1. Kyebhi Matesu kyalondekesa kwila wala ni kixikanu kyakolo ku difukunukinu?

 SAYI munzangala amwixana Matesu wala ni uhaxi wabhonzo kyavulu, mwene amubhange kya jipelasá javulu. Sayi kizuwa mwene ni mwiji wê exile mu tala o minangu ya JW Broadcasting^®. Kudisukilu dya minangu, ene atale vidyu ya mimbu a mu sangesa o jindandu, ni makamba mâ a afukununa mu palayízu. b Kyoso kyabhu o vidyu, Matesu wazukama ku jitata jê wakwata ku maku mâ yu wambe: “Papá, Mamá, mwamono, né mwene se ngi fwa, nganda vutuka ku mwenyu ku difukunukinu, kyanda bhita mwene, kingilenu ngo.” Eye utena kuxinganeka kyebhi kyadivu o jitata jiji, mukumona o kixikanu kyala nakyu o mona ku kudifukunukinu?

2-3. Mukonda dyahi kima kyambote kuxinganeka ku kidyelelu kya difukunukinu?

² O kuxinganeka kudifukunukinu kima ki twatokala kubhanga etwenyoso. (Nzw. 5:28, 29) Mukonda dyahi? Mukonda etu kitwejiya se kithangana kyebhi ki twanda kwata o uhaxi wabhonzo mba ki twanda funda muthu wa kazola. (Ndo. 9:11; Tiy. 4:13, 14) O kidyelelu kyetu ku difukunukinu kitena kubhana o nguzu itwabhindamena phala kudibhana ni ibhidi yiyi. (1 Te. 4:13) O Bibidya itudeylelesa kwila o Tata yetu ya dyulu Jihova, watwijiya kyambote, watuzolo we yavulu. (Luk. 12:7) Kuma wa twijiya kyambote, Jihova wanda tu fukununa ni ukexilu, ni idifwa, ni ima itwexilenayu ande dya kufwa. Jihova watuzolo kyavulu, mukonda dya henda yiyi, watubhana o ujitu wakukala ni mwenyu wakalelaku. Né mwene se tufwa, mwene wanda tu fukununa!

³ Mu milongi yiyi, kyadyanga twandamona se mukonda dyahi tutena kudyelela ku kikanenu kya difukunukinu. Mukusuluka twandadilonga musoso wa Bibidya ukolesa kyavulu o kixikanu kyetu. Mu musoso yu bhwene bhu tusanga o izwelu ya velusu ya  milongi yiyi, yamba: “Phang’yé wanda fukunuka.” (Nzw. 11:23) Mu kusuluka twandamona ihi itutena kubhanga phala kubandekesa o kidyelelu kyetu ku difukunukinu.

4. Phala kuxikina mu kikanenu kiki, ihi itwatokala kwijiya? Ta kifika.

⁴ Se twejiya kwila o muthu watubhange o kikanenu, wala ni hanji ya kukikumbidila yu wala ni kutena, ni uhete phala kukibhanga, twanda tena kumuxikina. Xinganeka mu kifika kiki, mu mbanza mu watungu mwabhiti kitembu kya dikota, anga o inzo yê izanganya. Bhenyobho kamba dyê wiza anga ukutangela: ‘Eme nganda kukwatekesa kutungulula o inzo yé.’ Kiki kilondekesa kwila mwene wala ni hanji yu kukukwatekesa. Se o kamba dyê mutungi wa jinzo, yu wala ni jifalamenda joso jimwabhindamena, eye wanda dyelela kwila, mwene wala ni kutena ni uhete phala kukumbidila o kikanenu kya kubhange. Kyenyiki eye uxikina mu kikanenu kya kamba dye. Abha ihi itwamba yalungu ni kikanenu kya Nzambi kyalungu ni difukunukinu? O kwila mwene wala ni hanji ni kutena phala kukikumbidila?

5-6. Mukonda dyahi tutena kuxikina kwila Jihova wala ni hanji ya kufukununa o athu afu?

