1. Mukonda dyahi twene mubhana itambwijilu mu yônge?

 MUKONDA dyahi twene muya mu yônge? O kima kyadyanga kyabeta kota kitubhangesa kuya mu yônge, o kuximana Jihova. (Jisá. 26:12; 111:1) Etu twene muya we mu yônge phala kudiswinisa mudyetu mu ithangana yiyi yabhonzo mutwala. (1 Te. 5:11) Kyoso ki tuzangula o lukwaku mu yônge phala kutambwijila, twamukumbidila o ima iyadi yiyi.

2. Ithangana yebhi itwala nayu phala kutambwijila mu yônge?

² Semana joso twala ni ujitu wa kutambwijila mu yônge. Mu kifika, mu yônge ya disukilu dya semana, tutena kubhana itambwijilu mu mbandu ya Milongi ya Mulangidi. Mu yônge yakaxi ka semana tutena kubhana itambwijilu mu mbandu ya kutokwesa milongi ya Bibidya, mu mbandu ya milongi ya Bibidya mu kilunga ni mu jimbandu jamukwa.

3. Ibhidi yebhi itutena kudibhana nayu? Kyebhi o izwelu mu divulu dya Jihebelewu 10:24, 25 itukwatekesa?

³ Etwenyoso twamesena kuximana Jihova ni kuswinisa o jiphange jetu. Maji mu kithangana kya kutambwijila nange twene mudibhana ni ibhidi yiyi: Nange tukala ni hele yakutambwijila, mba twamesena kutambwijila muveji javulu maji kamutusola kala kitwamesenene. Kyebhi kitutena kudibhana ni ibhidi yiyi? O kitambwijilu tukisanga mu mukanda watumikisa poxolo Phawulu ku jiphange mu kilunga kya Jihebelewu. Mu kuzwela yalungu ni valolo ya kudyongeka, Phawulu wambe kwila ene atokalele kudikwatenena mu “kudiswinisa mudya.” (Tanga Jihebelewu 10:24, 25.) Kyenyiki kyoso ki tutendela kwila o jiphange jetu aswina mukwivwa o itambwijilu yetu ya kixikanu, ne mwene se izwelu yofele ngo tukala dingi  ni vondadi yakutambwijila. Ne mwene se katusolo muveji javulu phala kutambwijila kala kitwamesenene, tusanguluka mu kumona kwila o jiphange jetu atena kutambwijila.—1 Ph. 3:8.

4. Ima yebhi itatu itwanda dilonga mu milongi yiyi?

⁴ Mu milongi yiyi, kyadyanga twandamona kyebhi kitutena kudiswinisa mudyetu mu ilunga yofele ki mwala athu avulu phala kutambwijila. Mukusuluka twanda mona kyebhi kitutena kudiswinisa mudyetu mu ilunga yamakota mwala athu avulu phala kubhana itambwijilu. Mukusukaku twanda mona ihi itutena kubhanga phala o izwelu yetu mu kubhana itambwijilu iswinisa o jiphange jetu.

5. Kyebhi kitutena kudiswinisa mudyetu se o kilunga kyetu kyofele?

⁵ Mu ilunga yofele mba mu ibuka ki mwala athu avulu phala kubhana o itambwijilu, sayi bhabha o mwendexi wabhingi kukingila hanji tu ithangana kate ki kumoneka muthu uzangula o lukwaku phala kutambwijila. Kyenyiki o athu adivwa kala o kyônge kyamulaleka kyavulu, kiki kiluwalesa. Ihi i utena kubhanga? Zangula o lukwaku mu veji javulu phala kutambwijila. Mu kubhanga kiki wanda swinisa we akwenu phala kubhana itambwijilu.

6-7. ima yahi i utena kubhanga phala kusosolola o hele yê mu kutambwijila?

⁶ Abha se eye wene mukala ni hele yavulu mu kithangana kya kutambwijila? Avulu ene mudivwa we kiki. Maji kyebhi ki utena kusosolola o hele ya kubhana itambwijilu phala utene kuswinisa o jiphange?

