1. Ujitu webhi watubhana Jezú?

 JEZÚ kyoso kyexile mu ixi wene walondekesa o ukexilu wa kubhana, mwene walondekesa o ukexilu yu bhukaxi kamadiwanu mukukwatekesa yo abhindamene. (Luk. 9:​12-17) Mwene watubhana o ujitu wabeta ndingi kota o mwenyu we, seku muthu weji tena kubhanga kiki. (Nzw. 15:13) Mwene wa suluka mukukala ni ukexilu wa kubhana ne mwene kyoso kyamufukununa. Mwene wambele kwila wanda bhinga o nzumbi ikola ya Jihova phala kutulonga ni ku tuswinisa. Kyene mwene kyabhange. (Nzw. 14:​16, 17; 16:13) Bhukaxi ka yonge, Jezú wamusuluka mu kutubhana kikwatekesu phala kubhanga maxibulu ku akwá jixi joso.—Mat. 28:​18-20.

2. Kala kyalondekesa Efezu 4:​7, 8, Jezú wa tubhana anayi kala maujitu?

² Tala o ujitu wamukwa watubhana Jezú. O poxolo Phawulu wa soneka kiki yalungu ni Jezú: “Kyoso mwene kya bande ku dyulu, wajituna jipelezu yu wajibhana mu ilunga kala maujitu.” (Tanga Efezu 4:​7, 8.) Phawulu wa jimbulula kwila Jezú wabhana o maujitu ya, phala kukwatekesa o ilunga mu maukexilu avulu. (Efe. 1:​22, 23; 4:​11-13) Lelu o “maujitu” ya, o akwatekexi a tufunga, o tufunga twa kilunga, ni tufunga twa ilunga. a O mayala ya akwa ituxi we mukonda dya kiki atena we kulweza. (Tiy. 3:2) Ne kiki ngana yetu Jezú Kidistu wene mutukwatekesa bhukaxi ka mayala yá. Ene maujitu atubhana Jezú.

3. Kyebhi kitutena kukwatekesa o mayala a tukala kupholo?

 ³ Jezú wa solo o mayala ya phala kukolesa o kilunga. (Efe. 4:12) Kala muthu mudyetu watokala kubhanga nguzu phala kukwatekesa o mayala ya kukumbidila kyambote o kikalakalu kya abhana Jezú. Phala kutukwatekesa kutendela, xinganeka ku maka ya: Kyoso kyamutunga o kididi kya ubhezelu sayi jiphange o kikalakalu kya o kutunga. O jiphange ja kamukwa akwatekesa mu kulamba o kudya, kusumba, o imbamba a bhindamena , a kamukwa hanji a kwatekesa o kwambata o jiphange mukididi mwamutunga. Kala kyabhanga yo akwatekesa o jiphange a kwatekesa yo a mutunga, etu we tukwatekesa o akwatekexi a tufunga, o tufunga twakilunga ni tufunga twa ilunga. Kindala twanda mona kyebhi o jiphange jiji kya tukwatekesa ni kyebhi kitutena kwasakidila ni kusakidila we Jezú, mu kutubhana o mayala ya.

O AKWATEKEXI A TUFUNGA AKWATEKESA O KILUNGA

4. Ikalakalu yebhi yexile mubhanga o akwatekexi a tufunga mu izuwa ya jipoxolo?

⁴ Mu izuwa ya jipoxolo sayi jiphange exile mukwatekesa o tufunga mu ilunga. (1 Ti. 3:8) Mu 1 Kolindu 12:28 poxolo Phawulu wa zwela yalungu ni “kukwatekesa yó a bhindama”. Nange mwene wexile muzwela yalungu ni akwatekexi a tufunga. Kiki kilondekesa kwila ene exile mubhanga ikalakalu yengi. Nange ene exile musoneka o jikopya ya mikanda ikôla, ni kusumba ima ya mukwa yeji kwatekesa mu kikalakalu kiki. Kiki kyakwatekesa o tufunga kukala dingi ni kithangana kya kuswinisa o jiphange ni kuboka o njimbu yambote.

