1-2. (a) Nanyi wexile Unise, ni ibhidi yahi yadibhana nayu kala mama? (b) Jimbulula o foto yakapa.

 SUMBALA o Bibidya ki ijimbulula o batizu ya Timote, tutena kuxinganeka o kusanguluka kwevu manyâ, Unise, mu kizuwa kyokyo. (Jisa. 23:25) Xinganeka o muxima wa Unise, wamutitila ni kisangusangu, mukumona mon’ê wala mu menya. Mwene wamukwolela ni kusanguluka kumoxi ni Loide, o kuku ya Timote, wala bhumbandu yê. Unise uhemena kyoso Timote kya mubonda mu menya. Mukithangana kyazangula Timote mu menya, Unise umateka kudila ni kisangusangu. Unise waditundu kyambote mukikalakalu kyabhonzo, kya kulonga Timote, kuzola Jihova ni Mon’ê Jezú Kidistu. Ibhidi yahi yadibhana nayu kyoso kyayi ni kulonga mon’ê?

² Kubhata dya Timote, oso kexile mubheza Jihova. Tatê wexile mukwa Ngelexa, manyâ ni kukwê, exile Jijudé. (Ika. 16:1) Timote nange wexile hanji mukitala kya kikumbi kyoso Unise ni Loide, kya kituka Jikidistá. Maji tat’ê ka kituka Kidistá. Njila yebhi yeji sola Timote? Nange mwene wexile kya ni kitala kyasoko phala kusola ubheka wê. O kwila mwene wejisola o ubhezelu wamakutu wa tat’ê? Weji kayela o ijila ya Jijudé yamulongo tunde undenge? Inga wejixikina o ubhezelu wa ubhe, mukukituka dixibulu dya Jezú Kidistu?

3. Kala kilondekesa Jisabhu 1:8, 9, kyebhi Jihova kyatala o nguzu ibhanga o jimama phala kukwatekesa o twana twâ kukala ni ukamba ni Jihova?

³ Kala Unise, lelu, o jimama mukilunga azolo we o miji yâ.  Ku ima yoso yamesena o kubhanga, o kyabetakota, o kukwatekesa o twana twâ kukala ni ukamba wambote ni Jihova. O Nzambi yetu, ubhana valolo ku nguzu yoso yabhanga. (Tanga Jisabhu 1:8, 9.) Ni kikwatekesu kya Jihova, jimama javulu atena kubhangesa o twana twâ kumuzola ni kumusidivila.

4. Ibhidi yahi idibhana nayu o jimama mu izuwa yalelu?

⁴ Ki kima kyayibha o mama kudibhwidisa mu ithangana ni ithangana, se mon’ê wandasola kusidivila Jihova, kala kyabhangele Timote. O jitata ejiya o ijijidiku yene mudibhana nayu o twana twâ, kumundu wa Satanaji. (1 Ph. 5:8) Jimama javulu, jamudibhana we ni kibhidi kya kusasa o twana ubheka wâ mba ni munumi kamubheza Jihova. Mu kifika, phange Lemba * wambe: “Mwadiwami tata yambote, udikila mwene o mwiji, maji kamesenene kwila, ngisasa o twana twetu kala Jimbangi ja Jihova. Ngadidi mu mivu yavulu, mu kubanza ngó se twana twami ejitena kubheza Jihova.”

5. Ihi itwandadilonga mu milongi yiyi?

⁵ Se eye umama mukilunga, utena we kuditunda kyambote kala kyaditundu Unise. Mu milongi yiyi, twandadilonga kyebhi ki utena kukayela o phangu ya Unise mu kusasa o twana twê, bhukaxi ka ima i uzwela ni ima i ubhanga. Twandamona we kyebhi Jihova kyatena kukukwatekesa.

6. Kala kilondekesa 2 Timote 3:14, 15, kyebhi Timote kya kituka Kidistá?

⁶ Kyoso Timote kyexile kamona ndenge, manyâ wabhangele yoso phala kumulonga o “Mikanda Ikôla,” kala kyexile mu itendela o Jijudé. Mu kidi, o kwijiya kwe kikuvudile, mukonda kejidile kima kyalungu ni Jezú Kidistu. Né kiki, yoso yadilongele Timote mu Mikanda Ikôla, yejitena kumukwatekesa kuxikina o ubhezelu wa Jikidistá. O kwila mwene wejikituka Kidistá? Kuma wexile munzangala, mwene wakexile ni ujitu wakusola, se wandakala Kidistá mba kana. Sé phata, Timote waxikina o ima ‘ya mwijidisa nayu kwila ya kidi’ yalungu ni Jezú, ku mbandu, mukonda dya nguzu ya manyâ. (Tanga 2 Timote 3:14, 15.) Unise wasanguluka kyavulu mu kumona kwila, waditundu kyambote mu kikalakalu kya kulonga mon’ê yalungu ni Jihova. Unise wakumbidila mwene o dijina dyê, dyatundu mu kizwelu kilombolola “mutolodi.”

