1. Yalungu ni kuzwela ni akwa mu ukunji, kyebhi kidivwa amoxi? (Tala we ofoto.)

 KUMA tu mundu wa Jihova, twene muboka mukonda twazolo Tata yetu ya dyulu, ni kwila twamesena kukwatekesa akwetu kumwijiya. Aboki avulu awabhela kyavulu o kikalakalu kya kuboka. Maji amukwa, kyene mu abhonza kusanguluka mu kikalakalu kiki. Mukonda dyahi? Sayi amoxi akwa jisonyi, anga a banza kwila ene ki alongexi ambote. Amoxi adivwa kyayibha kuya mu jinzo ja akwa sé kwa exana. Amoxi akala ni woma wakudisanga ni athu akwa njinda. Sayi amoxi, a alongo kwila katokala kubhangesa akwa kufutuluka. Sumbala o jiphange jiji azolo kyavulu Jihova, maji kyene mu abhonza kubokela o njimbu yambote ku athu a kambe kwa ejiya. Ne kiki, ene ejiya o valolo yala-nayu o kikalakalu kiki anga aboka ithangana yoso. Sé-phata, Jihova usanguluka kyavulu ni ene!

2. Se kyene mu kubhonza kusanguluka mu ukunji, mukonda dyahi kiwatokala kuluwala?

² O kwila sayi ithangana ki kubhonza kusanguluka mu ukunji mukonda dya ima itwazwela ku dima? Se kyene, kana kuluwala. O kukamba o kudidyelela, kitena kulondekesa kwila eye u muthu walenduka, ni kwila kiwamesena kudifumanesa. Kilondekesa we kwila eye kiwamesena kuzoka ni athu.Twejiya kwila séku muthu wamesena kubhangesa akwa kukala ni njinda, benge-benge se wamusota ku abhangela mbote. O Tat’e ya dyulu wejiya kyambote o ibhidi i wamudibhana-nayu, ni kwila wamesena kukubhana o kikwatekesu ki wabhindamena. (Iza. 41:13) Mu milongi yiyi, twanda dilonga jindunge jitanu  jalungu ni ima itutena o kubhanga phala kudibhana ni ibhidi itwatumbula ku dima, ni kyebhi ki tutena kusanguluka mu ukunji.

EHELA O MAK’A NZAMBI KUKUSWINISA

3. Ihi ya kwatekesele polofeta Jelemiya kubokela akwa?

³ Tunde ukulu, o njimbu ya Nzambi yexile mu swinisa o jiselevende jê kyoso kyexile mutambula ikalakalu yabhonzo phala ku ibhanga. Mu kifika, tala o phangu ya polofeta Jelemiya. Mwene wexile ni hele kyoso Jihova kyamubhana o kikalakalu kya kuboka. Jelemiya wambe: “Eme ki ngi’jiya kuzwela; mbata ngala ngi mona-ndenge.” (Jel. 1:6) Ihi yamukwatekesa kukala ni kuswina phala kuboka? O izwelu ya Jihova yamubhana nguzu. Mwene wambe: “O maka mé mu muxima wami, medi kala túbhya, twa wama, tu’ojikile mu ifuba yami; nga bhwila ni kutala hadi.” (Jel. 20:​8, 9) Sumbala Jelemiya wexile muboka mu mbambe yabhonzele, maji o njimbu yamutumine o kutula, yamubhanene o nguzu yabhindamene phala kubhanga o kikalakalu.

4. Ihi ibhita kyoso ki tutanga o Mak’a Nzambi ni ku axinganeka? (Kolose 1:9, 10)

⁴ O izwelu ya Jihova itusanga mu Bibidya, yene mubhana nguzu ku jiselevende je. Kyoso poxolo Phawulu kyasonekena o kilunga kya akwa Kolose, mwene wambe kwila o kudilonga dingi yalungu ni Jihova, kweji kwatekesa o jiphange kusuluka mu “kwima ibundu mu ikalakalu yoso yambote” ni ‘kwenda kala kya mesena Jihova.’ (Tanga Kolose 1:9, 10.) O ikalakalu yambote yatumbula Phawulu, yalungu ni kuboka o njimbu yambote. Kyoso ki tutanga o Mak’a Nzambi ni kuxinganeka mu ima i tutanga, o kixikanu kyetu kwa Jihova kikola dingi, anga tutendela dingi kyambote o valolo yala-nayu o kikalakalu kya kuboka o njimbu ya Utuminu.

