1. O palayizu mu nzumbi ihi ni nguzu yebhi i twatokala o kubhanga?

 LELU mu ixi mwala palayizu mu nzumbi, yezala ni athu a dibhakula mukubhanga ima yambote. Yene yezala ni mazunda a athu ala ni kutululuka kwa kidi. O yo ala kya mu palayizu yiyi, abhanga yoso phala katunde-mu. Ene amesena we kwila athu avulu adibunda ni ene mu kididi kiki kya katunda. Kididi kyebhi? O palayizu mu nzumbi! a

2. Sumbala ni ibhidi ya mundu yu kyebhi kyala o athu ala mu palayizu mu nzumbi?

² Mu ukexilu wa kifika, Jihova wabhange kididi mwamusidivila o jiselevende je ni kutululuka kwoso ni muxima umoxi, sumbala atungu ku mundu wayibha wa Satanaji wezala ni athu adizembe mudya. (1 Nz. 5:19; Dij. 12:12) O Nzambi yetu ya henda umona o ibhidi yene mubhekela o mundu yu ku jiselevende je, maji mwene ubhangesa o jiselevende je kudivwa kwila ala mu kididi kya kondama ni kusuluka mu kumusidivila ni kisangusangu kyoso. O Mak’a me a jimbulula o palayizu mu nzumbi kala “diswamenu” ni “díbhya dyotekele” kyambote. (Iza. 4:6; 58:11) Ni dibesá dya Jihova o yo ala mu palayizu yiyi, ala ni kisangusangu kya dikota anga adivwa we kwila ala mu kididi kya kondama mu izuwa yiyi yabhonzo isukidila-ku ya mundu yu.—Iza. 54:14; 2 Ti. 3:1.

3. Kyebhi o kikanenu mu divulu dya Izaya kibatulu 65 kya dikumbidila mu izuwa ya akwa Izalayele?

³ Bhukaxi ka Polofeta Izaya, Jihova wa jimbulula kyebhi kyeji kala o mwenyu wa athu mu palayizu mu nzumbi. Eye utena kusanga o dijimbulwilu didi, mu kibatulu kya 65 kya divulu dya Izaya. O Kibatulu kiki, kya dyanga kudikumbidila ku muvu wa 537 A.K.K. Mu kithangana kyenyokyo, o Jijudé abhuluka ku  ubhika ku Babilonya, ya avutuka ku ixi yâ. Jihova wa besowala o mundu we, yu wa akwatekesa kutunga dingi o mbanza ya Jeluzaleme ya budikile, ni kutungulula o tembulu phala isuluke mu kukala o kididi kya ubhezelu wakidi wa Jihova mu Izalayele.—Iza. 51:11; Zak. 8:3.

4. Kyebhi o kikanenu kya Izaya 65 kya mudikumbidila mu izuwa yetu?

⁴ O mbandu ya kayadi ya kikumbidilu kya kikanenu kya Izaya, yamateka ku muvu wa 1919 K.K. kyoso o abhezi a Jihova mu izuwa yetu, abhuluka ku ubhika wa Babilonya Yadikota, kifwa o kisangela kya jingeleja joso ja makutu. Mu kusuluka, o palayizu mu nzumbi yamateka mu kudisanzumuna mu ixi bhofele-bhofele. Ni kuswina kwoso, o aboki a Utuminu a sokejeka ilunga yavulu yexile mulondekesa o idifwa ya nzumbi ikola ya Nzambi. Mayala ni ahatu m’ukulu exile akwa usweya ni idifwa yabolo, alungulula o myenyu yá, mu “kuzwata o ukexilu wa ubhe, wabhange Nzambi mu vondadi yê.” (Efe. 4:24) Kidi kwila, mabesá avulu a jimbulula Izaya, anda dikumbidila ku hadya ku mundu wa ubhe. Maji né mwene kindala, etu twamukatula mbote mu maukexilu avulu, mukonda dya kukala mu palayizu mu nzumbi. Twanda mona se ihi itubhekela o palayizu mu nzumbi ni mukonda dyahi kitutokala kutunda-mu.

