1-2. (a) Sayi jinguvulu ene mu lungulukila o mundu wa Jihova. Kyebhi kyene mubhanga kiki, maji ihi yene mubhanga o mundu wa Jihova? (b) Mukonda dyahi tusanguluka kyoso kyamutuzukutisa? (Zwela yalungu ni foto ya kapa.)

 KINDALA kiki, mu 30 a jixi ku mundu, o kikalakalu kyetu akifidisa. Mu jixi jenyiji, sayi jixi o jinguvulu ate mu kaleya o jiphange jetu, kikale jiphange ja mala mba ja ahatu. Kituxi kyahi kyate? Phala Jihova ene kabhange kima kyayibha, kana. O yabhange ene o kutanga ni kudilonga o Bibidya, kuzwela ni athu yalungu ni Bibidya ni kuya mu yônge, kwabhu. Ene aditunu we kudita ku usoladi ni ku maka ajinguvulu. Ne mwene ni unguma woso yú, o jiselevende jiji ja fiyele ja Nzambi amukolokota mu kwenda mu ufiyele * wâ kwa Nzambi, amulondekesa kwila kanaku kima kitena ku afidisa kubheza Jihova. Kiki kyabhangesa kusanguluka!

² Eye nange wamono kya jifoto ja Jimbangi ja Jihova, mu jifoto jiji ene asanguluka né mwene ni kwazukutisa. Asanguluka mukonda ejiya kwila Jihova wawabhela yoso yamubhanga ene mukukala jinga fiyele. (1 Mal. 29:17a) Jezú wambe kiki: “Azediwa yó a mwa zukutisa mukonda dya kubhanga o ima yayuka . . . Tanenu-ku mu sanguluke, mukonda o futu yenu ku dyulu yadikota.”—Mat. 5:10-12.

3. Kala kyosoneke mu divulu dya Ikalakalu 4:19, 20, ihi yabhange o jipoxolo kyoso kya azukutisa ni mukonda dyahi?

³ O hadi yamutala o jiphange jetu, yene imoxi ni hadi yatale  o jipoxolo ja Jezú kyoso kya azukutisa mukonda dya kuzwela yalungu ni Jezú. Mu ithangana yavulu, o afundixi mu inzo ya kufundisa ya Jijudé “a atumu phala kazwele kima kyoso-kyoso mba kulonga mu dijina dya Jezú.” (Ika. 4:18; 5:27, 28, 40) Ihi yabhange o jipoxolo? (Tanga Ikalakalu 4:19, 20.) Ene ejidile kwila kwexile muthu wabetelekota kukala ni ungana, Mwéne ‘wa atumine kubokela o athu ni kubhana umbangi’ walungu ni Kidistu. (Ika. 10:42) Phetele ni Nzwá ene o athu akexile muzwelela o jipoxolo joso. Mu kiki, ni kuswina kwoso ene azwela kwila ejibelesela Nzambi, kejibelesela o afundixi’ó. Ambe kwila ene kejibhwila mu kuzwela yalungu ni Jezú. Kyedile kala ene akexile mu kwibhula kiki o afundixi: ‘Enu mwakake, mwamuzwela kwila o itumu yenu yabetakota o ya Nzambi ndenge?’

4. Kala kyotange mu divulu dya Ikalakalu 5:27-29, phangu yahi yaxisa o jipoxolo ku Jikidistá joso ja kidi? Kyebhi kitutena we kubhanga kala kyabhangele ene?

⁴ O jipoxolo axisa phangu yambote ku Jikidistá joso ja kidi, o phangu yakutumaka “Nzambi kala nguvulu yetu, kana o athu.” (Tanga Ikalakalu 5:27-29.) Kyoso kyazubha ni ku abeta mukonda dya ufiyele wâ, o jipoxolo atundu mu inzo ya kufundisa “ni kusanguluka, mukonda a amono kwila afwama kwa sebhulula mukonda dya dijina dya Jezú.” Ene asuluka mu kuboka!—Ika. 5:40-42.

5. Ibhwidisu yebhi itwatokala kutambwijila?

⁵ O phangu yatuxila o jipoxolo itubhangesa kudibhanga o ibhwidisu yiyi: Kyebhi o jipoxolo kyatokalele kubelesela Nzambi o athu kana, se o Mikanda Ikola yamba kwila twatokala “kutumaka o maungana”? (Lom. 13:1) Poxolo Phawulu watange kwila twatokala “kubelesela o maungana ni jinguvulu.” Kyebhiphe kitutena o kubhanga kiki se twatokala kukala fiyele kwa Nzambi, o Mutwameni wetu wabetakota?—Tit. 3:1.