5. Kyebhi ki tutena kukatula dingi mbote mu kutanga ni kudilonga o Bibidya?

⁵ Phala kukatula mbote yavulu mu Mak’a Nzambi, kitwatokala kutanga, kudilonga ni kuxinganeka ni lusolo. Katula kithangana kyasoko. Se watange velusu maji kyamukubhonza ku itendela, kana ku ibhita. Muveji dya kiki, tokwesa mu Índice das Publicações da Torre de Vigia mba mu Kadivulu ka Kutokwesa Phala o Jimbangi ja Jihova, phala kusanga o dilombolwelu dyalungu ni velusu. Se ukatula kithangana kyasoko kyoso ki udilonga, wanda xikina ni kidi-kyoso kwila, o izwela o Bibidya ya kidi mwene. (1 Te. 5:21) Kyoso o kixikanu kye mu Mak’a Nzambi kidibandekesa, o  vondadi ye yakutangela akwenu o ima i wadilongo, yanda dibandekesa we.

DIPELEPALALE KYAMBOTE PHALA KUBOKA

6. Mukonda dyahi twatokala kudipelepalala kyambote phala kuboka?

⁶ Se udipelepalala kyambote phala kuboka, kiwanda kala ni hele yavulu phala kuzwela ni athu. Ande dya kutumikisa o maxibulu me phala kuboka, Jezú wa akwatekesa kudipelepalala. (Luk. 10:​1-11) Mukonda dya kukumbidila o ima ya alongo Jezú, ene atena kubhanga ima yavulu yambote, ya a sangulukile kyavulu.—Luk. 10:17.

7. Kyebhi ki tutena kudipelepalala phala kuboka? (Tala we ofoto.)

⁷ Kyebhi ki tutena kudipelepalala phala kuboka? Etu twatokala kuxinganeka mu ima itwandala kuzwela, ni kubhanga kiki kala ki twene muzwela mu kizuwa ni kizuwa, mu ukexilu wa bhebhuluka. Kima kyambote kubanza mu ibhwidisu yene mubhanga kyavulu o athu mu mbambe yetu, ni kuxinganeka kyebhi ki tutena ku atambwijila. Bhenyobho, mu kuzwela ni athu tutena kubhanga nguzu phala kutululuka, kwolela, ni kuzwela kala tu makamba.

8. Mu ukexilu webhi o Jikidistá adifu ni itutu ya mavu yatumbula Phawulu mu kifika kyate?

⁸ Poxolo Phawulu watangela o jiphange, wixi: “Etu twala ni ujitu yú mu itutu ya mavu.” (2 Ko. 4:7) O ujitu yu ihi? O kikalakalu kibhulula o myenyu kya kuboka o njimbu ya Utuminu. (2 Ko. 4:1) Ihi ilombolola o itutu ya mavu? Yene ilombolola o jiselevende ja Nzambi, ene muboka o njimbu yambote ku akwa. Mu izuwa ya Phawulu, o asumbixi exile mukwambata ima ya valolo kala kudya, vinyu ni kitadi, mu itutu ya mavu. Kyene we kimoxi n’etu, Jihova watubhana njimbu yambote yala ni valolo yavulu phala ku itula. Ni kikwatekesu kya Jihova, tutena kukala ni nguzu itwabhindamena phala kuboka o njimbu ni ufiyele woso.

BHINGA KUSWINA MU MUSAMBU

9. Kyebhi ki tutena kutolola o woma wa athu? (Tala we ofoto.)

⁹ Sayi ithangana, tutena kukala ni woma wa athu mba woma wa kwila o athu kanda tuxikina. Kyebhi kitutena kutolola o kibhidi kiki? Phala kutambwijila, tu xinganeke mu phangu ya jipoxolo kyoso kya atendelesa kweha o kuboka. Muveji dya kwehela o woma ku atolola ni kweha o kuboka, ene asambe kwa  Nzambi mu kumubhinga phala ku akwatekesa, “n’a suluke kuzwela o maka mé sé wôma.” Ni lusolo-lwoso, Jihova watambwijila o musambu wâ. (Ika. 4:​18, 29, 31) Se tukala ni hele ya kuboka mukonda dya woma wa athu, twatokala we kusamba kwa Jihova phala kumubhinga kikwatekesu. Bhinga kwa Jihova phala ku kukwatekesa kukolesa o henda yé ku athu, phala ki ukale ni woma wa ku atudila o njimbu yambote.