⁷ Eye utena kutanga dingi o jindunge jatundu kya mu Mulangidi b mu mivu kudima. Mu kifika, o ndunge imoxi yalungu ni kudisokejeka kyambote. (Jisa. 21:5) Se wijiya kyambote o milongi ya kyônge ki kyanda kubhonza kyavulu kubhana kitambwijilu. O ndunge yamukwa yalungu ni kubhana itambwijilu mu izwelu yofele. (Jisa. 15:23; 17:27) Se ubhana kitambwijilu kyalebha o hele yanda dibandekesa, ku mbandu yamukwa o jiphange atendela dingi kyambote o kitambwijilu kyala ni izwelu yofele muveji dya kitambwijilu kyalebha kyala ni izwelu yavulu. Mu kubhana kitambwijilu kyabutu mu izwelu yê mwene, kyanda londekesa kwila eye wadisokejeka kyambote ni kwila watendela kyambote o milongi.

8. Kyebhi Jihova kyamona o nguzu itubhanga ni muxima woso?

⁸ Maji phe ihi itwamba se wafikisa kya kukayela o jindunge jiji maji ne kiki wala hanji ni hele mu kubhana itambwijilu? Ijiya kyu kwila Jihova ubhana valolo yavulu mu nguzu yoso iwene mubhanga. (Luk. 21:1-4) Jihova katubhingi kubhanga kima kyatundu o nguzu yetu. (Fil. 4:5) Kyenyiki sola mbambe i utena ku ikumbidila, samba kwa Jihova phala na kubhana muxima watululuka. Nange kudimatekenu eye utena kusola o mbambe yakubhana itambwijilu yabutu.

9. Kibhidi kyebhi kitena kumoneka mu kilunga kyadikota?

⁹ Sé mu kilunga kye mwala aboki avulu eye utena kudibhana ni kibhidi kyengi. Nange jiphange javulu aleka o maku phala kutambwijila, mukonda dya kiki kubhita ithangana yavulu se ku kusola. Mu kifika, sayi phange ya muhatu a mwixana Danyela wa wabhela kyavulu kubhana itambwijilu mu yônge. c  Phala mwene o kutambwijila kubhanga mbandu ya ubhezelu wê kwa Jihova. O ukexilu wa kuswinisa akwa, ni kwila kiki kikolesa o kixikanu kyê, ku ilongesu ya Bibidya. Maji kyoso mwene kyayi mu kilunga kyengi kyadikota, ka kexile mu musola kyavulu phala kutambwijila, sayi ithangana kate mwene wexile mubhita o kyônge kyoso se ku musola.” Mwene wambe: “Ngexile mu luwala kyavulu kyexile kala ngamudibotesa ujitu wakatunda. Kyoso ki kubhita ithangana yavulu se o mwendexi ku kusola eye umateka kudibhwidisa se mwene wa mu kibhanga mulwelu.”

10. Ihi itutena kubhanga phala kutambwijila dingi mu yônge?

¹⁰ O kwila eye wadivwile kya kala phange Danyela? Se kyene, nange eye ki umesena kubhana itambwijilu ni ukala mu kwivwidila ngo akwenu. Maji kana kubhwila mu kusota kubhana itambwijilu. Ihi i utena kubhanga? Eye utena kupelepalala itambwijilu yavulu phala o kyônge. Se ka kusolo kudimatekenu dya milongi, wanda kala hanji ni kithangana kya kubhana itambwijilu yengi. Mu kupelepalala o Milongi ya Mulangidi, xinganeka kyebhi kala kaxi ka lungu ni dyambu dya milongi. Mu kubhanga kiki eye wanda tena kubhana itambwijilu yambote kabasa mbandu ya milongi. Ku mbandu yamukwa, eye utena kudisokejeka kyambote phala kubhana itambwijilu mu jikaxi ji jimbulula milongi yazongo. Milongi yazongo sayi bhabha ibhonza kyavulu phala ku ijimbulula. (1 Ko. 2:10) Mukonda dyahi? Mukonda nange athu ofele ngó anda leka o lukwaku mu mbandu yenyiyi. Abha phe se wakayela kya o jindunge joso jiji, maji ne kiki kwa bhiti kya yônge yavulu ka kusolo phala kutambwijila? Eye utena kuzwela ni mwendexi ande dya kumateka o kyônge ni ku mulondekesa o mbandu i wamesena kutambwijila.

