1. Jimbulula ihi yabhiti kyoso Jezú kyabhange o madiwanu mê a dyanga.

 XINGANEKA kwila twala mu muvu wa 29, kudimatenu dya ukunji wa Jezú mu ixi. Jezú ni man’yâ Madiya ni amoxi ku maxibulu mê, a exana phala kuya mu fesa ya ukaza mu mbanza ya Kaná, yala ku mbandu yathunda ya mbanza ya Nazale, mwakudila Jezú. Nange Madiya wa mukwatekesa we mu fesa, mukonda mwene dikamba dya mwiji wa dikaza. Maji mukusuluka o vinyu mu fesa ya ukaza yabhu, kiki kyeji tena bhekela jisonyi javulu ku mwiji ni kudikaza. Nange o athu a exanene ku fesa avudile. b Bhenyobho Madiya anga uya ni lusolo kwa Jezú anga umwambela: “Ene kala dingi ni vinyu.” (Nzw. 2:1-3) Ihi yabhange Jezú? Mwene wabhange kima kya madiwanu, ‘wakitula o menya mu vinyu yambote.’—Nzw. 2:9, 10.

2-3. (a) Madiwanu ebhi abhangele Jezú? (b) Ihi itwanda dilonga mu milongi yiyi?

² Mu madiwanu oso abhange Jezú kyoso kexile mu ixi. c Bhukaxi kakutena kwexilenaku, mwene wabhange madiwanu phala kukwatekesa athu avulu. Mu kifika, sayi kizuwa bhukaxi ka madiwanu, Jezú wadisa 5.000 ja mayala, mukusuluka mu kizuwa kyamukwa dingi wadisa 4.000 ja mayala, se tutaku we o ahatu ni ana ndenge, nange anda tenesa 27.000 a athu ndenge. (Mat. 14:15-21; 15:32-38) Mu ithangana iyadi yenyoyo, Jezú wasakele we jihaxi javulu. (Mat. 14:14; 15:30, 31) Xinganeka  ngo o kisangusangu kyakexile nakyu o athu enyó mu kwasaka ni kwadisa kwa Jezú bhukaxi ka madiwanu!

³ Etu tutena kudilonga kyavulu ni madiwanu abhangele Jezú. Mu milongi yiyi twandadilonga madisá alungu ni madiwanu a Jezú, anda kolesa o kixikanu kyetu. Mukusuluka twandamona kyebhi kitutena kukayela o kulenduka ni henda yalondekesa Jezú kyoso kyabhange o madiwanu enya.

4. O madiwanu abhangele Jezú atulonga madisá alungu ni nanyi?

⁴ O madiwanu a Jezú atulonga madisá kana ngó alungu ni mwene maji alungu we ni Jihova. Tuzwela kiki mukonda Jihova mwene wamubhana o kutena kwoso phala kubhanga o madiwanu enya. Ikalakalu 10:38, yamba: “Nzambi kya mu undu ni nzumbi ikôla ni kutena. Mwene wende mu jimbandu joso mu kubhanga o mbote ni kusaka yó akexile mwatalesa hadi kwa Dyabhu, mukonda Nzambi wakexile-nê.” Lembalala kwila Jezú wakayela ni kuyuka kwoso o ukexilu wa kuxinganeka wa Tat’ê mu yoso yabhange ni yazwela, kate mwene kyoso kyexile mubhanga o madiwanu. (Nzw. 14:9) Tala madisá atatu ututena kudilonga mu madiwanu a Jezú.

5. Ihi yabhangesa Jezú kubhanga madiwanu? (Matesu 20:30-34)

⁵ Jezú ni Tat’ê Jihova, atuzolo kyavulu. Kyoso Jezú kyexile mu ixi, mwene walondekesa kuma wazolele kyavulu o athu mukubhanga madiwanu phala kusosolola o hadi yâ. Sayi kizuwa mayala ayadi exile ifofo, adyondo kwa Jezú phala kwakwatekesa. (Tanga Matesu 20:30-34.) Jezú “henda ya mu kwata” yu wa asake. O “henda” yiyi yadikota yalondekesa Jezú, yene we yamubhangesa kudisa o athu exile ni nzala ni kusaka o diyala wexile ni dibhute. (Mat. 15:32; Mál. 1:41) Tutena kudyelela kwila Jihova, o Nzambi mukwa “henda,” ni Mon’ê Jezú Kidistu atuzolo kyavulu, ni kwila adivwa kyayibha kyoso kya tumona kutala hadi. (Luk. 1:78; 1 Ph. 5:7) Ki twala ni phata kwila, Jihova ni Jezú amesena kyavulu kuzubha o maka oso ene mubhekela hadi ku athu oso mu ngongo!

