1. Ihi yene mu kwatekesa o mundu wa Jihova kusuluka mu kumubheza sumbala ni ibhidi yene mudibhana nayu?

 O BIBIDYA izwela kwila—etu twala mu ‘ithangana yabhonzo kudibhana nayu.’ (2 Ti. 3:1) Katuku o ibhidi yene mudibhana nayu athu oso ku mundu yu wayibha, o mundu wa Jihova wene mudibhana ni ifidisu ni zukutisu. Ihi yene mu tukwatekesa kusuluka mu kubheza Jihova sumbala ni ibhidi yiyi? O kima kyabeta dingi kota mu kutwatekesa, o kwijiya Jihova kala “o Nzambi ya mwenyu.”—Jel. 10:10; 2 Ti. 1:12.

2. Ihi itwejiya yalungu ni Jihova itena kutubhana nguzu phala kukolokota?

² Jihova umona o ibhidi yoso itwene mudibhana nayu, yu wamesena kutukwatekesa. (2 Mal. 16:9; Jisá. 23:4) O kumona Jihova kala o Nzambi ya mwenyu kutena kutukwatekesa kuditunda kyambote mu kudibhana kabasa kibhidi kimoneka ku mwenyu wetu. Tala kyebhi Sobha Davidi kyatena kumona o kidi kiki.

3. Ihi yamesenene kuzwela Davidi kyoso kyambe ‘Jihova wene ku mwenyu’?

³ Davidi wejidile Jihova wadyelela we kwa Mwene. Kyoso Sobha Sawulu ni athu amukwa amesenene kumujibha, Davidi wasambe kwa Jihova phala kumukwatekesa. (Jisá. 18:6) Kyoso Nzambi kya tambwijila o musambu wê yu wamubhulula, Davidi wambe: ‘Jihova wene ku mwenyu!’ (Jisá. 18:46) Ni izwelu yiyi Davidi “kakexile mulondekesa ngo kwila kwene Nzambi. Sayi milongi yamba kwila Davidi wakexile mulondekesa ni kidi kyoso kwila Jihova mwene o Nzambi ya kidi, o muthu wanda suluka mu kwatekesa o jiselevende.” Kyene, Davidi wejidile mukonda dya ima yabhiti ku mwenyu wê kwila o Nzambi yê wejidile o ima yexile mudibhana nayu ni kwila mwene wexile polondo phala kumukwatekesa. Kiki kyabhana nguzu kwa Davidi phala kukolokota mu kusidivila ni kuximana Jihova.—Jisá. 18:​28, 29, 49.

4. Mbote yahi itukatula mu kumona Jihova kala o Nzambi ya mwenyu?

 ⁴ O kuxikina ni kidi kyoso kwila Jihova mwene o Nzambi ya mwenyu, kutena ku tukwatekesa ku musidivila ni kuswina kwoso. Twanda kala ni nguzu phala kukolokota mu kudibhana ni ibhidi ni nguzu phala kusuluka mu kubhanga yoso itutena mu sidivisu ya Nzambi. Twanda kala we ni vondadi ya kusuluka mu kuzukama dingi kwa Jihova.

O NZAMBI YA MWENYU WANDA KUBHANA NGUZU PHALA KUKOLOKOTA

5. Ihi itena kutubhana kidyelelu kyoso kitudibhana ni ibhidi? (Filipe 4:13)

⁵ Se tulembalala kwila Jihova wene ku mwenyu ni kwila mwene wala polondo phala kutukwatekesa, twanda tena kukolokota kabasa ibhidi itudibhana nayu kikale se yamakota mba yofele. Mwene utena kutukwatekesa kuditunda kyambote kabasa kibhidi, mukonda phala Nzambi yetu seku kibhidi kibhonza kyavulu ku kitolola. Mwene o Muteni-a-yoso, utena kutubhana o nguzu i twabhindamena phala kukolokota. (Tanga Filipe 4:13.) Kiki kituxikinisa kwila twanda tena kuditunda kyambote mu kudibhana ni ibhidi. Mu kumona kwila Jihova watukwatekesa kuditunda kyambote mu kudibhana ni ibhidi yofele, tudyelela ni kidi kyoso kwila mwene wanda tukwatekesa mu kudibhana ni ibhidi yamakota.

