Phawulu wasoneka: “Eme ngi mufi wa Kitumu—a ngi jibha kwala o Kitumu kyene—phala mwenyu wami u kale kwa Nzambi.”—Nga. 2:19.

O maka asoneka Phawulu alungile ni pondo mba milongi yexile mujimbulula mukilunga kya Ngalásya mu ixi ya Loma. Sayi Jikidistá exile mwa afwinyisa kwa alongexi amakutu. O mala enya exile mulonga kwila phala muthu kubhuluka, wabhingile kubelesela o Kitumu mba Kijila kya Mozé bengebenge kyalungu ni kusaya. Maji Phawulu wejidile kwila phala Nzambi kikwabhingile dingi kukayela o Kitumu kyalungu ni kusaya. Mukusota kukwatekesa o athu kuxinganeka mu ukexilu watokala, Phawulu waditunu o ilongesu yamakutu, yu wasoto kukolesa o kixikanu kya jiphange mu sata yakukula ya Jezú Kidistu.—Nga. 2:4; 5:2.

O Bibidya yamba ni kidi kyoso kwila o muthu kyoso kyafwa kejiya dingi kima, o ima yamukondoloka ki umufwinyisa dingi. (Ndo. 9:5) Kyoso Phawulu kyambe: “Eme ngi mufi wa Kitumu mba Kijila,” mwene wamesenene kuzwela kwila kexile dingi kudikwatekenena mu Kijila kya Mozé. Muveji dya kiki, Phawulu wadyelele kwila bhukaxi kakixikanu kyê musata yakukula mwene wejikala ni “mwenyu . . . kwa Nzambi.”

Phawulu walungulula o ukexilu “Mukonda . . . [dya] Kitumu.” Kyebhi kyene? Mwene wajimbulula we kwila “etu ki twa xikanena Kidistu Jezú, phala Nzambi a tu xikinine mu kuxikan’oko ku twa xikana Kidistu, kana mu kubhanga imbamba ya Kitumu.” (Nga. 2:16) Mu kidi, o Kijila kyexile ni kikalakalu kye kyadikota. Phawulu wajimbulula kwa akwa Ngalásya kuma: “Kitumu a ki bandekesa ku pholo kunu, phala kwidikisa o ima yoso yayibhila Nzambi. Kyene ki nanga ngó katé bhwoso bhu ijila yó a mu bhele polomesa u tunda ku mbutu ya Mbalahamu.” (Nga. 3:19) Kyene, o Kijila kyambele kya kwila séku muthu mukwa ituxi weji belesela o Kijila ni kuyuka kwoso. Kyenyiki ene abhingile sata yayuka yeji nangenena. O Kijila kyakwatekesa o athu kwijiya kwila, Jezú mwene wexile o “mbutu.” Mu kuxikana kwa Jezú Kidistu, o muthu eji muxikina kwa Nzambi kala muthu wayuka. (Nga. 3:24) Kumesu a Nzambi Phawulu wexile muthu wayuka mu Kijila, ni mukonda dya kuxikina Jezú ni kukala ni kixikanu kwa mwene. Mukonda dya kiki Phawulu wakituka “mufi wa Kitumu” phala “mwenyu we ukale kwa Nzambi.” O Kitumu mba Kijila, kikyexile dingi ni kutena kwa mwene, maji Nzambi ngo wexile ni kutena kwa Phawulu.

Phawulu wajimbulula maka adifu kiki mu mukanda wê phala akwa Loma. “Kyene kimoxi ni enu, phange jami. Enu wenu a mi bhange mu afi a Kitumu, mukonda mu mbandu kyá ku mukutu wa Kidistu . . . twa jituka ku Kitumu, kuma twala tu afi ku yóyo yoso ya tu kwatele. Wila kiki, twa jituka phala ni tu kale mù bhikila Nzambi.” (Loma 7:4, 6) Mu mukanda kwa akwa Loma ni mu mukanda kwa akwa Ngalásya 2:19, ilondekesa kwila, Phawulu kexile muzwela yalungu ni kusaya mukonda dya kubhukumukina o Kijila, kana. Muveji dya kiki mwene wexile muzwela yalungu ni maka a kujituna mu Kijila. O Kijila kikyexile dingi ni kutena kwa mwene ni ku athu akamukwa kala mwene. Ene atambula ufolo mukonda dya kuxikina mu sata ya kukula ya Kidistu.