MBANDU YAKUDILONGA 47
MWIMBU 103 O Tufunga—Mawujitu a tu Bhana Jihova
Ihi Yatokala Kubhanga o Jiphange Phala Kukala Tufunga?
“Se muthu wa mubhanga nguzu phala kukala kafunga, wa musota kikalakalu kyambote.”—1 Ti. 3:1.
ITWANDADILONGA
O kumona o milongi ya Bibidya yatokala kukumbidila o phange wamesena kukala kafunga.
1-2. Ikalakalu yebhi yene mubhanga o tufunga?
SE EYE wamusidivila kya kala mukwatekexi wa tufunga mu ithangana yavulu, eye wala mu njila yambote phala kukituka kafunga. Eye wamesena kubhanga o “kikalakalu kyambote,” kyene mubhanga tufunga—1 Ti. 3:1.
2 Ikalakalu yebhi yene mubhanga o tufunga? O tufunga ene mukala ku pholo mu sidivisu ya kuboka, ene akalakala kyavulu mu kukunda o jiphange mu jinzo jâ, ni kulonga ni kuswinisa o kilunga bhukaxi ka izwelu yâ ni ibhangelu yâ. Mukonda dya kiki o Bibidya wamba kwila o mayala ya “maujitu” atubhana Jezú.—Efe. 4:8.
3. Ihi yatokala kubhanga phange phala kukituka kafunga? (1 Timote 3:1-7; Titu 1:5-9)
3 Ihi iwatokala kubhanga phala kukituka kafunga? O ima iwatokala kubhanga phala kukala kafunga ki yadifu ni ima iwatokala kubhanga phala kusota salu. Nange se kwala patalá wamusota muthu wala ni uhete wa kukalakala, se eye wala ni uhete yu eye utena kubokona ku salu yiyi. Maji phala kukala kafunga ki watokala ngo kukala ni uhete wa kuboka ni kulonga. Eye watokala kukumbidila o milongi itusanga mu 1 Timote 3:1-7 ni Titu 1:5-9. (Tanga.) O milongi yiyi yanda tu londekesa yalungu ni maukexilu atatu atokala kubhanga o tufunga: (1) kukala ni kilunji kyambote kikale mu kilunga mba kana, (2) watokala kwendesa kyambote o mwiji wê ni (3) kukala polondo phala kubhanga ikalakalu mu kilunga.
KUKALA NI WENDELU WAMBOTE
4. O muthu kene “mutatela” kilombolola ihi?
4 Se wamesena kukala kafunga ki watokala kukala ni kima kya ku “kutatela.” Kiki kilombola kwila eye wala ni wendelu wambote mu kilunga, mukonda seku muthu wanda kutatela kima kyayibha. Ku mbandu ya mukwa eye watokala we kubhana “phangu yambote kwa yo kamusidivila Jihova.” Nange sayi athu atena ku kuxongwena mukonda u kidistá, maji o athu katokala kukala ni jiphata kwila eye u muthu wambote. (Dan. 6:4, 5) Dibhwidise: ‘O kwila o jiphange mu kilunga ni athu kamusidivila Jihova ene muzwela kyambote yalungu neme?’
5. Ihi iwatokala o kubhanga phala “kuzola o ima yambote”?
5 Eye watokala we “kuzola o ima yambote,” kifwa kusota idifwa yambote ku jiphange, kuximana o jiphange mukonda dya idifwa yambote yala nayu. Eye we watokala kusanguluka mu kubhanga mbote kwa akwenu mu kubhanga yoso i utena. (1 Te. 2:8) Mukonda dyahi o tufunga abhingi kukala ni kidifwa kiki? Mukonda ene abhita ithangana yavulu mu kukunda o jiphange ni kubhanga o ikalakalu yala nayu kala tufunga. (1 Ph. 5:1-3) Ne kiki o kusanguka kwa mu kusidivila akwâ, kwabeta dingi, kota o kutambula ndenge.—Ika. 20:35.