KYEBHI KI DIVWA O ATHU ALA MU PALAYIZU MU NZUMBI

5. Kala kyokanene mu Izaya 65:​13, ihi itwala-nayu mu palayizu mu nzumbi?

⁵ Adya kyambote mu nzumbi. O kikanenu kya polofeta Izaya, kilondekesa kyambote kwila o mwenyu wa yo ala mu palayizu mu nzumbi, kiwadifu ni wa yo kala mu palayizu mu nzumbi. (Tanga Izaya 65:13.) Jihova udikila o ibhindamu yoso mu nzumbi, ya jiselevende je. Etu twala ni nzumbi ye ikola, o maka mê o Bibidya, kudya kwavulu mu nzumbi, phala tutene ‘kudya, . . . kunwa, . . . ni kusanguluka.’ (Sokesa ni Dijingunwinu 22:17.) Maji, kikyene kimoxi ni yo kala palayizu mu nzumbi. Ene a ‘tala hadi ni nzala . . . , a kala ni dinyota. . . , anga jisonyi ja a kwata.’ Ene kejiya Nzambi. Kyenyiki, o ibhindamu yá mu xitu kene mu idikila.—Amo. 8:11.

6. O divulu dya Jowele 2:​21-24 dijimbulula ihi yalungu ni kudya mu nzumbi kutubhana Jihova, ni mbote yebhi itubhekela o kudya kuku?

⁶ Mu kikanenu kye, polofeta Jowele watumbula makudya, kala jimbundu, vinyu, ni maji a midiva, phala kulondekesa kwila Jihova utubhana yoso itwabhindamena phala kukolesa o kixikanu kyetu. Bhukaxi ka ima yiyi, mwala o kudya mu nzumbi. (Jowe. 2:21-24) Mwene ubhanga kiki bhukaxi ka Bibidya, ka madivulu metu, ka sayte yetu, ka yonge yetu mu ilunga, yonge ya ilunga ni yonge ya makota. Tutena kukatula mbote mu kudya kuku mu nzumbi izuwa yoso. Mu kubhanga kiki, tudivwa kwila twekuta, twaswina mu nzumbi.

7. Ihi ibhangesa o mixima yetu kusanguluka? (Izaya 65:14)

⁷ A sanguluka. O mundu wa Nzambi wa sanguluka kyavulu mukonda mixima yâ yezala ni kisakidilu. (Tanga Izaya 65:14.) O kidi ni ikanenu itusanga mu Mak’a Nzambi ni kidyelelu ki twala-nakyu mukonda dya sata ya kukula ya Jezú, itusangulukisa o mixima. O kuzwela yalungu ni ima yiyi ni jiphange jetu mu nzumbi, ki tubhekela kusanguluka kwa kidi!—Jisá. 34:8; 133:1-3.

8. Yebhi o idifwa iyadi yabeta-kota mu palayizu mu nzumbi?

⁸ O kukala ni muxima umoxi ni henda yala mwaxaxi ka mundu wa Jihova, yene o idifwa yabeta-kota mu palayizu mu nzumbi. O ukexilu yu, utukwatekesa kuxinganeka kyebhi kyanda kala o mwenyu ku mundu wa ubhe, kyoso o jiselevende ja Jihova, kyanda beta-kota mu kukala ni henda ni muxima umoxi. (Kol. 3:14) Sayi phange ya muhatu wazwela se ihi yamono ku Jimbangi ja Jihova, kyoso kyadisange-nawu  mu veji ya dyanga, Mwene wambe: “Eme kingejidile se kyebhi kikala o kusanguluka, né mwene ku mwiji wami. Kyoso ki ngadilungu ni Jimbangi ja Jihova, yene o veji ya dyanga ingamono o athu kudilondekesa henda ya kidi mudya.” Muthu woso-woso wamesena kusanguluka mu kidi, wabhingi kukala mu palayizu yetu mu nzumbi. Kikale se o athu ku mundu yu a banza ima yambote mba yayibha yalungu ni jiselevende ja Jihova, né kiki o jiselevende jiji, ala athu ambote bhu pholo ya Jihova ni ya yo ene mumubheza.—Iza. 65:15.

