1. Ihi yexile mubanza poxolo Phawulu yalungu ni akwatekexi a tufunga?

 O AKWATEKEXI a tufunga ene mukwatekesa kyavulu o ilunga. O poxolo Phawulu wexile mubhana valolo yavulu ku mayala enya afiyele. Twejiya o kidi kiki, mukonda kyoso kya sonekena o jikidista mu mbanza ya Filipe, mwene wamenekena o tufunga ni akwatekexi.—Fil. 1:1.

2. Kyebhi kya divu o phange Luis mu kukala mukwatekexi wa tufunga?

² Jiphange javulu jamayala a abatizala kya, kikale minzangala mba adyakime asanguluka kyavulu mu kukwatekesa o kilunga kala akwatekexi a tufunga. Mu kifika, Phange Devan amusolo kala mukwatekexi watufunga kyoso kyexile ni 18 dya mivu. Maji sayi phange amwixana Luis mwene amusolo kala mukwatekexi watufunga kyoso kyexile ni 50 a mivu. Mwene wambe: “Ujitu wadikota phala eme kukwatekesa o kilunga kala mukwatekexi watufunga, bhenge-bhenge kyoso ki ngi banza mu henda yoso yene mu ngilondekesa o jiphange.” Akwatekexi a tufunga amukwa adiwva we kiki.

3. Ihi itwanda dilonga mu milongi yiyi?

³ Se eye u phange wadiyala akubatizala kya, maji ki u mukwatekexi watufunga luwa, o kwila utena kuxinda o mbambe yiyi? Ihi yanda kukwatekesa kubhanga kiki? Ni ihi izwela o Bibidya phala muthu kukala mukwatekexi watufunga? Mu milongi yiyi twanda tambwijila o ibhwidisu yiyi. Maji kindala tumone se ikalakalu yebhi yene mubhanga o akwatekexi a tufunga.

 IKALAKALU YEBHI YENE MUBHANGA O AKWATEKEXI ATUFUNGA?

4. Ikalakalu yebhi yene mubhanga o akwatekexi atufunga? (Tala we ofoto.)

⁴ Sayi akwatekexi a tufunga ene mu langa o jimbambe bhutubokela ni kulanga o madivulu metu utubokela nawu o athu. Amukwa akwatekesa kuzelesa ni kuyudika o ima ya zanganya mu kididi kya ubhezelu. Amukwa ene mukalakala kala alondekexi mu yonge ni kukalakala ni iselekete ya jimbimbi mu kithangana kya yonge. Sumbala ni ikalakalu yoso yabhanga ene, o mayala ya akulu we mu nzumbi, azolo Jihova, akumbidila o milongi yala mu Bibidya. Ene azolo kyavulu o jiphange joso mu kilunga. (Mat. 22:​37-39) Ihi yatokala kubhanga o phange ya diyala amubatizala kya phala kukala mukwatekexi watufunga?

5. Ihi yanda kukwatekesa kukituka mukwatekexi watufunga?

⁵ O Bibidya ilondekesa o idifwa yatokala kukala nayu o phange ya diyala a mubatizala phala kukala mukwatekexi watufunga. (1 Ti. 3:​8-10, 12, 13) Ihi i ubanza kudilonga o idifwa yiyi ni ku ikumbidila ku mwenyu wê? Se ubhanga kiki wanda tena kukituka mukwatekexi watufunga. Maji watokala kubanza kyambote se mukonda dyahi wamesena kukala mukwatekexi watufunga.

MUKONDA DYAHI WAMESENA KUKALA MUKWATEKEXI WATUFUNGA?

6. Ihi ya tokala kukubhangesa kukwatekesa o athu? (Matesu 20:28; tala we o foto .)

⁶ Jezú Kidistu mwene phangu yetu, yoso yexile mubhanga mwene, wexile mu ibhanga ni henda. Jezú wexile mubhanga nguzu phala kukwatekesa o athu ni kubhanga ikalakalu yexile mubhanga o abhika. O henda ye kwa Jihova ni ku athu yene ya mukwatekesa ku bhanga o ikalakalu yiyi. (Tanga Matesu 20:28; Nzw. 13:​5, 14, 15) Se o ikalakalu yoso yubhanga u ibhanga ni henda, Jihova wanda kubesowala yu wanda kukukwatekesa kukituka mukwatekexi watufunga.—1 Ko. 16:14; 1 Ph. 5:5.

