1. Kyebhi kyadisokejekele o mundu wa Jihova mu hama ya dyanga?

 KYOSO Jihova kyabhana kikalakalu ku jiselevende jê, mwene ukingila kwila ene akibhanga sé kavwanza. (1 Ko. 14:33) Mu kifika, Nzambi wamesena kwila o njimbu yambote a iboka mu ngongo yoso. (Mat. 24:14) Jihova wate Jezú ku pholo, phala kwendesa o kikalakalu kiki. Jezú ubhanga yoso phala o kikalakalu akibhange sé kavwanza. Ku hama ya dyanga, kyoso kya sokejekele o ilunga mu ididi yavulu, a solele tufunga phala kukala ku pholo ni kwendesa o ilunga. (Ika. 14:23) Mu Jeluzaleme mwexile kibuka kya jipoxolo ni adyakime, exile tufunga. Ene exile mubatula o maka ni kubhana itendelesu ku ilunga phala ku ikayela. (Ika. 15:2; 16:4) Mukonda dya jiphange kubelesela o itendelesu yexile mu tambula, “o ilunga yakexile muswina dingi mu kixikanu, anga ikala mu dibandekesa.” —Ika. 16:5.

2. Kyebhi Jihova kyene mu kwendesa ni kubhana kudya mu nzumbi ku mundu we, tunde ku muvu wa 1919?

² Jihova wamusuluka mu kusokejeka o mundu we kate lelu. Tunde ku muvu wa 1919, bhukaxi ka kibuka kyofele kya mayala a undu, Jezú wene musokejeka o kikalakalu kya kuboka ni kubhana kudya mu nzumbi ku akayedi’ê. a (Luk. 12:42) Tutena kumona ni kidi kyoso kwila, Jihova wamubesowala o kikalakalu kya kibuka kiki.—Iza. 60:22; 65:​13, 14.

3-4. (a) Bhana phangu yalungu ni mbote itukatula mukonda dya kudisokejeka. (b) Ihi itwanda dilonga mu milongi yiyi?

 ³ Se kitwadisokejekele, kitweji tena kubhanga o kikalakalu kya tutendelesa Jezú. (Mat. 28:19, 20) Mu kifika, xinganeka ngo se ihi yeji bhita, se o jiphange kasokejekele jimbambe phala o ilunga kubokela-mu, anga kala muthu ubokela kabasa kididi kyamesena. Nange sayi jimbambe tweji boka-mu veji javulu, maji o jimbambe jamukwa, nange nuka tweji bhixila-mu. O kwila utena kuxinganeka mu maukexilu amukwa utwene mukatula mbote mukonda dya kudisokejeka?

⁴ Jezú wamusuluka mu kusokejeka o mundu wa Nzambi lelu, kala kyabhangele ni akayedi’ê kyoso kyexile mu ixi. Mu milongi yiyi, twanda zwela yalungu ni phangu ya tuxila Jezú, ni kyebhi o kilunga kyetu kyene mukayela o phangu yiyi. Twanda dilonga we kyebhi ki tutena kulondekesa kwila tubhana valolo ku kilunga kya Jihova.

O KILUNGA KYETU KIKAYELA O PHANGU YA JEZÚ

5. Ukexilu webhi umoxi wa kukayela o phangu ya Jezú? (Nzwá 8:28)

⁵ Jezú wadilongo ni Tat’e ya dyulu o ima yatokala kubhanga ni yatokala kuzwela. O kilunga kya Jihova kikayela o phangu ya Jezu, mu kusota kwijiya bhukaxi ka Bibidya, yebhi o ima itwatokala kubhanga ni ima kitwatokala ku ibhanga, ni kutubhana itendelesu yendesa o ukexilu wa mwenyu wetu. (Tanga Nzwá 8:28; 2 Ti. 3:​16, 17) Mu ithangana yoso ene mutulembalesa phala kutanga ni kukumbidila o Mak’a Nzambi. Mbote yahi itwene mu katula mu kukayela o itendelesu yiyi?

