1-2. Ihi itwatokala o kubhanga kyoso ki tuya ni kukingila o mundu wa ubhe?

 TUSANGULUKA kyavulu mu kwijiya kwila Jihova wakanena kuma o mundu yu wayibha wanda bhwa ni kwila twanda tunga ku mundu wa ubhe. (2 Ph. 3:13) Kidi kwila etu kitwejiya se kizuwa kyahi kyanda kwiza o mundu wa ubhe, maji twala ni ima yavulu ituxikinisa kwila, ki twanda kingila dingi kyavulu.—Mat. 24:32-34, 36; Ika. 1:7.

² Kyoso ki tuya ni kukingila etu enyoso twatokala kukolesa o kixikanu kyetu, ku kikanenu kya Nzambi kyalungu ni mundu wa ubhe ne mwene se twamusidivila kya Jihova mu mivu yavulu. Maji mukonda dyahi? Mukonda ne mwene se o kixikanu kyetu kyakolo kyene kitena kuzoza. Mukidi kiki kyene kya bhangesa poxolo Phawulu kuzwela kwila, o kukamba o kixikanu kyene o “kituxi ki tulandukisa.” (Jih. 12:1) Phala o kixikanu kyetu ki kizoze, twatokala kuxinganeka ithangana yoso mu ima ituxikinisa kwila, kwakambe ngo bhofele o mundu wa ubhe wanda bhixila.—Jih. 11:1.

3. Ihi itwandamona mu milongi yiyi?

³ Mu milongi yiyi twanda mona ima itatu itutena kubhanga phala kukolesa o kixikanu kyetu mu kikanenu kya Jihova kyalungu ni mundu wa ubhe: (1) kuxinganeka mu sata yakukula, (2) kuxinganeka mu kutena kwa Jihova, ni (3) kubhakula kithangana mu ikalakalu mu nzumbi. Mukusuluka twanda mona kyebhi o njimbu yabhana Jihova kwa Habakuke ikolesa o kixikanu kyetu lelu. Maji kyadyanga twandamona kwila twatokala kukala ni kixikanu kya kolo ku kikanenu kyalungu ni mundu wa ubhe, phala tutene kudibhana kyambote ni ibhidi ya lelu.

 ITHANGANA YABHINGI KUKALA NI KIXIKANU KYAKOLO

4. Twabhingi kukala ni kixikanu kyakolo, phala kubatula maka alungu ni ihi?

⁴ Izuwa yoso etu twabhingi kusola ima ku mwenyu wetu, kwala ima yabhonzo yamukwá ya bhebhuluka. O kima ki tubhangesa kusola kyambote, o kukala ni kixikanu kyakolo. Mu kifika, Izuwa yoso etu tusola ima yalungu ni ukamba, itonokenu, kudilonga, ukaza, twana ni salu. Kima kyambote kudibhwidisa o kwila o ima ngisola ilondekesa kuma o mundu yu ki wanda nangenena, ni kwila o mundu wa ubhe wanda bhixila? Inga ngisola kubhanga o ima kala ki bhanga o athu, abanza kwila kitutena kukala ni mwenyu wakalelaku? (Mat. 6:19, 20; Luk. 12:16-21) Se tu kolesa o kixikanu kyetu kya kwila o mundu wa ubhe wa zukama kya, twanda tena kusola kyambote o ima ku mwenyu wetu.

5-6. Mukonda dyahi twatokala kukala ni kixikanu kyakolo kyoso ki twamudibhana ni ibhidi? Ta kifika.

⁵ Twabhindamena we kukala ni ixikanu kyakolo phala kudibhana kyambote ni ibhidi. Nange tutena kudibhana ni izukutisu, uhaxi ki wivu milongo, mba kibhidi kya mukwa ki tuluwalesa. Kudimatekenu nange tu banza kwila twanda tena kudibhana kyambote ni kibhidi kiki. Maji se o kibhidi kinangenena mu ithangana kala kyene mubhita mu ithangana yavulu, twanda bhinga kukala ni kixikanu kyakolo, phala kukolokota ni kusuluka kubheza Jihova ni kisangusangu.—Lom. 12:12; 1 Ph. 1:6, 7.