9. Yalungu ni ima itubhekela ndolo ni hadi lelu, kikanenu kyebhi ki tusanga mu divulu dya Izaya 65:​16, 17?

⁹ A ximbakata. O divulu dya Izaya 65:14 dyamba kwila, o yo a sola kukala ku kanga dya palayizu mu nzumbi, ‘a ta jingololo mukonda dya ndolo ku muxima ni kukumba mukonda dya kikote kya muxima.’ Maji-phe, ihi itwamba yalungu ni ima yoso yene mubhekela ndolo ni hadi ku mundu wa Nzambi? Mu kidi, o ima yiyi ‘anda ku ijimba kyá, ni ku jimuka-yu ku mesu ma Nzambi.’ (Tanga Izaya 65:16, 17.) Jihova wanda zubha o hadi yetu yoso, anga ku pholo dya kwenda, o ima yexile mututalesa hadi, kiyanda banda dingi ku mixima yetu.

10. Mukonda dyahi udivwa kwila dibesá dyadikota kudilunga ni jiphange jetu mu nzumbi? (Tala we ofoto.)

¹⁰ Ne mwene kindala, kyoso ki tukala mu yonge yetu, twene mutena kutululuka ni kuximbakata, mukonda mu ithangana yiyi, kitwene mudikwatenena mu ibhidi itubhekela o mundu yu wayibha. Etu we tutena kukwatekesa o jiphange jetu kukala ni kutululuka, kyoso ki tulondekesa o henda, kusanguluka, paze, kulenduka, ni kubatâma, idifwa ibhanga mbandu ku kibundu kya nzumbi ya Nzambi. (Nga. 5:22, 23) Dibesá dyadikota phala etu kukala mu kilunga kya Nzambi! O yo a kolokota mu palayizu mu nzumbi, anda mona o kikumbidilu kya kikanenu kyoso kya Nzambi, kya kubhanga “maulu ma ubhe ni ixi ya ubhe.”

11. Kala kizwela Izaya 65:​18, 19, o palayizu mu nzumbi yabhange Nzambi itubhangesa kudivwa kyebhi?

¹¹ Mixima yezala ni kisakidilu. Mu kusuluka, Izaya wajimbulula se mukonda dyahi twatokala kusanguluka ni kukemba mu palayizu mu nzumbi. Jihova mwene wabhange o palayizu yiyi mu nzumbi. (Tanga Izaya 65:18, 19.) Kyenyiki, kikima kya kudiwana mu kumona kwila Jihova bhukaxi k’etu, wamukwatekesa o athu kutunda mu isangela ya mundu yu, kiyene mulonga o kidi kyalungu ni Nzambi, ni ku akwatekesa kubokona mu palayizu yetu mu nzumbi! Etu twasanguluka ni mabesá utwala-nawu mukonda dya kubheza Jihova. Kiki ki tubhangesa kuzwela ni akwetu yalungu mabesá ya.—Jel. 31:12.

12. O kikanenu ki tusanga mu divulu dya Izaya 65:​20-24 ki kubhangesa kudivwa kyebhi, ni mukonda dyahi?

 ¹² O mixima yetu we yezala ni kisakidilu mu kidyelelu ki twala-nakyu mukonda dya ukamba wambote utwala-nawu ni Jihova. Xinganeka ngo mu ima itwanda mona ni itwanda bhanga ku mundu wa ubhe wa Nzambi! O Bibidya ikanena: “Ki mwà kala dingi mona u laya ngo izuwa yofele, mba mwadyakime u kamba kuzubha o izuwa yê.” Etu twanda ‘tunga jinzo, anga tukala-mu; twa kà dima milenga ya mivide, anga twa kà dya idima yê.’ Kitwanda “kalakala mu kingoho” mukonda twanda kala tu athu “a azediwisa kwa Jihova.” Mwene watukanena kukondama kwa kidi, ni mwenyu wambote. “Anga kya kà bhita, kwila ene kiluwa a zubha kwixana,” mwene wanda kwijiya kya ihi yabhindamena kala muthu ni kulanga o ibhindamu ya yoso.—Iza. 65:​20-24; Jisá. 145:16.