⁵ O kwila Jihova wala ni hanji ya kufukununa o athu afu? Sé phata, mwene wala. Phala kulondekesa o kidi kiki, mwene wabhangesa kwila o asoneki avulu a Bibidya azwela yalungu ni kikanenu kiki. (Iza. 26:19; Hoz. 13:14; Dij. 20:11-13) Kyoso phe Jihova ubhanga kikanenu, mwene ukikumbindila. (Josu. 23:14) Mukidi, Jihova wala ni hanji yavulu ya kufukununa o athu afu. Kyebhi kitwakijiya?

⁶ Mu kifika, xinganeka mu izwelu ya Jobe. Mwene wejidile kwila kyoso kyeji fwa Jihova wejikala ni ngunzu ya mwene ni hanji ya kumubheka dingi ku mwenyu. (Jobe 14:14, 15) Jihova wala we ni ngunzu ya jiselevende jê joso jafu kya. Mwene wamesena kyavulu kwafukununa, kwabhana mwenyu, sawidi yambote, ni kusanguluka. Maji ihi itwamba yalungu ni mazunda ni mazunda a athu afu sé kukala ni kithangana yakudilonga yalungu ni Jihova? O Nzambi yetu ya henda wamesena we kwafukununa. (Ika. 24:15) Jihova wamesena kwabhana kithangana kya kukituka makamba mê, ni akale ni mwenyu wakalelaku mu ixi mumu. (Nzw. 3:16) Kyenyiki tutena kumona kwila, Jihova wala ni hanji ya kufukununa o athu afu.

7-8. Mukonda dyahi twaxikina kwila Jihova wala ni kutena kwa kufukununa o athu afu?

⁷ O kwila Jihova wala we ni kutena kwa kufukununa o athu afu? Sé phata mwene wala! Mukidi, mwene “o Muteni-a-Yoso.” (Dij. 1:8) Mwene wala ni kutena kwa kubwisa o jinguma joso, kate mwene o kalunga. (1 Ko. 15:26) O kwijiya o maka enya kutubhana nguzu ni kutululuka. Tala o phangu ya phange ya muhatu amwixana Emma Arnold. Mu kithangana kya ita yabhiti ku mundu woso, mwene ni mwiji we adibhana ni ibhidi yavulu yalola o kixikanu kyâ. Ene kate mwene afundu jindandu ni makamba avulu akazola mu kibende kya Jinazi, phala kuswinisa mon’ê wa muhatu, phange Emma wa mu tangela: “Se o kalunga katenene kubhala kala o athu katé ku hádya ni hádya, kiki kyeji lombolola kwila kene kala dingi ni kutena Nzambi ndenge, ki kyene?” Seku kima kyatundu Jihova, o Nzambi yetu muteni ayoso! Kuma mwene o mubhangi wamwenyu se phata, mwene wala we ni kutena kwa kubhana dingi o mwenyu wa yó afu kya.

⁸ Kwala dingi kima kya mukwa ki tubhangesa kuxikina kwila, Nzambi utena kufukununa o athu afu: O kilunji kyê ki kyala ni disukilu. Mu kifika, mwene wixana o jithéthembwa joso mu majina mâ. (Iza. 40:26) Mwene we ulembalala o athu afu kya. (Jobe 14:13; Luk. 20:37, 38)  Phala Jihova, ki kibhonzo kulembalala o ima yoso yalungu ni athu anda fukununa, kikale o pholo yâ, o idifwa yâ, o ima yabhiti ku mwenyu yâ, ni kulembalala o ima yejidile ande dya kufwa.

9. Mukonda dyahi eyé uxikina mu kikanenu kya Jihova kyalungu ni difukunukinu?

⁹ Tutena kudyelela ni kidi kyoso mu kikanenu kya Jihova kyalungu ni difukunukinu, mukonda twejiya kwila mwene wala ni hanji, ni kutena phala kukikumbidila. Kwala dingi kima kya mukwa ki tubhangesa kudyelela mu kikanenu kiki: Jihova wa fukunwine kya athu, mu ukulu mwene wabhanene kya o kutena ku jiselevende jê katé mwene ni kwa Jezú phala kufukununa o athu afwile. Kindala tu dilonge o musoso utusanga mu divulu dya Nzwá kibatulu 11 walungu ni difukunukinu dya bhangele Jezú.

