1-2. Mu ukexilu webhi o athu atutalatala kyayibha?

 SAYI kizuwa Jezú wa tele kifika kya mutudi kexile mu mubatula kyambote o maka me ku mufundixi. O maxibulu a Jezú a tendela kyambote o kifika kiki mukonda mu izuwa yenyoyo o athu exile mwatalatala kyayibha. (Luk. 18:​1-5) Lelu etu we tutendela kyambote o kifika kiki kya Jezú mukonda ene we mututalatala kyayibha.

² Kumundu yu bhutwatungu kwene athu avulu akwa katombo ni akwa lwimbi mukonda dya kiki twejiya kwila anda tutalatala kyayibha. (Ndo. 5:8) Maji tulwala ndingi kyavulu kyoso phangyetu mu nzumbi ututalatala kyayibha. Maji o jiphange jetu kadifu ni yo atuzukutisa mukonda dya kusidivila Jihova. Ene wa akwa ituxi. Tutena kudilonga ku phangu ya Jezú ni jiselevende ja mukwa kyoso kya atalatala kyayibha ku jinguma ja. Se yo kamusidivila Jihova twene mu akwatela henda, mu kiki twatokala kusuluka mu kudilondekesa ndingi o henda! Kyebhi Jihova kya divwa kyoso kyatutalatala kyayibha kwa yo kamusidivila Jihova, mba kujiphange jetu mu nzumbi? O kwila mwene umona o ima ya mubhita netu?

3. Kyebhi Jihova kya divwa kyoso o jiselevende jê kya atalatala kyayibha?

³ Jihova wa mesena kwila atutalatala kyambote, mwene uluwala kyoso kyatutalatala kyayibha. Mukonda dya kiki o Bibidya yamba “Jihova kya mu wabhela o kubatula mu kidi.” (Jisá. 37:28) Jezú wambe kwila Jihova “wanda batula o maka  mâ ni lusolo ni kuyuka” mu kithangana kya tokala. (Luk. 18:​7, 8) Kwakambe ngo vofele Jihova wanda zubha o hadi, kanda kwehela dingi muthu kututalesa hadi.—Jisá. 72:​1, 2.

4. Kikwatekesu kyebhi kitubhana Jihova?

⁴ Twejiya kwila ku hádya Jihova wanda zubha o hadi yoso, maji mu izuwa ya lelu Jihova utukwatekesa kyoso kyatutalatala kyayibha. (2 Ph. 3:13) Mwene utulonga ihi i tutena o kubhanga se atutalatala kyayibha, phala kituvudise dingi o maka. Bhukaxi ka Bibidya mwene ubhanga kiki mu maukexilu ayadi. O ukexilu wadyanga, mu kutubhana o phangu ya Mon’ê Jezú. O wakayadi mu kutubhana itendelesu itukwatekesa kudibhana ni maka yá.

DILANGE KYOSO KYA MUKUTALATALA KYAYIBHA

5. Mukonda dyahi twatokala kudilanga kyoso kyatutalatala kyayibha?

⁵ Tuluwala kyavulu kyoso kyatutalatala kyayibha. (Ndo. 7:7) Jobe ni Habakuke asidivila Jihova, adivu we kyenyiki. (Jobe 6:​2, 3; Haba. 1:​1-3) Kikwale maka kudivwa kiki, maji twatokala kudilanga phala kitubhange kima kyayibha.

6. Yoso ya bhiti ni Sobha Abisalone itulonga ihi? (Tala we ofoto.)

⁶ Kyoso kyatutalatala kyayibha mba kyatalatala kyayibha muthu twamuzolo, tukala ni vondadi ya kuvutwila phonzo. Maji kiki kitena kutubhekela dingi maka. Xinganeka yabhiti ni mon’â Sobha Davidi, amwixana Abisalone. Mwene wexile ni njinda yavulu mukonda phang’yê Aminone, wazeka ni phang’ya yamuhatu ya Abisalone, amwixana Tamala. Kala kyambele o Kijila kya Mozé, Aminone atokalele kumujibha mukonda dya kituxi kya tele. (Iji. 20:17) Abisalone wa lungidye mu kukala ni jinda, maji kimwene wa tokalele kujibha Aminone.—2 Sam. 13:​20-23, 28, 29.

7. Ihi ya bhiti ni mukwa Jisálamu kyoso kya mono o athu ambote kwatalatala kyayibha?

⁷ Kyoso kya kamba kukastikala o athu abhanga kyayibha ku akwa, tumona kwila kubhanga mbote ku akwetu kikwale ni valolo. Sayi selevende ya Jihova mukulu wa monene kwila o athu a ibha exile mutalesa hadi ku athu ambote, mwene wexile mu mona kwila o athu ya, asangulukike ngo kumwenyu. Yu wambe: “Ene-ze akwa phulu’á! Ki bhwala ngó kima ki a tatesa.” (Jisá. 73:12) Mwene wa  luwalele kyavulu mukonda dya ima yiyi yu wa xinganekele kwila o kubelesela Jihova kikwexile ni valolo, yu wambe: “Anga ngi kala mu banza-phe, mba mak’ama ma tokala kyebhi, phata ya ngi kwata, kya ngi tatesa mwene kyavulu!” (Jisá. 73:​14, 16) Mukusuluka mwene wambe: “Eme-phe kwa xedi ngó kuxya mu njila; makánda mami mandekele kyá kuxangumuka.” (Jisá. 73:2) Kyene we kyabhiti ni phange a mwixana Betu.

