1. Mukonda dyahi tutena kusokesa Satanaji ni dinyanga?

O DINYANGA, wala ngó ni disukilu dimoxi—kukwata mba kujibha o kyama kyasange. Phala kukwata o yama, mwene utena kuta mibhetu mba mabhebhe a maukexilu avulu, kala kyambele o dikamba dya makutu dya Jobe. (Jobe 18:8-10) Ihi ibhanga o dinyanga phala kubhangesa o kyama kubwa mu mubhetu? Mwene usota kutonginina kyambote o kyama. Kwebhi kuyene muditela? Kudya kwahi kwa wabhela dingi? Mubhetu webhi watokala phala kumukwata? Satanaji wadifu mwene ni dinyanga. Mwene usota kututonginina, usota kutala kwebhi kutwene muditela ni ima itwawabhela dingi. Mukusuluka, mwene usola o mibhetu yandatutela, phala kutukwata se etu kukijiya. Maji o Bibidya itudyelelesa kwila, ne mwene se atukwata mu mubhetu, tutena kusutunuka. Yene itudimuna we phala kitubwe mu mibhetu yiyi.

2. Mibhetu yebhi ya Satanaji yene mukwatanayu athu avulu?

² O mibhetu iyadi ya Satanaji yene mukwatanayu athu avulu, o kudizangeleka ni lwimbi. * Tunde ukulu, Satanaji wene muditunda kyambote mukwata o athu bhukaxi ka mibhetu yiyi. Mwene wadifu ni dinyanga, ubhangesa o yama kuya mu ididi mwala o mubhetu mba dibhebhe. (Jisá. 91:3) Maji etu tutena kulenga o mibhetu ya Satanaji. Mukonda dyahi tuzwela kiki? Mukonda Jihova watulondekesa kyebhi Satanaji kyakwata o athu.—2 Kol. 2:11.

3. Mukonda dyahi Jihova wasolo kutudimuna bhukaxi ka athu o tumbule mu Bibidya?

³ Jihova utulondekesa o kilwezu kya kudizangeleka ni kukala ni lwimbi, mukututangela yabhiti ni jiselevende jê m’ukulu, phala kitute o ituxi yatele ene. Twandamona kyebhi Satanaji kyatena  kukwata kumibhetu yê kate mwene o jiselevende ja Jihova amusidivila kya mumivu yavulu. Maji o kwila kiki kilombolola kuma kitutena kubhanga kima phala kulenga o mibhetu ya Satanaji? Kana. Jihova wabhangesa o phangu ya athu kukala mu Bibidya “phala ku tu dimuna.” (1 Kol. 10:11) Mwene wejiya kuma, mukudilonga o jiphangu jiji, kwandatukwatekesa kulenga mba kusutunuka kumibhetu ya Dyabhu.

4. Ihi itena kubhita n’etu se tudizangeleka?

⁴ Satanaji wamesena kwila, tukala ni kifwa kya kudizangeleka. Mwene wejiya kwila, se tukala ni kifwa kya kudizangeleka, twandadifwa ni mwene, kitwandatambula o mwenyu wakalelaku. (Jisa. 16:18) Kyenyiki, kyene kyabhangesa poxolo Phawulu kudimuna kwila, o muthu utena ‘kudizangeleka, o kudizangeleka kwê hé ku mu bhekela izala, n’a di bhale mu kwêla mba kifundisu wila kya bhitile kwa Dyabhu.’ (1 Tim. 3:6, 7) Kiki kitena kubhita ni muthu wosowoso bhukaxi ketu, kikale se wamateka kindala mba wene musidivila kyá Jihova mumivu yavulu.

