1. Ihi itubhekela o kusanguluka kumuxima?

 JIHOVA wamesena kwila, etwenyoso tusanguluka. Tuzwela kiki mukonda o kusanguluka kubhanga mbandu ya kibundu kya nzumbi yê ikôla. (Nga. 5:22) Kuma o kubhana kota mukusangulukisa o kutambula ndenge, tukala ni kusanguluka kumuxima kyoso kitudibhakula mu ukunji wetu ni mukukwatekesa o jiphange jetu mu maukexilu avulu.—Ika. 20:35.

2-3. (a) Kala kilondekesa Ngalásya 6:4, ima yahi iyadi yandatukwatekesa kusanguluka mu sidivisu ya Jihova? (b) Ihi itwandadilonga mu milongi yiyi?

² Kala kya kisoneka mu Ngalásya 6:4, poxolo Phawulu watumbula ima iyadi yandatukwatekesa kukala ni kusanguluka. (Tanga.) Kyadyanga, twatokala kukala ni mbambe yakubhanga yoso itutena musidivisu ya Jihova. Se tubhanga yoso itutena, twandasanguluka jinga. (Mat. 22:36-38) Kayadi, kitutokala kudisokesa ni akwetu. Né mwene se kitwamutena kubhanga ima yavulu mukonda dya kukata, kukamba uhete mba jindunge, twatokala kusakidila Jihova. Yoso itwala nayu, mwéne watubhanayu. O kumbandu yengi, se akwetu aditunda dingi kyambote mu ukunji etu ndenge, twatokala kusanguluka, mukonda amuximana Jihova ni mauhete mâ, muveji dya kudifumanesa ene. Muveji dya kuzoka nawu mukusota se nanyi wabetakota, twatokala kudilonga ni ene.

³ Mu milongi yiyi, twandamona se ihi itena kutukwatekesa, se tuluwala mukonda kitwamutena kubhanga yoso itwamesenene mu sidivisu ya Jihova. Twandamona we kyebhi kitwatokala kukalakala ni mauhete utwala nawu, ni kyebhi kitutena kukatula mbote mu phangu ya akwetu.

4. Ihi itena kutuluwalesa? Bhana phangu.

⁴ Amoxi mudyetu, kamutena kubhanga dingi yoso yexile mubhanga m’ukulu, mukonda dya kukuka mba uhaxi. O kiki kitena kwa aluwalesa. Kiki kyene kyabhiti ni phange Carol. Mwene wexile ni ujitu wakusidivila mu ididi mwabhindamena aboki. Mu kithangana kiki, walongo o Bibidya ku 35 a athu, wakwatekesa athu avulu kudibhakula ni kudibatizala. Sé phata, phange Carol waditundu kyambote mu ukunji wê! Mu kubhita kithangana mwene wakate, kyenyiki, kexile dingi mutunda kubhata. Phange Carol wambe: “Ngejiya kwila, kingamutena dingi kubhanga ima yavulu mukonda dya uhaxi wami. Maji ngidivwa kwila, o ufiyele wami, wala hanji kala kiwexile kyoso kingadisanzele. Kifwa, kingamutena kubhanga yoso ingamesenene. O kiki kingiluwalesa.” Phange Carol wamesena kubhanga yoso yatena mu sidivisu ya Jihova. O kiki kima kyambote! Tutena kudyelela kwila, o Nzambi yetu ya henda ubhana valolo mu ukexilu yú.

5. (a) Se tuluwala mukonda kitwamutena dingi kubhanga yoso itwamesena, ihi itwatokala kulembalala? (b) Kala kilondekesa o foto, kyebhi o phange yadiyala kyabhange yoso yatenene tunde mu unzangala katé mu ukukilu?

