1. Ima yebhi itwejiya ni kidi kyoso?

 ETU tumundu wa Jihova, twejiya kwila mwene watuzolo kyavulu, wamesena kwila tusanguluka. (Lom. 8:35-39) Twejiya we kwila etu tukatula mbote yavulu kyoso ki tubelesela o itumu ya Bibidya. (Iza. 48:17, 18) Maji ihi itwatokala o kubhanga se kumoneka ibhidi ki twayifikile?

2. Ibhidi yebhi itutena kudibhana nayu, ni ibhwidisu yebhi nange itutena kudibhanga?

² O jiselevende joso ja Jihova ene mudibhana ni ibhidi. Mu kifika, muthu watokala ku mwiji wetu utena kutuluwalesa. Mba phe nange twala ni uhaxi wabhonzo utufidisa kubhanga yoso itwamesenene mu sidivisu ya Jihova, tutena kudibhana ni divwa, mba atuzukutisa mukonda dya kixikanu kyetu. Mu kudibhana ni ibhidi yiyi, nange tutena kudibhwidisa: Mukonda dyahi kyamubhita ngo neme? O kwila ngabhange kima kyayibha? O kwila kiki kilombolola kwila, Jihova ka mu ngi besowala dingi? Nange eye wadivu kya kiki, maji kana kuluwala. Jiselevende javulu ja fiyele ja Jihova adivu we kya kiki.—Jisá. 22:1, 2; Haba. 1:2, 3.

3. Ihi itwadilongo mu Jisálamu 34:19?

³ Tanga Jisálamu 34:19. O salamu yiyi ijimbulula ima yadi yakatunda: (1) O muthu wayuka udibhana ni ibhidi. (2) Jihova utukudila mu ibhidi yetu. Maji kyebhi Jihova kyena mubhanga kiki? Ukexilu umoxi, o kutukwatekesa kukala ni ixinganeku yambote yalungu ni mwenyu wetu ku mundu yu. Jihova utukanena kwila, twanda kala ni kisangusangu kyadikota mu kumusidivila, maji kiki ki kilombolola kwila kitwanda dibhana ni ibhidi. (Iza. 66:14) Jihova ututendelesa phala kulunga o mixima yetu ku hadya mukithangana kyoso kitwanda kala ni mwenyu kya mesenene Nzambi tunde kudimatekenu, o mwenyu wakalelaku. (2 Ko. 4:16-18) Kate kibhixila o kizuwa kyenyokyo, Jihova wanda  suluka mu kutukwatekesa kumu sidivila izuwa yoso ne mwene ni ibhidi.—Kud. 3:22-24.

4. Ihi itwanda dilonga mu milongi yiyi?

⁴ Twandamona ihi itutena kudilonga ku phangu ya jiselevende ja fiyele ja Jihova mu ukulu, ni mu izuwa yetu. Twandamona kwila etwenyoso tutena kudibhana ni ibhidi ki twayifikile. Maji kyoso kitudyelela kwa Jihova, mwene utukwatekesa jinga. (Jisá. 55:22) Kyoso ki tuya ni kudilonga o misoso yiyi dibhwidise: Ihi ingeji bhanga se ngexile mudibhana ni ibhidi kala yiyi? Kyebhi o misoso yiyi ikolesa o kixikanu kyami kwa Jihova? Madisá ebhi ungitena kukumbidila ku mwenyu wami?

5. Ibhidi yebhi yadibhana nayu Jakobo mukonda dya Labanu? (Tala ofoto yakapa.)

⁵ O jiselevende ja Jihova mu ukulu adibhana ni ibhidi ka ifikile. Tala o phangu ya Jakobo. O tat’ê wamutendelesa kusota muhatu ku ana a Labanu, ndandu yâ, wexile we mubheza Jihova. Tat’ê wamutangela kwila mukubhanga kiki mwene wejitambula mabesa avulu kwa Jihova. (Dim. 28:1-4) Kyenyiki Jakobo wabelesela tat’ê. Mwene waxisa o ixi ya Kananá, yu wayi ku dibhata dya Labanu, wexile ni twana tuyadi Leya ni Lakele. Jakobo wawabhelele Lakele, o mona wandenge wa Labanu, yu waxikina kukalakela Labanu mu sambwadi dya mivu phala kukazala ni Lakele. (Dim. 29:18) Maji phe o ima ki yabhiti kala kyadibakanene. Labanu wanganala Jakobo yu wamubhangesa kukazala ni Leya, o dikota. Kupholo dyakwenda Labanu wehela Jakobo kukazala ni Lakele, maji mwene wabhingile kumukalakela dingi sambwadi dya mivu. (Dim. 29:25-27) Labanu wanganala kyavulu Jakobo mu maka alungu ni wenji, mwene wabhangesa Jakobo kumukalakela mu makwinyi ayadi a mivu!—Dim. 31:41, 42.