5. Kala kilondekesa Ndongixi 7:16, 20, kyebhi o muthu kyatena kulondekesa o kifwa kya kudizangeleka?

⁵ O muthu udizangeleka, udibanza ngó mwene. Satanaji usota kutubhangesa kuxinganeka dingi mu mbote yetu, muveji dya kuxinganeka mu vondadi ya Jihova, bengebenge kyoso kitwamudibhana ni maka. O kwila eye akutatelele kya kima ki ukibhange? Akutalatalele kya kyayibha? Se kiki kibhita, Satanaji weji kiwabhela kyavulu se utatela Jihova mba o jiphange jé. Dyabhu wamesena kwila, eye uxinganeka kuma, o ukexilu umoxi ngó wakubatula o maka, o kubhanga kala kiwaxinganeka, muveji dya kukayela o itendelesu ikubhana Jihova mu Maka mê.—Tanga Ndongixi 7:16, 20.

6. Ihi i utena kudilonga kuphangu ya phange ya muhatu ku ixi ya Holanda?

⁶ Tala o phangu ya phange ya muhatu ku ixi ya Holanda, wadizangala mukonda dya itondalu ya akwa. Mwene kamesenene dingi kukala kumoxi ni jiphange jiji. Mwene wambe: “Eme ngexile mudivwa ubheka, kingamesenene dingi kwaloloka. Ngatangela kwa mwadiwami kwila, twatokalele kuya mukilunga kyengi.” Maji  mukusuluka wamono o minangu ya JW Broadcasting^® ya mbeji ya Katanu muvu wa 2016. O minagu yiyi yabhele jindunge jalungu ni kyebhi kitutena kudibhana kyambote ni itondalu ya akwetu. O phange ya muhatu wambe dingi: “Ni kidi kyoso, nga ditonginina eme ngamono kwila, ngatokalele kuxikina o itondalu yami, muveji dya kumesena kulungulula o jiphange mukilunga. O minangu yiyi ya ngikwatekesa kulunga o muxima kwa Jihova, ni kwila, mwene ngó wala ni ujitu wakututangela yoso itwatokala kubhanga.” Ihi itwadilongo? Kyoso ki udibhana ni ibhidi, sota kulunga o muxima we kwa Jihova. Mubhinge kikwatekesu phala utene kutala akwenu m’ukexilu watokala. Tata yé ya dyulu wene mumona o itondalu ya jiphange jé; ne kiki, Jihova wene mwa aloloka. Mwene wamesena kwila eye we kyene ki ubhanga.—1 Nzwá 4:20.

7. Ihi yabhiti ni Sobha Uziya?

⁷ Mukonda dya kudizangeleka, o Sobha ya Juda, Uziya, kevu o itendelesu ya akwa. Kyenyiki, wabhange kima kikyamutokalele kubhanga. Uziya wabhangele ima yavulu yambote. Mwene waditundu kyambote mu ita, watungile jimbonge javulu, wexile we ni mabhya avulu. “Ngana Nzambi we wa mu zediwisa.” (2 Mal. 26:3-7, 10) O Bibidya yamba: “Maji Uziyaphe kya zubha kyá o kukituka dizonda, o muxima wê wa di zangeleka katé ki wa zangiwa.” Jihova wabhele o kitumu kwila, o akunji ene ngó exile ni ujitu wakubhana o wasu wadizumba mu thembulu. Maji mukukaka kwê, Sobha Uziya wayi mu thembulu yu wasatela o wasu wadizumba. Jihova kakiwabhela, kyenyiki wabhangesa Uziya kukala ni dibhute kumwenyu wê woso.—2 Mal. 26:16-21.