6. Kyebhi ki utena kulondekesa kwila u “mukwa kuzalela”? (Jihebelewu 13:2, 16; tala we ofoto.)
6 Eye ulondekesa kwila o mukwa ‘kuzalela’ mu kubhanga mbote ku akwenu kate mwene kwa ki yó ki makamba mé. (1 Ph. 4:9) Sayi divulu dyamba kiki yalungu ni mukwa kuzalela: “Mwene ujikula o dibhitu ya inzo yê, ni muxima woso ukwatekesa akwâ kate mwene o athu yo ka ejiya.” Mu kiki dibhwidise: ‘O kwila angijiya kala ngi mukwa kuzalela o asonyi, atukunda mu kyonge kyetu?’ (Tanga Jihebelewu 13:2, 16.) O muthu mukwa kuzalela ulondekesa henda ku asonyi, ku jingadyama, ku ajitu ene mukwiza kubhanga diskulusu mu kilunga ni ku tufunga twa ilunga.—Dim. 18:2-8; Jisa. 3:27; Luk. 14:13, 14; Ika. 16:15; Lom. 12:13.
Dikaza azalela o kafunga ka ilunga ni muhatu wê, kubhata dyâ (Tala okaxi 6)
7. Kyebhi o kafunga kyalondekesa kwila ‘kazolo o kitadi’?
7 “Katokala kuzola o kitadi.” Kiki kilombolola kwila katokala kudikwatenena ku jimbote. Kikale se u mvwama mba u ngadyama, eye watokala kuta kupholo o Utuminu wa Nzambi ku mwenyu wé. (Mat. 6:33) Eye ubhanga yoso ni yoso phala kubheza Jihova, kulanga o mwiji wé ni kukwatekesa o kilunga. (Mat. 6:24; 1 Nz 2:15-17) Mu kiki dibhwidise: ‘Ihi i ngibanza yalungu ni kitadi? O kwila ngasanguluka ni ima i ngalanayu? Inga ngamesena kukala ni kitadi kyavulu ni jimbote?’—1 Ti. 6:6, 17-19.
8. Maukexilu ebhi utena kulondekesa kwila wala ni “wendelu wambote” ni kwila ‘uditumina o jihânji?’
8 Se eye utena ‘kulanga kyambote o wendelu wé’ ni ‘kuditumina o jihânji jé’ kiki kilombolola kwila eye wala ni ukexilu wambote ku mwenyu wé. Eye kiwanda tandanganya kyavulu ni kúdya, ni kunwa, izwatu ni kutonoka. Eye ki watokala kukayela o ukexilu wa athu kamusidivila Jihova. (Luk. 21:34; Tiy. 4:4) Eye utena we kutululuka né mwene kyoso o athu kya kutalatala kyayibha. Eye we kiwatokala “kukala hôlwa,” o athu katokala ku kwijiya kwila u mukwa kukodiwa. Dibhwidise: ‘O kwila ngilondekesa ku mwenyu wami kuma ngala ni wendelu wambote ni kwila ngiditumina o jihânji?’
9. Ihi ilombolola “kukala ni kilunji kyambote” ni kukamba kukala “mukwa kavwanza”?
9 Phala “kukala ni kilunji kyambote,” eye watokala kutonginina kyambote o ima kala kilondekesa o milongi ya Bibidya. Eye uxinganeka kyambote kyebhi o milongi ya Bibidya itena ku kukwatekesa kubatula o maka. Ande dya kusola kima, watokala kutokwesa hanji kyambote. (Jisa. 18:13) Mukonda dya kiki eye utena kubatula o maka mu ukexilu utubhinga Jihova. Phala ki ukale u “mukwa kavwanza,” eye watokala kukala ni ukexilu wa kubhixila selu mu ididi iwaxindi phala kuya. Atokala ku kwijiya kala u muthu atena ku kudyelela ni kwila ukayela o itendelesu yene mu kubhana. O idifwa yiyi yanda kukwatekesa kukala ni kilunji kyambote. Kindala tumone se kyebhi ki utena kukumbidila o milongi ya Bibidya ni kubhana phangu yambote kala mutwamene wa mwiji.
LANGA KYAMBOTE O MWIJI WÉ
10. Kyebhi o diyala kyatena “kwendesa kyambote o mwiji wê”?
10 Se udikaza kya, wandala kukala kafunga, watokala kwendesa kyambote o mwiji wé. Mu kiki-phe eye watokala“kwendesa kyambote o mwiji” wé. Eye watokala kukala ni kilunji kyambote, ni kulondekesa henda ku mwiji wé. Kuma u mutwameni wa mwij, eye watokala kuta kupholo dya mwenyu wé o ubhezelu wa Jihova. Mukonda dyahi? O poxolo Phawulu wambe kiki yalungu ni maka enyá: “Mukonda o muthu se katena kwendesa o mwiji wê, kyebhi-phe kyanda tena kulanga o kilunga kya Nzambi?”—1 Ti. 3:5.