6. Ukexilu webhi umoxi wambote, wene mutukwatekesa kukatula mbote mu kudilonga o Bibidya?

⁶ Etu tukatula mbote yavulu kyoso ki tutanga o Bibidya, ni kikwatekesu kya madivulu metu. Mu kifika, etu tutena kusokesa o ima itudilonga mu Bibidya ni itendelesu itutambula bhukaxi ka kilunga. Kyoso ki tumona kwila o itendelesu itwatambula yatundu mu Bibidya, o kidyelelu kyetu ku kilunga kya Jihova, kidibandekesa dingi.—Lom. 12:2.

7. Njimbu yebhi yaboko Jezú, ni kyebhi o kilunga kya Jihova kyene mukayela o phangu ye?

⁷ Jezú waboko “o njimbu yambote ya Utuminu wa Nzambi.” (Luk. 4:​43, 44) Jezú watumina we o maxibulu mê kuboka o njimbu yalungu ni Utuminu. (Luk. 9:​1, 2; 10:​8, 9) Lelu, oso a dilunga ni kilunga kya Jihova, a boka o njimbu ya Utuminu, kabasa kididi bhwa tungila mba kabasa o maujitu ala-nawu mu kilunga.

8. Ujitu webhi utwala-nawu?

⁸ Ujitu wadikota phal’etu kutangela akwetu yalungu ni Utuminu wa Nzambi! Maji o ujitu yu ki phala muthu woso-woso kana. Mu kifika, kyoso Jezu kyexile mu ixi, kehela kwila o jinzumbi jayibha jibhana umbangi walungu ni mwene. (Luk. 4:41) Lelu, ande dya muthu kumateka kuboka ni Jimbangi ja Jihova, mwene watokala kulungulula o ukexilu wa mwenyu we, mu kubhanga o ima isangulukisa Nzambi. Etu tulondekesa kwila tubhana valolo ku ujitu wa kuboka, mu kuzwela ni athu yalungu ni Utuminu wa Nzambi, kabasa kididi ni kithangana. Kala Jezú, o mbambe yetu o kukuna ni kutekela o jimbutu ja kidi kyalungu ni Utuminu, ku mixima ya athu. —Mat. 13:​3, 23; 1 Ko. 3:6.

9. Kyebhi o kilunga kyene mu kwijidisa o dijina dya Nzambi?

⁹ Jezú wejidisa o dijina dya Nzambi. Mu kusamba kwa Tata yê ya dyulu, Jezú wambe: “Eme nga ejidisa o dijina dyé.” (Nzw. 17:26) O kilunga kya Jihova kikayela o phangu ya Jezú, mu kubhanga yoso yatena phala kukwatekesa o athu kwijiya o dijina dya Nzambi. O Bibidya Tradução do Novo Mundo da Bíblia Sagrada, yene mu kwatekesa kyavulu o kilunga kya Jihova mu kikalakalu kiki. Mukonda, yene ya vutula dingi o dijina dya Nzambi mu ididi mu dyexile  kyoso kyasoneka o Bibidya. O Bibidya yiyi, kikale mu jimbandu mba yatenena, kindala yala kya mu 270 a madimi ndenge. Mu Apêndice A4 ni A5 ya Bibidya yiyi, wanda tena kwijiya dingi se mukonda dyahi ni kyebhi kyavutukisa dingi o dijina dya Nzambi mu Bibidya. Mu Apêndice C, ya Bíblia de estudo, tusanga-mu ima yavulu ilondekesa kwila o dijina dya Nzambi, dimoneka 237 dya jiveji mu Mikanda ya Ngeleku.

10. Ihi iwadilongo ni izwelu ya muhatu watungu mu ixi ya Mianmar?

¹⁰ Kala Jezú, etu twamsena kubhanga yoso itutena phala kukwatekesa athu avulu kwijiya o dijina dya Nzambi. Sayi muhatu ku ixi ya Mianmar, wexile ni 67 a mivu, kyoso kyadilongo kwila Nzambi wala ni dijina, mwene wamateka kudila, yu wambe: “Yiyi o veji ya dyanga i ngevu kwila o dijina dya Nzambi Jihova. . . . Mu ima yoso i ngadilongo kya ku mwenyu wami, kiki kyene o kima kyabeta-kota, ki wangilongo.” Kala kilondekesa o musoso yu, kyoso o muthu kyadilonga o dijina dya Nzambi, kiki kitena kulugulula o mwenyu wê!