10. Njimbu yebhi ya tambula Jezú, ni ihi yabhange mwene? (Nzwá 11:1-3)

¹⁰ Tanga Nzwá 11:1-3. Xinganeka yabhiti ku Betanya ku muvu wa 32 K.K. Jezú wexile ni makamba ambote mu mbanza yenyoyo, Lázalu ni jiphange jê ja ahatu, Málata ni Madiya. (Luk. 10:38-42). Maji Lázalu wexile mukata mukonda dya kiki o jiphange jê exile mu tandanganya. Kyenyiki atumikisa njimbu kwa Jezú wexile kumbandu ya Njolodá, kwenyóko phala kubhixila kwabhingile kwenda izuwa iyadi. (Nzw. 10:40) Maji nange Lázalu wafu mukithangana kya bhixila o njimbu kwa Jezú. Sumbala wejidile kwila kamba dyê wafu, Jezú wabhange hanji izuwa iyadi bhu kididi bhwa kexile yu wayi kiwa ku Betanya. Kyoso Jezú kya bhixila ku Betanya kwabhitile kya izuwa iwana tunde Lázalu kya fwile. Maji mukonda dyahi mwene wa kingila o kithangana kyoso kiki? Mukonda Jezú wamesenene kubhanga kima kyeji bhekela mbote ku makamba mê ni kubhana kijingu kwa Nzambi.—Nzw. 11:4, 6, 11, 17.

11. Yalungu ni ukamba ihi itutena kudilonga ku musoso wa Lázalu?

¹¹ O musoso yu utulonga we yalungu ni ukamba. Xinganeka mu maka ya: Kyoso Madiya ni Málata kya tumikisa o njimbu kwa Jezú, ene ka mubhingi phala kuya ku Betanya. Ene amwambela ngó kwila kamba dyê dya kazola wexile mu kata. (Nzw. 11:3) Kumbandu ya mukwa, Jezú wejitena kufukununa Lázalu tunde bhu kididi bhwakexile. Maji muveji dya kiki, mwene wayi ku Betanya phala kukala ni makamba mê, Madiya ni Málata. O kwila eye wala we ni dikamba dyala polondo ithangana yoso phala ku kukwatekesa né mwene se ku mubhinga? Mu kiki eye wejiya kwila utena kudyelela mu kikwatekesu kya dikamba didi mu kithangana kya “jiphaxi.” (Jisa. 17:17) Kala kyabhange Jezú, etu we tutena kukala tu makamba ambote phala akwetu! Kindala tuvutuke ku musoso wa Lázalu ni tumone ihi dingi yabhiti.

12. Ihi yakanena Jezú kwa Málata, ni mukonda dyahi mwene wejitena kudyelela ku kikanenu kiki? (Nzwá 11:23-26)

¹² Tanga Nzwá 11:23-26. Málata wevu kwila Jezú wexile mubhixila ku Betanya. Kyenyiki wayi ni kulenga phala ku disanga né, yu wambe: “Ngana, se wakexile-bhu, phang’yami hinu kafu.” (Nzw. 11:21) Mu kidi Jezú wejitena kusaka Lázalu. Maji mwene wamesenene  kubhanga kima kyakatunda dingi. Mwene wakanena: “Phang’yé wanda fukunuka.” Jezú wazwela dingi kima kya mukwa kyeji bhangesa Málata kudyelela mu kikanenu kya mubhange, mwene wambe: “Éme ngi difukunukinu ni mwenyu.” Kyene mwene, Nzambi wabhanene o kutena kwa Jezú phala kufukununa o athu. Ithangana kudima mwene wafukunwine kya athu ayadi mu maukexilu ka difwanganene: Ka kilumba wa mu fukununa mu kubhita ngó tu ithangana kyoso kyafu, ni munzangala wa diyala nange wa mu fukununa mwene mu kizuwa kyafu. (Luk. 7:11-15; 8:49-55) Maji Lázalu wabhangele kya izuwa iwana mu mbila, o mukutu wê wexile kya mubola, kyenyiki o kwila Jezú wejitena hanji kumu fukununa?