7. Mukonda dyahi kitwatokala kudinanza ni kukala ni lwimbi?

⁷ Ku mundu yu, athu avulu a diwana ni athu yo akwa ukumbu ene musota ngo kudifumanesa. Maji o mundu wa Jihova kene mubhanga kiki. O phange wene musidivila akwa ni henda, kala kyexile mubhanga Jezú, kasota kukala ni  ungana, ne kulondekesa kwila mwene wabeta kota akwa ndenge. Se phange mukwa lwimbi amusola kala mukwatekexi watufunga, nange mwene kanda mesena kubhanga o ikalakalu kupholo ya athu ibhekela jisoniyi, maji a tokala ku ibhanga phala kulanga o jimbudi ja Jihova. Nange mwene umona kwila o ikalakalu yoyo ki phala mwene. (Nzw. 10:12) Jihova kene mubesowala o athu ene mudinanza.—1 Ko. 10:​24, 33; 13:​4, 5.

8. Kitendelesu kyahi kya bhana Jezú ku jipoxolo jê?

⁸ Sayi ithangana o makamba a kazola a Jezú amesenene kukala ni maujitu abetele dingi kota mukonda dya lwimbi. Tala yabhiti ni maxibulu ayadi a Jezú, Tiyaku ni Nzwá. Ene abhingi kwa Jezú phala kwata mukididi kya beta kota mu Utuminu wa Nzambi. Jezú ka aximana mukonda dya ukexilu wa wakudimona kuma ene abeta kota akwa ndenge. Kyenyiki mwene wambe ku 12 ya jipoxolo jê: “Maji woso wamesena kukala kota bhukaxi kenu, akale o selevende yenu, woso wamesena kukala ku pholo mudyenu, mwene watokala kukala o mubhika wenu.” (Mál. 10:​35-37, 43, 44) Kyoso phange usota kukala mukwatekexi watufunga phala kukwatekesa o jiphange, o jiphange mukilunga anda katula mbote yavulu.—1 Te. 2:8.

KYEBHI KI UTENA KUBANDEKESA O HANJI YÉ YA KUKALA MUKWATEKEXI WATUFUNGA?

9. Kyebhi ki utena kubandekesa o hanji yê ya kukwatekesa akwenu?

⁹ Se phata eye wa zolo Jihova yu wamesena kusidivila akwetu. Maji ne kiki, eye nange kiwala ni vondadi ya kukala mukwatekexi watufunga, mukonda eye wejiya kwila wanda bhanga ikalakalu ya vulu. Mukiki kyebhi ki utena kubandekesa o hanji yé ya kukwatekesa akwenu? O kuxinganeka mukisangusangu kwijila mukukwatekesa o jiphange jetu. Jezú wambe: “O kubhana kusangulukisa dingi, o kutambula ndenge.” (Ika. 20:35) Jezú wexile phangu yambote ya lungu ni maka ya. Mwene wasangulukile kumwenyu mukonda wexile mukwatekesa o athu, kyene we kimoxi neye se ukwatekesa o jiphange mukilunga wanda sanguluka kumwenyu.

10. Ihi ilondekesa kwila Jezú wasangulukile mu kusidivila o athu? (Máluku 6:​31-34)

¹⁰ Tala kifika kimoxi kilondekesa kwila Jezú wasangulukile mu kusidivila o athu. (Tanga Máluku 6:​31-34.) Sayi kizuwa Jezú ni jipoxolo je a tohokele kyavulu. Ene exile muya mukididi kya tululuka phala kunyoha. Maji ande dya kubhixilaku mundu wavulu exile kya mukingila Jezú. Ene amesenene kwivwa o ilongesu yê. Nange Jezú weji dituna. Mukonda mwene ni jipoxolo “kakexile ni kithangana né ngó phala kudya.” Mba Jezú weji kwalonga ngo ima yofele, anga kwatumina kuvutuka. Maji Jezú wazolele o athu. Mukonda dya kiki “wa mateka kwalonga ima yavulu.” Mwene wasuluka mukwalonga kate “kyafu o dikumbi.” (Mál. 6:35) Mwene kamujijidika kubhanga kiki, wa bhange kiki mukonda “wa akwatela henda.” Mwene wa mesenene kwa longa, mukonda wa azolele. Jezú wexile mu sanguluka kyavulu muku bhanga o ima yiyi.

