1. Mukonda dyahi sayi ithangana o jiselevende ja Jihova atena kudivwa ubheka?

AVULU mudyetu adivwa ubheka. Phala amoxi kikulaleka kutolola o kibhidi kiki. Maji sayi yâ adivwa ubheka muthembu yavulu. Etu nange tutena kudivwa ubheka ne mwene kyoso kitukala mwaxaxi ka athu. Sayi jiphange kitena kwa abhonza kubhanga makamba mukilunga kya ubhe. Amukwa abhangele mbandu ya mwiji wexile mubhanga o ima kumoxi, maji kyoso ene kyazaluka atena kudivwa ubheka. Amukwa hanji adivwa ubheka kyoso kyafunda dikamba dyakazola. Sayi Jikidistá, bengebenge yó abokona kindala mu kilunga, adivwa ubheka kyoso mwiji wâ mba dikamba umubhana dikunda mba umuzukutisa.

2. Ibhwidisu yebhi itwandatambwijila?

² Jihova wejiya, utendela o ima yoso yalungu n’etu. Mwene wejiya kyoso kitwamudivwa ubheka, mwene utudyelelesa kwila, wamesena kutukwatekesa kutolola o kibhidi kiki. Jihova utukwatekesa kyebhi? Ihi itutena kubhanga phala kudikwatekesa? Ni kyebhi kitutena kukwatekesa akwetu mukilunga amudivwa ubheka? Tumone o itambwijilu ya ibhwidisu yiyi.

3. Kyebhi Jihova kyalondekesa kwila wexile musuwa Elija?

³ Jihova wamesena kwila o jiselevende jê joso jisanguluka. Mwene utala muthu ni muthu, utala kyoso kituluwala ni kyoso kituzoza. (Jisá. 145:18, 19) Tala kyebhi Jihova kyatalatele o polofeta yê Elija. O diyala didi dya fiyele dyatungile mu thembu  yabhonzo phala akwa Izalayele. O athu exile ni kutena mu Izalayele kazolele Jihova, exile muzukutisa o abhezi a Nzambi, ene amesenene kujibha bengebenge polofeta Elija. (1 Jis. 19:1, 2) Elija waxinganekene kwila mwene ngo wasubhukile ku jipolofeta joso jexile musidivila Jihova, kiki nange kyamuzozesa kusuluka kusidivila Jihova. (1 Jis. 19:10) Se kulaleka, Nzambi wabhange kima phala kukwatekesa polofeta Elija. Jihova watumikisa anju Yê phala kudyelelesa Elija kwila, mwene kexile ubheka. O anju yamwambela kwila kwexile hanji jiselevende javulu jafiyele jexile musidivila Jihova!—1 Jis. 19:5, 18.

4. Kyebhi o divulu dya Máluku 10:29, 30, dilondekesa kwila Jihova usuwa o jiselevende jê adivwa ubheka?

⁴ Jihova wejiya kwila avulu mudyetu axisa ima kudima phala kumusidivila. Bhukaxi ka ima yavulu itwaxisa kudima mwala o kikwatekesu kyajindandu ni makamba kamusidivila Jihova. Nange mu kuthandanganya ni maka enya, kwene kwabhangesa poxolo Phetele kwibhwidisa kwa Jezú: ‘Yene yoso twa i xi, etu twa ku kayela; diláwu mba futu yetu ikala yahi?’ (Mat. 19:27) Ni henda yoso Jezú watangela o maxibulu mê kwila, o kilunga kyeji kala o mwiji wâ. (Tanga Máluku 10:29, 30.) O Tata yetu yadyulu Jihova watukanena kwila wandakwatekesa yó amesena kumusidivila. (Jisá. 9:10) Tala o ima i utena kubhanga phala kutambula o kikwatekesu kya Jihova kyoso ki udivwa ubheka.

5. Mukonda dyahi kima kyambote kuxinganeka kyebhi Jihova kya kukwatekesa?

⁵ Xinganeka kyebhi Jihova kya kukwatekesa. (Jisá. 55:22) Ihi yandakukwatekesa kukala ni ibhanzelu yambote yalungu ni maka uwamudibhananawu? Sayi phange amwixana Carol, * kumwiji wê mwene ngó wamubheza Jihova, wambe: “Kyoso kingixinganeka kyebhi Jihova kyene mungikwatekesa kukolokota mu ibhidi yabhonzo, ngidivwa kwila eme kingala ubheka. Kiki kingidyelelesa kwila Jihova wandasuluka ni kungikwatekesa jinga.”