SULUKA MU KUBHANA VALOLO KU KILUNGA KYETU

11. Kyebhi o tufunga kyatena kulondekesa kwila a bhana valolo ku kilunga kya Jihova? (Tala we ofoto.)

¹¹ Mu ukexilu webhi o tufunga alondekesa kwila a bhana valolo ku kilunga kya Nzambi? Kyoso o tufunga kyatambula itendelesu ya kilunga, ene atokala ku itanga kyambote, ni kubhanga yoso ya tena phala ku ikumbidila. Mu kifika, ene katambula ngo itendelesu yalungu ni kyebhi kyatokala kubhanga o jimbandu jâ mu yonge ni kusamba mu kilunga, maji we atambula itendelesu yalungu ni kulanga o jimbudi ja Kidistu. Kyoso o tufunga kya kumbidila o itendelesu yoso ibhana o kilunga, o jiphange joso, adivwa kwila Jihova wa azolo ni kwila wamwalanga.

12. (a) Mukonda dyahi twatokala kubelesela yo a tukala ku pholo? (Jihebelewu 13:​7, 17) (b) Mukonda dyahi twatokala kudikwatenena mu idifwa yambote ya yo a tukala ku pholo?

¹² Kyoso o tufunga kyatubhana itendelesu, twatokala ku ibelesela ni muxima woso. Mu kubhanga kiki, twanda bhebhulukisa dingi o kikalakalu kya jiphange a tukala ku pholo. O Bibidya itutendelesa kubelesela ni kutumaka yo a tukala ku pholo. (Tanga Jihebelewu 13:7, 17.) Sayi ithangana, kitena kubhonza kubhanga kiki. Mukonda dyahi? Mukonda o jiphange ala ku pholo akwa ituxi. Maji, se tudikwatenena mu idifwa yâ yayibha, muveji dya kudikwatenena mu idifwa yambote, twanda kwatekesa o jinguma jetu. Mukonda dyahi twamba kiki? O jinguma jetu amesena kutuxikinisa kwila, ki Nzambi wamukwendesa o kilunga kyetu. Kyenyiki, se tukala ni ixinganeku yayibha yalungu ni tufunga, tutena we kumateka kukala ni ixinganeku yayibha yalungu ni kilunga, mu kusuluka, kitwanda dyelela dingi mu kilunga kya Jihova. Ihi itutena kubhanga phala kwijiya ni kudituna o makutu a jinguma jetu?

KANA KWEHELA AKWENU KUKUBHANGESA KUKAMBA KUDYELELA KU KILUNGA

13. Kyebhi o jinguma ja Nzambi a sota kubhangesa o athu kuxikina kwila o kilunga kyê kyayibha?

¹³ O jinguma ja Nzambi, a sota kubhangesa kwila o ima yambote ya kilunga kya Jihova, imoneka kala yayibha. Mu kifika, etu twene mudilonga bhukaxi ka Bibidya kwila, Jihova wamesena kwila o abhezi’ê a zela mu ukexilu wa xitu, wa nzumbi ni kilunji. Mwene ututangela kwila o muthu usuluka mu kubhanga o ima yayibha, anga udituna kulungulula o ukexiliu wê, katokala kusuluka mu kilunga. (1 Ko. 5:11-13; 6:9, 10) Etu twene mubelesela o kitumu kiki kya Bibidya. Maji, mukonda dya kubelesela o kitumu kiki, o jinguma jetu azwela kwila, etu kitwazolo o athu, twene mwafundisa,  ni kwila kitudilungu ni athu adituna o ima ituxikina.

14. Nanyi wene mubheka o makutu alungu ni kilunga kya Jihova?

¹⁴ Sota kwijiya se nanyi wamubheka o makutu. Satanaji, o Dyabhu, wene mutanga makutu alungu ni kilunga kya Nzambi. Mwene “o tata ya makutu.” (Nzw. 8:44; Dim. 3:​1-5) Kyenyiki, tutena ku kingila kwila Satanaji, bhukaxi ka jinguma jetu, wanda tanga makutu alungu ni kilunga kya Jihova. Kiki kyene kyabhiti ni Jezú ni Jikidistá ja dyanga.