11. Ihi dingi ya bhange Jezú phala kukwatekesa o athu? (Tala we ofoto.)

¹¹ Jezú kexile ngo mulonga o athu yalungu ni Jihova maji wexile we mwabhana kudya sayi bhabha wexile we mwasaka. O Bibidya yamba kwila sayi kizuwa Jezú watumina o maxibulu me kudisa o mundu. (Mál. 6:41) Mu kubhanga kiki, Jezú wa kwatekesa o maxibulu me kukala ni ukexilu wa kukwatekesa akwa. Mwene we walondekesa kwila kima kyambote kubhana o ima yabhindamena akwetu, kala kudya izwatu ni ima yengi. Yiyi yene o  ima yatokala o kubhanga o akwatekexi a tufunga. Xinganeka o kusanguluka kwexile nako o maxibulu mu kuwanena o jimbolo, “oso adi ya ekuta”! (Mál. 6:42) Jezú kakwatekesa ngo o athu muveji imoxi, maji mwene wabhange kiki kumwenyu we woso kyoso kyexile mu ixi. (Mat. 4:23; 8:16) O kulonga ni kukwatekesa akwa, yexile mu sangulukisa Jezú.

12. Mukonda dyahi seko muthu watokala kuzwela kwila kale ni valolo mu kilunga?

¹² Sayi athu abanza kwila kala ni uhete wa kubhanga ikalakalu mu kilunga. Se kyene we ki ubanza, kana kuluwala. Mukidi eye wala ni mauhete avulu u utena kukalakala nawu phala kukwatekesa o jiphange. O kwila eye utena kutanga o izwelu ya poxolo Phawulu mudivulu dya 1 Kolindu 12:​12-30 ni kusamba yalungu ni maka ya? Mudivulu didi, Phawulu walondekesa kwila kala selevende ya Jihova kate mwene eye, oso ala ni valolo mu kilunga. Mukiki, se kindala ki wamutena kukumbidila o jimbambe phala kukala mukwatekexi watufunga, kana kuluwala. Muveji dya kiki bhanga yoso i utena phala kusidivila Jihova ni kukwatekesa o jiphange. Utena kudyelela kwila o tufunga anda kubhana ikalakalu i utena kubhanga.—Loma 12:​4-8.

13. Ima yebhi yabeta kota mu idifwa yoso ya tokala kukala nayu o phange wa mesena kukala mukwatekexi watufunga?

¹³ Tumone ukexilu wamukwa wanda kukwatekesa kubhanga nguzu phala kukala mukwatekexi watufunga: Idifwa yavulu i watokala kukala nayu, yene we ya tokala kukala nayu o jikidista joso. Mukifika o jikidista joso atokala kukolesa o ukamba wa ni Jihova, kukala polondo phala kukwatekesa akwa ni kusanguluka kwoso, ni kukala phangu yambote mu wendelu we. Mukiki, eye nange wala kya ni idifwa yoso ya bhindamena kukala nayu o phange wa mesena kukala mukwatekexi watufunga. Maji idifwa yebhi yatokala kukala nayu o phange wa mesena kukala mukwatekexi watufunga?

IHI I WATOKALA O KUBHANGA PHALA KUKALA MUKWATEKEXI WATUFUNGA?

14. O kizwelu “mukwa kilunji” kilombolola ihi? (1 Timote 3:​8-10, 12)

¹⁴ Twanda dilonga idifwa yotumbule mu Bibidya mu divulu dya 1 Timote 3:​8-10, 12. (Tanga.) O akwatekexi a tufunga atokala kukala “akwa kilunji”. O kizwelu kiki kitena we kulombolola “atokala kumuxila”, mba “kukala ni ukexilu wambote ubhangesa o athu kukuxila.” Kiki kikilombolola kwila eye  kiwatokala kwolela mba kutonoka. (Ndo. 3:​1, 4) O kya beta kota o kukumbidila kyambote o kikalakalu kye. Se ubhanga kiki wanda kala u muthu wa kukudyelela, o jiphange joso mukilunga anda kuxila.

15. Ihi ilombolola “kukala muthu wa kidi” ni muthu kene mu “nganala akwa phala kunganyala kitadi”?

¹⁵ “Kukala muthu wa kidi” kulombolola kwila eye u muthu wa kukudyelela, ni kwila uzwela o kidi mu ithangana yoso. Kiwene munganala akwenu. (Jisa. 3:32) “Né kunganala akwa phala kunganyala kitadi.” Kiki kilombolola kwila eye umukwa kidi ku salu ye kate mwene kyoso ki ukalakala ni kitadi. Eye ki weji nganala o makamba me phala kunganyala kitadi.

16. (a) Ihi ilombolola “kukamba kunwa vinyu yavulu”? (b) Ihi ilombolola kukala ni “kitongolwelu kyazele”?

¹⁶ “Katokala kukala akwa kunwa vinyu yavulu” Kiki kilombolola kwila katokala kukodiwa, ni kwila katokala kukwijiya kwila mukwa kunwa kyavulu. Kukala ni “kitongolwelu kyazele” kiki kilombolola kwila eye uxila o ima yoso ya wabha ni yayibha izwela Jihova. Kidi kwila eye umukwa ituxi, maji eye wala ni ukamba wambote ni Jihova, Mukiki eye wala ni kutululuka.