6. Ihi yabhiti ku mwenyu wa Davidi kyoso kyexile munzangala hanji yamukwatekesa kudyelela dingi kwa Jihova?

⁶ Tala ima iyadi yabhiti ku mwenyu wa Davidi yamukwatekesa kudyelela dingi kwa Jihova. Kyoso kyexile kafunga ka jimbudi mu unzangala, kwamoneka ulusu ni hoji yakwata kambudi ka tat’ê. Mu ithangana iyadi yiyi, Davidi ni kuswina kwoso wabhange yoso phala kubhulula o kambudi mu kanu a yama yiyi. Maji ne kiki, Davidi kadizangeleka ne ngo kuxinganeka kwila mwene wabhange kiki mu nguzu yê mwene. Mwene wejidile kwila Jihova mwene o muthu wamubhana o nguzu phala kubhanga kiki. (1 Sam. 17:34-37) Davidi nuka wadijimbi o ima yiyi yabhiti ku mwenyu wê. Mu kuxinganeka mu ima yiyi, mwene watena kukala ni kidyelelu kya kwila o Nzambi ya mwenyu weji mubhana nguzu phala kukolokota ku hadya.

7. Davidi wadikwatenena mu kima kyahi ni kyebhi o kudikwatenena mu kima kiki kyamukwatekesa kutolola Ngoliya?

⁷ Mukusuluka, kyoso Davidi kyexile hanji munzangala ande dya kutenesa 20 a mivu, Davidi wayi mukunda bhwexile o kifuxi kya masoladi akwa Izalayele. Mwene wamono kwila o masoladi akexile ni woma wavulu mukonda o dizonda mukwa Fidíxa amwixana Ngoliya wambe wixi: “Lelu nganda xongwena o masoladi akwa Izalayele.” (1 Sam. 17:​10, 11) O masoladi akexile ni woma wavulu mukonda ene adikwatenene dingi mu uzonda ni kuxongwena kwa Ngoliya. (1 Sam. 17:​24, 25) Maji ki kyene kyabhange Davidi. Mwene wejidile kwila kyoso Ngoliya kya kexile muxongwena o masoladi a Izalayele mu kidi mwene wakexile mu xongwena o “Nzambi wene ku mwenyu.” (1 Sam. 17:26) Davidi wakexile mu xinganeka kwa Jihova. Davidi wadyelele ni kidi kyoso kwila o Nzambi wamukwatekesa kyoso kyexile kwinga o jimbudi, weji mukwatekesa dingi mu kithangana kiki. Mu kudyelela ni kikwatekesu kya Nzambi, mwene wabhânge, yu watena kutolola Ngoliya!—1 Sam. 17:​45-51.

8. Mu kudibhana ni ibhidi, ihi itena kutukwatekesa kukolesa o kidyelelu kyetu kwa Jihova? (Tala we ofoto.)

⁸ Tutena we kuditunda kyambote mu kudibhana ni ibhidi, se tu lembalala kwila o Nzambi ya mwenyu wala polondo phala kutukwatekesa. (Jisá. 118:6) Tutena kukolesa o kidyelelu kyetu kya kwila Jihova wanda tukwatekesa mu kuxinganeka mu ima yabhange mwene mu ukulu. Tanga misoso ya Bibidya ikulembalesa  kyebhi Jihova kyabhulula o abhezi’ê. (Iza. 37:​17, 33-37) Tanga we misoso mu sayite jw.org yalungu ni kyebhi Jihova kyene mukwatekesa o jiphange jetu mu izuwa yetu. Ku mbandu yamukwa, lembalala o ithangana yoso Jihova ya kukwatekesa kya. Nange o udivwa kwila Jihova kabhange kima kya katunda kala ku kubhulula mu dikanu dya hoji mba dya ulusu, maji kana kuluwala. Mukonda dyahi? Mukonda mu kidi Jihova wabhange kya ima yavulu ku mwenyu wé phala o mbote yé! Mwene wa kukwatekesa kukala ni ukamba wambote ni mwene. (Nzw. 6:44) Ne mwene lelu, eye wamutena kusuluka ni ku musidivila mukonda dya kikwatekesu kya mwene. O kwila ki kweji kala kima kyambote kumubhinga kikwatekesu phala ni utene kulembalala o kithangana kyoso mwene kyatambwijila o misambu yé, wakukwatekesa mu kithangana kyatokala, mba wakukwatekesa mu ithangana ya bhonzo? O kuxinganeka mu ithangana yiyi, kwanda kolesa o kidyelelu kyé kya kwila Jihova wanda suluka mu kukukwatekesa.