6. Jihova wabhana o kutena kwa Jezú kwa kubhanga ihi?

⁶ Jihova wabhana o kutena kwa Jezú, phala kuzubha o maka oso mu ngongo. O madiwanu abhange mwene alondekesa kwila, Jezú wala ni kutena kwakuzubha o maka oso kitwejitena kwazubha mu nguzu yetu. Mu kifika, mwene wala ni kutena kwa kutubhulula ku ituxi ni ku ibhidi yê yetu yoso, kala o mauhaxi ni kufwa. (Mat. 9:1-6; Lom. 5:12, 18, 19) O madiwanu abhange Jezú alondekesa kwila mwene utena “kusaka o mauhaxi moso” kate mwene ni kufukununa o athu afu. (Mat. 4:23; Nzw. 11:43, 44) Mwene wala we ni kutena kwa kufidisa itembwe yamakota, ni kukwatekesa o athu ene mwazukutisa ku madimonyo. (Mál. 4:37-39; Luk. 8:2) Tusanguluka kyavulu mu kwijiya kwila Jihova wabhana o kutena kwoso kuku kwa Mon’ê Jezú!

7-8. (a) O madiwanu a Jezú atubhana kidyelelu kyahi? (b) Madiwanu ebhi u wamukingila ni hanji yoso?

⁷ Tutena kudyelela kwila, o Utuminu wa Nzambi wanda zubha o hadi yoso mu ixi. O madiwanu abhange Jezú kyoso kyexile mu ixi, alondekesa o ima yandabhanga mwene kala Sobha ya Utuminu wa Nzambi mu ukexilu wabeta dingi kota o yabhangele mu ukulu ndenge. Tala ngo o mabesá utwanda tambula mu utuminu wa Jezu Kidistu. Twanda kala ni sawidi yayuka, mukonda Jezú wanda zubha o mauhaxi oso ni unema woso wene mubhekela o hadi ku athu. (Iza. 33:24; 35:5, 6; Dij. 21:3, 4) Seku muthu dingi wandatala hadi  ni nzala mba wanda dibhana ni ibhidi ijila mu mavuwa. (Iza. 25:6; Mál. 4:41) Twanda sanguluka kyavulu mukutambulula o jindandu jetu ni makamba afwile anda kwafununa. (Nzw. 5:28, 29) Madiwanu ebhi anda bhita ku mundu wa ubhe u wamukingila ni hanji yoso?

⁸ Jezú walondekesa o kulenduka ni henda yavulu mukubhanga madiwanu, etu we twatokala kukayela o idifwa yiyi. Twanda mona phangu jiyadi, kya dyanga tumateka ni fesa ya ukaza yabhiti mu mbanza ya Kaná.

9. Ihi yabhange Jezú mu fesa ya ukaza? (Nzwá 2:6-10)

⁹ Tanga Nzwá 2:6-10. Kyoso o vinyu yabhu mu fesa ya ukaza, o kwila Jezú amujijidika phala kubhanga kima? Kana. Ki kwexile kikanenu kyexile mulondekesa kwila o Mexiya weji bhanga madiwanu akubhangesa kwila o menya akituka vinyu. Maji xinganeka ngo bhofele kyebhi ki weji divwa se mu fesa ya ukaza wé kimwala dingi kima phala o athu kunwa. Tutena kumona kwila Jezú wakwatela henda ku mwiji, benge benge o dikaza, mwene kamesenene kwila akwata jisonyi. Kyenyiki, kala kitwamono ku dimatenu dya milongi, mwene wabhenge madiwanu. Mwene wabhangesa 390 a jilitulu ja menya ku kituka vinyu yambote. Mwene wabhange vinyu yavulu, nange phala o mbandu yeji subhuka ikale phala kizuwa kyengi mba phe phala ku isumbisa o kitadi phala kukwatesa o dikaza. Se phata o dikaza adivu kyambote ni kikwatekesu kya bhana Jezú!