8. Kala kilondekesa 1 Kolindu 4:6, 7, ihi itwatokala kubhanga phala kitukale ni kifwa kya kudizangeleka?

⁸ O kwila o kudizangeleka kutena we kutubhangesa kudibhala mu mubhetu kala kyabhitile ni Uziya? Tala yabhiti ni phange Zuze. Mwene wexile diyala dya wenji, wexile muditunda kyambote. Exile mumuxila we mukilunga, wexile musidivila kala kafunga. Mweme wexile mubhanga madiskulusu mu yônge ya ilunga ni mu yônge yamakota, kate mwene o kafunga ka ilunga wexile mumubhinga itendelesu. Mwene wambe: “Eme ngexile mudyelela kyavulu mu mauhete mami, ni mu ima ingejidile kya kubhanga. Kingexile mudyelela dingi kwa Jihova. Ngabanzele kwila ngejiya kya yoso, ngi diyala dya nguzu. Kyenyiki, kingakexile kubhana matwi mu idimwinu ni kubelesela o itendelesu ya Jihova.” Kyenyiki, mukubhita kithangana, Zuze wate kituxi kyadikota, ya amute  mu kamukonde. Mivu yavulu kudima, mwene wavutuka mukilunga. Kindala mwene wamba: “Jihova wangilongo kwila, o ujitu utwalanawu, kiwene o kima kyabetakota, kana. Maji o kubhanga o ima itubhinga mwene.” Kitutokala kujimba kwila, o mauhete utwalanawu mba ujitu ututambula mukilunga, Jihova mwene watubhanawu. (Tanga 1 Kolindu 4:6, 7.) Se tukala ni kifwa kya kudizangeleka, Jihova kandatubhana ikalakalu mukilunga kyê.

9. O lwimbi lwa bhangesa Satanaji ni Eva kubhanga ihi?

⁹ Kyoso kitwivwa o kizwelu lwimbi, nange tuxinganeka kwa Satanaji, Dyabhu. Kuma wexile anju ya Jihova, Satanaji nange wexile ni maujitu avulu. Maji mwene wamesenene dingi. Mwene wamesenene kutambula o ubhezelu watokala ngó kwa Jihova. Satanaji wamesena kwila, tukayela o ukexilu wê. Kyenyiki, mwene usota kutubhangesa kumesena kukala ni ima yavulu. O veji yadyanga yasoto kubhanga kiki, kyoso kya zwela ni Eva. Ni henda yoso, Jihova wabhele kwa Adá ni Eva o ujitu wakudya “ku mixi yoso mu díbhya,” wa afidisile muxi umoxi ngó. (Dim. 2:16) Ne kiki, kadyaphemba Satanaji wanganala Eva mukumubhangesa kubanza kwila, wabhingile mwene kudya kukibundu kya muxi umoxi wofidise. Eva kasangulukile ni ima yexilenayu, wamesenene dingi. Etu twejiya se ihi yabhiti kupholo. Eva wate kituxi yu wafu.—Dim. 3:6, 19.

10. Kyebhi o lwimbi lwa dibhange mubhetu phala Sobha Davidi?

¹⁰ O lwimbi lwa bhangesa Sobha Davidi kujimba yoso yamubhele Jihova, kala o umvwama, o fuma ni kikwatekesu phala kutolola o jinguma jê. Ni kisakidilu kya muxima, Davidi waxikinine kwila, o maujitu amubhele Nzambi “ki kwala muthu u tena ku a kwata konda!” (Jisá. 40:5) Maji kwabhixila kithangana, Davidi wajimbi yoso yabhangele Jihova phala mwene. Mukusuluka, Davidi wakituka mukwa lwimbi, wamesenene dingi ima yamukwa, o yamubhele Jihova kiyamusokele. Sumbala Davidi wexile ni ahatu avulu, mwene wehela o jihanji jayibha kukula ku muxima wê, yu wamesenene kukala ni muhatu wangene. O muhatu yú wexile Bate-seba, munumyê wexile Udiya mukwa Hiti. Mukonda dya lwimbi lwa muxima, Davidi wate phanda ni Bate-seba, o mwene yu wemita. O kya bhangele Davidi kima kyayibha. Maji mukusuluka, mwene wabhange dingi kima kyayibha kinene. Wasoto ndunge phala kubhangesa Udiya kumujibha! (2 Sam. 11:2-15) Ihi  yexile muxinganeka Davidi? O kwila wabanzele kuma Jihova kejimumona? Sumbala mwene wasidivila Jihova ni ufiyele woso mumivu yavulu, mwene wakituka mukwa lwimbi. O kiki kyamubhekela hadi yavulu. Maji mukubhita kithangana, Davidi wafisala o ituxi yê, wadyela, Jihova yu wamuloloka!—2 Sam. 12:7-13.

