O MWIMBU wexile ni valolo yavulu phala akwa Izalayele. O Bibidya itumbula mu jiveji javulu athu exile muxika mimbu. Mu Bibidya sayi jimbandu javulu jizwela yalungu ni mimbu. Mu kifika o divulu dya Jisálamu, Mukumbi wa Mikumbi, ni Kuditenda. Sayi divulu dyokulu, dilondekesa kwila o akwa Izalayele exile mubhana valolo yavulu ku mimbu.

O mimbu mu kizuwa ni kizuwa. O akwa Izalayele exile mu xika mwimbu phala kulondekesa kyebhi kyexile mu diwva. (Iza. 30:29) O ahatu exile muxika iselekete, ni kwimba mwimbu isangulukisa o mixima, ni kukina mu jifesa. Mu kifika kyoso kyexile mu bhana o ungana ku jisobha, kyoso o masoladi kyexile mu tolola o jinguma jâ mu ita ni kyoso kyexile mu bhanga o jifesa phala o ubhezelu. (Afun. 11:34; 1 Sam. 18:​6, 7; 1 Jis. 1:​39, 40) O akwa Izalayele exile mu kwimba phala kukonda o malamba kyoso kyexile mu funda ndandu mba kamba dya kazola. (2 Mal. 35:25) Sayi divulu dyamba kiki: “Se phata o Jihebelewu exile athu awabhele kyavulu o mwimbu.”

Mwimbu mu jinzo ja jisobha. O jisobha akwa Izalayele awabhele we kyavulu o mwimbu. Mu kifika sobha Sawulu wabheka Davidi ku sabhalalu ye phala kuxika mwimbu phala ku mubatamesa o muxima. (1 Sam. 16:​18, 23) Ku pholo dya kwenda kyoso Davidi kya kituka sobha, mwene wasokejeka mayala phala kwimba mimbu mu tembulu ya Jihova. (2 Mal. 7:6; Amo. 6:5) Mu inzo ya sobha Solomá mwexile mala ni ahatu exile mu kwimba mimbu.—Ndo. 2:8.

Mwimbu mu ubhezelu. Kyabeta-kota, mu ubhezelu wâ kwa Jihova, o akwa Izalayele exile mu kwimba. Mu tembulu mu Jeluzaleme, mwexile 4.000 jamayala exile muxika jingoma ja ngondo, tukoxi, jimbanza ni jikoloneta. (1 Mal. 23:5; 2 Mal. 5:12) Maji o mayala yá kene ngo exile mu kwimba mu kubheza Jihova. Avulu ku akwa Izalayele, kyoso kyexile muya mu tembulu mu Jeluzaleme, exile mu kwimba o mimbu yala mu Jisálamu 120 ndu 134. Sayi madivulu a Jijudé amba kwila, mu fesa ya Phasu o akwa Izalayele exile mu kwimba Jisálamu. a

Katé lelu, o jiselevende ja Nzambi abhana valolo yavulu ku mimbu. (Tiy. 5:13) Twimbila Jihova phala kumuximana. (Efe. 5:19) Kyoso kitwimbila Jihova kumoxi ni jiphange jetu, tuswina. (Kol. 3:16) O mimbu yetu itukwatekesa we kukolokota mu ibhidi. (Ika. 16:25) O kyabeta-kota, kyoso kitwimba tulondekesa kwila twala ni kixikanu kwa Jihova ni kwila twamuzolo.