11. O divulu dya Filipe 2:4 dituswinisa kubhanga ihi?

¹¹ Tanga Filipe 2:4. Poxolo Phawulu waswinisa o jikidistá phala kuta kupholo o mbote ya akwa. Kyebhi kitutena kukumbidila o kitendelesu kiki mu yônge? Mu kulembalala kwila akwetu amesena we kubhana itambwijilu.

12. Mu ukexilu webhi dingi ututena kuswinisa o jiphange jetu mu yônge? (Tala we ofoto.)

¹² Kyoso ki wa mudizwelesa ni makamba  mé, o kwila eye uzwela mu kithangana kyoso se kwa ehela we kuzwela? Kana! Eye wamesena kwila ene we abhanga mbandu mu maka u mwa muzwela. Se ku kibhange ene anda divwa kwila eye ki wa mwabhana valolo. Kyene kimoxi we, mu yônge etu twamesena kwila jiphange javulu abhana itambwijilu. Mu kidi, ukexilu umoxi wabetakota wa kuswinisa o jiphange jetu, o kwabhana we o ujitu wa kulondekesa o kixikanu kyala nakyu. (1 Ko. 10:24) Twandamona kyebhi kitutena kubhanga kiki.

13. Ihi itutena kubhanga phala akwetu akale we ni kithangana kya kutambwijila?

¹³ Kima kimoxi kitutena kubhanga, o kubhana itambwijilu yofele mba ki yalebha kyavulu. Mu kubhanga kiki, akwetu anda kala we ni kithangana kya kutambwijila. O tufunga ni aboki amukwa akulu mu nzumbi, atena kubhana o phangu. Ne mwene kyoso ki ubhana itambwijilu mu izwelu yofele, bhanga yoso phala ki uzwele jipondo javulu. Se uzwela yoso yalungu ni kaxi, ki kwanda subhuka ima yavulu phala akwenu kuzwela. Mu kifika, mu kaxi kaka mu twala, atubhanamu ndunge jiyadi ja kubhana itambwijilu yofele mba yabutu, ni kubhanga yoso phala ki tuzwele o jipondo joso. Mu kiki phe, se eye adyangela ku kusola phala kutambwijila mu kaxi kaka, ihi i ubanza se utumbula ngo ndunge imoxi?

14. Ihi itena kutukwatekesa kwijiya se twanda leka o lukwaku muveji jikuxi? (Tala we ofoto.)

¹⁴ Ukala ni kutongoloka phala kwijiya se veji jikuxi jiwanda tambwijila. Se eye uleka o lukwaku muveji javulu, kiki kitena kubhangesa o mwendexi ku kusola kyavulu ne mwene se akwenu ka bhana luwa kitambwijilu. Kiki kitena kubhangesa akwenu kudivwa kyayibha ni kukamba o vondadi yakuleka dingi o lukwaku.—Ndo. 3:7

15. (a) Ihi itwatokala o kubhanga se katusolo phala kutambwijila? (b)  Kyebhi o jiphange endesa o milongi mu kyônge kyatena kulondekesa kwila asuwa o athu oso? (Tala o kaxa “ Se Eye u Mwendexi wa Milongi.”)