11-12. Kyebhi o wendelu wa twana utena kukwatekesa o tata kukituka kafunga? (Tala we ofoto.)
11 Se u tata, o ‘twana twé atokala ku kubelesela ni ku kuxila.’ Eye watokala kwalonga ni kwakwatekesa ni henda. Mu kidi eye wamesena kwila o twana twé asanguluka, ni kwila atonoka we ni ana-ndenge ni akwâ. Maji o itendelesu iwanda kwa bhana, yanda kwakwatekesa kukala athu abelesela, axila akwa ni kukala ni wendelu wambote. Ku mbandu yamukwa eye watokala kubhanga yoso ni yoso phala kukwatekesa o twana twé kukala ni ukamba wambote ni Jihova, ni kukayela o milongi ya Bibidya kate kyoso kyanda kwabatizala.
12 ‘O twana twé katokala kwa ejiya kala athu abukumukina Jihova.’ Se mona wa Mbangi ya Jihova, uta kituxi kyadikota, ihi yanda bhita ni tat’ê? Se o tata kamulongo ni ku mubazela mu ukexilu watokala, mwene katena dingi kukala kafunga.—Tanga o Mulangidi wa 15 de Outubro de 1996, dif. 21, jik. 6-7.
O jitata atokala kulonga o twana twâ phala kubhanga o ima phala Jihova ni kilunga kyê (Tala okaxi 11)
KUKWATEKESA O KILUNGA
13. Kyebhi ki utena kulondekesa kwila u muthtu ‘walenduka’ ni kwila eye ki “mukwa kujiza”?
13 O jiphange ala ni idifwa yambote akwatekesa kyavulu o kilunga. O diyala ‘walenduka’ ubhanga nguzu phala kukala ni kutululuka. Se wamesena kwila o athu akwijiya kala u muthu walenduka, watokala kwividila o ima izwela akwenu ne mwene se wala ni kibanzelu kyengi. Se o tufunga adyongeka phala kubatula o maka, o kwila weji xikina o kima kyasolo se yene ikayela o milongi ya Bibidya? Eye we kiwatokala kukala u “mukwa kujiza” mba kujijidika kubhanga o ima mu ukexilu wé. Eye watokala kubhana valolo mu ima izwela akwenu. (Dim. 13:8, 9; Jisa. 15:22) Eye kiwatokala kukala mukwa“jimvunda” ne kukala muthu“uthathamana”. Mu veji dya kujijidika kubhanga ngó o ima mu ukexilu wé, eye watokala kubhana valolo mu ima izwela akwenu ni kuzwela ni kuxila kwoso. Se ukala u diyala walenduka, eye wanda dyanga kusota kusanga paze ne mwene mu ithangana yabhonzo. (Tiy. 3:17, 18) Se ulondekesa henda mu kuzwela ni akwenu ne mwene yo kamusidivila Jihova, eye wanda kwakwatekesa kutululuka ni kuzubha o njinda.—Afun. 8:1-3; Jisa. 20:3; 25:15; Mat. 5:23, 24.
14. O ‘kukala muthu kakituka Kidistá kindala’ ni kukala “fiyele” kulombolola ihi?
14 Phala kukala kafunga o phange ‘katokala kukala muthu wakituka Kidistá kindala.’ Ki kilombolola kuma kyoso kya mubatizala watokala kubhita mivu yavulu, maji watokala kukala muthu wakulu mu nzumbi. Ande dya ku kusola phala kukala kafunga, kala kyakexile Jezú, eye watokala kukala u muthu walenduka, mukwa mwanyu, mu kukingila o kithangana kyatokala phala Jihova na kubhane ikalakalu yengi mu kilunga. (Mat. 20:23; Fil. 2:5-8) Eye utena kulondekesa kwila u “fiyele” mu kudikwatenena kwa Jihova, ku ijila yê, itumu yê ni kukayela o itendelesu ibhana o kilunga kyê.—1 Ti. 4:15.