8. Ihi yabhange phange umoxi mukonda dya ku mutatela?

⁸ Sayi jiphange atatela manu Betu kwila wanyana o kitadi kya kilunga. Mukonda dya kiki amukatula o maujitu woso yexile nayu, o jiphange mu kilunga kexile mu muxila dingi. Mwene wambe: “Ngafutukile kyavulu, ngexile we ni jinda yavulu,” mukonda dya kiki wa zozele mu nzumbi, wabhitile mivu itanu sé kuya muyonge ne kuboka. O ima yabhiti ni manu Betu itena we kubhita netu, se kitukale ni ixinganeku yambote kyoso kya tutatela.

KYOSO KYA MUKUTALATALA KYAYIBHA KAYELA O PHANGU YA JEZÚ

9. Ibhidi yebhe yadibhana nayu Jezú? (Tala we ofoto.)

⁹ Jezú wabhana phangu yambote yalungu ni ihi i twatokala kubhanga kyoso kya tutalatala  kyayibha. Athu avulu exile mu mutalatala kyayibha kate mwene ni jindandu je. O jindandu je kexile mu bheza Jihova exile mu zwela kwila mwene kexile ni kilunji, o atwamene a jingeleja exile mu zwela kwila mwene wexile ni madimonyo, o masoladi akwa Loma amuxokwena, amuphapena mate ku pholo, amubeta, ya a mujibha. (Mál. 3:​21, 22; 14:55; 15:​16-20, 35-37) Sumbala ni ibhidi yoso yiyi Jezú wakolokota mu ufiyele we, mwene kavutula phonzo. Ihi i tutena kudilonga ku phangu ya Jezú?

10. Ihi yexile mu bhanga Jezú kyoso kyexile mu mutalatala kyayibha? (1 Phetele 2:​21-23)

¹⁰ Tanga 1 Phetele 2:​21-23. a Jezú watuxila phangu yambote yalungu ni ihi itwatokala o kubhanga kyoso kya tutalatala kyayibha. Jezú wexile njimu, mu unjimu we sayi ithangana Jezú wexile mu dixibha, sayi ithangana wexile mu zwela. (Mat. 26:​62-64) Jezú kexile mutambwijila athu woso exile mu mutatela. (Mat. 11:19) Kyoso Jezú wexile mu zwela mwene kexile mwa xongwena ni kwa kwatesa wôma. Mu ithangana yoso Jezú wexile mulanga o dimi dye mukonda, “o ima yoso wa ibhakula kwa Nzambi, Yó ufundisa ni kuyuka.” Jezú wejidile kwila Jihova wexile mumona yoso yexile mubhita nayu. Mwene wejidile kwila Jihova weji subha o hadi yoso wexile mu dibhana nayu mu kithangana kyenyokyo.

11. Kyebhi ki tutena kulanga o dimi dyetu? (Tala we o jifoto.)

¹¹ Kyoso kya tutalatala kyayibha tukayela o phangu ya Jezú, mu kulanga o dimi dyetu. Sayi bhabha kitubhingi kuzwela mba  kubhanga kima. Mukonda se tuzwela twanda bhulumuna dingi o maka. (Ndo. 3:7; Tiy. 1:​19, 20) Maji sayi bhabha twatokala mwene kuzwela phala kuzokela o kidi kyalungu ni kilunga kya Jihova ni kudizokela etu. (Ika. 6:​1, 2) Kyoso ki tuzwela twatokala kutululuka ni ku zwela ni kuxila kwoso.—1 Ph. 3:15. b

12. Kyebhi kitulondekesa kwila tudyelela kwa “Yó ufundisa ni kuyuka”?

¹² Etu tutena we kukayela o phangu ya Jezú mu kudyelela kwa “Yó ufundisa ni kuyuka.” Kyoso o athu kya tutatela mba atubhanga kyayibha, twejiya kwila Jihova wejiya o kidi. O kidyelelu kiki, kitubhangesa kukolokota mukonda twejiya kwila Jihova wanda zubha o hadi woso itubhita lelu. Se tudyelela kwa Jihova ni kumwehela kubatula o maka, kitwanda kala ni njinda ne kuzemba o athu. O njinda ni kutema kutena ku kuluwalesa, ni ku kubhangesa kuta kituxi.—Jisá. 37:8.