5. Ikalakalu yebhi yene mubhanga o akwatekexi a tufunga?

⁵ Xinganeka mu ikalakalu yene mubhanga o akwatekexi a tufunga mu kilunga kye. (1 Ph. 4:10) Ene, ene mulanga o kitadi, o jimbambe ja kilunga, ene abhinga ku filiyale o madivulu abhindamena o kilunga, kyoso kyabhixila o madivulu ene a awanuna ku jiphange. A mukwa mu yonge akalakala mu iselekete, a kamukwa akalakala kala alondekexi, ni kutungulula o ididi ya ubhezelu. O ikalakalu yoso yiyi atokala ku ibhanga, phala o ima mukilunga yende mu ukexilu watokala ni kuyuka kwoso. (1 Ko. 14:40) Ku mbandu ya kamukwa o akwatekexi ya tufunga ene mu bhanga jimbandu mu yonge ya kaxi ka semana ni kubhana madiskulusu ku disukilu dya semana. O mukwatekexi wa tufunga a tena kumusola phala kukwatekesa o kafunga mukulanga kibuka kimoxi kya sidivisu ya kuboka. O akwatekexi a mukwa ene muya kumoxi ni tufunga kukunda o jiphange.

6. Mukonda dyahi twatokala kubhana valolo mu ikalakalu yene mubhanga o akwatekexi a tufunga?

⁶ Tala yene muzwela o athu yalungu ni ikalakalu yene mubhanga o akwatekexi ya tufunga mu kilunga. Phange ya muhatu a mwixana Manda, b watungu mu ixi ya Bolívia. wambe: “Eme ngene mukatula mbote yavulu mu yonge mukonda dya ikalakalu yene mubhanga o akwatekexi ya tufunga. O ima yene mu bhanga ene yene mungikwatekesa kwimba, ni kubhana itabhwijilu mu yonge, kwivwa madiskulusu, ni kudilonga ima yavulu ku jividyu, ni jifoto jene mulondekesa mukithangana kya kyonge. Ene alanga o kididi kya ubhezelu, ni kukwatekesa o jiphange atala o kyonge bhukaxi kanete. Kyoso kibhwa o kyonge, ene amateka kuxixila o kididi kya ubhezelu, ni kulanga o kitadi ni kutubhana o madivulu itwabhindamena. Ngisakidila kyavulu o ima yene mubhanga ene!” Mana Lesli, muhatu wa kafunga watungu mu ixi ya Colômbia, mwene wambe: “Mwadi wami ene mu mukwatekesa kyavulu ku akwatekexi a tufunga, se kamukwatekesele mwene weji kala ni ikalakalu yavulu phala kubhanga. Mukonda dya kiki ngene mwasakidila kyavulu mukikwatekesu kya.”  Etwenyoso tusakidila we o ikalakalu yene mubhanga o akwatekexi a tufunga a kilunga kyetu.—1 Ti. 3:13.

7. Kyebhi kitutena kusakidila o ikalakalu ya akwatekexi a tufunga? (Tala we ofoto.)

⁷ Kitwatokala ngo kumona o ima ya mubhanga o akwatekexi a tufunga maji twatokala kubhanga yamba o Bibidya: “Sakidilenu  jinga.” (Kol. 3:15) Phange Karlu, kafunga watungu ku ixi ya Finlândia, wa jimbulula se kyebhi kyene musakidila: “Ngene musoneka kamukanda mba ngitumikisa Jimbu mwala velusu ya Bibidya ngimutangela kyebhi mwene kyangikwatekesa ni kwila ngibhana valolo yavulu mu kikalakalu kyê.” Phange Pascal ni Jael atungu mu ixi ya Nova Caledônia, Ene, ene mutumbula we o akwatekexi ya tufunga ku misambu ya. Phange Pascal wambe: “Twene musamba kwa Jihova mu, kumudyonda ni kusakidila o akwatekexi a tufunga ya kilunga kyetu.” Jihova, wene mutambwijila o misambu yetu, mu kiki o jiphange mukilunga ene mukatula mbote.—2 Ko. 1:11.

