1. Mu Jisálamu 18:46 Davidi wasokesa Jihova ni ihi?

 SAYI ithangana tutena kudibhana ni ibhidi itena kubhonzesa o mwenyu wetu mba kulungulula o ima ku mwenyu wetu. Etu twasanguluka kyavulu mukonda tutena kubhinga o kikwatekesu kya Jihova Nzambi! Mu milongi yatundumu, twadilongo kwila Jihova Nzambi ya mwenyu, mwene wala jinga polondo phala kutukwateksa. Kyoso kitutambula o kikwatekesu kye tudyelela kwila “Jihova wala kumwenyu!” (Tanga Jisálamu 18:46.) Kyoso kyazubha kuzwela o ima yiyi, Davidi wexana Nzambi kala “ndánji yami.” Maji kyoso kyazubha kuzwela kwila Nzambi wala ku mwenyu, Davidi wasokesa Nzambi ni kima kikyala ni mwenyu, Davidi wexana Nzambi kala “ndánji yami.” Kiki kilombolola ihi?

2. Ihi itwanda dilonga ni izwelu ya Davidi ya kwila Jihova ndánji yami?

² Mu milongi yiyi, twanda dilonga se mukonda dyahi Jihova amwixana kala ndánji, ni ihi ilombolola o kizwelu kiki. Twanda dilonga we se kyebhi kitutena kudyelela kwa mwene kala ndánji yetu. Kudisukilu, twanda mona se kyebhi kitutena kukayela o idifwa ya Jihova.

MUKONDA DYAHI JIHOVA NDÁNJI?

3. Kyebhi o Bibidya kyene musokesa o kizwelu ndánji? (Tala ofoto yakapa.)

³ O Bibidya isokesa Jihova ni “ndánji” phala kutukwatekesa kutendela o idifwa yé. Mu ithangana yavulu o jiselevende ja Jihova kyoso kya bhana kijingu kwa Nzambi mukonda dya idifwa yê, ene amujimbulula mu Bibidya kala ndánji. O divulu dya Matendelelu  32:4 dyene dya dyanga kutumbula Jihova kala “ndánji”. Mu musambu Ana wambe kwila “kana-ku ndanji yadisokela ni Nzambi yetu.” (1 Sam. 2:2) Habakuke wexana Jihova kala “ndánji” yami. (Haba. 1:12) O musoneki wa Jisálamu 73 wexana Nzambi kala ndánji ya muxima wê. (Jisá. 73, 26) Kate mwene Jihova waditumbula kala ndánji. (Iza. 44:8) Tumone idifwa itatu ibhangesa Jihova kudifwa ni ndánji ni kudilonga se kyebhi kitutena kumubhangesa kukala ndánji yetu.—Mate. 32:31.

4. Kyebhi Jihova ndánji mba ditadi dyonene? (Jisálamu 94:22)

⁴ Jihova utulanga mu ithangana ya bhonzo. Mu kithangana kya kitembwe kya dikota, o muthu utena kusanga kilangidilu ku ndánji mba ditadi dyonene. Kyene we kimoxi ni Jihova mwene utulanga mu ithangana yabhonzo ku mwenyu wetu. (Tanga Jisálamu 94:22.) Mwene utukwatekesa kulanga o ukamba wetu ni mwene, utudyelelesa we kwila o hadi itwamutala kindala kiyanda nangenena. Mwene we utukanena kwila ku hadya wanda zubha o ima yoso itubhekela o hele mba o hadi.—Ize. 34:​25, 26.

5. Kyebhi Jihova kya kituka ndánji yetu?

⁵ Tubhanga Jihova kala Dilengelu dyetu kyoso ki tusamba kwa mwene. Kyoso ki tusamba, Jihova utubhana o “kutululuka” kwê kulanga o mixima yetu ni ilunji. (Fil. 4:​6, 7) Tumone o kifika kya phange Artem amutele mu kaleya mukonda dya kixikanu kyê. Kyoso kyexile mu kaleya, sayi mufundixi wamubhangele ibhwidisu yavulu mu veji javulu, wamutalatala kyayibha, wamukwatesa we woma. Phange Artem wambe “Ngasambe kwa Jihova phala kungibhana kutululuka kwa muxima ni unjimu. Sumbala ni izukutisu yiyi, eme ngasuluka ni kutululuka. Ni kikwatekesu kya Jihova kyedile kala ngexile kudima dya mulundu wa matadi.”