10. Kyebhi Jihova kyatukwatekesa kuditunda kyambote kala tu Jimbangi jê? (Izaya 43:10-12)

¹⁰ Jihova watusolo kala tu Jimbangi jê, yu watukanena kwila wanda tukwatekesa kukala ni kuswina. (Tanga Izaya 43:​10-12.) Tumone ngo maukexilu awana a Jihova kutubhana o kuswina. Kya dyanga, Jezú wala n’etu kabasa kididi kutubokela o njimbu yambote. (Mat. 28:​18-20) Kya kayadi, Jihova wasolo o Jianju phala kutukwatekesa. (Dij. 14:6) Kya katatu, Jihova utubhana o nzumbi ye ikola phala kutukwatekesa kulembalala o ima itwadilongo. (Nzw. 14:​25, 26) Kya kawana, Jihova watubhana jiphange phala kwenda n’etu mu kikalakalu kiki. Ni Jihova ku mbandu yetu ni kikwatekesu kya jiphange jetu ja kazola, twala ni ima yoso itwabhindamena phala kukala ni kuswina ni kusuluka mu kuboka.

KALA NI IXINGANEKU YAMBOTE, SOTA MAUKEXILU ENGI A KUZWELA NI ATHU

11. Mu kuboka, kyebhi ki tutena kusanga dingi athu? (Tala we ofoto.)

¹¹ O kwila eye uluwala se kiwamusanga athu avulu ku mabhata? Se kyene, utena kudibhwidisa: ‘Kwebhi kwala o athu a mbambe yami mu kithangana kiki?’ (Ika. 16:13) ‘O kwila ala ku salu mba mu itanda?’ Se kyene, o kwila utena kusanga dingi athu mu kubhana umbangi mu ikoka? Sayi phange ya diyala amwixana Joshua, wambe: “Eme ngasange dingi athu phala ku abokela, mu kwenda mu itanda ni mu ididi yamukwa mubhita athu avulu.” Mwene ni muhatu we, Bridget, ene we mutena kuzwela dingi ni athu avulu, kyoso kyaxinda mu mawusuku ni mu Malumingu mu ngoloxi, mukonda yene o ithangana yala kumabhata.—Efe. 5:​15, 16.

12. Kyebhi ki utena kwijiya se ihi ixikina o athu mba ihi ya athandanganyesa?

¹² Se o athu kamuwabhela o njimbu itwamwatudila, sota kwijiya se ene axikina mu ima  yahi mba ihi ya athandanganyesa. Phange Joshua ni muhatu we Bridget, ene mubhanga o kibhwidisu kyala ku pholo dya kamukanda phala kumateka kuzwela ni athu. Mu kifika, mu kukalakala ni kamukanda Ihi i u banza ia lungu ni Bibidia? ene azwela: “Sayi athu amona o Bibidya kala divulu dya Nzambi, amukwa kana. Ihi i ubanza?” Mu ithangana yavulu, kiki ki akwatekesa kumateka kuzwela ni muthu.

13. Mukonda dyahi tutena kuzwela kwila twamuditunda kyambote mu ukunji, né mwene se o athu kamutwivwa? (Jisabhu 27:11)

¹³ Etu tuditunda kyambote mu ukunji, né mwene se o athu kamubhana matwi ku njimbu itwamuboka. Mukonda dyahi? Mukonda twamubhanga o kima kyamesena Jihova ni Mon’e kokwetu—twamubhana o umbangi. (Ika. 10:42) Né mwene kyoso kitukamba kusamba muthu phala kuzwela-né mba o njimbu yetu ka mu ixikina, tutena kusanguluka mukonda twejiya kwila twamusangulukisa o Tata yetu ya dyulu.—Tanga Jisabhu 27:11.

