Kyoso kitwexile dingi mu boka, twexile dingi mubhindamena o madivulu. O jiphange ku Betele ya Brooklyn exile mu bhanga o madivulu ni Despertai! Maji o madivulu ni jikapa jakolo exile mwabhanga mu ididi yamukwa ya kubhangelamu madivulu, kyokyo o ididi yakubhangelamu o madivulu kyexile mulaleka phala kutubhana o madivulu, o kiki kyexile mutandanganyesa o kikalakalalu kyetu kya kuboka. O phange Rutherford wazwela ni phange Robert Martin wexile o mutwameni wa kididi mwakexile mubhangamu o madivulu, se ihi yabhingile phalaphe se tutene kubhanga o madivulu.

O phange Martin wambe kwila “yiyi ndunge yambote, mukonda yiyi yejijikula njila phala kubhanga kididi kya kubhanga madivulu mu maukexilu avulu.” O jiphange alukala kididi mu kikoka kya ku dyembu dya Concord 18 mu mbanza ya Brooklyn, ya asumbu o jimakina joso ja bhindamenene.

Maji ko athu oso kasangulukile ni ima yiyi. O ngana ya ditenda bhwakexile mubhanga o madivulu metu, wayi mu kunda o kididi kyetu kya ubhe kya kubhangamu o madivulu. Mwene wambe: “Enu mwala ni makina yakatunda phala kubhanga o madivulu, maji seku muthu mudyenu wejiya kukalakala nayu, kwandabhita ngó mbeji jisamanu o makina yiyi yandazangaka.”

Phange Martin wambe: “O izwelu yê yedi kala yakidi mwene, maji mwene kaxinganeka kwa Ngana yetu, mukonda o Ngana wala n’etu mu ithangana yoso.” O phange Martin walungilyé. O makina yetu ya kubhanga madivulu yexile mubhanga midi jiyadi ja madivulu mu kizuwa kimoxi.

Muveji dya kukala ngó ni madivulu metu mu ukunji, o Jimbangi ja Jihova asoto ndunge yengi yakuboka bhukaxi ka rádio. Mu Lumingu mu ngoloxi mu kizuwa kya 26 ya mbeji ya Kawana wa 1922, o phange Rutherford waboko o njimbu yambote yalungu ni Jihova mu veji yadyanga bhukaxi ka mutelembe mba rádio. Mwene wabhange o diskulusu ni  dyambu: “Mazunda a Athu Lelu, Kandafwa Dingi.” Mwene wa dibhange mu mutelembe awixana KOG mu kibatu kya Los Angeles, California, ku ixi ya Estados Unidos.

Makwinyi ayadi ni kitanu a midi (25.000) ya athu evu o diskulusu. Amoxi atumikisa mikanda phala kusakidila phange Rutherford. Sayi mukanda watokalele kwa manu Willard Ashford, watungu mu mbanza ya Santa Ana, ku California. Mwene wambe kwa phange Rutherford: “Ngawabhelele kyavulu o diskulusu dyódyo ni kwila dyangikwatekesa we.” Mu kusuluka mwene wambe dingi: “Se eye kiweji bhanga o diskulusu didi bhukaxi ka radio, kingejitena kwivwa o diskulusu didi, mukonda dya jihaxi jitatu jingalanaju monzo, né mwene se wejibhanga bhumbandu ya inzo yetu.”

O madiskulusu amukwa, abhange mu semana yakayela. O Mulangidi wambele kiki: “Hama jitatu ja midi ja athu atenene kwivwa o diskulusu dyódyo bhukaxi ka mutelembe mba rádio.”

Kyoso o Adilongi a Bibidya kyamono kuma o athu asangulukile kyavulu, ene asolo kutunga kididi kya mutelembe mba wa rádio ku kibhela mba inzo ya dikota ku Kikolo Kya Staten, ki kyexile dikanga dya Betele ya Brooklyn. Ku mivu ku pholo o Adilongi a Bibidya, amono kuma o kididi kyókyo kya mutelembe mba kya rádio, akixana WBBR, kyeji kwakwatekesa kusanzumuna o njimbu ya Utuminu wa Nzambi.

O Mulangidi 15 wa mbeji ya Kanake wa 1922, wabhana o ngolokela yalungu ni kyônge kya dikota kyejibhita ku Cedar Point, Ohio, kyejimateka mu kizuwa kya 5 katé mu kizuwa kya 13 kya mbeji ya Katutu wa 1922. O Adilongi a Bibidya exile ni hânji yavulu phala kwivwa o milongi kyoso kyabhixila ku Cedar Point.

Mu diskulusu dya dyanga dyabhange, Phange Rutherford wambe ku jingivwidi: “Ngixikina ni kidi kyoso kuma, o Ngana wandabesowala o kyônge kiki kyadikota . . . ni kwila mwandatena kubhana umbangi kala nuka kyabhitile mu ngongo yoso.” O Adilongi a Bibidya mu kyônge kyokyo, atenene kuswinisa o jiphange phala asuluke mukubhanga o kikalakalu kya kuboka.

O Kya Sesa mu kizuwa kya 8 kya mbeji ya Katutu, 8.000 a athu ndenge akexile bhu kididi kyokyo phala kwivwa o diskulusu dyabhange Phange Rutherford. O jiphange amesenene kwijiya se ihi  ilombolola o kizwelu “ADV,” kyamonekene mu kixanu. Sayi athu kyoso kyaxikama, nange adibhwidisa se mukonda dyahi ku ditala kwakexile lona yadikota. Manu Arthur Claus, wende kibatu kyadikota. Watundu ku Tulsa, Oklahoma, ku Estados Unidos phala kumona o kyônge kiki. Mwene wasoto kididi kyamukwatekesa kwivwa kyambote o madiskulusu, mukonda mu izuwa yenyoyo kimwexile jimicrofone mba iselekete yejikwatekesa kubandekesa o dízwi dya alongexi.