⁵ Se waluwala mukonda kiwamutena dingi kubhanga yoso iwamesena, utena kudibhwidisa kiki: ‘Ihi yamesena Jihova kokwami?’ Jihova wamesena kwila, ubhanga yoso i utena kubhanga kindala kiki. Xinganeka mukifika kiki: Phange yamuhatu wala mu kitala kya 80 amivu, waluwala mukonda kamutena kubhanga dingi mu ukunji, yoso yexile mubhanga kyoso kyexile ni 40 amivu. Mwene ubanza kwila, kate mwene yoso yene mubhanga, ki isangulukisa Jihova. Maji o kwila kiki kidi mwene? Banza ngó mu maka yá. Se phange wabhange yoso yatenene kyoso kyexile ni 40 amivu, yu wasuluka ni kubhanga mu kitala kya 80 amivu, mu kidi mwene nuka wazozele mu kusidivila Jihova ni muxima woso. Se tumateka kudivwa kuma, o itwamubhanga mukilunga kiyasoko phala kusangulukisa Jihova, twatokala kulembalala kwila, Jihova mwéne wejiya o ima imusangulukisa. Se tu bhanga nguzu, kudisukilu Jihova wandatutangela: “Kyawabha!”—Sokesa ni Matesu 25:20-23.

6. Ihi itutena kudilonga ku phangu ya phange Madiya?

⁶ Twanda sanguluka dingi, se tulunga o muxima mu ima itutena kubhanga, muveji dya ima kitutena ku ibhanga. Tala o phangu ya phange Madiya, wala ni uhaxi umufidisa kubhanga dingi mu ukunji. Kudimatekenu watolokele o muxima, wexile mudivwa kwila, kexile ni valolo. Maji mukusuluka, Madiya wasolo kukwatekesa phange yamukwa mukilunga kyê, wexile we mukata. Phange Madiya wambe: “Ngasokejeka o ima phala kuboka ne, bhukaxi ka mutelembe wakafwetele ni kusoneka mikanda. Ithangana yoso ingexile mukalakala ne, mukuvutuka kubhata ngexile ni kisangusangu mukwijiya kwila, ngatena kukwatekesa phangyami yamuhatu.” Etu we tutena kubandekesa dingi o kisangusangu kyetu, se tulunga o muxima mu ima itutena kubhanga, muveji dya ima kitutena ku ibhanga. Maji, ihi itwamba se kitwamutena kubhanga dingi, mba twabhingi kubandekesa o uhete wetu mu ikalakalu yamukwa, musidivu ya Jihova?

7. Kitendelesu kyahi kyambote kyabhana Phetele ku Jikidistá?

⁷ Mu mukanda wê wadyanga, poxolo Phetele watendelesa o jiphange kwila, atokalele kuswinisa o jiphange jâ ni mauhete oso oso exile nawu. Phetele wasoneka: “Kuma kala  muthu mudyetu watambula uhete, akalakale nawu phala kusidivila akwâ kala selevende ya ngalasa ya Nzambi.” (1 Ph. 4:10) Kitutokala kukamba kukalakala ni mauhete metu, mukonda dya wôma, mukuxinganeka kwila se tukibhanga, o jiphange andakala ni lwimbi mba anda luwala. Se tukamba kukalakala ni mauhete metu mukonda dya wôma, kitwanda bhana kwa Jihova yoso itutena.