14. Mukonda dyahi tutena kusanguluka kyoso aboki amukwa a sanga athu amesena kwivwa o njimbu yambote?

¹⁴ Kyoso aboki amukwa mu mbambe yetu, a sanga athu amesena kwivwa o njimbu yambote, etu we tutena kusanguluka. O Mulangidi wasokesa o kikalakalu kyetu ni kikalakalu kya kusota mona wajimbidila. Kyoso o mon’a ndenge kya jimbidila, athu avulu amusota mu ididi yavulu kiyadifu. Kyoso kya sanga o mona, athu oso a sanguluka, kana ngo o muthu wamusange. Kyene we kimoxi, oso mu kilunga a kwatekesa o muthu kukituka dixibulu dya Jezú. Etu twabhindamena o jiphange joso mu kilunga, phala kukwatekesa mu kubokela o athu oso mu mbambe yetu. Kyoso o dixibulu kyamateka kuya mu yonge, oso mu kilunga a sanguluka.

DIKWATENENE MU HENDA YE KWA JIHOVA NI KU AKWENU

15. Kyebhi o kukumbidila o izwelu itusanga mu divulu dya Matesu 22:​37-39, itukwatekesa kubandekesa o kusanguluka kwetu mu ukunji? (Tala we ofoto ya )

¹⁵ Tutena kubandekesa o kusanguluka kwetu mu kuboka, mu kudikwatenena mu henda yetu kwa Jihova ni ku akwetu. (Tanga Matesu 22:​37-39.) Xinganeka ngo o kusanguluka kwa Jihova, kyoso kyatumona o kuboka ni kyebhi kyanda divwa o athu, kyoso kyanda mateka kudilonga o Bibidya! Lembalala we  kwila, o yo axikina kwivwa o njimbu yetu anga a sola kusidivila Jihova, atena kukala ni mwenyu wa kalelaku.—Nzw. 6:40; 1 Ti. 4:16.

16. Kyebhi ki tutena kusanguluka mu ukunji wetu se kitwamutena kutunda kubhata mukonda dya ibhidi? Bhana phangu.

¹⁶ O kwila sayi kibhidi kyamukufidisa kutunda kubhata? Se kyene, dikwatenene mu ima i utena o kubhanga phala kulondekesa o henda ye kwa Jihova ni ku akwenu. Mu kithangana kya uhaxi wa COVID-19, phange Samuwele ni Dania, katenene kutunda kubhata. Mu kithangana kiki kyabhonzo, ene exile mubhana umbangi bhukaxi ka mutelembe, a soneka mikanda, ni alongo o Bibidya bhukaxi ka Zoom. Phange Samuwele wabhana umbangi kwa yo exile mu disange-ne mu kididi kya kusaka, kwexile muya mutambula o milongo phala o uhaxi wa Câncer. Mwene wambe: “O ibhidi itena kutuzozesa mu kilunji, mu xitu ni mu nzumbi. Twatokala kusanga kusanguluka mu sidivisu yetu kwa Jihova.” Mu kithangana kiki kyabhonzo, phange Dania wadibhale anga wabhiti mbeji jitatu bhu hama. Mu kusuluka, mwene wabhingile kwendela ku kyalu kya malola mu mbeji jisamanu. Phange Dania wambe: “Eme ngabhange yoso i ngatenene sumbala ni ibhidi yami. Ngatenene kubokela o muhatu wexile o musaki wexile mu ngikunda, ngexile muzwela ni yo exile mutubhekela o imbamba kubhata. Eme we ngaditundu kyambote mu kudizwelesa ni muhatu ukalakala mu ditenda disumbisa milongo ni imbamba yamukwa ya kusaka-nayu.” Sumbala phange Samuwele ni Dania katenene kubhanga ima yavulu kala kyexile mubhanga m’ukulu, ene abhange yoso yatenene. Mukonda dya kiki, a sangulukile.

17. Ihi utena kubhanga phala kukatula dingi mbote mu jindunge jitwadilongo mu milongi yiyi?

¹⁷ Sota kukayela o jindunge jitanu ji twadilongo mu milongi yiyi. Kala ndunge, tutena ku isokesa ni imbamba itwabhindamena phala kulamba o kudya. Se tujimba-ku kimbamba kimoxi kala o maji mba mongwa, o kudya kikwanda wabha. Maji kyoso ki tubunda o imbamba yoso, o kudya kuwabha dingi. Kyene we kimoxi, mu kukayela o jindunge joso, twanda tena kudibhana kyambote ni ixinganeku yayibha ni ibhidi, ni kukala dingi ni kusanguluka mu ukunji.