9. Ihi itwatokala kulembala mu kudibhana ni ibhidi? (Jisabhu 27:11)

⁹ O kumona Jihova kala Nzambi wa mwenyu, kwanda tukwatekesa kumona o ibhidi itudibhana nayu mu ukexilu watokala. Kyebhi? Kyoso kitudibhana ni ibhidi twatokala kubanza kwila, Dyabhu wambe kuma se tukala ni ibhidi, ki twanda sidivila dingi Jihova. Mu kiki o ukexilu utudibhana ni ibhidi utena kusangulukisa Jihova mba kana. (Jobe 1:​10, 11; tanga Jisabhu 27:11.) Maji kyoso ki tusuluka mu kukala fiyele kwa Jihova ne mwene ni ibhidi, tulondekesa o henda yetu kwa Jihova ni kwila Dyabhu mukwa makutu. O kwila wamudibhana ni izukutisu mukonda dya jinguvulu, kukamba kitadi, mba o athu mu ukunji kamesena ku kubhana matwi mba ibhidi yamukwa? Se kyene, lembalala kuma o ibhidi yiyi iwamudibhana nayu ikubhana kithangana phala kusangulukisa o muxima wa Jihova ni kwila mwene wanda suluka mu kukwatekesa kukolokota kabasa kibhidi ki udibhana nayu. (1 Ko. 10:13) Mwene wanda kubhana nguzu phala kukolokota.

 O NZAMBI YA MWENYU WANDA KUBESOWALA

10. Ihi yanda bhanga o Nzambi ya mwenyu ku athu oso amubheza?

¹⁰ Jihova mukwa kubesowala yo amubheza. (Jih. 11:6) Mwene utubhana kutululuka ni kusangaluka kindala, ku hadya wanda tubhana o mwenyu wakalelaku. Tutena kudyelela ni kidi kyoso kwa Jihova mukonda mwene wamesena kutubesowala ni kwila wala ni kutena kwa kubhanga kiki. O kidyelelu kiki kituswinisa kusuluka mu kukala ni ima yavulu phala kubhanga mu ubhezelu wetu, kala kya bhangele o jiselevende jafiyele ja Nzambi mu ukulu. Kiki kyene kyabhange Timote ku hama yadyanga.—Jih. 6:​10-12.

11. Mukonda dyahi Timote wakalakala mu kilunga ni kuswina? (1 Timote 4:10)

¹¹ Tanga 1 Timote 4:10. Timote wakexile ni kidyelelu kwa Nzambi ya mwenyu. Mukonda dya kiki wakalakela Jihova ni akwâ ni kuswina kwoso. Kyebhi mwene kyabhange kiki? O poxolo Phawulu wamuswinisa kukala mulongexi wambote mu ukunji ni mu kilunga. Phawulu waswinisa we Timote kukala phangu phala o jiphange mu kilunga kikale phala o minzangala ni adyakime. Mwene watambula we ikalakalu yabhonzo, kala kubhana itendelesu ni henda ni kuswina kwoso kwa athu oso abhindamene o itendelesu yiyi. (1 Ti. 4:​11-16; 2 Ti. 4:​1-5) Timote wejidile ni kidi kyoso kwila sumbala kweji kala athu keji tena kumona mba kubhana valolo mu ima yabhange mwene, maji ne kiki Jihova weji mubesowala.—Lom. 2:​6, 7.

12. Ihi itena kuswinisa o tufunga kusuluka mu kukalakala ni kuswina kwoso mu kilunga? (Tala we ofoto.)

¹² Lelu, o tufunga we atena kudyelela ni kidi kyoso kwila Jihova umona, ubhana valolo o ikalakalu ya yambote. Katuku o kikalakalu kya kwinga mba kukunda o jiphange, kulonga, ni kuboka, tufunga twavulu ene mukwatekesa o ikalakalu ya kutunga ni kukwatekesa o jiphange abhiti mu mavuwa. Amukwa akalakala kumoxi ni kibuka kikwatekesa o jiphange ahaxila,  ala mu jinzo ja kusaka. O tufunga tutu twejiya kwila o kilunga kyatokala kwa Jihova ki kya tokala ku athu kana. Mukonda dya kiki, ene adibhakula ni nguzu yoso mu kusidivila o kilunga, adyelela ni kidi kyoso kwila Nzambi wanda kwa besowala mukonda dya ima yoso yabhanga ene.—Kol. 3:​23, 24.

13. Kyebhi Jihova kyamona o nguzu itubhanga phala kumusidivila?

¹³ Ko athu oso atena kukala tufunga. Maji etu enyoso tutena kubhana kima kwa Jihova. Jihova usanguluka kyavulu kyoso kitubhanga yoso itutena phala kumusidivila. Mwene umona kyoso kitusangela kitadi phala kukwatekesa o kikalakalu kya kuboka ku mundu woso ne mwene se kyatolo. Mwene usanguluka kyavulu kyoso kituzangula o lukwaku phala kutambwijila mu yonge ne mwene ni jisonyi, mwene usanguluka we kyoso kituloloka akwetu atuxongwena. Ne mwene se udivwa kala iwamubhanga yofele ngo, dyelela kwila Jihova ubhana valolo mu yoso i ubhanga. Mwene wakuzolo, wanda kubesowala.—Luk. 21:​1-4.