6. Mukonda dyahi twatokala kudyelela jinga kwa Jihova? (Izaya 26:​3, 4)

⁶ Jihova fiyele, nuka wanda tuxisa. Kala o ndánji mba o mulundu ki wene mutunda bhu kididi kyê, twejiya kwila Jihova wala polondo phala kutukwatekesa. Tutena kumudyelela mukonda mwene “ndanji i nangenena.” (Tanga Izaya 26:​3, 4.) Mwene wene ku mwenyu phala kukumbidila o ikanenu yê, kwivwa o misambu yetu ni kutubhana o kikwatekesu ki twabhindamena. Tutena we kudyelela kwa Jihova mukonda mwene udikisa henda kwa yo umusidivila. (2 Sam. 22:26) Mwene nuka wanda jimba yoso itwene mubhanga ni kwila wanda tufuta.—Jih. 6:10; 11:6.

7. lhi itwanda bhanga se tudyelela kwa Jihova ni muxima woso? (Tala we ofoto.)

⁷ Tubhanga Jihova kala dilengelu dyetu kyoso ki tumudyelela ni muxima woso.Twadyelela kwila se tumubelesela ne mwene mu ithangana yabhonzo twanda ditunda kyambote. (Iza. 48:​17, 18) Kyoso kituya ni kumona o kikwatekesu kyê ku mwenyu wetu, o kidyelelu kyetu kwa mwene kyanda dibandekesa dingi. Twanda dyelela ni kidi kyoso kwila kabasa ibhidi itudibhana nayu Jihova wanda tukwatekesa.  Mu ithangana yabhonzo itumona kwila seku muthu phala kutukwatekesa, tudyelela kwila Jihova wanda kala netu. Phange Vladimir wambe: “O izuwa ingabhiti mu kaleya kyexile o kithangana ki ngakolesa dingi o ukamba wami ni Jihova. Nga dilongo kudyelela dingi kwa Jihova mukonda, ngexile ubheka ni kwila kingejidile se ilhi yejibhita n’eme.”

8. (a) Mukonda dyahi twamba kwila Jihova kalunguluka? (b) Mbote yebhi itukatula mukubhanga Jihova kala dilengelu dyetu? (Jisálamu 62:​6, 7)

⁸ Jihova kalunguluka. O idifwa yê ni ikanenu yê nuka yanda lunguluka. (Mal. 3:6) Kyoso Adá ni Eva kya mubhukumukina Jihova kalungulula o vondadi yê ya lungu ni athu. Poxolo Phawulu wasoneka kwila Jihova “katena kudituna mudyê mwene.” (2 Ti. 2:13) Jihova nuka wanda lungulula o ukexilu wê, o vondadi yê mba o itumu yê. Kuma Jihova nuka wanda lunguluka, twejiya kwila wanda tukwatekesa mu ithangana ya bhonzo ni kukumbidila o ikanenu yê yalungu ni hadya.—Tanga Jisálamu 62:​6, 7.

9. Ihi itwadilongo ku phangu ya phange Tatyana?

⁹ Se tuxinganeka mu idifwa ya Jihova ni ku ikanenu yê yalungu ni ixi ni athu, kiki kyanda tukwatekesa kudyelela kwa mwene mu kumubhanga kala ndánji yetu. Kiki kyanda tukwatekesa kukolokota ni kutululuka ni ufiyele kwa mwene mu kithangana kya izukutisu. (Jisá. 16:8) Kiki kyabhiti ni phange ya muhatu amwixana Tatyana wexile mu kaleya ku bhata dyê. Mwene wambe: “Ngexile ubheka wami, o kiki kya ngibhonzele kyavulu. Ngaluwalele kyavulu.” Mu kiki mwene wamateka kuxinganeka mu idifwa ya Jihova ni ku kikanenu kyê kyalungu ni athu, mwene watendela se mukonda dyahi watokalele kukolokota mu izukutisu yiyi. Kiki kyamukwatekesa kutululuka ni kukala ni nguzu ni kusuluka mu ufiyele wê. Mwene wambe dingi: “Kutendela se mukonda dyahi o ima yiyi yexile mubhita, kya ngikwatekesa kulembalala kwila ngala bhu kididi kiki mukonda dya Jihova. Kiki kyangikwatekesa kulembwa kudixinganeka ngo mudyami.”