¹⁵ Se jiphange javulu aleka o maku phala kutambwijila, nange ki twanda tena kubhana  itambwijilu muveji javulu kala ki twamesenene. Nange o mwendexi kanda tena ku tusola ne ngo veji imoxi. Kiki kitena ku tuluwalesa, maji ki twatokala kukala ni njinda mukonda dya kukamba kutusola.—Ndo. 7:9

16. Kyebhi kitutena kuswinisa akwetu abhana itambwijilu?

¹⁶ Se ki utena kutambwijila muveji javulu kala ki wamesenene, ihi i ubanza se wivwidila kyambote o itambwijilu ya akwenu ni kwasakidila mu disukilu dya kyônge mukonda dya itambwijilu yâ? Nange o izwelu yé ya kuximana yanda swinisa kyambote o jiphange kala kyeji bhita se watambwijila. (Jisa. 10:21) O kuximana akwetu ukexilu wamukwa wa kudiswinisa mudyetu.

17. (a) Kyebhi o jitata kyatena kukwatekesa o twana twa kubhana itambwijilu yatokala kala kya fwama mu kitala kya? (b) Kala kilondekesa o vidyu, ima yebhi iwamono itwatokala kubhanga mu kupelepalala o itambwijilu? (Tala we nota.)

¹⁷ Mu mawkexilu ebhi dingi ututena kudiswinisa mudyetu mu kyônge? Se eye wala ni twana wa akwatekesa kusokejeka itambwijilu yambote kala kyafwama mu kitala kya. (Mat. 21:16) Sayi ithangana tudilonga milongi itena kubhonza bhofele phala o ana ndenge kala maka alungu ni ukaza ni milongi yamukwa yazongo, maji ne kiki, nange kutena kukala hanji kaxi imoxi mba jiyadi ki janda bhonza kyavulu phala o twana kubhana itambwijilu. Ku  mbandu yamukwa kwatekesa mon’ê kutendela kwila katokala ku kingila kwila amusola mu ithangana yoso yaleka o lukwaku. Mu kubhanga kiki kyoso o mwendexi kyanda sola athu engi phala kutambwijila muveji dya kumusola, mwene kanda thathamana.—1 Ti. 6:18. d

18. Kyebhi kitutena kudilanga phala ki tuzwele kyavulu yalungu n’etu mu kubhana itambwijilu? (Jisabhu 27:2)

¹⁸ Etu enyoso tutena kupelepalala itambwijilu yambote ibhana kijingu kwa Jihova, ni iswinisa o jiphange jetu. (Jisa. 25:11) Sayi bhabha tutena kubhana kitambwijilu kyalungu ni kima kyabhiti kumwenyu wetu, maji twatokala kudilanga phala ki tuzwele kyavulu yalungu n’etu. (Tanga Jisabhu 27:2; 2 Ko. 10:18) Muveji dya kiki, mu itambwijilu yetu twatokala kudikwatenena mu kuzwela yalungu ni Jihova, ni maka mê o Bibidya ni mundu wê. (Dij. 4:11) Mu kifika, se mu kibhwidisu kya kaxi a mu tubhinga phala kuzwela yalungu n’etu, kyene ki twanda bhanga se kibhana. Phangu imoxi yalungu ni maka enya, twanda imona mu kaxi ka kayela.

19. (a) Ihi ibhita kyoso kitusota o mbote ya athu oso mu yônge? (Loma 1:11, 12) (b) Mukonda dyahi eye wawabhela kutambwijila mu yônge?

¹⁹ Mu kidi ki kwala itumu yalungu ni kyebhi kitutena kutambwijila, maji etwenyoso twatokala kubhanga nguzu phala kubhana itambwijilu iswinisa o jiphange jetu. Tutena kubhanga kiki mu kusota kutambwijila kana ngo muveji imoxi. Ku mbandu yamukwa, kiki kyalungu ni kudivwa kyambote kabasa o itambwijilu itwatena kubhana, ni kusanguluka we kyoso akwetu kya bhana o itambwijilu ya. Kyoso kitusota o mbote yakwetu mu yônge, tutena kusanguluka “phala tu diswinise mudyetu.”—Tanga Loma 1:11, 12.