6. Kyebhi o mukanda wa 1 Phetele 5:9, 10, utena kuswinisa yó amudivwa ubheka?

 ⁶ Xinganeka kyebhi Jihova kyamukwatekesa o jiselevende jê adivwa ubheka. (Tanga 1 Phetele 5:9, 10.) Phange Hiroshi, mumivu yavulu mwene ngo wexile Mbangi ya Jihova ku mwiji wê, wambe: “Kikubhonzo kumona kwila etwenyoso mu kilunga twala ni maka. Etu twejiya kwila, etwenyoso twamubhanga nguzu phala kusidivila Jihova, ni kwila tutena kuswinisa yó kumwiji wâ ene ngó amusidivila Jihova.”

7. O musambu ukukwatekesa kyebhi?

⁷ Samba ithangana yoso, tanga o Bibidya, nde muyônge. Eye utena kujikula o muxima phala kutangela kwa Jihova kyebhi kiwamudivwa. (1 Phe. 5:7) Phange ya muhatu amwixana Massiel wambe: “O kima kyabeta kota kyene mungikwatekesa kudibhana ni ibhidi yakudivwa ubheka, o kusamba kwa Jihova ni kudyonda.” Kyoso munzangala yú kyasolo kusidivila Jihova, mwene wexile mudivwa ubheka mukonda kumwiji wê mwene ngó wexile musidivila Jihova. Mwene wambe: “Mukidi Jihova Tata yami mwene, eme ngexile musamba izuwa yoso, ithangana yavulu mu kizuwa, ngexile mumutangela kyebhi ki ngamudivwa.”

8. O kutanga ni kuxinganeka mu Mak’â Nzambi kukukwatekesa kyebhi?

⁸ Tanga o Mak’â Nzambi, xinganeka mumusoso ulondekesa kuma Jihova wakuzolo. Phange Bianca, exile mu musebhulula kujindandu jê, wambe: “Kutanga ni kuxinganeka mumisoso ya Bibidya ni kumwenyu wajiselevende ja Jihova adibhana ni ibhidi kala o yami, kwangikwatekesa.” Sayi jiphange abhaka jivelusu ja Bibidya ja aximbakatekesa, kala Jisálamu 27:10 ni Izaya 41:10. Amukwa asola kwivwa o milongi ya yônge yongalavale mba kutanga o Bibidya. Kubhanga kiki kya akwatekesa kutululuka.

9. O kuya muyônge kyene mukukwatekesa kyebhi?

⁹ Bhanga yoso i utena phala kuya muyônge semana joso. O milongi ya yônge yandakuswinisa, eye wandatena kwjiya o jiphange jê. (Jihe. 10:24, 25) Massiel, twamutumbula kudima wambe: “Sumbala ngimukwa jisonyi maji ngaxindi o mbambe yakuya muyônge yoso ni kutambwijila muyônge. Kiki kyangikwatekesa kuzukama dingi kujiphange.”

10. Mukonda dyahi kima kyambote kubhanga ukamba ni jiphange mukilunga?

¹⁰ Bhanga ukamba ni jiphange mukilunga. Bhanga ukamba ni athu mukilunga atena kukulonga ima yavulu. Ene atena kukala adyakime mba jindenge jé, atena kukala ni ijila ki idifu ni yé. O Bibidya itulembalesa kwila o unjimu “wala ni yá a kuka kyá.” (Jobe 12:12)  O jiphange akuka kyá atena kudilonga ima yavulu ni minzangala mu kilunga. Jonata wexile mwadyakimi wa Davidi yamivu yavulu, maji kiki kikyafidisa kukala ni ukamba wambote mudya. (1 Sam. 18:1) Davidi ni Jonata adikwatekesa mudya phala kusidivila Jihova sumbala ni ibhidi yavulu. (1 Sam. 23:16-18) Phange Irina kumwji we mwene ngó wamusidivila Jihova, wambe: “Mukidi o jiphange jetu mu kilunga, atena kukala jitata, ni jiphange. Jihova utena kwa abhangesa kukala jindandu jitwabhidamena.”