O TUFUNGA “A KALAKALA KYAVULU”

8. Mukonda dyahi poxolo Phawulu wa soneka kwila o tufunga akalakala kyavulu? (1 Tesalonika 5:​12, 13)

⁸ Mu izuwa ya jipoxolo o tufunga exile mukalakala kyavulu phala kukwatekesa o kilunga. (Tanga 1 Tesalonika 5:​12, 13; 1 Tim. 5:17) Ene exile mosokejeka o yonge, kumoxi ni tufunga twengi exile mubatula o maka. Ene we exile ‘mudimuna’ o jiphange ja mala ni ja ahatu ni henda yoso phala kulanga o kilunga.” (1 Te. 2:​11, 12; 2 Ti. 4:2) Ku mbandu yengi ene atokalele kukalakala phala kudikila o miji ya ni kukolesa o kixikanu kya ni ukamba kwa Jihova.—1 Ti. 3:​2, 4; Tit. 1:​6-9.

9. Ima yebhi yene mubhanga o tufunga?

⁹ Lelu o tufunga akalakala kyavulu, ene akunji. (2 Ti. 4:5) O tufunga atubhana phangu yambote mu sidivisu ya kuboka. Ene a sokejeka o mbambe yetu ya sidivisu ya kuboka. Ene we atulonga kukala alongexi ambote a Bibidya ni kukituka we tu aboki. O tufunga akalakala ni henda yoso kala afundixi. Kyoso o muthu kya ta kituxi kyadikota o tufunga amukwatekesa kukala dingi ni ukamba wambote ni Jihova. Ene abhanga we yoso phala kuzelesa o kilunga. (1 Ko. 5:​12, 13; Nga. 6:1) A ejiya we kala abhidi ahenda. (1 Ph. 5:​1-3) Ene a sokejeka kyambote o madiskulusu ya bhukaxi ka Bibidya. Ene wa abhanga nguzu phala kwijiya o jiphange joso mu kilunga ni kwakunda ku mabhata ma. Sayi tufunga akwatekesa o ikalakalu ya kutunga ni kutunglula o ididi ya ubhezelu, kusokejeka o yonge ya makota ni yonge ya ilunga, amoxi hanji a kalakala mu Kibuka Kikwatekesa o Jiphange mu Jinzo Jakusaka, Kibuka kya Kukunda o Jihaxi, ni ikalakalu ya mukwa dingi. Se phata, o tufunga akalakala kyavulu!

10. Mukonda dyahi twatokala kubhana valolo mu ikalakalu ya bhanga o tufunga?

¹⁰ Jihova wakanena ku mundu we kwila weji kwabhana abhidi eji kwalanga kyambote kyenyiki “jene ki mungu dingi já kala ni woma, mba jiya ni kusasumuka’’. (Jel. 23:4) Phange ya muhatu amwixana Johanna wa tungu mu ixi ya Finlândia, wa mono o kikumbidilu ya izuwelu yiyi kyoso manya wa kwatele uhaxi wa bhonzo. Mwene wambe: “Kingawabhela kuzuwela kyavulu ni athu o ibhidi yami, maji sayi kafunga wangibhana matwi kyoso ki ngamutangela o ibhidi yami, wa sambe neme yu wa ngilondekesa kwila Jihova wa ngizolo kyavulu. Eme kingilembalala o ima ya zwelele mwene maji ngilembalala kwila ngexile ni kutululuka ku muxima. Se phata Jihova wamutumikisa mu kithangana ki ngabhitamene.” O kwila watambwile kya kikwatekesu kya tufunga kya kilunga kye?