8. Kala kilondekesa 1 Kolindu 4:6, 7, mukonda dyahi kitutokala kudinanza mukonda dya mauhete metu?

⁸ Twabhingi kukalakala ni mauhete metu moso, maji twatokala kudilanga phala kitudinanze. (Tanga 1 Kolindu 4:6, 7.) Mukifika, nange wenemuditunda kyambote mukumateka kulonga o Bibidya. Eye kiwatokala kukala ni hele yakukalakala ni uhete yú! Maji twatokala kulembalala kwila, kitutokala kudinanza mukonda dya uhete wetu. Xinganeka kwila, waditundu kyambote mukuboka, eye wamateka kulonga o Bibidya. Eye wasanguluka kyavulu, wamesena kutangela o musoso yú ku jiphange mu kibuka kyenu kya kuboka. Maji kyoso ki udisanga nawu, kukala phange yamuhatu wamu atangela o kusanguluka kwê, mukonda watena kubhana kadivulu kumukwa dibhata. Mwene wabhana kadivulu, eye wamateka kulonga o Bibidya. Ihi iwandabhanga? Eye wejiya kwila o musoso wé utena kuswinisa o kibuka kyoso, maji usola kukingila phala kwa atangelawu mu kithangana kyengi kyatokala, phala ki uluwalese phange yamuhatu wabhana o kadivulu. Kubhanga kiki kulondekesa henda. Maji kiki kikilombolola kwila, kiwanda sota dingi kumateka kulonga o Bibidya ku athu. Eye wala ni uhete, kyenyikiphe, kalakala nawu!

9. Kyebhi kitwatokala kukalakala ni mauhete metu?

⁹ Twatokala kulembalala kwila, kabasa uhete utukala nawu, Nzambi mwene watubhanawu. Twatokala kukalakala nawu phala kuswinisa o jiphange, muveji dya kusota o mbote yetu. (Fil. 2:3) Kyoso kitubhanga o vondadi ya Nzambi bhukaxi ka nguzu ni mauhete metu, twandakala ni kisangusangu; ki mukonda dya kutúnda akwetu mba kubhanga dingi ene ndenge, kana, maji mukonda twamuximana Jihova ni mauhete metu.

10. Mukonda dyahi ki kima kyambote kudisokesa ni akwetu?

¹⁰ Se muthu kadilange, utena kumateka kusokesa o ima yabhanga kyambote ni ima akwa k’ejiya ku ibhanga kyambote. Mukifika, phange utena kukala ni uhete wakubhanga madiskulusu. Kyenyikiphe, kumuxima wê, utena kumateka kubanza kwila, mwene wabetakota,  o phange yamukwa kala ni uhete wavulu wakubhanga madiskulusu ndenge. Maji o phange kala ni uhete wavulu wakubhanga madiskulusu, utena kuditunda kyambote mukuzalela akwa, kulonga o twana twê, ni kuboka. Tusanguluka kyavulu mukwijiya kwila, bhukaxi ketu twala ni jiphange javulu jamala ni ja ahatu, ene musidivila Jihova ni kukwatekesa akwa bhukaxi ka mauhete ni jindunge jâ!

11. Mukonda dyahi twatokala kubhanga yoso phala kukayela o phangu ya Jezú?

¹¹ Sumbala kitutokala kudisokesa ni akwetu, tutena kukatula mbote mu phangu ya jiselevende ja fiyele. Mukifika, tala o phangu ya Jezú. Etu tu akwa ituxi, maji tutena kudilonga ima yavulu ku idifwa ni ima yabhangele mwene kyoso kyexile mu ixi. (1 Ph. 2:21) Se tusota kukayela kyambote o phangu ya Jezú, twandasidivila dingi kyambote Jihova, twandaditunda kyambote mu ukunji wetu.

12-13. Ihi itutena kudilonga ku phangu ya Sobha Davidi?

¹² Mu Mak’â Nzambi, tusangamu misoso ya ahatu ni mayala afiyele ututena kukayela o phangu, sumbala exile we akwa ituxi. (Jih. 6:12) Xinganeka mu phangu ya Sobha Davidi, amwixanene kwala Jihova kwila, wexile “diyala dya sangulukisa o muxima wami” mba “muthu wa ngi zelela ku muxima,” kala kyamba o versão yamukwa. (Ika. 13:22) Davidi kexile muthu wayuka. Mwene watondala we lwavulu. Ne kiki, mwene phangu yambote phala etu. Mukonda dyahi? Mukonda kyoso kyamubazela, mwene kasoto kudizokela. Maji waxikina o kibazelu kya nguzu kyamubhana, wadyela o ituxi yê ni muxima woso. Kyenyiki, Jihova wamuloloka.—Jisá. 51:3, 4, 10-12.