10. Kyebhi Jihova kyatena kukala ndánji yetu mu kindala kiki?

¹⁰ Mu izuwa ku pholo kwanda bhita ima yanda tubhangesa kudyelela dingi kwa Jihova m’ukulu ndenge. Kindala kyene o kithangana phala kukolesa o kidyelelu kyetu kwa mwene, mu kwila wanda tubhana yoso itwanda bhindamena phala kukolokota. Kyebhi kitutena kubhanga kiki? Tanga misoso ya Bibidya ni jiphangu ja Jimbangi ja Jihova. Tala kyebhi Jihova kyene mukwatekesa o jiselevende jê. Xinganeka kyambote mu misoso yâ. Kubhanga kiki kwanda kukwatekesa kubhanga Jihova kala ndánji yé.

KAYELA O IDIFWA YA JIHOVA

11. Mukonda dyahi twatokala kukayela o idifwa ja Jihova? (Tala we o kaxa “ Jimbambe Phala o Minzangala ya Mala.”)

¹¹ Twene mumona o idifwa ya Jihova kala ndánji. Kindala tumone se kyebhi ki tutena kukayela o idifwa yê. O kima kitutena kubhanga  o kukala polondo phala kuswinisa o jiphange jetu mu kilunga. Mu kifika Jezú wabhana kwa Ximá o dijina dya Sefa (dilombolola “Phetele”), dilombolola “mbandu ya ditadi.” (Nzwá 1:42) Jezú wambe kwila Phetele weji tena kuswinisa o jiphange mu kilunga ni kukolesa o kixikanu kyâ. Mu kilunga o tufunga a ajimbulula kala “kilembeketa kya ditadi dyonéne.” Kiki kilombolola kwila ene alangidila o kilunga kyoso. (Iza. 32:2) Kidi kwila o kilunga kyoso kikatula mbote se oso akayela o difwa ja Jihova.—Efe. 5:1.

12. Kyebhi ki tutena kulondekesa henda ku akwetu mu ithangana yabhonzo?

¹² Kala u dilengelu. Se o jiphange jetu axisa o jinzo jâ mukonda dya ita mba jabudika mukonda dya mavuwa, twatokala kwazalela. Twatokala kubhana o ima yabhindamena o jiphange jetu. (2 Ti. 3:1) Tutena we kubhana ku jiphange jetu o kiximbakatesu ni henda yabhindamena. Kudizwelesa nawu kyoso kyeza mu yonge ni kwaswinisa, twamesena kwila o kilunga kikala kididi kya kutululuka bhu tusanga o kiswinisu. Athu avulu lelu aditalatala ni undanda, kiki kitena kubhangesa o jiphange jetu kukala ni hele ni kudivwa kwila ka azolo. Mu kiki kyoso o jiphange jetu kyeza mu yonge, twatokala kubhanga yoso itutena phala ene a mone kwila twazolo ni kwila ala bhu kididi kya kondama.

13. Kyebhi o tufunga kyatena kukala dilengelu phala o jiphange mu kilunga? (Tala we ofoto.)

¹³ O tufunga atena kuximbakatesa o jiphange amudibhana ni izukutisu. Kyoso kibhita o mavuwa mba mawuhaxi, o tufunga ni lusolo lwoso abhana o kikwatekesu kyabhindamena o jiphange. Ene abhana we o kikwatekesu mu nzumbi. O jiphange anda divwa kyambote mu kubhinga kikwatekesu ku tufunga se o tufunga a ejiya kala athu azwela ni kilendu, abhana matwi ni kusota kutendela se kyebhi ene kyamudivwa. O idifwa yiyi itena kulondekesa ku jiphange jetu  kwila a azolo, kyenyiki ki kyanda bhonza o muthu kuxikina o kiswinisu kya mubhana o kafunga bhu kaxi ka Bibidya.—1 Te. 2:​7, 8, 11.