11. Kyebhi kitutena kusakidila o tufunga? (Tala we ofoto.)

¹¹ Jihova usanguluka kyavulu kyoso ki tusakidila o tufunga ni muxima woso “mukonda dya kikalakalu kyâ.” (1 Te. 5:​12, 13) Phange Henrietta watungu mu ixi ya Finlândia wambe: “O tufunga  ala polondo phala kukwatekesa, maji kiki ki kilombolola kwila ene kamudibhana ni ibhdi. Sayi bhabha ngizwela ku kafunga kwila mwene kafunga kambote.” Phange ya muhatu amwixana Sara watungu mu ixi ya Turquia, wambe: “O tufunga abhindamena we kiswinisu phala asuluke mu kubhanga o ikalakalu ya. Tutena kwabhana kiswinisu mu kwasonekena tumikanda twa kisakidilu, ni kwa exana ku mabhata metu phala kudya, mba kuboka nawu.” Xinganeka mu kafunga wene mukalakala kyavulu phala kukwatekesa o kilunga wamesena kumusakidila. O kwila wamono maukexilu wakusakidila o tufunga?—1 Ko. 16:18.

O TUFUNGA TWA ILUNGA A KOLESA O ILUNGA

12. Jezú wasolele ananyi phala kuswinisa o ilunga mu izuwa ya jipoxolo? (1 Tesalonika 2:​7, 8)

¹² O mayala a solo kwa Jezú phala kukolesa o kilunga, amukwa akwatekesa o kilunga mu ukexilu wengi. Mwene wabhana ujitu kwa tufunga mu Jeluzaleme pha kusola Phawulu ni Balanabé phala kukala tufunga twa ilunga. (Ika. 11:22) Mukonda dyahi? Kala o akwatekexi a tufunga, o tufunga twa kilunga ni tufunga twa ilunga, aswinisa ni kukolesa o ilunga. (Ika. 15:​40, 41) O mayala ya axisa ima yavulu kudima kate mwene ene muta o myenyu yâ mu kilwezu phala kulonga ni kuswinisa akwa.—Tanga 1 Tesalonika 2:​7, 8.

13. Ikalakalu yebhi yene mubhanga o tufunga twa ilunga?

¹³ O tufunga twa ilunga ene mu kwenda njila ya makanga phala kukunda o ilunga. Mu jisemana joso o tufunga twa ilunga abhanga madiskulusu, akunda o jiphange ku mabhata ma, abhanga yonge ni aboki a thembo yoso, abhanga kyonge ni tufunga, ni yonge phala o sidivisu ya kuboka, ene asokejeka madiskulusu, ni kusokejeka yonge ya ilunga ni yonge yamakota. Mu mivu yoso akala alongexi a xikola ya aboki a thembu yoso ni kubhanga yonge ni aboki athembu  yoso ya ilunga yoso. Ku mbandu yengi sayi dingi ikalakalu yene mu bhanga ene.

14. Mukonda dyahi o tufunga twa ilunga mabesa phala o jiphange?

¹⁴ Mukonda dyahi o tufunga twa ilunga mabesa phala o ilunga? Sayi phange watungu mu ixi ya Turquia, wambe kiki yalungu ni kikalakalu kya tufunga twa ilunga: “Kyoso kyatukunda ngi kala dingi ni vondadi ya kukwatekesa o jiphange mu kilunga. Eme ngejiya tufunga twavulu twa ilunga enyoso ene mukatula kithangana phala kudizwelesa ni jiphange.” Mana Johanna, twamutumbula kudima, waboko ni kafunga ka ilunga ene katena kuzwela ne ngo ni muthu umoxi, mwene wambe: “Maji ne kiki eme nuka ngajimbi o kizuwa kyokyo, phange jami jiyadi ayile mutunga kididi kyengi, eme ngakexile ni ngunzu yavulu. O kafunga ka ilunga wa ngi swinisa yu wangikwatekesa kumona kwila kwa kambe ngo o ima yiyi yanda bhita. Lelu ngatungu ubheka, maji ku mundu wa ubhe nganda kala kumoxi ni mwiji wami woso, ni makamba mami kate ku hádya ni hádya.” Kiki kilondekesa kwila o tufunga twa ilunga mabesa phala o jiphange.—Ika. 20:37–21:1.