13. Kala kilondekesa o diluvulu dia Nzwá 11:32-35, kyenbhi divu Jezú? (Tala we ofoto.)

¹³ Tanga Nzwá 11:32-35. Xinganeka yabhiti mu kithangana kyenyókyo. Madiya, phange ya mukwa ya Lázalu udisanga ni Jezú, mwene anga uzwela kala kyazwela we Malata wixi,: “Ngana se eye wakexile-bhu, phang’yami hinu kafu.” Madiya ni athu amukwa ala kumoxi ni mwene, aluwala kyavulu. Kyoso kya amono amudila, Jezú uluwala ukala ni kikote ku muxima. Mukonda dya ndolo ya kumona o makamba mê aluwalele, Jezú wamateka we kudila. Mwene wejidile kyambote o ndolo ya kufunda muthu wa kazola!

14. O ukexilu wadivu Jezú mu kumona Madiya kudila utulonga ihi yalungu ni Jihova?

¹⁴ O ukexilu wadivu Jezú kyoso kyamono Madiya kudila, utulonga kwila Jihova wívwa o ndolo yetu. Kyebhi ki twakijiya? Kala kitwadilongo mu milongi yatundumu, Jezú ukayela ni kuyuka kwoso o ukexilu wa kuxinganeka, ni wa kudivwa wa Tata yê. (Nzw. 12:45) Kyenyiki kyoso ki tutanga kwila Jezú wa didi mukonda dya hadi yexile mutala o makamba mê, tutena kuxikina kwila Jihova uluwala kyavulu kyoso kya tumona kudila mukonda dya hadi. (Jisá. 56:8) O kuxinganeka mu maka yá, kutubhangesa kukala dingi ni vondadi ya kubandekesa o ukamba ni Tat’etu ya henda Jihova.

15. Kala kilondekesa o divulu dya Nzwá 11:41-44, ihi yabhiti kyoso Jezú kya bhixila bhu mbila ya Lázalu. (Tala we ofoto.)

¹⁵ Tanga Nzwá 11:41-44. Jezú wabhixila ku mbila bhwa fundile Lázalu yu wabhingi phala  kukatula o ditadi dyexile bhu mwelu. Málata wambe kwila ki kyeji kala kima kyambote kukatula o ditadi, mukonda o mukutu nange wexile mu nuha kya. Jezú wa mu vutwila: “Eme ki ngi kutangela kwila, se uxikana, wanda mona o fuma ya Nzambi?” (Nzw. 11:39, 40) Mu kusuluka Jezú watale ku dyulu, anga usamba bhu pholo dya mundu. Mwene wamesena kubhana o kijingu kyoso kwa Jihova. Bhenyobho udikola ni dizwí dya swina: “Lázalu, tunda bhu kanga!” Lázalu anga utunda mu mbila! Jezú wabhange kima kyedile kala seku muthu utena kukibhanga.—Tala o nota de estudo mu Nzwá 11:17, mu Bibidya ya phutu.

16. Kyebhi o kibatulu 11 kya divulu dya Nzwá, kikolesa o kixikanu kyetu ku difukunukinu?

¹⁶ O kibatulu 11 kya divulu dya Nzwá, kikolesa o kixikanu kyetu, ku kidyelelu kya difukunukinu. Kyebhi kyene? Xinganeka mu kikanenu kyabhange Jezú kwa Málata: “Phang’yé wanda fukunuka.” (Nzw. 11:23) Kala Tat’ê, Jezú wala we ni hanji, ni kutena kwa kukumbidila o kikanenu kiki. O kudila kwa Jezú kulondekesa kwila, mwene wamesena ni muxima woso kuzubha o kufwa ni hadi yoso yene mu tubhekela. Kumbandu yamukwa, mukithangana kyatundu Lázalu mu mbila, Jezú walondekesa kwila wala ni kutena kwa kufukununa o athu afu. Xinganeka we mu izwelu ya lembalesa Jezú kwa Málata: “Eme ki ngi kutangela kwila, se uxikana, wanda mona o fuma ya Nzambi?” (Nzw. 11:40) Etu twala ni ima yavulu phala kuxikina kwila, o kikanenu kya Nzambi kyanda dikumbidila. Maji ihi itutena kubhanga phala kubandekesa dingi o kidyelelu kyetu ku kikanenu kiki?