17. Ihi ilombolola “ku atonginina se ene afwama mwene kutambula o kikalakalu kiki”? (1 Timote 3:10; tala we ofoto.)

¹⁷ “ku atonginina se ene afwama mwene kutambula o kikalakalu kiki” kiki kilombolola kwila o tufunga amono kya kwila eye ukumbidila kyambote o ikalakalu ye ni kwila atena kukudyelela. Mukiki, kyoso o tufunga kyanda kubhinga phala kubhanga ikalakalu, kayela o itendelesu yoso yanda kubhana ni ya madivulu yene mutubhana o kimbandi kya fiyele. Sota kwijiya se o kikalakalu kye kyalungu ni ihi, ni kizuwa kyebhi ki watokala ku izubha. Se ulanga kyambote o ikalakalu ye, oso mu kilunga anda mona kwila eye umuthu mukwa kukudyelela ni kwila anda kumona kwila wa mukula mu nzubi. Tufunga sulukenu mu kubhana itendelesu ku jiphange jamayala a batizala kya. (Tanga 1 Timote 3:10.) Mu kilunga kyenu mwala minzangala ala ni 13, 14 a mivu mba ndenge a abatizala kya? Ene ene mudilonga ubheka wa ni kusokejeka o yonge? Ene mutambwijila mu yonge ni kuboka jinga? Se mwatambwijila kyene mu ibhwidisu yiyi, mwabhane ikalakalu ya tena o kubhanga, sumbala ana jindenge hanji. Mukiki o minzangala ya anda “ku atonginina se ene afwama mwene kutambula  o kikalakalu kiki.” Kyenyiki, kyoso kyanda tenesa 17 mba 18 a mivu, ene nange atena kwasola kala akwatekexi a tufunga.

18. Kyebhi kya kala o muthu “kala ni kikuma kya kima”?

¹⁸ “Kala ni kikuma kya kima.” O muthu kala ni kikuma kene mubhanga ima ya bhangesa akwa kumutatela mba kumuzwela kya ibha. Kidi kwila, nange, sayi athu anda kutatela. Kiki kya bhiti kate mwene ni Jezú, mwene wambe kwila o akayedye eji bhita mu ima yiyi. (Nzw. 15:20) Maji se ukala ni ukexilu wambote kala Jezú eye wanda kala ni wendelu wambote bhukaxi ka jiphange.—Mat. 11:19.

19. Ihi ilombolola “kukala ngó ni muhatu umoxi”?

¹⁹ “Kukala ngó ni muhatu umoxi.” Jihova wa mesena kwila o diyala dikala ngo ni muhatu umoxi eye we watokala kukala ni kixinganeku kiki. (Mat. 19:​3-9) O kidista katokala kuta phanda. (Jih. 13:4) Ku mbandu yengi eye wa tokala kukala fiyele ku muhatu we, ni kwila ki watokala ku wabhela dingi ahatu engi.—Jobe 31:1.

20. Kyebhi o jitata kya tena kwendesa kyambote o twana ni miji yâ?

²⁰ ‘Kwendesa kyambote o twana ni mwiji wê.’ Se eye umutwameni wa mwiji, eye wa tokala kukumbidila kyambote o kikalakalu kye. Bhanga jinga o ubhezelu ku mwiji. Bhanga yoso i utena phala kuya musidivisu ya kuboka ni muhatu we ni twana twe. Kwatekesa o twana twe kukala ni ukamba wambote ni Jihova. (Efe. 6:4) O diyala ulanga kyambote o mwiji wê ulondekesa kwila wala polondo phala kulanga kyambote o kilunga.—Sokesa ni 1 Timote 3:5.

21. Ihi i watokala o kubhanga se kiwala hanji umu kwatekexi watufunga?

²¹ Se eye ki wala hanji umukwatekexi watufunga, twakudyondo dilonge kyambote o milongi yiyi samba yalungu ni maka ya. Dilonge we o itendelesu ya Bibidya yalungu ni akwatekexi a tufunga, bhanga nguzu phala kukumbidila o itendelesu yiyi. Xinganeka o henda ye kwa Jihova ni kujiphange mu kilunga kye. Kiki kyanda mbandekesa o hanji ye ya kwasidivila. (1 Ph. 4:​8, 10) Kyoso ki wanda kituka o mukwatekexi watufunga eye wanda mona o kusanguluka kwijila mu kusidivila o Jiphange. Dyelela kwila Jihova wanda besowala o nguzu i wene mubhanga phala kukala umukwatekexi watufunga!—Fil. 2:13.