13. Ima yebhi yojimbulule mu Izaya 65:25 ilungulula o athu ku myenyu yá kyoso kyamateka kusidivila Jihova?

¹³ Ala ni kutululuka ni kukondama kwa kidi. Ni kikwateksu kya nzumbi ya Nzambi, avulu m’ukulu exile akwa usweya, indanda, mba akwa makutu, alungulula o myenyu ya. (Tanga Izaya 65:25.) Ene abhange nguzu yavulu phala kuxisa o ukexilu wâ wayibha. (Lom. 12:2; Efe. 4:​22-24) Kidi kwila, o jiselevende ja Nzambi akwa ituxi hanji, kyenyiki twanda suluka hanji mu kutondala. Maji, Jihova wene mu kwongeka “athu oso” amuzolo anga adizolo we mudya. Mukonda dya kiki, twala ni muxima umoxi ni kutululuka kwa kidi. (Tit. 2:11) Ima yoso yiyi madiwanu, Jihova ngo, o Nzambi muteni wa yoso, utena kubhanga kiki!

14. Kyebhi o divulu dya Izaya 65:25 dya dikumbidila ku mwenyu wa phange imoxi?

¹⁴ O kwila o athu atena mwene kulungulula o ukexilu wa? Xinganeka mu musoso yu. Sayi munzangala wa diyala amutele kya mu kaleya mu veji javulu, mu kitala kya 20 mwene wexile ni ukexilu wabolo, wexile we mukwa usweya. Mwene amutele mu kaleya mukonda dya kunyana makalu, kubula jinzo phala kunyana o imbamba, ni ituxi yamukwa dingi ya makota. Mwene wexile polondo phala kubhanga jimvunda kabasa kithangana. Kyoso kyevu o kidi kya Bibidya mu veji yadyanga, yu wamateka kuya mu yonge ya Jimbangi ja Jihova, mwene wamono kwila wasange kima kyakatunda ku mwenyu, kifwa o kubheza Jihova mu palayizu mu nzumbi. Tunde kyamubatizala, mwene wene muxinganeka jinga kyebhi o divulu dya Izaya 65:25 dya dikumbidila ku mwenyu we. Mwene waxisa o idifwa ya hoji, kifwa muthu mukwa usweya, yu wa kituka mbudi, kifwa muthu watululuka.

15. Mukonda dyahi twamesena kwixana akwetu phala kudibunda n’etu mu palayizu mu nzumbi, ni kyebhi ki tutena kubhanga kiki?

¹⁵ O divulu dya Izaya 65:13 dimateka ni izwelu: ‘Kala kiki, Ngana Jihova Sukeku, wixi.’ O velusu ya 25 isuka ni izwelu: “Kyene kya zwela Jihova.” Kiki kilombolola kwila, o ikanenu ye idikumbidila ithangana yoso. (Iza. 55:​10, 11) O palayizu mu nzumbi kikanenu kyadikumbila. Jihova wabhange mwiji wa abhezi kitutena ku usanga dingi kididi kyengi. Mukonda dya kubhanga mbandu ku mwiji yu, twala ni kutululuka kwavulu kindala, tudivwa we kwila twala mu kididi kya kukondama, sumbala twala hanji ku mundu yu wezala ni usweya. (Jisá. 72:7) Mukonda dya kiki, twamesena kukwatekesa athu avulu phala kubhanga mbandu ku mwiji wetu wa jiphange. Tutena kubhanga kiki, mu kudikwatenena mu kubhanga maxibulu.—Mat. 28:19, 20.