6. (a) “O maungana” otange mu divulu dya Loma 13:1, ananyi, ni kyebhi kitwatokala kwatalatala? (b) Ihi itwamba yalungu ni ungana wa jinguvulu joso ja ngongo?

⁶ Tanga Loma 13:1. Mu velusu yiyi, o kizwelu “maungana” kyatokala ku jinguvulu  jitumina o athu. O Jikidistá atokala kubelesela o jinguvulu jiji. O jinguvulu jiji akalakala phala kimukale kavwanza mu dyembu, abhanga yoso phala o athu akumbidile o ijila, katé sayi ithangana ene azokelela o mundu wa Jihova. (Dij. 12:16) Mukonda dya kiki, twatokala kufuta o lubhaku, o dijimu, kwaxila ni ku abhana kijingu. (Lom. 13:7) Maji o jinguvulu jiji ja ngongo jala ngó ni ungana mukonda Jihova mwéne wa abhana nawu. Jezú walombolola kyambote o maka yá kyoso kyamwibhula kwal’o Nguvulu ya Loma amwixana Pônsyu Pilatu. Kyoso Pilatu kyazwela kwila mwene wexile ni ungana wakubhulula Jezú mba ku mu jibhisa, Jezú wamutambwijila: “Eye kiweji kala ni kutena ko kwami, se ka kubhele naku kwa Nzambi.” (Nzw. 19:11) Kala kyabhiti ni Pilatu, o ungana wala nawu o jinguvulu ni jingana ja ngongo, wala we ni mbambe.

7. Mu kithangana kyahi kitutokala kubelesela o jinguvulu ja ngongo? Ene atokala kwijiya kima kyahi?

⁷ O Jikidistá atokala kubelesela o ijila yoso ya jinguvulu, maji o ijila yoyo ki itufidisa kubelesela o ijila ya Nzambi. Kitutokala kubelesela o athu se atubhinga kima kya ibhila Nzambi mba se atufidisa kubhanga kima kyatutumu Nzambi kwila tukibhanga. Mu kifika, ene nange ajijidika o minzangala kukwata mauta phala kuya mu usoladi. * Mba ene nange afidisa o Bibidya yetu mba o madivulu metu anga atufidisa phala kituboke ni kuya ku yônge. Kyoso o jinguvulu kyazukutisa o maxibulu a Kidistu, atokala kwijiya kwila andabhakula jikonda kwa Nzambi. Jihova wamumona o ibhidi yoso yiyi!— Ndo. 5:8

8. Mu ukexilu webhi Jihova kadifwangana ni jinguvulu ja ngongo? Mukonda dyahi twatokala kwijiya o maka enyá?

⁸ O “maungana” ala ni kutena, abhanga ima yambote, atumina we akwâ. Maji kiki ki kilombolola kwila ene ala ni kutena mu ima yoso, ni kwila abetakota akwâ ndenge, kana. Sayiku Muthu wala ni kutena mu ima yoso, wabetakota, o jingana joso mu ngongo ndenge. Jihova Nzambi mwene o Muthu yú. Mu Bibidya Jihova Nzambi amutumbula mu luwana lwa jiveji kwila mwéne “Suke-ku.”—Dan. 7:18, 22, 25, 27.

9. Ihi yamono polofeta Daniyele?

⁹ Polofeta Daniyele wamono ima yalondekesa kyambote kwila Jihova wabetakota kukala ni ungana, o jinguvulu josojoso ndenge. Kyadyanga, Daniyele wamono yama iwana yamakota. O yama yiyi ilombolola mautuminu atuminine kya o ngongo mu ukulu: Babilonya, Medu-Pelesa, Ngelexa ni Loma. Ilombolola we o utuminu wamutumina o ngongo lelu, Anglo-Americana. (Dan. 7:1-3, 17) Mukusuluka, Daniyele wamono Jihova waxikama ku kyandu kya ungana ku dyulu. (Dan. 7:9, 10) O yamono dingi polofeta Daniyele yatokala kudimuna o jinguvulu ja lelu.

10. Kala kyatange Daniyele 7:13, 14, 27, Jihova ubhana kwa nanyi o ungana wakutumina o ixi? O kiki kilondekesa kima kyahi kyalungu ni Mwene?