⁶ Kyoso ki tudibhana ni uhaxi wabhonzo kyavulu, nange tutena kumateka kuxinganeka kwila, o mundu wa ubhe wa tukanena Nzambi ki wanda bhixila. O kwila kiki lombolola kwila o kixikanu kyetu kya zoza? Kana. Xinganeka mu kifika kiki: Kyoso ki kunoka mu izuwa yavulu, nange tubanza kwila o mwanya ki wanda moneka dingi, maji mu kidi mwene wanda moneka. Kyene kimoxi we kyoso ki tuluwala kyavulu nange tudivwa kwila o mundu wa ubhe nuka wanda bhixila. Maji se tukala ni kixikanu kyakolo, ki twandakala ni phata kwila o ikanenu ya Jihova yanda dikumbidila. (Jisá. 94:3, 14, 15; Jih. 6:17-19) Se tukala ni kidyelelu kiki, o ubhezelu wetu kwa Jihova wandakala o kima kyabeta dingi kota ku mwenyu wetu.

7. Ukexilu webhi wa kuxinganeka utwatokala kulenga?

⁷ Etu twabhingi kukala ni kixikanu kya kolo phala kuboka. Phala athu avulu utwene mwabokela kya bhonza kyavulu kuxikina kwila o “njimbu yambote” yalungu ni mundu wa ubhe ya kidi mwene. (Mat. 24:14; Ize. 33:32) Etu twatokala kudilanga phala ki tukale ni phata yalungu ni ima yene mu tulonga Jihova kala kibhanga o athu enya. Phala ka tufunyise twatokala kukolesa o kixikanu kyetu ithangana yoso. Tudilonge maukexilu atatu ututena kubhanga kiki.

XINGANEKA KU SATA YAKUKULA

8-9. Mukonda dyahi o kuxinganeka mu sata yakukula kukolesa o kixikanu kyetu?

⁸ Ukexilu umoxi wa kukolesa o kixikanu kyetu, o kuxinganeka mu sata yakukula. O sata yakukula itudyelelesa kwila, Jihova wanda kumbidila o ikanenu yê yoso. O kuxinganeka se mukonda dyahi Jihova wabhana o sata yakukula, ni mu yoso yabhange phala kutubhana mon’ê, kyanda kolesa o kixikanu kyetu mu kikanenu kya Jihova kyalungu ni mwenyu wakalelaku ku mundu wa ubhe. Mukonda dyahi tutena kuzwela kiki?

⁹ Phala kutubhana o sata yakukula, Jihova wa tumikisa Moné wadyanga o Moné wa kazola, phala kumuvwala kala muthu wayuka mu ixi. Kyoso Jezú kyexile mu ixi, wa dibhanene ni ibhidi yabhonzo kyavulu. Mu kusuluka amutalesa hadi yavulu kate kyafu. Se phata o sata ya kukula kima kyakatunda kyabhange Jihova! O tata yetu ya henda keji kwehela kwila Moné kutala hadi ni kufwa phala kutubhana mwenyu  wambote mu mivu yofele ngo. (Nzw. 3:16; 1 Ph. 1:18, 19) Kuma Jihova wabhana moné wa kazola phala kutukwatekesa, mwene wanda bhanga yoso phala tukale ni mwenyu wakalelaku ku mundu wa ubhe.

XINGANEKA MU KUTENA KWA JIHOVA

10. Kala kilondekesa Efezu 3:20, Jihova wala ni kutena phala kubhanga ihi?

¹⁰ O kima kya kayadi kitena kukolesa o kixikanu kyetu o kuxinganeka mu kutena kwa Jihova. Mwene wala ni kutena phala kukumbidila o ikanenu yê yoso. Kidi kwila o kikanenu kya mwenyu wakalelaku ku mundu wa ubhe, phala o athu kibhonza kyavulu ku kixikina kwila kyanda bhita mwene. Maji Jihova mu ithangana yavulu ukanena ima katena kuyibhanga ku athu. Maji mwene utena ku ibhanga mukonda mwene o Nzambi Muteni a yoso. (Jobe 42:2; Mál. 10:27) Kyenyiki kitudiwana mu kumona kuma o Nzambi Muteni wa Yoso utukanena ima yedikala ki yandadikumbidila!—Tanga Efezu 3:20.

11. Bhana phangu ya kikanenu kya Nzambi kyadikumbidila, maji phala o athu kyedile kala ki kyeji dikumbidila. (Tala okaxa “ Ikanenu ya Nzambi Yadikumbidila.”)