15. O kwila o tufunga twoso atokala kukala alongexi akatunda kyoso kyaya ni kubhanga madiskulusu?
15 O Bibidya yamba kwila o tufunga atokala kukala ni “uhete wa kulonga kyambote o maka a Nzambi.” Kiki ki kilombolola kwila o tufunga twoso atokala kukala alongexi akatunda kyoso kyaya ni kubhanga madiskulusu. Né kiki, ene ene mulonga kyambote o athu mu sidivisu ya kuboka, ni jiphange kyoso kya akunda. (1 Ko. 12:28, 29; Efe. 4:11) Sumbala ki umulongexi wakatunda, né kiki watokala kubhanga nguzu phala kubandekesa dingi o uhete wé wa kulonga. Kyebhi ki utena kubhanga kiki?
16. Ihi i tutena kubhanga phala kubandekesa o uhete wetu wa kulonga? (Tala we ofoto.)
16 “Ukwata kyambote o maka a fiyele.” Mu kulonga ni mu kubhana itendelesu, dikwatenene mu Bibidya. Phala kubhanga kiki watokala kudilonga o Bibidya ni madivulu metu. (Jisa. 15:28; 16:23) Mu kudilonga, tonginina kyambote se kyebhi o madivulu metu kya jimbulula o jivelusu ja Bibidya, phala utene we kulonga mu ukexilu watokala. Kyoso ki wanda longa, bhanga yoso phala o ima i wanda longa itule ku mixima ya athu. Utena we kubhinga kikwatekesu ku tufunga twa mukwa. (1 Ti. 5:17) O tufunga atokala we “kuswinisa” o jiphange, maji sayi ithangana atokala we ‘kwabazela.’ Maji eye watokala kukala u mukwa henda. Se udikwatenena ku Mak’â Nzambi ni kukala u mukwa henda, wanda kala u mulongexi wambote, mukonda wanda kayela o phangu ya Jezú, o Mulongexi Wadikota.—Mat. 11:28-30; 2 Ti. 2:24.
Mukwatekexi wa tufunga wamudilonga ni kafunga kyebhi kya kulonga bhukaxi ka Bibidya. Mu kusuluka o mukwatekexi wamusokejeka o diskulusu ni lumwenu (Tala okaxi 16)
SULUKA MU KUKULA MU NZUMBI
17. (a) Ihi itena kukwatekesa o akwatekexi a tufunga kukula mu nzumbi? (b) Ihi yatokala kuxinganeka o tufunga kyoso kyaya ni kutonginina o mukwatekexi phala kukala kafunga? (Tala o kaxa “ Dimukenu Kyoso ki Muya ni Kutonginina o Akwatekexi a Tufunga.”)
17 Mu kutanga yoso i twamono mu milongi yiyi, sayi akwatekexi a tufunga atena kubanza kwila kanda tena kukala tufunga, mukonda kwala ima yavulu phala kubhanga. Maji twatokala kulembalala kwila, Jihova ni kilunga kyê, kamesena kwila tukala tu athu ayuka. (1 Ph. 2:21) Lembalala we kwila, o nzumbi ikôla ya Jihova yene yanda tukwatekesa kukala ni idifwa yiyi. (Fil. 2:13) O kwila sayi kidifwa ki wamesena kukala nakyu? Samba kwa Jihova yalungu ni maka enyá. Tokwesa mu madivulu metu, bhinga we kikwatekesu ku tufunga.
18. Ihi yatokala kubhanga o akwatekexi a tufunga?
18 Kikale o tufunga ni akwatekexi a tufunga, etu enyoso twatokala kusuluka mu kukala ni idifwa i twadilongo mu milongi yiyi. (Fil. 3:16) O kwila eye u mukwatekexi wa tufunga? Se kana, bhanga yoso phala kukula mu nzumbi. Samba kwa Jihova phala ku kukwatekesa ni ku kulonga jinga, ni utene kukala dingi ni maujitu mu kilunga kyê. (Iza. 64:8) Sé phata Jihova wanda suluka ni ku kukwatekesa kyoso ki wandaya ni kubhanga nguzu phala kukala kafunga.
MWIMBU 101 Tu Kale Kumoxi