11. Ihi itutena kubhanga phala kukolesa o ukamba wetu ni jiphange?

¹¹ Kubhanga makamba a ubhe kutena kubhonza bengebenge se eye umukwa jisonyi. Phange Ratna, mukwa jisonyi wadilongo o kidi sumbala ni izukutisu ya mwiji wê, wambe: “Eme ngabhingile kuxikina kwila ngabhindamena o kikwatekesu kya mwiji wami mu nzumbi.” Kitena kubhonza kuzwela kumuthu kyebhi kiwamudivwa, maji kyoso ki ukibhanga o muthu yú utena kukituka dikamba dyakazola. O makamba mê amesena kukuswinisa, kukukwatekesa, nekiki ene amesena kwila wa atangela phala n’ejiya kyebhi kyatena kubhanga kiki.

12. Kyebhi o ukunji utena kukukwatekesa kubhanga makamba ambote?

¹² O ukexilu umoxi wakubhanga makamba o kuboka ni akwetu. Carol, amutumbula kudima, wambe: “Kukala ni jiphange mu ukunji ni mu ikalakalu yengi yene mukilunga, kwangikwatekesa kukala ni makamba ambote. Mumivu yavulu Jihova wene mungikwatekesa bhukaxi kamakamba yâ.” Kima kyambote phala etu kyoso kitubhanga makamba mu kilunga. Jihova bhukaxi kamakamba metu, utuswinisa kyoso ki tuluwala, mukifika kyoso kitudivwa ubheka.—Jisa. 17:17.

13. Etwenyoso mu kilunga twala ni kikalakalu kyebhi?

¹³ Etwenyoso twala ni kikalakalu kyakubhangesa o kilunga kukala kididi kyakondama, kyatululuka, phala kikukale muthu udivwa ubheka. (Nzwá 13:35) O ima itubhanga ni ima ituzwela mukidi itena kuswinisa kyavulu akwetu! Tala yazwela phange yamuhatu: “Kyoso kingadilongo o kidi o kilunga kyadibhange mwiji wami. Eme kingejitena kukituka Mbangi ya Jihova se o kikwatekesu kya jiphange.” Ihi i utena kubhanga phala kukwatekesa yó amusidivila ubheka kumwiji phala nadivu kwila o kilunga kya azolo?

14. Ihi itutena kubhanga phala kukala ni ukamba ni jiphange ja ubhe mukilunga?

¹⁴ Sota kubhanga ukamba ni jiphange ja ubhe. Tutena kumateka ni kusangesa o jiphange ja ubhe mu kilunga. (Loma 15:7) Maji etu kitwamesena kwamenekena mukwatangela ngo: Eyo? Wala kyambote? Maji etu twamesena kukolesa o ukamba wetu ni ene mukubhita nawu kithangana. Kyenyiki, talatatala akwenu ni kilendu, londekesa kwila eye waswu. Sota kutendela o ibhidi yamudibhana nayu, kana kubhanga ibhwidisu ya atandanganyesa. Nange kitena kwabhonza kuzwela kyebhi kyamudivwa, kyenyiki, dilange phala kiwajijidike kuzwela kyebhi kyamudivwa. Muveji dya kiki, wazukama ni kilendu kyoso, bhanga ibhwidisu ni masunga, evwa ni mwanyu woso o itambwijilu yâ. Mukifika, eye utena kwa ebhwidisa se kyebhi ene kyeza mu kwijiya o kidi.

15. Kyebhi o Jikidistá akulu munzumbi kyatena kukwatekesa akwa mu kilunga?

¹⁵ O kixikanu kya athu oso mu kilunga kikola dingi kyoso kitulondekesa kwila twadiswu mudyetu, kiki kibhita dingi bengebenge  se o tufunga ni yó akulu mu nzumbi asuwa o jiphange. Melissa, amulongo o kidi kwala manya, tunde undenge, wambe: “Eme ngasakidila kyavulu o jiphange edile kala jitata jami mu nzumbi abhiti ithangana yavulu neme, angilondekesa kwila angiswu. Ithangana yoso ingabhindamene kuzwela ni muthu kwexile muthu phala kungivwa.” Phange Mauricio munzangala, waluwalele, wadivwile ubheka kyoso o muthu wamulongele o kidi, kyaxisa o kilunga kya Jihova, wambe: “O tufunga angilondekesa kwila ene angiswu, mukungikwatekesa ithangana yoso. Ene ithangana yoso exile muzwela neme. Ene exile mukalakala kumoxi neme m’ukunji, exile mungitangela o mbote yakatula mukudilonga o Bibidya ni kujokala malunda afiti kumoxi neme.” Kikale Melissa ni Mauricio ala musidivisu ya thembu yoso.