¹¹ Tuzwele bhofele yalungu ni ikanenu yabhangele Nzambi ku jiselevende jê mu ukulu yedile kala ki yeji dikumbidila. Mwene wa kanene kwa Mbalahamu ni Sala kwila, eji vwala mona wa diyala sumbala a kukile kya. (Dim. 17:15-17) Mwene wa tangela we Mbalahamu kwila, wejibhana o ixi ya Kanana ku mbutu yê. O kikanenu kiki kyedile kala nuka kyeji dikumbidila, mukonda o akwa Izalayele exile o mbutu ya Mbalahamu a talele hadi kala abhika ku ixi ya Ijitu mu mivu yavulu. Maji o kikanenu kiki kyadikumbidila mwene. Mu kubhita mivu yavulu kupholo Jihova wakanena kwa muhatu amwixana Nzebele kwila wejivwala mona wa diyala, sumbala wa kukile kya. Mwene we wakanena kwa kilumba Madiya, muhatu muzeletete kwila weji vwala o Mon’a Nzambi, mu kukumbidila o kikanenu kyabhangele Jihova mu mivu kudima, mu njaludim ya Edene! (Dim. 3:15) Jihova ukumbidila yoso ya kanena.

12. O divulu dya Josuwé 23:14 ni Izaya 55:10, 11 itulonga ihi yalungu ni kutena kwa Jihova?

¹² Kyoso ki tuxinganeka kyebhi Jihova kya kumbidila o ikanenu yabhangele mu ukulu, o kixikanu kyetu mu kikanenu kya mundu wa ubhe ki kola dingi. (Tanga Josuwé 23:14; Izaya 55:10, 11.) Mu kiki twanda tena kukala dingi polondo phala kukwatekesa o athu kutendela kwila o kikanenu kyalungu ni mundu wa ubhe ki nzoji kana. O yalungu ni dyulu dya ubhe, ixi ya ubhe, Jihova wambe: “O maka yâ, afiyele, a kidi.”—Dij. 21:1, 5.

BHAKULA KITHANGANA MU IKALAKALU MU NZUMBI

13. Kyebhi o yonge itena kukolesa o kixikanu kyetu? Jimbulula.

¹³ Kima kya katatu kitena kukolesa o ixikanu kyetu, o ngastala kithangana mu ikalakalu mu nzumbi. Mu kifika, xinganeka mu mbote itwene mukatula mu yônge yetu ya kilunga. Sayi phange ya muhatu amwixana Ana, b wamusidivila mu maukexilu avulu alungu ni sidivisu ya thembu yoso mu mivu yavulu kya, wambe: “O yonge ikolesa o kixikanu kyami kala o ngoji ifikidila o ulungu. Ne mwene se o mulongexi kale ni uhete wavulu wakubhanga madiskulusu, mba ka mulonga kima kya ubhe, ne kiki ki kwene mukamba kima kingikwatekesa kutendela kyambote o Bibidya, o kiki kikolesa o kixikanu kyami.” Kumbandu yamukwa o kixikanu kyetu kikola dingi we mu kwivwa o itambwijilu ibhana o jiphange jetu mu yônge.—Lom. 1:11, 12; 10:17.

14. Kyebhi, o kikalakalu kya kuboka kikolesa o kixikanu kyetu?

¹⁴ O kikalakalu kya kuboka kyala we ni kutena  kwa kukolesa o kixikanu kyetu. (Jih. 10:23) Sayi phange ya muhatu amwixana Manda, wene musidivila kya Jihova mu 70 a mivu ndenge, wambe: “O kikalakalu kya kuboka kyene mu kolesa o kixikanu kyami ithangana yoso. Ithangana yoso, kyoso kingizwela yalungu ni ikanenu yakatunda ya Jihova, o kixikanu kyami kikola dingi.”

15. Kyebhi o kudilonga ubheka kikolesa o kixikanu kyetu? (Tala we ofoto.)

¹⁵ Kima kyamukwa kikolesa o kixikanu kyetu o kudilonga ubheka. Sayi phange ya muhatu amwixana Suza wambe kwila kyoso kya sola o kithangana kyanda dilonga ukatula dingi mbote. Mwene wambe: “Kya lumingu eme ngi pelepalala o Mulangidi wa semana ya kayela. Kya sekunda ni kya talesa ngi pelepalala o milongi ya kyônge kya kaxi ka semana. O izuwa yamukwá ku semana kyene o kithangana kyami kya kudilonga ubheka.” Mukonda dya kuxinda jimbambe ja lungu ni kudilonga ni kujikumbidila, phang’etu Suza wene mukolesa dingi o kixikanu kyê. Phang’etu yamuhatu Irene, wene musidivila ku mbonge yetu ku Estados Unidos mu mivu yavulu kya, wambe kwila o kudilonga o ikanenu ya Bibidya kwene mukolesa o kixikanu kyê. Mwene wajimbulula: “Eme ngidiwana kyavulu mukumona o ukexilu wene mu dikumbidila o ikanenu ya Jihova kate mwene mu ima yofele.” c