Phala kubhangesa o jiphange kukatula mbote yavulu, o mwendexi wa kyônge wabhana o ngolokela kuma kyoso o Phange Rutherford kyejibhanga o diskulusu, seku muthu wejibokona dingi mu kididi mwexile mubhita o kyônge, phala kalandukise muthu. Ku divwa dya ola ni kaxaxi, o Phange Rutherford wamateka o diskulusu dyê ni izwelu ya Jezú yala mu divulu dya Matesu 4:17: “O Utuminu wa dyulu wazukama.” Mu kuzwela kyebhi o athu kyeji kwijiya yalungu ni Utuminu, mwene wambe kiki: “Jezú wambe kwila mu kithangana kya kutukuluka kwê, mwene wejikwendesa o kikalakalu kya kubhongolola o mundu wê. Mu kubhongolola kuku mwene wejisola o athu afiyele phala akale ku mbandu yê.”

O Phange Claus wazukamene bhumbandu ya ditala, mwene wambe: “Twexile mu kwivwa kyambote o izwelu yoso.” Mukusuluka mwene watundu bhu kididi kyê, mukonda wexile mudivwa kyayibha. Maji mwene kamesenene kuya mukonda wejidile kwila kyoso o diskulusu dyejimateka, keji mwehela kuvutuka mu kididi mwakexile.

Mu kubhita tu ithangana mwene wexile kya mudivwa kyambote. Mwene wevu kwila o jiphange exile mubeta o maku ni nguzu yavulu. Ni hanji yavulu mwene wamesenene kusota kididi phala kusambela kuthandu dya kididi mwexile mubhita o kyônge kya dikota. O Phange Claus, wakexile ni 23 amivu, wasoto ndunge phala kusambela ku sabhalalu, mwene wa sambela jimetulu jiwana, yu wamono kuma o jinjanela ja jikukile, mwene wamono kwila bhenyobho kyeji mubhana phala kwivwa kyambote diskulusu.

 Maji manu Arthur kakexile ubheka wê ku kididi kyokyo. Mwene wexile ni makamba mê. Sayi dikamba amwixana Frank Johnson, wamwibhula: “O kwila eye wala ni kanivete?”

Manu Arthur wambe: “Xé ngala.”

Manu Frank wambe: “Eye u kitambwijilu kya misambu yetu. Eye wamumona o lona yoyo yokute kujipheleku? Tonginina kyambote o Mufundixi. * Kyoso mwene kyandazwela, ‘bokenu, bokenu,’ eye watokala kubatula o jingoji jiji jiwana.”

Mu kiki, manu Arthur wakexile mukinga ni kanivete bhumaku, kyoso o Phange Rutherford kyejibhana o ngolokela. Mu kusuluka o Phange Rutherford wabhixila ku mbandu yabetakota ya diskulusu dyexile mubhanga. Ni kusanguluka kwoso ni nguzu yoso, nange o Phange Rutherford wadikola ni dizwí dya swina: “Kalenu fiyele ni jimbangi ja kidi ja Ngana. Sulukenu mu kubhânga, katé kyandabwikisa o jingeleja joso ja makutu. Bokenu o njimbu ya kidi mu ididi yoso. O athu atokala kwijiya kuma Jihova mwene o Nzambi, ni kwila Jezú Kidistu mwene o Sobha ya jisobha ni Ngana ya jingana! Mu izuwa yoso, kiki kyene o kizuwa kyabetakota. Talenu o Sobha yu tumina kyá! Kyenyikiphe, énu mwatokala kubokela o athu. Mu kikiphe, bokenu, bokenu, bokenu o njimbu yalungu ni Sobha ni Utuminu wê!”

Kala kyambe phangyetu manu Arthur, mwene ni jiphange jamukwa abatula o jingoji, bhofelebhofele o lona yatuluka. O kizwelu “ADV,” mu kingileji, kyakexile mulombolola kiki: “Bokenu Yalungu ni Sobha ni Utuminu Wé.”

O kyônge kya dikota kya bhiti ku Cedar Point, kyakwatekesa o jiphange kulunga o muxima mu kikalakalu kyabetakota, mu kuboka o maka alungu ni Utuminu wa Nzambi. O yó amesenene kusanzumuna o kikalakalu kya ukunji ni lusolo lwoso adibhakula phala kuboka dingi ni nguzu yavulu o njimbu yiyi. Sayi phange wexile muboki wathembu yoso watundu ku Oklahoma, ku ixi ya Estados Unidos, wambe: “O athu utwexile mwabokela exile jingadyama, ene exile mukalakala mu makungu mwakexile mukatula o alakatran. Kyoso ki tu abokela o njimbu yalungu ni Despertai ene amateka kudila.” Mu kusuluka mwene wambe: “Dibesá dyadikota kukonda o malamba a athu enyá.”

O Adilongi a Bibidya amono o valolo ya izwelu ya Jezú yala mu divulu dya Luka 10:2 yamba: “O idima yavulu phala ku ibhongolola, maji o akalakadi atolo.” Ku disukilu dya 1922, ene exile dingi polondo phala kuboka o njimbu yambote yalungu ni Utuminu wa Nzambi mu ngongo yoso.