15. (a) Kala kyamba o mukanda wa 3 Nzwá 5-8, kyebhi ki tutena kusakidila o tufunga twa ilunga? (Tala we ofoto.) (b) Mukonda dyahi twatokala kubhana valolo ku ahatu a mayala ala ku pholu mu kilunga? kyebhi ki tutena kubhanga kiki? (Tala o kaxa “ Londekesa kisakidilu ku ahatu a mayala ala ku pholo mu kilunga.”)

¹⁵ Mu hama ya dyanga kwexile phange amwixanene Ngayu. Sayi kizuwa poxolo Nzwá wamuswinisa kuzalela o jiphange exile mu kunda o ilunga. Poxolo Nzwá wasoneka: “bhanga yoso phala kwakwatekesa mu ukexilu usangulukisa Nzambi.” (Tanga 3 Nzwá 5-8.) Kyebhi ki tutena kubhanga kiki? Tutena kubhanga kiki mukwazalela, kutunda nawu mu sidivisu ya kuboka, kyoso kya mu tukunda. Phange Lesli twamutumbula kudima, ulondekesa o kisakidilu kye ku tufunga twa ilunga mu maukexilu engi, mwene wambe: “Eme ngisamba phala Jihova  kudikila o ibhindamu ya. Eme ni mwadi wami twasonekene kya mikanda phala kusakidila o kikalakalu kyene mubhanga ni kyebhi kyene mu tukwatekesa.” Lembalala kwila ene we akwa ituxi, sayi ithangana ene mu dibhana ni mauhaxi, hele, mba kuluwala. Jihova utena ku tambwijila o misambu ya tufunga twa ilunga bhu kaxi ketu, kyoso ki twatangela izwelu ya henda mba kyoso ki twabhana maujitu!—Jisa. 12:25.

TWABHINDAMENA DINGI “MAYALA”

16. Mu kuxinganeka mu izwelu itusanga mu Jisabhu 3:​27, ibhwidisu yebhi yatokala kudibhanga o mayala mu kilunga?

¹⁶ Mu ngongo yoso, o ilunga yala ni ibhindamu ya mayala phala kutwamenena o ikalakalu mu ilunga. Se u phange ya diyala akubatizala kya, o kwila wene muxinganeka mu maka ya? (Tanga Jisabhu 3:27.) O kwila wamubhanga nguzu phala kukala mukwatekexi wa tufunga? Se u mukwatekexi wa tufunga, o kwila wamubhanga nguzu phala kukala kafunga? c O kwila utena kusosolola o ima kumwenyu phala kubhanga o Xikola ya Ukunji wa Utuminu? O xikola yiyi yanda kulonga ni ku kukwatekesa mu kubhanga dingi mu sidivisu ya Jihova. Se wamubhanza kwila kiwala ni uhete ya kubhanga o ikalakalu yiyi, samba wa Jihova, mubhinge o nzumbi ikola phala ukukwatekese kubhanga o kikalakalu kyoso-kyoso iwanda tambula.—Luk. 11:13; Ika. 20:28.

17. Ihi yene mubhanga o Sobha yetu Jezú Kidistu?

¹⁷ Jezú wamulondekesa kwila wamutulanga mu izuwa yiyi ya sukidilaku bhu kaxi ka jiphange jamala mu kilunga. (Mat. 28:20) Twala ni Sobha yetu ya henda mukwa kubhana, watubhana jiphange akulu mu nzumbi phala kutudikila mu nzumbi. Kyoso ki uxinganeka mu ima yiyi eye u sakidila kyavulu, ki kyene? Mu kiki sota maukexilu akulondekesa kwila eye ubhana valolo mu nguzu yene mubhanga o mayala ya. Kana kujimba kusakidila Jihova mu kutubhana o maujitu ya.—Tiy. 1:17.