SULUKA MU KUZUKAMA DINGI KWA NZAMBI YA MWENYU

14. Kyebhi o kuzukama dingi kwa Jihova kutukwatekesa kusuluka mu kukala fiyele? (Tala we ofoto.)

¹⁴ Se tukala ni ukamba wambote ni Jihova, ki kwanda tubhonza kusuluka kumukala fiyele. Kiki kyene kyabhiti ni Zuze. Mwene waditunu kubhanga undumbu mukonda wakexile ni ukamba wambote ni Jihova, mwene kamesenene kuluwalesa Jihova. (Dim. 39:9) Phala kukala ni ukamba wambote ni Jihova, twatokala kukatula kithangana phala kusamba kwa mwene ni kudilonga o Maka mê. Se tubhanga kiki o ukamba wetu ni mwene wanda kola dingi. Se tukala ni ukamba wambote ni Jihova kala Zuze, etu we kitwanda mesena kubhanga kima kiluwalesa Jihova.—Tiy. 4:8.

15. Madisá ebhi utudilonga ni ima yabhiti ni akwa Izalayele kyoso kyexile mu kikangalakata? (Jihebelewu 3:12)

¹⁵ O athu oso adijimba kwila Jihova mwene o Nzambi ya mwenyu, kalaleka mu kumubhana dikunda. Tala yabhiti ni akwa Izalayele kyoso kyexile mu kikangalakata. Ene ejidile kwila Jihova  weji tena kulanga ni kudikila o ibhindamu yâ, maji ene amateka kukala ni phata mu maka yá. Kate mwene ebhula: “Jihova wala mwene bhukaxi k’etu, inga kana?” (Mak. 17:​2, 7) Mukonda dya kiki, ene abhukumukina Nzambi. Mu kidi, etu ki twamesena kukayela o phangu yâ yayibha.—Tanga Jihebelewu 3:12.

16. Ihi itena kulola o kixikanu kyetu?

¹⁶ O ima ku mundu ibhangesa kwila o kukala ni ukamba wambote ni Jihova kukala kima kyabhonzo. Avulu adituna kwila kwene Nzambi. Mu ithangana yavulu, o athu kamesena kubhanga o vondadi ya Nzambi edi kala ala ni mwenyu wambote. O kumona o ima yiyi kubhita, kutena kulola o kixikanu kyetu. Sumbala tuxikina kwila kwene Nzambi, maji tutena kumateka kukala ni phata se mwene wanda tena mwene kutukwatekesa. O musoneki wa Sálamu 73 wadivu we kiki. Mwene wamono kwila o athu amukondolokele kexile mubhanga o vondadi ya Nzambi akexile ni mwenyu wasanguluka. Mukonda dya kiki wamateka kukala ni phata se o kubheza Nzambi kwexile mwene o kima kyatokala.—Jisá. 73:​11-13.

17. Ihi yanda tukwatekesa kuzukama dingi kwa Jihova?

¹⁷ Ihi yakwatekesa o mukwa JIsálamu kulungulula o ibanzelu? Mwene waxinganeka mu ima yeji bhita ni atho oso eha kudyelela Jihova. (Jisá. 73:​18, 19, 27) Mwene waxinganeka we o mbote ijila mu kusidivila Nzambi. (Jisá. 73:24) Tutena we kuxinganeka mu maukexilu oso Jihova watubesowala. Ni kuxinganeka kyebhi ki tweji dibotesa ngo o mwenyu wetu se tudituna kusidivila Jihova. Se tulembalala se mukonda dyahi kima kyambotekusidivila Jihova, twanda tena kusuluka mukukala fiyele kwa mwene. Kala kya zwela o mukwa Jisalamu etu we twanda zwela: “Eme-phe kya ngi wabhela o kuzukama kwa Nzambi.”—Jisá. 73:28.

18. Mukonda dyahi ki tutokala kukala ni woma wa ima yanda bhita ku hadya?

¹⁸ Tutena kudibhana kabasa kibhidi kimoneka ku mwenyu wetu mu izuwa yiyi isukidilaku mukonda twala tu “abhika a Nzambi ya mwenyu ni ya kidi.” (1 Te. 1:9) O Nzambi yetu utubhana valolo, wanda tukwatekesa. Mu ukulu Mwene walondekesa kya kwila ukwatekesa o jiselevende jê, lele wala we ku mbandu yetu. Kwakambe ngo etu enyoso mu ixi twanda bhita mu hadi yadikota, maji kitwanda kala ubheka mu kithangana kiki, Jihova wanda kala n’etu. (Iza. 41:10) Twamesena kwila etu enyoso “tuswine ni tuzwele, twixi: ‘Jihova mwene o mukwatekexi wami, kinganda kala ni wôma.’”—Jih. 13:​5, 6.