Eye Wakijidile?
Mukonda dyahi Sobha Davidi wexile ni masoladi kexile akwa Izalayele?
MWAXAXI ka masoladi a Sobha Davidi, mwexile mayala kexile akwa IzalayeIe, mu kifika, Zeleke mukwa Amone, Udiya mukwa Hiti, ni Itima o mukwa Mowabhe. a (1 Mal. 11:39, 41, 46) Ku masoladi a Davidi, kwexile we “akwa Makeleti ni akwa Mapelete ni akwa Ngate.” (2 Sam. 15:18) O athu akwa mbanza ya Ngate exile o akwa Fidixa. Atokwexi avulu a Bibidya, a banza we kwila o akwa Makeleti ni akwa Mapelete, nange ene amoxi ni akwa Fidixa.—Ize. 25:16; Josu. 13:2, 3; 1 Sam. 6:17, 18.
Mukonda dyahi Davidi wehela mayala akwa jixi jengi kukala masoladi me? Mwene wadyelele kwila ene exile jifiyele kwa mwene, o kya beta-dingi-kota, exile jifiyele kwa Jihova. Mu kifika, mu kuzwela yalungu ni akwa Makeleti ni akwa Mapelete, sayi dicionário dyalungu ni Bibidya, dyambe: “Ene a kolokota mu kukala fiyele kwa Davidi mu ithangana yabhonzele dingi ya utuminu we.” Maji kyebhi ene kyalondekesa o ufiyele wa? Kyoso “o mayala oso akwa Izalayele” kyaxisa o Sobha Davidi phala kukayela o diyala “mukwa kavwanza amwixana Seba,” o akwa Makeleti ni akwa Mapelete, akolokota ku mbandu ya Davidi, ya amukwatekesa kufidisa o kavwanza ka matekene Seba. (2 Sam. 20:1, 2, 7) Mu kithangana kyamukwa, o mona a Davidi, Adoniya, wamesene kukala sobha bhu kididi kya Solomá. Lwamukwa dingi, o akwa Makeleti ni akwa Mapelete a suluka mu kukala fiyele kwa Davidi, ya akwatekesa Solomá kukala sobha mukonda mwene o muthu amusolele kwa Jihova.—1 Jis. 1:24-27, 38, 39.
O diyala dyamukwa kexile mukwa Izalayele, walondekesele ufiyele kwa Davidi, wexile Itayi, mukwa Ngate. Itayi ni 600 a masoladi me, akwatekesa Sobha Davidi, kyoso o mon’e Abisalone kyasoto kufunyisa o mayala a Izalayele phala kumubhanga sobha, muveji dya kukala ku mbandu ya Davidi. Ku dimatekenu, Davidi wambela Itayi kwila, kuma mwene wexile mukwa ixi yengi, kabhingile kukwatekesa Davidi mu kubhânga. Maji Itayi wamutambwijila, wixi: “Kala Jihova kyene ku mwenyu, kala ngana yami u sobha kyene ku mwenyu, kabasa kididi ki uya selevende yé kwene we kwandaya, kikale phala kubhuluka, kikale phala kufwa.”—2 Sam. 15:6, 18-21.
Itayi wexile fiyele kwa Davidi, o sobha amusolele kwa Jihova
Sumbala o akwa Makeleti, akwa Mapelete, ni akwa Ngate kexile akwa Izalayele, ene exile muxila kyavulu Jihova, o Nzambi yakidi, ni Davidi kala o muthu amusolele kwa Jihova. Se-phata, Davidi wasangulukile kyavulu mu kukala ni mayala yá ku mbandu ye!
a O kijila kya Nzambi mu divulu dya Matendelelu 23:3-6 kyexile mu fidisa o akwa Amone ni akwa Mowabhe kubokona mu kilunga kya Izalayele. Maji nange o kijila kiki kyexile mulondekesa ngo kwila, o athu enya katokalele kubhanga mbandu ya mwiji wa Izalayele mba ku atalatala kala o athu avwalukila ku mwiji yu, maji kikyexile mwafidisa kudilunga mba kutunga ni mundu wa Nzambi. Tala o divulu Estudo Perspicaz das Escrituras, Volume 1 pág. 114.