10. Ima yebhi itusanga mu musoso wala mu divulu dya Nzwá kibatulu 2? (Tala we ofoto.)

 ¹⁰ Tutonginine dingi bhofele o musoso utusanga mu kibatulu kya 2 mu divulu dya Nzwá. Eye wamono kwila Jezú kimwene wezalesa o masanga ni menya? Muveji dyakudisotela fuma, Jezú wabhingi ku jiselevende phala kwizalesa o masanga. (Velusu 6, 7) Kyoso kyabhangesa o menya kukituka vinyu, Jezú kakatulako tuvinyu yu watwambata kumutwameni wa fesa. Muveji dya kiki mwene wabhingi ku jiselevende, phala kubhanga kiki. (Velusu 8) Jezú kakwata we kopho ya vinyu yu wa ilondekesa ku athu oso ni kuzuwela, ‘Lolenu o vinyu yiyi ingabhange!’

11. Ihi itutena kudilonga ku madiwanu a Jezú?

¹¹ Ihi itutena kudilonga ku madiwanu a Jezú alungu ni ku abhangesa o menya kukituka vinyu ? Tudilonga disá dyakulenduka. Jezú kadizangeleka ni madiwanu abhangele; mu kidi mwene nuka wadizangeleka mu ima yoso yexile mubhanga. Muveji dyakiki Jezú wexile muthu walenduka, mwene wexile mubhana o kijingu kyoso kwa Tat’ê. (Nzw. 5:19, 30; 8:28) Se tukayela o phangu ya Jezú mu kukala tu athu alenduka, kitwanda dizangeleka mukonda dya kima kyoso kyoso kitubhanga. Kabasa kima kitubhanga mu sidivisu ya Jihova, ki twatokala kudisotela kijingu, muveji dyakiki tubhana o kijingu kyoso kwa Nzambi yetu Jihova. (Jel. 9:23, 24) Mwéne watokala kutambula o kijingu. Ki tweji bhanga kima kyoso kyoso se o kikwatekesu kya Jihova.—1 Ko. 1:26-31.

12. Kyebhi dingi kitutena ku kayela o phangu ya kulenduka ya Jezú? Bhana phangu.

¹² Tumone ukexilu wamukwa dingi ututena ku kayela o phangu ya kulenduka kwa Jezú. Xinganeka mu kifika kiki: Kafunga ubhita ithangana yavulu mukukwatekesa mukwakexi wa tufunga ku pelepalala o diskulusu dyê dya dyanga. Mukonda dyakiki, o munzanga yó ubhanga diskulusu dyambote, enoso mukilunga asanguluka kyavulu. Kyoso kyabhu o kyônge, sayi phange watangela ku kafunga: ‘O manu Nganji wabhange diskulusu dyambote, ki kyene?’ Nange o kafunga weji zuwela, ‘kyene mwene, maji eme ngabhiti ne ithangana yavulu ni kumukwatekesa’? Maji kyeji fwama dingi se o kafunga uzwela: ‘Kyene mwene, ngasanguluka muku mwivwa!’ Se tukala tu athu alenduka, kitwanda sota kutambula kijingu mu ima yambote itubhanga phala akwetu. Muveji dya kiki twanda sanguluka mu kwijiya kwila Jihova umona o ima itubhanga ni kwila uyibhana valolo. (Sokesa ni Matesu 6:2-4; Jih. 13:16) Sé phata etu tusangulukisa kyavulu Jihova kyoso kitukayela o phangu ya Jezú ya kulenduka.—1 Ph. 5:6.

13. Ihi yamono Jezú kyoso kyazukama ku mbanza ya Nayíne, ni ihi yabhange mwene? (Luka 7:11-15)

¹³ Tanga Luka 7:11-15. Mu ukunji wê mu ixi Jezú wende njila katé ku Nayíne, o mbanza yiyi yexile ku Ngalileya kwazukamene o mbanza ya Suneme. Hama vwa a mivu kudima, o polofeta Elija wafukunwine o mona amutudi mu mbanza yenyi. (2 Jis. 4:32-37) Kyoso Jezú kyayi ni kuzukama ku dibhitu dyambanza ku Nayíne, mwene umona athu amutunda mu mbanza amuya mufunda kimbi. Kyokyo kyexile kithangana kyakuluwala, mukonda o muthu exile muya mumufunda, mona umoxi yelele a mutudi. Maji o mama wa mona yú kexile ubheka, mwene wexile kumoxi ni athu avulu atokalele mu mbanza. Jezú wimanesa o athu anga ubhanga kima o mutudi nuka weji kijimba, mwene wafukununa o mona! Didi o difukunukinu dya dyanga mu maufukunukinu  atatu abhangele Jezú osoneke mu divulu dya Matesu, Máluku, Luka ni Nzwá.