11. Kala kilondekesa Efezu 5:3, 4, ihi itena kutukwatekesa kutolola o lwimbi?

¹¹ Ihi itudilonga kuphangu ya Davidi? Twadilongo kwila, etu tutena kutolola o lwimbi, se tulondekesa jinga kisakidilu mu yoso yene mutubhana Jihova. (Tanga Efezu 5:3, 4.) Twatokala kusanguluka ni yoso itwalanayu. Kyoso kitumateka kulonga o Bibidya ku athu, twene mu aswinisa kuxinganeka mu kima kya tambula kwa Jihova ni kusakidila Jihova. Se muthu ubhanga kiki mu izuwa yoso ya semana, kilombolola kwila, bhukaxi ka musambu, mwene wandasakidila Jihova mu sambwadi dya ima kiyadifu. (1 Tes. 5:18) O kwila eye we kyene kiwenemubhanga? O kuxinganeka mu yoso yene mubhanga Jihova phala eye, kwandakukwatekesa kulondekesa jinga kisakidilu. Se ulondekesa kisakidilu, wandasanguluka ni yoso iwalanayu. Se usanguluka ni yoso iwalanayu, kiwandadibhala mumubhetu wa lwimbi.

12. O lwimbi lwa bhangesa Juda dya Kadyota kubhanga ihi?

¹² O lwimbi lwa bhangesa Juda dya Kadyota kubhanga kima kyayibha kinene, o kusumbisa Jezú. Maji kudimatekenu, Juda kexile muthu wayibha. (Luka 6:13, 16) Jezú wamusolele kala poxolo. Yoso ilondekesa kwila, Jezú wamudyelele, mukonda wamubhele o kikalakalu kya kulanga o ngonga ya kitadi. O kitadi kiki kyexile phala kudikila o ibhindamu ya Jezú ni jipoxolo mukikalakalu kyâ kya kuboka. Kifwa, kyadifu ngó ni kitadi kitwene musangela lelu, phala kukwatekesa o kikalaku kya kuboka ku mundu woso. Maji mukubhita kithangana, Juda wamateka kunyana o kitadi kiki, sumbala wevwile kyoso Jezú kya dimuna o mundu muveji javulu phala kudilanga kulwimbi. (Mál. 7:22, 23; Luka 11:39; 12:15) Juda kabhana matwi ku idimwinu yoso yiyi.

13. O lwimbi lwa Juda lwadimonekena dingi mukithangana kyebhi?

¹³ O lwimbi lwa Juda lwadimonekena dingi ande dya Jezú kufwa. Jezú ni maxibulu mê, kumoxi ni Madiya ni phangyê Malata exile mudibhata dya Ximá mukwa dibhute. Mukithangana kya kudya, Madiya wa waye o maji adizumba atele kitadi kyavulu mu mutwe wa Jezú. Juda ni maxibulu amukwa kakiwabhela. O maxibulu amukwa adivu kiki nange mukuxinganeka kwila, o kitadi kiki kyeji tena kukwatekesa kyavulu mu kikalakalu kya kuboka. Maji Juda wexile ni kixinganeku kyengi. Kuma mwene wexile “mwiyi,” wamesenene kunyana o kitadi mu ngonga. Mukusuluka o lwimbi lwa bhangesa Juda kusumbisa Jezú mu pelesu ya mubhika.—Nzwá 12:2-6; Mat. 26:6-16; Luka 22:3-6.