7. Kyebhi Unise kyakwatekesa mone kukula mu nzumbi kyoso kyadibatizala?

⁷ O kima kyamukwa kyejibhanga Timote o kumubatizala.Maji Unise watandanganyele ni ima yejibhita ni Timote, kyoso kyeji mubatizala. Ihi yejisola kubhanga kumwenyu wê? O kwila wejidilunga ni makamba ayibha? O kwila wejimesena kuya muxikola ya mbanza ya Atena, ni kuxikina o milongi ya jifilozofu ja mbanza yenyoyo? O kwila wejikala mubhika wajimbote, mukungastala o kithangana, o nguzu ni unzangala wê mukusota o maumvwama? Unise kejitena kusola mu kididi kya Timote, maji wejitena kumukwatekesa. Kyebhi? Mwene wejitena kubhanga yoso, phala Timote kuzola Jihova ni muxima woso, ni kulondekesa kisakidilu mu yoso yabhangele Jihova ni Jezú phala o mwiji wê. O jimama jamusasa o twana ubheka wâ, ki ene ngó adibhana ni ibhidi. Né mwene se o tata ni mama ala mu kidi, kitena hanji kubhonza kutula o maka a Nzambi kumixima ya minzangala, phala akitute  jiselevende jafiyele ja Jihova. Ihi itena kudilonga o jitata kuphangu ya Unise?

8. Kyebhi o mama kyatena kukwatekesa munumyê wamusidivila Jihova, kudikila o ibhindamu ya twana?

⁸ Longa o Bibidya ku twana twê. Enu jiphange ja ahatu, se mwadi wê wamusidivila Jihova, ejiya kwila, Jihova wamesena kuma umukwatekesa kudikila o ibhindamu ya twana twenu. Ukexilu umoxi wakubhanga kiki, o kusokejeka o ima phala kubhanga o Ubhezelu ku mwiji, mu semana joso. Zwela ima yambote yalungu ni ubhezelu ku mwiji, xinganeka mu ima i utena kubhanga phala o ubhezelu ubhite ni kutululuka ni kusanguluka. Nange utena kukwatekesa mwadi wê kusokejeka o ima phala o ubhezelu. Kumbandu yengi, se umona kwila o twana twandakatula dingi mbote se adilonga o Bibidya mu divulu Sanguluka Katé Kuhádya ni Hádya!, utena kukalakala kumoxi ni mwadi wê mukulonga o twana ni ku akwatekesa.

9. Ihi itena kukwatekesa o jimama jamusasa o twana ubheka?

⁹ Sayi jiphange ja ahatu, éne mwene alongo o Bibidya kutwana twâ, amoxi mukonda exile musasa o twana ubheka wa, amukwa mukonda o munumi ki Mbangi ya Jihova. Se kiki kyamubhita neye, kana kukala ni hele yavulu. Jihova wandakukwatekesa. Longa o twana twe bhukaxi ka jifalamenda jene mutubhana o kilunga kya Jihova. Utena kwibhudisa ku jiphange jamukwa, ala kya ni uhete wakukalakala ni jifalamenda jiji mu ubhezelu kumwiji? * (Jisa. 11:14) Jihova utena kukukwatekesa kudizwelesa ni twana twe. Mubhinge kikwatekesu, phala utene kubhanga ibhwidisu yatokala ku twana twe, ene n’a kutangela yoso yamuxinganeka ni kyebhi kyamudivwa. (Jisa. 20:5) Phala kumateka kuzwela ni twana, utena kwa ebhwidisa kiki: ‘Kibhidi kyahi kyonene kiwamudibhana nakyu muxikola?

10. Mu ukexilu webhi dingi u utena kulonga moné yalungu ni Jihova?

¹⁰ Sota kithangana phala kulonga o twana yalungu ni Jihova. Zwela yalungu ni Jihova ni ima yavulu yabhange phala o mbote yê. (Mate. 6:6, 7; Iza. 63:7) Watokala kubhanga kiki bengebenge, se kiwamutena kulonga o Bibidya kwa monê kubhata. Phange Lemba, twamutumbula kudima, wambe: “O ithangana ya kuzwela o ima mu nzumbi, yatolo, kyenyiki, se imoneka, kitutokala kuyehela kubhite ngó. Twexile mu heba mba kukwata ulungu phala kutala o ibhangelu ya Jihova ni kuzwela we ima yavulu mu nzumbi. Kyoso twana twami kitwakuluku dingi, nga aswinisa kudilonga o Bibidya ubheka wâ.” Sota kuzwela we ima yambote yalungu ni kilunga kya Jihova ni jiphange. Kana kulongolola o tufunga. O ima i uzwela yene yandabhangesa se o twana tusota mba kana o tufunga, kyoso kyandabhindamena kikwatekesu.