6. Ibhidi yebhi dingi yadibhana nayu Jakobo?

⁶ Jakobo wadibhana dingi ni ibhidi yamukwa. Mwene wexile ni mwiji wadikota, maji o an’ê kexile mudibhana kyambote mudya ithangana yoso. Ene kate mwene a sumbisa phang’yâ kala mubhika. Twana tuyadi twa Jakobo, Ximiya ni Levi, kaxidisa ngo o dijina dya mwiji, maji axidisa we o dijina dya Jihova. Kumbandu yamukwa, Lakele o muhatu amuzolele dingi kwa Jakobo, wafu kyoso kyexile muvwala o mona wakayidi. Sumbala Jakobo wakukile kya, mwene wabhingile kuxisa o mbanza mwatungile mukonda dya nzala, yu wayi mu ixi ya Ijitu.—Dim. 34:30; 35:16-19; 37:28; 45:9-11, 28.

7. Kyebhi Jihova kyalondekesa kwila wasangulukile ni ima yexile mubhanga Jakobo?

⁷ Sumbala ni ibhidi yavulu yabhitile nayu Jakobo, maji ne kiki mwene nuka watexi o kidyelelu kye kwa Jihova ni mu inanenu yê. Jihova walondekesa kwila wasangulukile ni ima yexile mubhanga Jakobo. Mu kifika, sumbala mu ithangana yavulu Labanu wanganala Jakobo, maji ne kiki Jihova wa mubesowala ni jimbote javulu. Jakobo wasangulukile kyavulu kyoso kya disange dingi ni mon’ê wakazola Zuzé, amufikile kwila, wafwile kya mivu kudima! O kyakwatekesa Jakobo kudibhana kyambote ni ibhidi yoso yiyi, o ukamba wexile nawu ni Jihova. (Dim. 30:43; 32:9, 10; 46:28-30). Se tukala we ni ukamba wambote ni Jihova, twanda tena kudibhana kyambote ni ibhidi kitwayifikile.

8. Ihi yamesenene kubhanga Sobha Davidi?

⁸ Sobha Davidi katenene kubhanga yoso ya mesenene mu sidivisu ye kwa Jihihova. Mu kifika, mwene wamesenene kyavulu kutunga tembulu phala Jihova. Yu wazwela ni polofeta Natane, yalungu ni kima kyamesenene o kubhanga. Polofeta Natane wamwambela: “Yoso  iwala nayu ku muxima wé, bhangayu kuma Nzambi wala n’eye.” (1 Mal. 17:1, 2) O izwelu yiyi ya swinisa kyavulu Davidi. Nange mwene kalaleka kyavulu phala kumateka kusokejeka o ima phala kutunga o tembulu.

9. Ihi yabhange Davidi kyoso kyatambula o njimbu ya muluwalesa?

⁹ Maji mukubhita ithangana o polofeta ya Nzambi weza ni njimbu yaluwalesa Davidi. “Mu usuku wenyó,” Jihova watangela polofeta Natane kwila, Davidi ki mwéne weji tunga o tembulu, maji muveji dyakiki o mon’ê mwene weji kibhanga. (1 Mal. 17:3, 4, 11, 12) Ihi yabhange Davidi kyoso kyevu o njimbu yiyi? Mwene walungulula o ibanzelu yê. Davidi wadibhakula mu kuphopheka kitadi ni ima yengi yeji bhindamena mon’ê Solomá, phala kubhanga o kikalakalu kya kutunga o tembulu.—1 Mal. 29:1-5.

10. Kyebhi Jihova kya besowala Davidi?

¹⁰ Mu kithangana kyoso kyatangela kwa Davidi kwila ki mwéne weji tunga o tembulu, Jihova wate kikutu ni mwene. Mwene wakanene kwila sayi muthu ku mwiji wa Davidi weji tumina katé kuhadya ni hadya. (2 Sam. 7:16) Ku mundu wa ubhe mu Utuminu ya midi ya mivu Davidi wanda sanguluka kyavulu mu kwijiya kwila, o Sabha Jezú wejila ku mwiji wê! O musoso yu utulondekesa kwila ne mwene se kitwamutena kubhanga yoso itwamesenene phala Jihova, nange o Nzambi yetu watubhakela mabesá avulu, mabesá nuka twafikile kwila tweji kwatambula.