“NI KIDI MWENE KYA KÀ BHITA”

16. Mukonda dyahi tutena kuzwela kwila o yazwela Jihova kwa polofeta Habakuke yalungu we netu lelu? (Jihebelewu 10:36, 37)

¹⁶ Sayi jiselevende ja Jihova amukingila o dizubhilu dya mundu yu mu mivu yavulu kya. Mu ibanzelu ya athu ene atena kuxinganeka kwila, o ikanenu ya Nzambi yamulaleka kyavulu phala kudikumbidila. Maji Jihova wejiya kyambote kyebhi kidivwa o jiselevende jê, mwene kate wambe kwa polofeta Habakuke: “Mukonda kisunji kiki kya-nda kubhita bhu thembu ya tokala, ni kidi mwene kuma bhu thembu yaxindi kya  kà bhita mwene, ki ki fulu, kana; se wa mono kya laleka mu kwiza, eye-phe kinga na-kyu, kuma ni kidi mwene kya kà bhita, ki kya-nda ku kokoloka, kana.” (Haba. 2:3) O kwila Jihova wazwela o maka yâ phala kuswinisa ngo Habakuke? Inga o izwelu yiyi yatutokala we etu lelu? Ni kikwatekesu kya nzumbi ikola poxolo Phawulu wazwela kwila, o maka yâ atokala we ku Jikidistá amukingila ni hanji yoso o mundu wa ubhe. (Tanga Jihebelewu 10:36, 37.) Kyenyiki, ne mwene se tumona kwila o kikanenu kiki kyamulaleka phala kudikumbidila tutena kudyelela, ‘kuma ni kidi mwene kyanda dikumbidila, ki kyanda kokoloka, kana!’

17. Kebhi o phange’etu ya muhatu kyene mu kumbidila o kitendelesu kyabhana Jihova kwa polofeta Habakuke?

¹⁷ Jiphange javulu ene mukayela o kitendelesu kya Jihova kya kukolokota mu kukinga mu mivu yavulu kya. Mu kifika, phange Luiza, wamateka kusidivila Jihova ku muvu wa 1939. Mwene wambe: “Ngexile muxinganeka kwila o Alumajedone yeji kwiza ande dya kuzubha o xikola ya ditala dya kaxi (ensino médio). Maji ki kyene kyabhiti. Mu mivu yavulu o kima kimoxi kyene mu ngikwatekesa, o kutanga misoso mu Bibidya ya athu exile mukingila kate Jihova kya kumbidila o ikanenu Yê, kala Nowe, Mbalahamu, Zuzé ni athu akamukwa. O kukolokota mu kukingila kwene mu ngikwatekesa eme ni akwetu kudyelela kwila, o mundu wa ubhe wa zukama.” Se phata, o jiphange ene mu sidivila kya Jihova mu mivu yavulu, axikina we mu izwelu yiyi ya phange Luiza!

18. Kyebhi o kutonginina o ibhangelu kukolesa o kixikanu kyetu ku mundu wa ubhe?

¹⁸ Kidi kwila o mundu wa ubhe ki walaku luwa. Maji xinganeka mu ima yalaku kya, kala o jithéthembwa, o mixi, o yama ni athu. Seku muthu weji zwela kwila o ima yiyi ki yakidi, maji phe sayi kithangana o ima yiyi ki yexileku luwa. Yene yala bhabha mukonda Jihova mwene wa ibhange. (Dim. 1:1, 26, 27) O Nzambi yetu wakanena kubheka o mundu wa ubhe. Mwene wanda kumbidila o kikanenu kiki. Kyoso kyanda dikumbidila o kikanenu kiki, o athu anda kala ni mwenyu wakalelaku ni kuyuka kwoso. Mu kithangana kyaxindi Nzambi, o mundu wa ubhe wanda kala kima kya kidi, kala o ima yene kya mungongo.—Iza. 65:17; Dij. 21:3, 4.

19. Kyebhi ki utena kukolesa o kixikanu kyê?

¹⁹ Kyoso kituya ni kukingila o mundu wa ubhe, twatokala kubhanga yoso itutena phala kukolesa o kixikanu kyetu. Ithangana yoso tulondekesa kisakidilu mu sata ya kukula. Xinganeka mu kutena kwa Jihova. Bhakula kithangana mu ikalakalu mu nzumbi. Mu kubhanga kiki, eye wanda kala kumoxi ni “yó bhukaxi ka kixikanu kyâ, ni mwanyu wâ, atambula o ima ya akanena.”—Jih. 6:11, 12; Lom. 5:5.