11. Kala kilondekesa Tiyaku 3:18, mukonda dyahi kima kyambote kukala umukwa paze kubhata?

¹¹ Kala umukwa paze kubhata. Izuwa yoso sota kuzwela kwa mwadi wé ni twana twé kwila, eye wa azolo kyavulu. Xila mwadi wé mukuzwela ne, tendelesa o twana phala kumuxila we. Kyoso ki ubhanga kiki, kubhata kukala kutululuka, o kiki kikwatekesa o ana kwijiya dingi yalungu ni Jihova. (Tanga Tiyaku 3:18.) Tala o phangu ya Jozefi, muboki wathembu yoso ku Roménia. Mu undenge, tatê wabhonzesa o ima ku mwiji wê woso, phala kabheze Jihova. Jozefi wambe: “Mametu wabhange yoso phala tukale ni kutululuka  kubhata. Kyoso tat’etu kyexile mu thathamana kyavulu, mametu wexile mubhanga nguzu phala kumutalatala ni henda yoso. Kyoso kyexile mutonginina kwila, kyamutubhonza kubelesela ni kuxila tat’etu, mwene wexile mutanga n’etu Efezu 6:1-3. Mukusuluka, wexile mututangela o idifwa yambote ya tat’etu ni mukonda dyahi twatokalele mwene kumuxila. Kiki kyakwatekesa o mwiji wetu kukala ni paze.”

12. Kala kilondekesa 2 Timote 1:5, o phangu ya Unise yakwatekesa kyebhi Timote?

¹² Tanga 2 Timote 1:5. Unise wabhana phangu yambote kwa Timote. Mwene nange walongo kwa Timote kwila, o kixikanu tukilondekesa mu ibhangelu. (Tiy. 2:26) Timote watenene kumona kuma, manyâ wexile mu bhanga o ima mukonda dya kuzola Jihova. Timote wamono we kwila, kusidivila Jihova, kwexile musangulukisa manya. O phangu ya Unise yakwatekesa kyebhi Timote? Poxolo Phawulu watonginina kwila, Timote wexile ni kixikanu kala kya manyâ. Kiki ki kyabhiti mu kingoho, kana. Timote wakayela o phangu ya manya. Lelu we, jimama javulu jatena kubhixidisa o Mak’â Nzambi ku mixima ya jindandu ja “sé izwelu.” (1 Ph. 3:1, 2) Eye we utena kubhanga kiki. Kyebhi?

13. Mukonda dyahi o jimama jatokala kuta kupholo o ukamba wâ ni Jihova?

¹³ O ukamba wé ni Jihova watokala kukala kupholo dya ima yoso. (Mate. 6:5, 6) Kala kibhanga o jimama jamukwa, eye we wene muxisa ima yavulu kudima. Eye wene mungastala o kithangana, o kitadi, kate mwene kiwene muzeka kyasoko phala kudikila o twana twé. Maji kana kwehela o ima yiyi kukufidisa kukolesa o ukamba wé ni Jihova. Izuwa yoso, sota kithangana phala kusamba ubheka we, kudilonga o Bibidya ni kuya mu yônge semana joso. Mukubhanga kiki, wandazukama dingi kwa Jihova, wandabhana phangu yambote ku mwiji wé ni jiphange jamukwa.

14-15. Ihi iwadilongo ku phangu ya Lena, Madiya ni Nzwá?

¹⁴ Tala yazwela o minzangala yavulu, adilongo kuzola ni kuxila Jihova mukonda dya phangu ya jimama jâ. Lena, mon’a phange Lemba, wambe: “Kitwexile mutena kudilonga o Bibidya, se papa wexile kubhata. Maji mama wexile mubhanga yoso phala kitufonge muyonge. Sumbala kitwejidile ima yazongo yalungu ni Bibidya, o ibhangelu yê yangikwatekesa kukala ni kixikanu kyakolo. Ande dya kumateka kuya mu yônge, etu twejidile kyá kwila, kiki kyene mwene o kidi.”

¹⁵ O tata ya Madiya sayi ithangana wexile mu fidisa o mwiji woso kuya mu yônge. Madiya wambe: “Ngejiya jiphange javulu ja ahatu ala ni kuswina, mametu wala mwaxaxi ka ahatu yá. Mu undenge wami, ngexile mudituna kubhanga ima mukonda dya kutandanganya ni ixinganeku ya akwetu. Maji kumona o kuswina kwa mametu ni kyebhi kyexile muta Jihova kupholo kumwenyu wê, kwangikwatekesa kutolola o woma wa athu.” Nzwá ni mwiji wê, a afidisa kuzwela yalungu ni Jihova ni Bibidya kubhata dyâ, kwala tat’ê, wambe: “O kima kyangitula dingi kumuxima, o kumona kwila, mametu waxikina kuxisa ima yavulu kudima phala kusangulukisa papá, maji kaxikina kweha o henda yê kwa Jihova.”