¹³ Tutena kukatula mbote mu phangu ya Davidi, mukudibhwidisa: ‘Kyebhi kingidivwa kyoso kyangibazela? O kwila ngene muxikina o itondalu yami sé kulaleka, inga ngisota kudizokela? O kwila ngenemusota kutatela akwetu? Ngibhanga nguzu phala kingite dingi o itondalu yami yokulu?’ Utena kudibhanga o ibhwidisu kala yiyi, kyoso ki utanga o misoso ya jiselevende jamukwa a atumbula we mu Bibidya. O kwila ene adibhana we ni ibhidi ingamudibhana nayu eme? Idifwa yebhi yambote yalondekesa ene? Mukutanga, utena we kudibhwidisa: ‘Kyebhi kingitena kukayela kyambote o phangu ya selevende yiyi yafiyele ya Jihova?’

14. Kyebhi kitutena kukatula mbote mu phangu ya jiphange jetu?

¹⁴ Tutena we kukatula mbote mukutala o  jiphange jetu, kikale minzangala, kikale adyakime. Mukifika, utena kuxinganeka phange wamukolokota ni ufiyele woso mu ibhidi, kala o ijijidiku ya jikoleka ja xikola, izukutisu ya jindandu ni kukata? O kwila umona idifwa yambote kwa phange yiyi, iwamesena kukayela? Kutala o phangu yê yambote, kwandakukwatekesa kukolokota mu ibhidi iwene mudibhana nayu. Tusanguluka kyavulu mu kukala ni jiphange jamala ni ja ahatu, atubhana phangu yambote.—Jih. 13:7; Tiy. 1:2, 3.

15. Kitendelesu kyebhi kyabhana poxolo Phawulu kitukwatekesa kusuluka mukusanguluka mu sidivisu yetu kwa Jihova?

¹⁵ Phala kukala ni muxima umoxi ni kutululuka mukilunga, kala muthu mudyetu watokala kubhanga yoso yatena. Dilonge o phangu ya Jikidistá kuhama ya dyanga. Ene exile ni ikalakalu ni maujitu avulu. (1 Ko. 12:4, 7-11) Maji kiki ki kya abhangesa kudisokesa mba kuzoka ni kudiwanuna mudya. Muveji dyakiki poxolo Phawulu wa aswinisa phala kala muthu mudya kubhanga yoso yatenene phala “kukolesa o mukutu wa Kidistu.” Phawulu wasonekena akwa Efezu: “Kyoso kala mbandu ya mukutu ikumbidila kyambote o kikalakalu kyê, ikwatekesa o mukutu kukola dingi. Kyenyiki o mukutu woso uswina mu henda.” (Efe. 4:1-3, 11, 12, 16) O yó akayela o kitendelesu kya Phawulu abheka kutululuka mu kilunga ni kukala ni muxima umoxi. O Jikidistá jakidi lelu abhanga wa kyenyiki.

16. Ihi itwatokala kusola kubhanga? (Jihebelewu 6:10)

¹⁶ Bhanga yoso phala kudisokese ni akwenu. Muveji dya kiki kayela o phangu ya Jezú, bhanga yoso phala kukayela o idifwa yê. Katula mbote mu phangu ya athu akixikanu, a atange mu Bibidya ni a izuwa yetu. Mukiki, suluka ni kubhanga yoso i utena, dyelela kwila Jihova ‘Nzambi wayuka, kyenyiki mwene kanda jimba o kikalakalu kyé.’ (Tanga Jihebelewu 6:10) Suluka mukusanguluka mu sidivisu yé kwa Jihova, mu kwijiya kwila mwene wasanguluka we mukumona yoso i utena o kubhanga.