¹⁰ Tanga Daniyele 7:13, 14, 27. Nzambi wandatambula ku jinguvulu ja ngongo o kutena ni ungana wala nawu, yu wanda ku ubhana ku athu engi afwamena dingi, ala ni kutena. Wanda ku ubhana kwa nanyi? Wanda ku ubhana ku “mon’a muthu” Jezú Kidistu, ni ku “athu’ê angene a Suke-ku,” o 144.000 andatumina “katé ku hádya ni hádya.” (Dan. 7:18) Sé phata, Jihova mwéne “Suke-ku” mukonda mwene ngó wala ni ungana wakubhanga kiki.

11. Ihi dingi yasoneka Daniyele ilondekesa kuma Jihova wala ni ungana wabetakota, jisobha joso ndenge?

¹¹ Daniyele wambe kiki yalungu ni kisumwa  kyamono: O “Nzambi ya dyulu, . . . mukwa kutulula o jisobha ku ungana mba u a tudika-ku.” Mwene wateku dingi: “ O Sukeku mwene Utumina o mausobha ma athu; u mabhana woso amwandala.” (Dan. 2:19-21; 4:17) O kwila Jihova watulwile kya ni kutudika jisobha? Kidi mwene!

12. Bhana ifika ilondekesa kwila mu ukulu Jihova wakatula jisobha ku kyandu kya ungana.

¹² Jihova walondekesa kyambote kwila mwene sukeku, o “maungana” angongo ndenge. Tumone ifika itatu. Falawó mukwa Ijitu wate ku ubhika o mundu wa Jihova, mu veji javulu mwene waditunu kwa eha mba kwasula. Maji Jihova wa abhulula, yu wa bobesa Falawó mu menya a Kalunga ka Kusuka. (Mak. 14:26-28; Jisá. 136:15) Sobha Belxazale mukwa Babilonya, wabhana fesa yu “wadizangeleka, ka xila o ngana ya dyulu” mwene “wateku dingi o kuximana jinzambi ja phalata, ni ja ulu” mu veji dya kuximana Jihova. (Dan. 5:22, 23) Maji Nzambi watulula o diyala dyodyo, mukwa ukumbu. Mu “usuku wenyo-phe” Belxazale amujibha, o utuminu wê a ubhana ku akwa Medu ni akwa Pelesa. (Dan. 5:28, 30, 31) Sobha Helode Ngilipa Yadyanga, watumu kujibha poxolo Tiyaku yu watumu kuta mu kaleya poxolo Phetele, wamesenene we kumujibha. Maji Jihova kehela Helode kubhanga kala kyakexile mu xinganeka. “O anju ya Jihova ya mu kwama,” yu wafu.— Ika. 12:1-5, 21-23.

13. Tanga musoso umoxi ulondekesa kwila Jihova watolola ibuka ya jinguvulu.

¹³ Jihova walondekesa we o unene wê ku ibuka ya jinguvulu adibundile kumoxi. Mwene wabhângela akwa Izalayele yu wa akwatekesa kubwika 31 a jisobha akwa Kanana, wa akwatekesa phala ene natene kutambula jisengu javulu ku ixi yakanene kubhana ku akwa Izalayele. (Josu. 11:4-6, 20; 12:1, 7, 24) Jihova wakwatekesa we akwa Izalayele kutolola Sobha Benehadade ni 32 a jinguvulu jamukwa akwa Sidya alwile ita ni akwa Izalayele.—1 Jis. 20:1, 26-29.

14-15. (a) Ihi yatange Sobha Nabukodonozolo ni Sobha Ndala yalungu ni ungana wa Jihova? (b) Ihi yatange o mukwa jisálamu yalungu ni Jihova ni mundu Wê?

¹⁴ Mu veji javulu, Jihova walondekesa kwila mwéne Sukeku! Kyoso Sobha Nabukodonozolo mukwa Babilonya kya dizangeleka mukonda dya ‘ungana wê, ni undanda ni  kijingu kyê’ mu veji dya kuxikina kwila Jihova mwéne o Muthu watokala kutambula o fuma, Nzambi wamubhangesa kusaluka. Kyoso Nabukodonozolo kyadisanze, mwene wa “tanesa Suke-ku” yu wamono kwila o “utuminu [wa Jihova] utuminu wa kunangenena.” Mwene wateku dingi: “Kana-ku muthu utena kufudisa lukwaku lwê.” (Dan. 4:30, 33-35) Kyoso Daniyele kyamulola o ufiyele wê, Jihova wamubhulula mu dikungu dya jihoji. Sobha Ndala waxiki o ngonge: “[Athu oso] ende ni kuteketa ni kuxila o Nzambi ya Daniyele. Mbata mwene o Nzambi ya mwenyu u xalela-ku, o utuminu wê kene ku u jima, o ungana wê wa kal’ê katé ku dizubhilu.”—Dan. 6:7-10, 19-22, 26, 27.