13. Ihi itena ku tukwatekesa kyoso kyatutalatala kyayibha?

¹³ Kidi kwila nuka twanda tena ku kayela o phangu ya Jezú ni kuyuka kwoso. Sayi ithangana twanda zwela ni kubhanga ima yanda tubhangesa kudyela. (Tiy. 3:2) Sayi bhabha anda tubhanga kima kyanda tubhangesa kudivwa kyayibha ku mwenyu wetu woso. Se kyene we kyamubhita neye ijiya kwila Jihova wejiya o ima yoso i wamubhita nayu. Jezú wejiya o ima iwamudibhana nayu mukonda mwene we amutalatala kyayibha. (Jih. 4:​15, 16) Ku mbandu yengi Jihova utubhana itendelesu bhukaxi ka Bibidya yanda tukwatekesa kyoso kya tutalatala kyayibha. Kindala twandadilonga jivelesu jiyadi mu divulu dya Loma yanda tukwatekesa kyavulu.

“EHELENU NZAMBI KUBHANGA KIKI”

14. Kyebhi kitwehela Jihova “kuvutwila phonzo”? (Loma 12:19)

¹⁴ Tanga Loma 12:19. Poxolo Phawulu wambe kujikidista kwila ene atokalele kwehela Jihova “kuvutwila phonzo.” Tubhanga kiki kyoso ki kwehela Jihova kuvutwila phonzo mu ukexilu we ni mukithangana kye. Sayi phange a mwixana Nzwá amutalatalele we kyayibha, wambe: “Ngatokalele kulanga o njinda yami phala kingibhange kima kyayibha, maji kyangibhonzele kyavulu. O divulu dya Loma 12:19 dya ngikwatekesa kukingila kwa Jihova.”

15. Webhi o ukexilu wambote wa kwehela Jihova kubatula o maka?

¹⁵ Jihova utubesowala kyavulu kyoso kitumwehela kubatula o maka. kyoso kitubhanga kiki kitwanda luwala mukonda dya kukamba kumbatula o maka. Jihova utukwatekesa. Kyedi kala wamuzwela: “O phonzo yangitokala eme, eme mwene ngatokala kuvutwila o phonzo.” Setuxikina kwila Jihova wanda fundisa yo atutalatala kyayibha, kitwanda suluka mukukala ni jinda mukonda mwene wanda mbatula o maka ni kuyuka kwoso. Kiki kyene kya kwatekesa manu Nzwá twamutumbula kudima. Mwene wambe: “Se ngisola kubatula o maka modyami o maka anda dibandekesa ngo, maji se ngehela Jihova kwabatula, o maka oso anda bhita kyambote.”

“TOLOLENU O PHULU NI MBOTE”

16-17. Kyebhi o musambu utena kutukwatekesa kutolola o phulu ni mbote? (Loma 12:21)

¹⁶ Tanga Loma 12:21. Phawulu wa tendelesa we o jikidistá phala kutolola “o phulu ni mbote.” Mu diskulusu dya bhange kumulundu Jezú wambe: “Zolenu o jinguma jenu, ni kusambela yó a mi zukutisa.” (Mat. 5:44) Kiki kyene kya bhange Jezú. Jezú watale hadi yavulu  kyoso o masoladi akwa Loma kya muphapela kutaka. Etu kitutena kutendela o ndolo yevu Jezú kyoso kya muphapela kutaka.

¹⁷ Sumbala ni hadi yatale mwene wasuluka ni ufiyele we kwa Jihova, ni kuzola o athu. Muveji dya kubhinga kwa Jihova phala kutalesa hadi kumasoladi akwa Loma, wa bhingi: “Tata, waloloka, mukonda ene kejiya o kima kya mubhanga.” (Luk. 23:34) Kyoso ki tusambela o athu atubhange kyayibha, kitwanda kwabhakela phonzo kate mwene twanda sosolola o njinda ni kulungulula o ixinganeku yetu yalungu ni athu atubhanga kyayibha.

18. Kyebhi o musambu kyakwatekesa manu Betu ni manu Nzwá kudibhana ni athu atalatala kyayibha?

¹⁸ O musambu wakwatekesa jiphange jiyadi a atumbula kudima mu kudibhana ni athu atalatala kyayibha. Phange Betu wambe: “Ngakexile musambela o jiphange a ngitalatala kyayibha. Mu ithangana yavulu ngabhingi kwa Jihova phala ku ngikwatekesa kujimba o ima yoso yabhiti.” Ku pholo dya kwenda Phange Betu wavutuka mu kusidivila Jihova ni ufiyele woso. Phange Nzwá wambe: “Mu veji javulu ngasambela o jiphange a ngibhangele kyayibha. Mukonda dya misambu yiyi, Jihova wangikwatekesa kwa loloka, kukamba kukala ni njinda yá ne kwafundisa. O misambu yiyi, yangikwatekesa we kukala ni kutululuka.”

19. Ihi itwatokala kubhanga Kate ku dizubhilu? (1 Phetele 3:​8, 9)

¹⁹ Kate kyanda bhixila o dizubhilu dya mundu yu, twanda dibhana hanji ni ibhidi yavulu. Maji kiza ki kize twanda kala polondo mu kusuluka mu ku samba kwa Jihova mu ku mubhinga kikwatekesu. Ne kiki, twatokala kusuluka mu kukumbidila o itumu ya Bibidya ni ku kayela o phangu ya Jezú kyoso kya tutatela. Se ubhanga kiki, dyelela kwila Jihova wanda kubesowala kate ku hadyá ni hadyá.—Tanga 1 Phetele 3:​8, 9.