11. Kyebhi o Jikidistá mu kithangana kya jipoxolo kya abesowala sumbala o Utuminu wa Nzambi ki weza mukithangana kyafikile? (Ikalakalu 6:7)

¹¹ Mu kithangana kya jipoxolo, o Jikidistá adibhana ni ibhidi kayifikile. Mu kifika, ene amesenene kwila o Utuminu wa Nzambi wize, maji ka kijidile se kiki kyeji bhita mu kithangana kyebhi. (Ika. 1:6, 7) Mu kiki ihi yabhange? Ene adibhakula mu kikalakalu ya kuboka. Kyoso kyayi ni kuboka o njimbu mu ididi yoso, ene amono kyebhi Jihova kyexile mubesowala o nguzu yexile mubhanga.—Tanga Ikalakalu 6:7.

12. Ihi yabhange o Jikidistá mu ukulu kyoso kyexile mubhita ni nzala yavulu?

¹² Sayi kithangana mu izuwa yenyoyo, “mu ngongo yoso,” mwexile nzala ya dikota. (Ika. 11:28) O Jikidista atungile mu izuwa yenyoyo, adibhana we ni kibhidi kiki. Xinganeka ngo o hadi yatale ene mukonda dya nzala yavulu? Se phata o atwameni amiji atandanganyele kyavulu se kyebhi kyeji dikila o miji yâ. Xinganeka o minzangala exile mubanza kusanzumuna dingi o ukunji wâ? Nange o minzangala yenyoyo exile mudibhwidisa se atokalele kukingila kate kyeji bhwa o kithangana kya nzala. Sumbala o ibhidi kiyadifwile ku muthu ni muthu, o Jikidistá mu kithangana kyonyokyo atena kusanga ukexilu wakudibhana ni maka enyo. Ene asulukile mu kuboka o njimbu yambote kate bhoso bhwatenene, ni kwila asangulukile mu kuwana o ima yakexile nayu ni jiphange jamukwa ku mbanza ya Judeya.—Ika. 11:29, 30.

13. Kyebhi o jikidistá kya a besowala mu kikithangana kya nzala?

¹³ Kyebhi o Jikidistá jojo kya a abesowala mu kithangana kya nzala? O yo abhana o imbamba ku jiphange, amono kyambote kyebhi Jihova kya akwatekesa. (Mat. 6:31-33) O ukamba wa ni jiphange jojo jexile mwabhana kikwatekesu, wexile dingi mukola. O yo asangela kitadi mba abhana ima yengi, atena kumona o kisangusangu kijila mukukwatekesa akwa. (Ika. 20:35) Jihova wabesowala enyoso mu nguzu yabhange phala kudibhana kyambote ni ithangana yoyo ya bhonzo.

14. Ihi yabhiti ni Balanabe ni Phawulu? Maji mabesá ebhi atambula? (Ikalakalu 14:21, 22)

¹⁴ Mu izuwa ya jipoxolo o Jikdistá exile mwazukutisa,  sayi bhabha mu ithangana kayifikile. Tala yabhiti ni poxolo Phawulu ni Balanabe kyoso kyexile muboka mu mbanza ya Listra. Kudimatekenu o athu atambulula kyambote, mukonda evu o ima ya atangela. Maji kupholo dyakwenda mu kizuwa kyenyokyo mwene, o jinguma “afunyisa o mundu,” kyenyiki amoxi ku athu yo evwile o njimbu abuba Phawulu ni matadi amuxisa bhwenyobho phala na fwe. (Ika. 14:19) Maji ne kiki, Phawulu ni Balanabe asuluka ni kuboka mu ididi yamukwa. Ihi yabhiti? Ene ‘abhange maxibulu avulu,’ ku mbandu yamukwa o izwelu yâ ni phangu yâ, ya swinisa o jiphange mu izuwa yenyoyo. (Tanga Ikalakalu 14:21, 22.) Phawulu ni Balanabe sumbala ni izukutisu keha o kuboka, mukonda dya kiki akwatekesa athu avulu. Kyene kimoxi we, se tukamba kubhwila mukubhanga o kikalakalu kyatubhana Jihova twanda tambula mabesá.