15. Ihi yabhange o atwameni a jingeleja kwa Jezú ni ku akayedi’ê?

¹⁵ Sumbala o Mon’a Nzambi, Jezú, wexile muthu wayuka, wabhangele madiwanu akatunda, ne kiki, Satanaji bhukaxi ka athu, wamwangele makutu avulu alungu ni Jezú. Mu kifika, o atwameni a jingeleja, atangela o athu kwila, o kutena kwa Jezú kwa kukaya o madimonyo, a mubhanene-ku “kwa mutwameni wa madimonyo.” (Mál. 3:22) Kyoso Jezu kyexile mumufundisa, o atwameni a jingeleja amutatela kwila mwene waxingile Nzambi, ya aswinisa o mundu phala kubhinga kwila Jezú amujibha. (Mat. 27:20) Ku pholo dya kwenda, kyoso o akayedi a Jezú kyexile muboka o njimbu yambote, o jinguma “afunyisa o athu akwa jixi jengi” phala kwazukutisa. (Ika. 14:2, 19) Mu kuzwela yalungu ni divulu dya Ikalakalu 14:2, o Mulangidi wa 1 wa Kayadi wa 1998, wajimbulula kwila, o yo exile ku mbandu ya Satanaji, aditunu o njimbu yexile muboka o Jikidistá, ya azwela ima yavulu yayibha yalungu ni ene, phala kubhangesa o athu kukamba ku abhana matwi ni kwazemba.

16. Se twivwa misoso mba jinjimbu jamakutu, ihi itwatokala kulembalala?

¹⁶ Kate lelu, Satanaji wamusuluka ni kutanga makutu. Mwene “wa mu nganala athu oso  a tungu mu ngongo.” (Dij. 12:9) Se wivwa ima yayibha yalungu ni kilunga mba yalungu ni jiphange ala ku pholo, lembalala ngo ihi yabhiti ni Jezú ni maxibulu mê, ku hama ya dyanga. Kala kya kikanene mu Bibidya, o mundu wa Jihova lelu, a mwazukutisa ni ku atalatala kyayibha. (Mat. 5:​11, 12) Se tu lembalala se nanyi wene mubheka o makutu anga tubhanga kima ni lusolo phala kudilanga, o jinjimbu mba misoso yamakutu kiyanda tunganala. Maji-phe, kyebhi ki tutene kudilanga?

17. Kyebhi ki tutena kulenga o kilwezu kya kutukwata mu misoso ya makutu? (2 Timote 1:13) (Tala we o kaxa “ Ihi itutena o kubhanga se twivwa misoso mba jihundu jamakutu.”)

¹⁷ Ditune o jihundu ja makutu. Poxolo phawulu wabhana itendelesu yambote yalungu ni ima itwatokala kubhanga se twivwa jinjimbu ja makutu. Mwene watangela Timote phala ‘atendelese athu amoxi, phala . . . kabhane mátwi ku misoso ya makutu’ ni ‘kudituna o misoso kiyalungu ni ima ikôla.’ (1 Ti. 1:​3, 4; 4:7) Xinganeka mu kifika kiki: O mon’a ndenge utena kukatula kima kyaxidi bhoxi ni kukita mu kanu, maji o mwadyakime nuka wanda xikina kubhanga kiki, mukonda wejiya kwila kitena kumubhekela uhaxi. Kyene we kimoxi, etu tudituna o misoso yamakutu mukonda twejiya se kwebhi ku yamutunda. Etu tudikwatenena ngo mu “maka mambote” ma kidi.—Tanga 2 Timote 1:13.

18. Kyebhi ki tutena kulondekesa kwila tubhana vololo ku kilunga kya Jihova?

¹⁸ Twamono ngo maukexilu atatu alungu ni ima ibhanga o kilunga kya Jihova phala kukayela o phangu ya Jezú. Kyoso ki uya ni kudilonga o Bibidya, sota kumona se mu maukexilu ebhi dingi o kilunga kyene mukayela o phangu ya Jezú. Kwatekesa akwenu mu kilunga kye kukolesa o kidyelelu kyâ ku kilunga kya Jihova. Ku mbandu yamukwa, kolokota mu kulondekesa o kisakidilu kye, mu kusidivila Jihova ni ufiyele woso ni kudikwatenena ku kilunga kyamukwendesa Mwene phala kukumbidila o vondadi ye. (Jisá. 37:28) Tusulukyenu jinga mu kulondekesa o kisakidilu kyetu, ku ujitu wa kubhanga mbandu ya mundu ya Jihova wezala ni henda ni ufiyele.