KYEBHI KI TUTENA KUKWATEKESA AKWETU KUMESENA KWIZA MU PALAYIZU MU NZUMBI

16. Ihi itena kukwatekesa o athu kumesena kwiza mu palayizu mu nzumbi?

¹⁶ Kala muthu utena kubhanga kima phala kufwamesa o palayizu mu nzumbi, phala  akwetu akale ni vondadi ya kubokona-mu. Phala kubanga kiki twatokala kukayela o phangu ya Jihova. Mwene kajijidika o athu phala kwiza mu kilunga kye. Muveji dya kiki, ni kilendu kyoso, mwene u “bheka” o athu kokwe. (Nzw. 6:44; Jel. 31:3) Kyoso o athu ala ni mixima yambote kyadilonga yalungu ni henda ya Jihova ni idifwa ye yamukwa yakatunda, ene a sola kumuzukama mu vondadi ya. Kyebhi ki tutena kukwatekesa akwetu kwiza mu palayizu mu nzumbi, bhukaxi ka idifwa yetu ni wendelu wetu wambote?

17. Kyebhi ki tutena kukwatekesa akwetu kumesena kwiza mu palayizu mu nzumbi?

¹⁷ Ukexilu umoxi wa kubhangesa akwetu kumesena kwiza mu palayizu mu nzumbi, o kutalatala o jiphange jetu ni henda ni kilendu. Kyoso o athu kyamateka kuya mu yonge yetu, twamesena kwila ene adivwa kala kyadivwile o athu nange ayile mu kyonge kya Jikidistá mu kilunga kya akwa Kolindu. Ene ambe: “Nzambi wala mwene mwaxaxi k’enu!” (1 Ko. 14:​24, 25; Zak. 8:23) Mu kiki, twatokala kusuluka mu kukayela o kitendelesu kya kukala ‘ku paze ni akwetu.’—1 Te. 5:13.

18. Ihi itena kubhangesa o athu kumesena kwiza mu kilunga kyetu?

¹⁸ Twatokala kusota jinga kutala akwetu kala kyene mu atala Jihova. Tubhanga kiki mu kudikwatenena mu idifwa ya yambote kana mu itondalu ya. Mukonda o itondalu yâ, kiyanda nangenena kate ku hadya. Tutena kubatula ni henda kabasa maka utukala-nawu ni jiphange jetu, se ithangana yoso tukala tu ‘athu abatâma, tudilendukila mudyetu, anga twenda ni kudiloloka ni muxima woso.’ (Efe. 4:32) Mu kubhanga kiki, o athu awabhela we ku atalatala ni henda, anda mesena kwiza mu palayizu mu nzumbi. b

 KANA KUTUNDA MU PALAYIZU MU NZUMBI

19. (a) Kala kyolondekese mu kaxa “ Ene a Tundu Anga Avutuka,” ihi yazwela amoxi kyoso kyavutuka mu palayizu mu nzumbi? (b) Ihi itwatokala kubhanga ni kuswina kwoso? (Tala we ofoto.)

¹⁹ Tusakidila kyavulu mukonda dya palayizu yetu mu nzumbi! Yene yafwama dingi m’ukulu ndenge, ni kwila mwala dingi abhezi avulu a Jihova m’ukulu we ndenge. Twamesena kusuluka mu kulondekesa o kisakidilu kyetu mu palayizu mu nzumbi, yatubhangela Jihova. Muthu woso-woso wamesena kukala kyambote, kusanguluka, kutululuka, ni kukala ni kukondama kwa kidi, watokala kubokona mu palayizu mu nzumbi ni kubhanga yoso phala katunde-mu. Maji twatokala kudilanga kyavulu, mukonda Satanaji wamubhanga yoso yatena phala kutunganala ni kutukatula-mu. (1 Ph. 5:8; Dij. 12:9) Kitwatokala kwehela kwila mwene uditunda kyambote. Tu bhang’yenu yoso itutena phala kulanga o kuwabha, o kuzela ni kutululuka kwa palayizu mu nzumbi.