15. Ihi itutena kudilonga mu phangu ya phange Macmillan?

¹⁵ Ande dya muvu wa 1914, sayi ima o mundu wa Jihova wexile mukingila kwila yeji bhita. Mu kifika, tala o phangu ya phange Alexander Hugh Macmillan. Kala kyakexile mubanza athu avulu mu thembu yenyoyo, mwene wafikile kwila weji tambula kya o dibesá dyê dya kuya ku dyulu mu kithangana kyenyokyo. Mu diskulusu dyabhange mu mbeji ya Katutu wa muvu wa 1914, mwene wambe: “O didi nange dyene o diskulusu dyami dyasukina.” Mu kidi, kidyexile o diskulusu dyê dyasukina. Ithangana kupholo Macmillan wasoneka: “Amoxi mudyetu twalweza kyavulu mukuxinganeka kwila twejiya kya ku dyulu kindala.” Mwene wambe dingi: “O kima kitwatokala o kubhanga o kudibhakula mu kubhanga o kikalakalu kya ngana.” O phange Macmillan wadibhakula mu kikalakalu kiki. Wakalakala ni kuswina kwoso mu ukunji. Mwene wexile we ni ujitu wakuswinisa o jiphange a atele mu kaleya, mukonda dya kixikanu kyâ. Né mwene wakukile kya, phange Macmillan kexile mufonga mu yonge. Mbote yahi yakatula phange Macmillan mukudibhakula mu sidivisu ya Jihova, kyoso kyexile mukingila o dibesa dyakutambula o mwenyu ku dyulu? Ithangana ande dya kufwa, ku muvu wa 1966, mwene wasoneka: “Kindala o kixikanu kyami kyakolo kyavulu kala ki kyexile mu ukulu.” Yiyi phangu yambote phala etwenyoso ku ikayela, benge benge se o ibhidi yetu ki ya mubhwa mu kithangana ki twafikile!—Jih. 13:7.

16. Kibhidi kyebhi kexile mu ki kingila kyadibhana nakyu phange Herbert Jennings ni muhatu wê? (Tiyaku 4:14)

¹⁶ Jiselevende javulu ja Jihova adibhana ni ibhidi ka ifikile. Mu kifika, mu musoso wê, o phange Herbert Jennings b wa jimbulula kyebhi mwene ni muhatu wê, asangulukile kyavulu kala akunji a jixi jengi mu ixi ya Gana. Maji mukubhita kithangana o jidotolo amutangela kwila mwene wala ni uhaxi a wixana disturbio bipolar, kifwa uhaxi ubhangesa o muthu kulungulula o ukexilu wê ni lusolo. Sayi ithangana o muthu usanguluka kyavulu, uzwela we kyavulu, mu ithangana yamukwa uluwala kyavulu. Mu kutumbula o izwelu itusanga mu divulu dya Tiyaku 4:14, o phange Jennings wa jimbulula o kithangana kyokyo kya mwenyu wê kala, ‘o kizuwa kya mungu, ki twakijiya.’ (Tanga.) Mwene wasoneka: “Twaxikina o maka utwexile nawu kyenyiki twaxisa o ixi ya Gana, ni makamba metu avulu, etu twavutuka mu ixi ya Canada [phala kusaka o uhaxi].” Jihova wa kwatekesa phange Jennings ni muhatu wê, ku mu sidivila ni ufiyele woso sumbala ni uhaxi wexile mu dibhana nawu.

17. Kyebhi o phangu ya phange Jennings yakwatesa jiphange ja mukwa?

 ¹⁷ Phange Jennings wazwela ni kidi kyoso yabhiti ku mwenyu wê, o ukexilu yu wakwatekesa athu avulu. Sayi phange ya muhatu wasoneka: “Nuka ngantangele musoso wa muthu wangitula ku muxima kala yu. . . . Kyoso kingatange kwila phange Jennings, axisa o kikalakalu kya mukungi ajixi jengi, phala kusaka o uhaxi wakexile nawu, kya ngikwatekesa kutala o ibhidi yami mu ukexilu watokala.” Sayi phange ya diyala wasoneka: “Eme ngasidivila kala kafunga mu kilunga mu dikwinyi dya mivu, maji mukusuluka ngabhingile kweha o ujitu yu, mukonda dya uhaxi wa kiluji. “Eme ngexile mudivwa kala kingexile ni valolo, mukonda dya kiki o kutanga o misoso ya akwetu, mu ithangana yavulu kyexile mu ngiluwalesa. . . . Maji o kukolokota kwa phange Jennings kwangiswinisa.” Kiki kingilembalesa kwila, ne mwene se twamudibhana ni ibhidi, tutena hanji kuswinisa akwetu. Sayi ithangana o ima ku mwenyu wetu ki ibhiti kala kitwayifikile, maji ne kiki tutena kukala phangu yambote yakixikanu ni kukolokota.—1 Ph. 5:9.