16-17. Ihi itutena kubhanga phala kukwatekesa akwetu?

¹⁶ Bhanga ima phala kukwatekesa akwenu. (Nga. 6:10) Leo, mukunji wa jixi jengi, wamusidivila dikanga dya mwiji wê, wambe: “Muveji javulu eye ubhidamena muthu ukulondekesa henda mukithangana kyatokala. Ngilembalala kyoso kingabhitile mukilwezu kya dikalu. Maji kyoso kingabhixila kubhata sayi dikaza, angixana phala kudya kama kubhata dyâ. Eme kingilembalala dingi o ima ingadi, maji ngilembalala kwila ene angivu ni henda yoso. Kudisukilu eme ngadivu kyambote!”

¹⁷ Etwenyoso twa wabhela kuya muyônge, kala o yônge ya ilunga, yamakota, mukonda etu twa wabhela kubhita ithangana ni jiphange jetu ni kudizwelesa o mbote itwakatula mu madiskulu. Maji Carol, twamutumbula kudima, wambe: “O ithangana ya yônge ya ilunga ni yamakota yene mungibhonza dingi.” Mukonda dyahi? Mwene wambe: “Sumbala eme ngene mukala mukaxi ka jiphange javulu, maji muveji javulu ene axikama ni jindandu jâ muxitu, kiki kingibhangesa kudivwa dingi ubheka.” Amukwa kyabhonza kukala mukyônge kya ilunga mba yamakota kyoso kyafunda kazola kâ. O kwila eye wejiya muthu wamudibhana ni ibhidi yiyi? O kwila utena kwixana muthu phala kutala ni enu o kyônge kya ilunga mba kyônge kyadikota kumoxi ni mwiji wé?

18. Kyebhi kitutena kukumbidila o mukanda 2 Kolindu 6:11-13, kyoso kituzalela akwetu?

 ¹⁸ Sota kubhita kithangana ni akwenu. Sota kubhita kithangana ni jiphange a maukexilu oso, bengebenge yó adivwa ubheka. Twamesena “[kujikula] o muxima wetu,” kotelele ku jiphange jiji. (Tanga 2 Kolindu 6:11-13.) Melissa, twamutumbula kudima, wambe: “Eme ngasangulukile kyavulu kyoso o jiphange kyexile mungixana phala kubhita kithangana kumoxi ni ene kubhata dyâ mba kubhanga njila ni ene.” O kwila sayi muthu mukilunga kyé u utena kumwixana mba kumuzalela kubhata dyé?

19. Bengebenge mukithangana kyebhi twatokala kukala ni jiphange jetu?

¹⁹ Sayi kithangana o jiphange jetu andabhindamena kwila tubhitanawu kithangana. Sayi jiphange kyabhonza kukala ni jindandu jâ kamubheza Jihova mu ithangana yamubhanga o jifesa jamundu. Akamukwa hanji aluwala dingi kyavulu kyoso kibhixila o kizuwa kyafu ndandu yakazola. Tulondekesa kwila twazolo o jiphange jetu mukwa “tambula konda” kyoso kitudibhakula phala kukalanawu mu ithangana yiyi yabhonzo.—Fil. 2:20.

20. Kyebhi o izwelu ya Jezú itusanga mudivulu dya Matesu 12:48-50, itukwatekesa kyoso kitudivwa ubheka?

²⁰ Sayi ima yavulu itena kubhangesa Kidistá kudivwa ubheka mu ithangana ni ithangana. Twatokala kutendela kwila Jihova wejiya, utendela kyoso kitudivwa kiki. Muveji javulu mwene utubhana o kikwatekesu kitwabhindamena bhukaxi ka jiphange jetu. (Tanga Matesu 12:48-50.) Tulondekesa o kisakidilu kyetu kwa Jihova mukubhanga yoso itutena phala kukwatekesa akwetu mu kilunga. Kabasa o kithangana kitwandadivwa kiki, etu nuka twandadivwa ubheka, mukonda Jihova wala jinga kumbandu yetu!