14. Maka ebhi utusanga mu kibatulu 7 kya divulu dya Luka? (Tala we ofoto.)

¹⁴ Tutonginine dingi bhofele o musoso utusanga mudivulu dya Luka kibatulu 7. Tala kuma Jezú “wamono” o muhatu mukusuluka “wa mu kwatela henda.” (Velusu 13) Nange Jezú wamono o muhatu wexile mudila ku mbandu ya kimbi kyexile mu kwambata, yú wa mukwatela henda. Maji Jezú ka kwatela ngó henda ku muhatu yú, muveji dya kiki mwene walondekesa o henda yiyi. Mwene wazwela ni muhatu ni kilendu kyoso, yú wamwambela: “Kana kudila dingi.” Mukusuluka Jezú wabhange kima phala kumukwatekesa, mwene wafukununa o munzangala yú “wa mubhana kwa many’â.”—Velusu 14, 15.

15. Ihi itwadilongo ku madiwanu a Jezú?

¹⁵ Ihi itutena kudilonga mu madiwanu a Jezú alungu ni difukunukinu dya mona amutudi? Twatokala kulondekesa henda kwa yó afundu ndandu ya kazola. Kidi kwila, etu ki tutena kufukununa muthu. Maji kala kyabhange Jezú, etu we twatokala kutala kyambote o athu ni kwalondekesa o henda. Tutena kulondekesa o henda mu kuzwela mba kubhanga kima kitena kwakwatekesa, ni kwakonda o malamba. d (Jisa. 17:17; 2 Ko. 1:3, 4; 1 Ph. 3:8) Né mwene tu izwelu mba ima yofele itubhanga, itena kwakwatekesa kyavulu.

16. Kala kilondekesa ofoto, ihi iwadilongo ku musoso wa mama wafundile mon’ê wa muhatu?

¹⁶ Tala o musoso yu. Mivu kudima mu kyônge mukithangana kya kwimba, sayi phange ya muhatu, wamono mama wexile mudila. O mwimbu wexile muzwela yalungu difukunukinu, kikwabhitile luwa tembu yavulu o mama wafundile mon’ê wamuhatu wexile hanji munzangala. Sé kulaleka, o phange ya muhatu wazukama kwa mama wexile mudila, wamute o lukwaku ku kisuxi yu wembi ne katé kudisukilu dya mwimbu. Kupholo dya kwenda o mama wambe: “Eme ngadivu kwila, angizolo kyavulu ku jiphange jami ja mayala ni ja ahatu.”  Mwene wa sangulukile kyavulu mu kuya mu kyônge. Mwene wambe dingi: “O kikwatekesu kyetu kyala bhabha bhu kididi kya Ubhezelu.” Tutena kudyelela kwila Jihova umona, anga ubhana valolo katé mwene mu ima yofele itubhanga phala kulondekesa henda kwa yó afundu dandu yakazola, ya ala ni ‘kikote ku muxima.’—Jisá. 34:18.

17. Ihi itwadilongo mu milongi yiyi?

¹⁷ Etu tutena kukatula mbote yavulu mukutokwesa o misoso yalungu ni madiwanu abhangele Jezú. O madiwanu ya alondekesa kwila Jihova ni Jezú atuzolo kyavulu, ene atudyelelesa we kwila, o ikanenu yoso ya Nzambi yalungu hadya, kwakambe ngó yanda dikumbidila, kyoso o Utuminu wa Nzambi wanda mateka kutumina o ixi. Mu kudilonga o misoso yiyi tutena kuxinganeka kyebhi ki tutena kukayela o idifwa ya Jezú. Mukonda dyahi kukatula kithangana phala kudilonga o madiwanu amukwa abhange Jezú kikale ubheka we mba ku ubhezelu ku mwiji? Tala o ima ya ubhe i utena kudilonga ku misoso yiyi anga tangelayu we akwenu. Xinganeka o kisangusangu kiwanda kala nakyu mu kuzwela ni akwenu yalungu ni maka!—Lom. 1:11, 12.

18. Ihi itwandamona mu milongi yakayela?

¹⁸ Kudisukilu dya ukunji we mu ixi, Jezú wabhange o madiwanu akatatu ni asukinaku alungu ni difukunukinu osoneke mu Bibidya. Mu kithangana kiki mwene wafukununa kamba dyê dya kazola, o ima yabhiti mu difukunukinu didi, ki yadifu mu mawufukunukinu amukwa abhangele. Ihi itutena kudilonga ku difukunukinu didi? Ni kyebhi kitutena kukolesa o kixikanu kyetu ku kidyelelu kya difukunukinu? O milongi yakayela yanda zwela yalungu ni ibhwidisu yiyi.