16. Kyebhi o phangu ibhana o jimama itena kukwatekesa akwâ?

¹⁶ Enu mu jimama, lembalalenu kwila, o ima imubhanga itena kufunyisa akwenu. Kyebhi? O phangu ya Unise yaswinisa katé  mwene poxolo Phawulu. Mwene waxikinine kwila, o kixikanu kya kidi kya Timote, kya dyanga, “kyakexile” ni “Unise.” (2 Ti. 1:5) Kithangana kyebhi kya monene Phawulu o kixikanu kya Unise? Kiki kyabhiti nange, kyoso Phawulu kya bhangele o njila yadyanga kala mukunji wa jixi, mu mbanza ya Listra, kwene kwadisangele ni Loide ni Unise, yu wa akwatekesa kukituka Jikidistá. (Ika. 14:4-18) Xinganeka ngó. Kyoso Phawulu kyasonekena Timote, kwabhitile kya 15 dya mivu. Né kiki, Phawulu wexile mulembalala hanji Unise kala phangu yambote! Sé phata, Phawulu, nange ni jiphange jamukwa mu hama yadyanga, exile mumona Unise kala muhatu wa kixikanu. Se wamusasa mona ubheka wé mba kazola ké kamubheza Jihova, dyelela kwila, o ufiyele wé wamuswinisa oso akukondoloka.

17. Ihi iwatokala o kubhanga se mon’é kamuxikina yoso iwamumulonga?

¹⁷ Ihi itwamba, se mon’e kamesena kuxikina o ima iwamumulonga? Lembalala kwila, kubhinga kithangana phala kulonga o monandenge. Kala kyamulondekesa o foto, kyoso kitukuna mbutu, sayi ithangana tutena kudibhwidisa se yene yandakula mwene ni kwima ibundu. Sumbala ki utena kwijiya se yanda kwima ibundu mba kana, eye utena kubhanga yoso phala ku itekela. (Mál. 4:26-29) Kyene we kimoxi ni jimama. Sayi ithangana, ene anda dibhwidisa se o nguzu yamubhanga  yamukwatekesa mwene o twana twâ kuzola Jihova. Eye ki utena kusolela mu kididi kya twana twé. Maji se u alonga jinga kyambote, wanda kwa abhana o ujitu wakusola kukala makamba a Jihova.—Jisa. 22:6.

18. Kyebhi Jihova kyatena kukwatekesa o twana twé kukula mu nzumbi?

¹⁸ Tundé mu ithangana yasoneka o Bibidya, Jihova wakwatekesa kyá minzangala yavulu kukituka makamba mê. (Jisá. 22:9, 10) Mwene utena kukwatekesa we o twana twé kukula munzumbi, se kyene kyamesena. (1 Ko. 3:6, 7) Né mwene se twana twé kitwamusidivila Jihova ni muxima woso, mwene wandasuluka ni ku azola. (Jisá. 11:4) Kyoso kyandalondekesa kwila ala bhukaxi ka athu “a fwamena,” Jihova wanda kwa akwatekesa kukituka makamba mê. (Ika. 13:48; 2 Mal. 16:9) Mwene utena ku kukwatekesa kuzwela o kima kyatokala mu kithangana kyatokala phala kubhixidisa o maka ku mixima ya twana twê. (Jisa. 15:23) Jihova utena we kubhangesa phange ya diyala mba yamuhatu mu kilunga kumukwatekesa. Né mwene kyoso kyandakula, Jihova utena kulungulula o muxima wa mon’é n’a lembalala yoso iwamulongo mu undenge. (Nzw. 14:26) Jihova wandakubesowala kyavulu se ulonga o twana twé bhukaxi ka izwelu ni ibhangelu yé.

19. Mukonda dyahi utena kudyelela kwila Jihova ukuxikina?

¹⁹ O henda yakukwatela Jihova, ki ijila mu ima isola o twana twê, kana. Mwene wakuzolo, mukonda eye we wamuzolo. Se wamusasa o twana ubheka, Jihova wakanena kukala Tata phala o twana twé, ni dilemba dyê. (Jisá. 68:5) Eye ki utena kusola yandabhanga o twana twé. Maji se udyelela jinga mu kikwatekesu kya Jihova, anga ubhanga yoso i utena, Jihova wandakuxikina jinga.