18. Ihi iwadilongo ku musoso wa phangi’etu ya muhatu ku ixi ya Nigeria, kala kilondekesa ojifoto?

¹⁸ O mavuwa kala o uhaxi wa COVID-19, abhekela ibhidi ku jiphange jetu javulu. Mu kifika, sayi phange mutudi watoka ku ixi ya Nigeria, mwene kexile ni kitadi phala kusumba kudya. Sayi kizuwa mukamene, o mon’ê wa muhatu wa mwibhwidisa se ihi yeji dya izuwa kupholo kyoso kyeji zubha kulamba o kopho ya loso yasukina. O phang’etu watangela mon’ê kwila ene kexile dingi ni kitadi ne kudya, kyenyiki ene atokalele kukayela o phangu ya mutudi mukwa Seleta, mukulamba o kudya kwasukina ni kudyelela kwa Jihova ni muxima woso. (1 Jis. 17:8-16) Mu kizuwa kyenyokyo ande mwene dya ene kuzubha o kuxinganeka se ihi ejidimosala, atambula kaxa ya kudya ya tundu  ku jiphange. O kudya koko kwasokele phala ene kudiya mu semana jiyadi. O phang’etu wambe kwila mu kithangana kyenyokyo, watendela kyebhi Jihova kyexile ku mwivwa kyoso kyexile mu zwela ni mon’ê. Ihi itwadilongo ku musoso yu? Twamono kwila kyoso ki tudyelela kwa Jihova ni muxima woso, o ibhidi ki twa ifikile imoneka ku mwenyu wetu, itena kutuzukamesa dingi kwa mwene.—1 Ph. 5:6, 7.

19. Kizukutisu kyebhi kyadibhana nakyu phange Aleksey Yershov?

¹⁹ Kibhidi kya mukwa ki twa kifikile kyene mudibhana nakyu o jiphange jetu mu izuwa yiyi, o izukutisu. Mu kifika, tala yabhiti ni phange Aleksey Yershov watungu mu ixi ya Russia. Kyoso kya mubatizala ku muvu wa 1994, o jiphange exile ni ufolo mu ixi yenyoyo. Maji phe mivu kupholo o ima ku Russia yalunguluka. Ku muvu wa 2020, o axiku dya ngoji abokona mu inzo ya phange Aleksey Yershov, atokwesa o ima monzo ya ambata imbamba yavulu ya phang’etu. Mukubhita jimbeji o jinguvulu amateka kumutatela. Phala kubhonzesa dingi o maka, o ima yexile mu mutatela nayu yexile, o jividyu jabhangele o muthu walondekesa kwila wamesena kudilonga o Bibidya mu muvu umoxi ndenge. Xinganeka kyebhi kya divu phange Aleksey mukumona kwila o muthu wamesenene kudilonga o Bibidya wexile ngo mu munganala!

20. Kyebhi o phange Aleksey kya kokesa o ukamba wê ni Jihova?

²⁰ O kwila o kibhidi kya dibhana nakyu phange Yershov kyabhekela mbote? Kyene. O ukamba wê ni Jihova wakolo dingi, mwene wambe: “Muhatu wami n’eme, twene musamba kumoxi kwa Jihova ithangana yavulu,” Yu wambe dingi: “Ngejiya kwila, kingejitena kudibhana kyambote ni kibhidi kiki se o kikwatekesu kya Jihova. O kudilonga ubheka wami kwene mu ngikwatesa kutolola o ixinganeku ya kuluwala. Eme nga wabhela kyavulu ku xinganeka mu phangu ya jiselevende ja Jihova mu ukulu. Mu Bibidya mwala phangu javulu jilondekesa o mbote ijila mu kukolokota ni kudyelela kwa Jihova.”

21. Ihi itwadilongo mu milongi yiyi?

²¹ Ihi itwadilongo mu milongi yiyi? Ku mundu yu o ibhidi itena kumoneka ku mwenyu wetu mu kithangana kitwa kifikile. Jihova ithangana yoso ukwatekesa oso adyelela kwa mwene, kala kyambe o velusu ya milongi yiyi: O muthu “wayuka u mona jiphaxi javulu; maji o Jihova-phe u mu kudila mu jiphaxi jê jene joso.” (Jisá. 34:19) Muveji dya kudikwatenena mu ibhidi yetu, twatokala kudikwatenena mu kutena kwalanaku Jihova. Se tubhanga kiki twandatena kuzwela kala kyambe poxolo Phawulu: “Mu ima yoso ngala ni nguzu, mukonda dya yó u ngibhana o kutena.”—Fil. 4:13.