17. Mu ihi itwatokala kubanza kyoso ki tutanga o misoso ya Bibidya yalungu ni difukunukinu ?

¹⁷ Tanga ni u xinganeke mu misoso ya mawufukunukinu abhiti mu ukulu. Mu Bibidya tusangamu dinake dya misoso ya athu a fukunwine, phala kukala mu ixi. c Mukonda dyahi ki ukatula kithangana phala kudilonga dingi kyambote o misoso yiyi? Kyoso ki uya ni kubhanga kiki,  lembalala kwila ene exile athu a kidi mayala, a ahatu ni ana jindenge. Sota o madisá u utena kudilonga ku misoso yiyi. Xinganeka kyebhi kala musoso ulondekesa kwila, Nzambi wala ni hanji ni kutena kwa kufukununa o athu afu. Kumbandu yamukwa, katula kithangana phala kudilonga ni kuxinganeka ku difukunukinu dyabeta dingi kota, o difukunukinu dya Jezu Kidistu. Lembalala kwila, o difukunukinu didi adimono ku jihama ni jihama ja athu, dyene dikolesa o kixikanu kyetu.—1 Ko. 15:3-6, 20-22.

18. Kyebhi ki utena ku katula mbote mu mimbu yetu izwela yalungu ni difukunukinu? (Tala we kulwiji.)

¹⁸ Kala ni ukexilu wa kwimba, kwivwa, ni kuxinganeka o mimbu yetu izwela yalungu ni difukunukinu. d O “mikumbi ya kuximana Nzambi” (Efe. 5:19) O mimbu yiyi ikolesa o kixikanu kyetu ku kidyelelu kya katunda, kyenyiki o kidyelelu kyetu ku difukunukinu kyanda kola dingi. Disokejeke phala kwimba o mimbu yiyi. Eye utena kudilonga, ni kutonginina o dilombwelelu dya izwelu ya mimbu, mu ubhezelu we ku mwiji. Lunda o mimbu yiyi mu kilunji ni kumuxima wé. Kyenyiki se o mwenyu we ukala mu kilwezu, mba ufunda muthu wa kazola, o nzumbi ikola ya Jihova yanda kukwatekesa kulembalala o mimbu yiyi phala ukale dingi ni nguzu ni ku kukonda o malamba.

19. Ihi itutena kuxinganeka yalungu ni difukunukinu? (Tala okaxa: “ Ihi i Wanda Kwa Ebhwidisa?”)

¹⁹ Xinganeka. Jihova watubhana o kutena kwa kudixinganeka mu palayízu. Sayi phange ya muhatu wambe: “Eme ngabhiti ithangana yavulu mu kudixinganeka ku mundu wa ubhe, kate kyedi kala ngamukwivwa kya o dizumba dya itulu mu Palayízu.” Xinganeka kyebhi ki wanda divwa mu kudisanga ni mayala ni ahatu afiyele atumbula mu Bibidya. Nanyi uwanda mesena kudisanga né? Ibhwidisu yebhi iwanda mubhanga? Xinganeka we kyebhi ki wanda divwa kyoso ki wanda disanga ni makamba, ni jindandu jê jafu kya. Xinganeka mu ima yanda bhita mu kithangana kyokyo, o ima yadyanga iwanda zwela, kudindwakuna nawu, ni kudila mukonda dya kisangusangu ki mwandakala nakyu.

20. Ihi itwamesena kubhanga ni kuswina kwoso?

²⁰ Etu tusakidila kyavulu mukonda dya kikanenu kya difukunukinu! Tutena kudyelela kwila o kikanenu kiki, kyanda dikumbidila, mukonda Jihova wala ni hanji ni kutena phala kubhanga kiki. Mu kiki twamesena kusuluka mu kukolesa o kixikanu kyetu mu kikanenu kiki kyakatunda. Mukubhanga kiki, twanda zukama dingi kwa Jihova, o Nzambi utukanena kwila, ‘o athu Utwazolo anda fukunuka!’