O kulôka kutena kulombolola “kukanena mba kubhanga polomesa. Muveji javulu, o muthu ukibhanga, utumbula Nzambi . . . kala mbangi.” O kulôka kuku atena kukubhanga mu izwelu mba isoneku mu mukanda.

Amoxi atena kuxinganeka kwila, o kulôka kituxi, mukonda Jezú wambe kwila: “Kana kulôka mu kima kyoso-kyoso, . . . Maji o kizwelu kyenu kya kwila kyene, kikale kyene, kana, kana, mukonda kima kyoso ki dibandekesa-ku kyatundu kwa Kadya-phemba.” (Mat. 5:33-37) Mukidi, Jezú wejidile kwila, mu kukumbidila o Kitumu kya Mozé, sayi ithangana akwa Izalayele abhingile kubhanga iloko. Avulu bhukaxi ka jiselevende ja fiyele ja Nzambi m’ukulu, abhangele iloko. (Dim. 14:22, 23; Mak. 22:10, 11) Jezú wejidile we kwila, katé mwene Jihova wabhangele iloko. (Jih. 6:13-17) Kyenyiki, Jezú kexile muzwela kwila, mu ithangana yoso kitutokala kulôka, kana. Muveji dya kiki, mwene wamesenene kuzwela kuma, twatokala kudilanga phala kituloke mu kama koso ka kambe o valolo. O kukumbidila yoso ituzwela, kima kikôla, twatokala kukumbidila yoso itukanena, sé kufula.

Ihiphe iwatokala kubhanga, se akubhinga phala kulôka? Kya dyanga, sota kutonginina se wandatena kukumbidila yoso iwandazwela mu kiloko. Se wala ni phata, kana kulôka. O Mak’â Nzambi atudimuna: “Kota ku kamba kubhana polomesa, kwindi i wabhana anga ulémbwa ku ibhanga.” (Ndo. 5:5) Kya kayadi, dilonge o ijila ya Bibidya yalungu ni maka uwandabhinga kulôka. Mukusuluka, kayela o kitongolwelu kyé kyolonge kyambote. Yebhi o ijila yiyi ya Bibidya?

Sayi iloko yalungu ni vondadi ya Nzambi. Mukifika, o Jimbangi ja Jihova ene mubhanga kikanenu kyoso kya kazala. O ikanenu yiyi, kifwa, ukexilu umoxi wa kulôka. Bhupholo ya Jihova ni athu amukwa, o dibhanga ni ngayala, adikanena kwila, andadizola, kudilanga ni kudixila mudyâ “kumwenyu wa woso.” (Sayi makaza nange abhanga o kikanenu kiki ni izwelu yengi. Né kiki, ene we akanena bhupholo ya Nzambi.) Mukusuluka, ene akituka diyala ni muhatu akazala, atena kukala kumoxi ku mwenyu wâ woso. (Dim. 2:24; 1 Ko. 7:39) O ikanenu ibhanga o athu kyoso kya kazala, yatokala mwene, yalungu ni vondadi ya Nzambi.

Sayi iloko ki yalungu ni vondadi ya Nzambi. O Kidistá yakidi, kandaxikina kulôka, mukukanena kwila, wandakwata uta phala kuzokela o ixi yê mba kudituna o kixikanu kyê. Kubhanga kiki, kubhumukina o itumu ya Nzambi. Yalungu n’etu tu Jikidistá, o Bibidya yamba: “Ki mutokala  ku mundu.” Kyenyikiphe, kitutokala kudita mu kavwanza ni ita ku mundu.—Nzw. 15:19; Iza. 2:4; Tiy. 1:27.

Sayi iloko, o Kidistá mwéne watokala kusola bhukaxi ka kitongolwelu kyê. Sayi ithangana twabhingi kuxinganeka kyambote mu kitendelesu kya Jezú kya kubhana “kwa Sézalu o ima ya Sézalu, maji kwa Nzambi, o ima ya Nzambi.”—Luk. 20:25.

Mukifika, xinganeka Kidistá wamesena kutalatala bilhete mba pasaporte, anga utonginina kwila, phala ku itambula watokala kulôka mu kukanena kwila, wandakalakala nayu kyambote. Se mu ixi yiyi o kiloko kiki kilombolola kubhanga kima kibhukumukina o ijila ya Nzambi, o kitongolwelu kyê kyolonge kyambote, ki kyanda mwehela kulôka. Maji o jinguvulu, jitena kuxikina kulungulula o izwelu ya kiloko, phala o Kidistá atene kukibhanga ni kitongolwelu kyazele.

Kutumbula kiloko kyengi kyosokejeke, kitena kulunga ni kijila kitusanga mu Loma 13:1, kyamba kiki: “Athu oso atokala kutumaka o maungana.” Kyenyikiphe, o Kidistá wandatonginina kwila, ki kituxi kulôka, mukukanena kubhanga kima kyamubhingi we Nzambi.

Kima kyambote kubelesela we o kitongolwelu, se akubhinga phala kukwata kima mba kubhanga kijimbwete mu kithangana kya kulôka. M’ukulu akwa Loma ni ji Sita, mu kulôka, exile mukwata ji jibhata. Mu kubhanga kiki, exile mu hambelela o nzambi ya ita, kwila muthu yo wamuzwela mwene o kidi. Akwa Ngelexa exile muleka o lukwaku bhulu mu kulôka. Exile mubhanga kiki mukonda axikinine kwila, kudyulu kwala nguzu itena kumona yoso izwela ni ibhanga o athu mu ngongo, oso akabhakula jikonda ku nguzu yiyi.

O selevende ya Jihova, kandaxikina kulôka ni kima mba kijimbwete kya ixi, kyalungu ni ubhezelu wamakutu. Abha se mu inzo ya kufundisa, akubhinga phala kuta o lukwaku kuthandu a Bibidya phala kulôka, ni ulondekesa kwila, o umbangi wé wakidi mwene? Eye utena kusola kuta o lukwaku, mukonda, mu Bibidya mwala misoso ya jiselevende ja fiyele abhangele iloko ni ijimbwete. (Dim. 24:2, 3, 9; 47:29-31) Kima kyambote kulembalala kwila, se uloka, wamukanena kwa Nzambi kwila, yoso iwandazwela, kidi mwene. Watokala kudipelepalala phala kutambwijila ni kidi kyoso, o ibhwidisu yandakubhanga.

Kuma tubhana valolo ku ukamba wetu ni Jihova, twatokala kusamba ni kuxinganeka kyambote mu maka alungu ni kulôka; tukibhanga ni kitongolwelu kyazele, tudilanga phala kitubhukumukine o ijila ya Bibidya. Se usola kulôka, bhanga yoso phala kukumbidila o ima iwakanena.—1 Ph. 2:12.