maji mu tu ithangana? Éye wejiya kyambote yoso i watokala kubhanga. Kyoso ki uya ni kusola o kithangana kyé phala kudilonga, xinganeka ku ibhwidisu yiyi. Kyoso ki kubhixila o kizuwa kya kudilonga, anga ukala ni usudi, utena kusota kudilonga mu dikwinyi ngó dya ithangana. Kota kudilonga mu dikwinyi dya ithangana, o kukamba kudilonga ndenge. Kyoso kiwanda mateka ni kudilonga, nange wanda kala dingi ni hanji ya kusuluka.—Fil. 2:13.

• Sola o maka uwanda dilonga. Se usola ngó o maka uwanda dilonga mu kizuwa kyé kya kudilonga, nange kiwanda bhanga “ima yambote ni kithangana [kiwala] nakyu.” (Efe. 5:16) Sola o ima i wamesena kudilonga anga soneka-yu mu phaphela. Se wala ni kibhwidisu kya kima kiwadilongo, soneka-kyu we mu phaphela. Izuwa yoso kyoso ki uzubha kudilonga, soneka mu phaphela yé o ima yamukwa i wamesena kudilonga.

• Kala u njimu. Se kwabhingi, utena kulungulula o kithangana kyanda kukwatekesa mba o maka uwanda sola kudilonga. O kyabeta kota, ki kizuwa, mba kithangana ni o maka uwanda dilonga, maji-phe o kudilonga semana joso.

Se tudilonga mu jisemana joso, twanda swina, kuzukama dingi kwa Jihova ni kukala dingi ni unjimu.—Josu. 1:8.