¹⁵ O mukwa jisálamu wambe kiki: “Jihova ufudisa o phangu ya akwa jixi; kikutu kya athu mu ngongo u ki sukika.” Mwene wambe dingi: “Ixi yoyo i zediwa, avu Jihova kuma Nzambi yâ; ni mundu woso wa solo mwene, kuma undundu wê.” (Jisá. 33:10, 12) Kiki kima kyambote kitubhangesa kudikwatenena ku ufiyele wetu kwa Jihova!

16. Yalungu ni “hadi yadikota” ihi itwatokala o kudyelela ni mukonda dyahi? (Tala o foto.)

¹⁶ Twazubha kutanga yabhange Jihova mu ukulu. Ihiphe yandabhita ku hádya? Tutena kudyelela kwila mu kithangana kya “hadi yadikota” Jihova wandabhulula o jiselevende jê ja fiyele.” (Mat. 24:21; Dan. 12:1) Mwene wandabhanga kiki kyoso o ifuxi, a ixana Ngongo dya Mangongo kyandakwiza phala kubwika o jiselevende jafiyele ja Jihova mu ngongo yoso. Né mwene se o 193 a jixi atokala ku Nações Unidas akala we mu ifuxi yiyi, ene kandatena kubhânga ni Sukeku ya ngongo yoso ni kifuxi kyê ku dyulu! Jihova wakanena kuma: “Eme nganda kudikudisa anga ngi dikolesa, anga ngi bhangesa kwila a ng’ijiya bhu mesu a miji ya vulu; hé a ka kijiya kwila eme-mwene ngi Ngana.”—Ize. 38:14-16, 23; Jisá. 46:10.

17. Ihi yambe o Bibidya yalungu ni yandabhita ni jisobha joso ja ngongo? Ni ihi yandabhita ni jiselevende jafiyele ja Jihova?

 ¹⁷ O yandabhanga Ngongo dya Mangongo phala kuzukutisa o jiselevende ja Nzambi, yandabhangesa kwila o ita ya sukinaku ya Jihova imateka. Mu ita yiyi ya Alumajedone Jihova wandabwika o “jisobha ja tungu mu ngongo yoso.” (Dij. 16:14, 16; 19:19-21) Maji “athu ambote ene a kà tunga mu ngongo, oso ayuka muxima a kà nangenena mwenyomo.”—Jisa. 2:21.

18. Ihi yene mubhanga o Jikidistá ja kidi, ni mukonda dyahi? (Daniyele 3:28)

¹⁸ Mu jihama ni jihama ja mivu, Jikidistá javulu ja kidi ate o ufolo wâ mu ilwezu katé mwene ni myenyu yâ mukonda dya kuzola Jihova mu kwila mwéne o Nguvulu yâ, mwéne ngó Sukeku. O Jikidistá jiji ene mukolokota mu ufiyele wâ kwa Jihova, amukayela o phangu ya minzangala itatu Jihebelewu, abhuluka ku kijiku kya tubhya. Abhuluka mukonda dya kukala fiyele kwa Sukeku.—Tanga Daniyele 3:28.

19. Jihova wandafundisa o mundu wê mu ima yebhi? Ihi itwatokala o kubhanga kindala kiki?

¹⁹ Davidi, mukwa jisálamu wasoneka yalungu ni ukota wakukala fiyele kwa Nzambi, mwene wasoneka kiki: “Jihova mukwa kufundisa o ifuxi yoso, a dikola kokwé, ngi fundise eme, u Jihova, kala kya tokala mu kulunga kwami, ni mu kidi kyami ki ngala na-kyu moxi.” (Jisá. 7:8) Lwamukwa dingi Davidi wasoneka: “Kuyuka kwami ni kutetuluka ku ngi konde mbandu ni mbandu.” (Jisá. 25:21) O ukexilu wabetakota wakukala ku mwenyu ó kukala fiyele kwa Jihova, nuka twamesena kumubhana dikunda, kiza kikiza! Twandadivwa kala kyadivu mukwa jisálamu, mwene wasoneka kiki: “Azediwa yó oso a yukila kyambote mu njila, mukwenda a kayela o ngonge ya Jihova.”—Jisá. 119:1.