14. Ihi yabhange o dikaza phala kukumbidila o izwelu itusanga mudivulu dya Luka 16:13?

¹⁴ Jezú wadimuna o akayedyê, wixi: “Enu wenu ki mu tena kubhikila kumoxi ni Nzambi ni Mamunu mba jimbote.” (Tanga Luka 16:13.) Kate lelu, kiki kidi mwene. Mukifika tala ngó yabhange o dikaza ku ixi ya Romenia, phala kubelesa o izwelu yiyi ya Jezú. Kwa moneka salu ya kithangana kyofele mu ixi yengi. Ene ambe: “Etu twexile ni dikongo mu bangu. Kyenyiki, kudimatekenu twaxinganeka kwila, o salu yiyi dibesá dya tundu kwa Jihova.” Maji kwexile tumaka. Se axikinine o salu yiyi, keji kala ni kithangana kyasoko phala o sidivisu ya Jihova. Mu kutanga o milongi “Mantenha a lealdade com um coração unificado” mu Mulangidi wa 15 wa Kakwinyi wa 2008, mu phutu, kwa akwatekesa kusola kyambote. Ene ambe: “Se twaxikinine kuya mu ixi yengi phala kunganyala dingi kitadi, kyeji tubhonza kusidivila Jihova, tweji londekesa kwila, o ukamba wetu ni Jihova kiwexile  dingi o kima kya betakota kumwenyu wetu. Twejidile kwila, se twaxikinine o salu yiyi, o ukamba wetu ni Jihova ki weji kala dingi kyambote.” Kyenyikiphe, ene aditunu. Ihi yabhiti? O munumi wasange salu yengi mu ixi yâ, eji mufuta kitadi kyasoko phala kudikila o ibhindamu yâ. O muhatu wambe: “Jihova kene mujimba o jiselevende jê.” O dikaza didi dya sanguluka mukonda asolo Jihova kala Ngana yâ, muveji dya kusola o kitadi.

15. Mukonda dyahi tutena kuzwela ni kidi kyoso kwila tutena kusutunuka mu mibhetu ya Satanaji?

¹⁵ Ihi itwatokala kubhanga se tutonginina kwila, twabu mu mubhetu wa kudizangeleka mba walwimbi? Tutena kusutunuka! Phawulu wambe kwila oso “akwika” kwala Dyabhu atena kusutunuka mu mubhetu wê. (2 Tim. 2:26) Kiki kyene kyabhitile ni Davidi. Mwene wabelesa o kibazelu kyamubhele polofeta Natane, wadyela mukonda dya kulondekesa o lwimbi, wasoto kukala dingi ni ukamba ni Jihova. Kana kujimba kwila, Jihova wabetakota mukutena, Satanaji ndenge. Kyenyikiphe, se tuxikina o kikwatekesu kya Jihova, twandatena kusutunuka ku mubhetu mba dibhebhe dyosodyoso ditutela Dyabhu.

16. Ihi yandatukwatekesa kulenga o mibhetu ya Satanaji?

¹⁶ Mu kidi, o kima kyabetakota o kubhanga yoso phala kitudizangeleke mba kukala ni lwimbi. Maji se o kikwatekesu kya Jihova, etu kitutena kulenga o mibhetu ya Satanaji. Maji twatokala kudilanga phala kitudyelele mu nguzu yetu. Kate mwene o athu amusidivila Jihova mumivu yavulu, amateka kudizangeleka, akituka akwa lwimbi. Kyenyikiphe, samba kwa Jihova izuwa yoso, mubhinge kikwatekesu phala utene kutonginina o ixinganeku ni ibhangelu yé. (Jisá. 139:23, 24) Bhanga yoso i utena phala ki udibhale mu mubhetu wakudizangeleka mba lwimbi!

17. Kwa kambe ngó, ihi yandabhita ni nguma yetu Dyabhu?

¹⁷ Mu jimidi ni jimidi jamivu, Satanaji wene mukwata athu avulu mumibhetu yê. Maji kwa kambe ngó andamukuta, mukusukaku andamubwika. (Dij. 20:1-3, 10) Twamukinga ni hanji yoso o kithangana kiki. Kate koko, dilange, dimuka phala ki udibhale mumibhetu ya Satanaji. Bhanga yoso i utena phala o kudizangeleka ni lwimbi kilusabhuke kumuxima wé. Sota kukayela o kitendelesu kiki: “Zokenuphe ni Dyabhu, mwène u mi lenga.”—Tiya. 4:7.