14. Kyebhi ki tutena kulondekesa kwila akwetu atena ku tudyelela?

¹⁴ Londekesa kwila akwenu atena ku kudyelela. Twamesena kwila o athu ejiya kuma twala polondo phala kwakwatekesa kyoso kyabhindamena kikwatekesu benge-benge mu ithangana yabhonzo. (Jisa. 17:17) Ihi i utena kubhanga phala o athu akudyelele? Tubhanga yoso itutena mu kukayela o phangu ya Jihova izuwa yoso mu kukumbidila itwa kanena ni kubhixila mu ola i twaxindi. (Mat. 5:37) Tutena we kwabhana kikwatekesu kyoso kya kibhindamena. Mu kusukaku twanda dyelela kwila twabhange yoso i twatena mu kukayela o itendelesu itwatambula mu kilunga.

15. Kyebhi o kilunga kikatula mbote kyoso kyadyelela ku tufunga?

¹⁵ Kyebhi o kilunga kyakatula mbote kyoso kidyelela ku tufunga? Kyoso o jiphange kyejiya kwila atena kuxindila ku tufunga kyoso kyabhindamena kikwatekesu, kiki kikwatekesa o jiphange  kusosolola o hele yâ. O jiphange we adivwa kwila a azolo mu kumona kwila o tufunga ala polondo phala kwakwatekesa. Kyoso o tufunga kyabhana o itendelesu bhukaxi ka Bibidya ni bhukaxi ka madivulu metu kana mu ibanzelu yâ, o jiphange anda kwadyelela dingi. O jiphange adyelela we ku tufunga kyoso kyakamba o kutangela ku athu engi o maka azwela ni phange, ni kwila akumbidila yoso yakanena kubhanga.

16. Kyebhi etwenyoso ki tutena kukatula mbote mu ima yamba Jihova kwila ya kidi?

¹⁶ Bhanga jinga o ima yamba Jihova kwila ya kidi. Se tubelesela Jihova mu ima yoso ni kubatula o maka bhukaxi ka Bibidya, twanda kala phangu yambote phala akwetu. Kyoso kituya ni kukolesa o kixikanu kyetu ni kwijiya kwetu twanda kula dingi mu nzumbi. Twejiya o milongi ya makutu ni ixinganeku ki yalungu ni ixinganeku ya Jihova ni kwila kitwene mu kwehela kwila itufwinyisa. (Efe. 4:14; Tiy. 1:​6-8) O kixikanu kyetu kwa Jihova ni mu ikanenu ye yanda tukwatekesa kutululuka kyoso kitutambula njimbu yayibha. (Jisá. 112:​7, 8) Tutena we kukwatekesa yo amudibhana ni izukutisu.—1 Te. 3:​2, 3.

17. Ihi itena kukwatekesa o tufunga kukala phangu yambote?

¹⁷ O tufunga atokala kulanga kyambote o wendelu wâ, kuzalela o asonyi, kukala akwa kilunji, maji ki akwa kavwanza. O mayala enya akwa kutululuka, akolesa o kilunga mu kudikwatekena kyambote mu “maka a fiyele.” (Tit. 1:9; 1 Ti. 3:​1-3) Bhukaxi ka phangu yâ ni mu kukunda o jiphange, o tufunga aswinisa o jiphange phala kukala mu yonge, kuboka jinga ni kudilonga ubheka. Kyoso o jiphange kya mudibhana ni maka a abhekela hele, o tufunga a alembalesa kwila atokala kudyelela kwa Jihova ni kudikwatenena mu ikanenu yê.

18. Mukonda dyahi twatokala kuzukama kwa Nzambi ni ku muximana? (Tanga we okaxa “ Ukexilu Wakuzukama Dingi Kwa Jihova.”)

¹⁸ Kuma twazubha kudilonga o idifwa ya Jihova tutena kuzwela kala kya zwela Sobha Davidi: “Atane-ku! Jihova ditadi dyami!” (Jisá. 144:1) Tutena kudyelela kwa Jihova wanda tukwatekesa ku muzukama dingi. Ku mwenyu wetu woso, katé mu ukukilu wetu, tuzwele kwila “mwene ditadi dyami.”—Jisá. 92:​14, 15.